Monday, July 22, 2024

[ክቡር ሚኒስትሩ ለከተማ አስተዳደሩ እንድ ሹም በቢሮ ስልካቸው ላይ ደጋግመው ቢደውሉም ሊያገኟቸው ስላልቻሉ ወደ እጅ ስልካቸው ሞከሩ] 

  • ጤና ይስልጥልኝ ክቡር ሚኒስትር?
  • ትላንት የቢሮ ስልክዎ ላይ ብደውል ለሥራ ወጥተዋል ተባልኩ፣ ዛሬም ስደውል ለሥራ ወጥተዋል ተባልኩ።
  • ልክ ነው ክቡር ሚኒስትር ቢሮ አልገባሁም ነበር።
  • እኔ ሳላውቅ የጀመሩት ነገር አለ እንዴ?
  • እርሶ ሳያውቁ ምን እጀምራለሁ ክቡር ሚኒስትር?
  • ለሌላ ከተማ መሥራት?
  • ትላንትም ዛሬም የመስክ ጉብኝት ፕሮግራም ነበረኝ ክቡር ሚኒስትር። ለአስቸኳይ ጉዳይ ፈልገውኝ ነው?
  • ሁለት ቀን ሙሉ ጉብኝት?
  • ባለፈው የከተማውን ካቢኔ ሰብስበው የሰጡትን ማሳሰቢያ ዘነጉት እንዴ ክቡር ሚኒስትር?
  • የምን ማሳሰቢያ?
  • ብልፅግና የሚመጣው ቢሮ ቁጭ ብሎ በመዋል ወይም ቪኤይት እየነዱ በመዝናናት አይደለም፣ ፒክ አፕ እየነዱ ነው አላሉም?
  • ስለዚህ?
  • ስለዚህ ያለፉትን ሁለት ቀናት ፒክ አፕ እየነዳን ጉብኝት ላይ ነበርን።
  • ከተማ ለመጎብኘት ገዛን እንዳይሉኝ?
  • ምን?
  • ፒክ አፕ?
  • ወጪ ለመቆጠብ ብለን ከፌዴራል ተቋማት ለመዋስ ነበር ዕቅዳችን ነገር ግን
  • ግን ምን?
  • የፌዴራል ተቋማትም ለጉብኝት ሊጠቀሙባቸው እንደሚችሉ በማመን…
  • ገዛን እንዳይሉኝ?
  • ገዛን!
  • ለከተማ ጉብኝት ፒክ አፕ?
  • ብልፅግና የሚመጣው ፒክ አፕ እየነዱ ነው አላሉም እንዴ?
  • ቆይ እሱ ይቆየንና ጉብኝት ላይ ነበርን ሲሉ ሙሉ ካቢኔውን ማለትዎ ነው?
  • አዎ። ሁላችንም በመስክ ጉብኝት ላይ ነበርን።
  • ምንድነው ስትጎበኙ የነበረው?
  • ሁሉም የካቢኔ አባል የተመደቡለትን ፕሮጀክቶች በየክፍለ ከተማው እየተዘዋወረ ሲጎበኝ ነበር።
  • ይህን ያህል ሰፊ ፕሮጀክት በከተማው አለ እንዴ?
  • ሰፊ ባይሆንም፣ ፕሮጀክቶች አሉን።
  • ሁሉንም የካቢኔ አባል ለጉብኝት የሚያስወጣ?
  • በተናጠል አይደለም ለጉብኝት የወጣነው።
  • እ…?
  • ጥንድ ጥንድ ሆነን ነው።
  • የባሰ አታምጣ አሉ!
  • ምን አሉኝ ክቡር ሚኒስትር?
  • እስኪ እርስዎ የጎበኙትን ፕሮጀክት ይንገሩኝ?
  • እኔ የመረጥኩት የተጀመሩ ሜጋ ፕሮጀክቶችን ነው።
  • ፕሮጀክቶቹ ምንድናቸው?
  • እርስዎ ከካቢኔያችን ጋር በተወያዩበት ወቅት እንዲተገበሩ ያዘዟቸውን ፕሮጀክቶች ነው የጎበኘሁት።
  • ዘነጋሁት፣ ምን ነበሩ?
  • የ90 ቀን ፕሮጀክቶች፡፡
  • እህ… ታዲያ ይኼንን መቼ ነበር ያዘዝኩት?
  • እ… አዎ… አሁን ስድስተኛ ወሩን ጨርሶ ወደ ሰባተኛ ወሩን ይዟል።
  • እናንተ ግን የፕሮጀክት ስም አደረጋችሁት?
  • ምኑን?
  • በ90 ቀን ይፈጸም ያልኩትን?
  • እ… እንደዚያ ነበር እንዴ ክቡር ሚኒስትር?
  • እርስዎን ጨምሮ ከካቢኔዎ ጋር አንድ ዙር ሳያስፈልገን አይቀርም።
  • ምን?
  • ውይይት!
  • ጥሩ። ጎብኝቱን ስንጨርስ መገናኘት እንችላለን።
  • ጎብኝቱም ይወስድባችሁ ይሆን?
  • ምን?
  • 90 ቀን!

[ክቡር ሚኒስትሩ የጎርጎራ ፕሮጀክትን ጎብኝተው ከተመለሱት ወዳጃቸው የቀድሞ ሚኒስትርና አምባሳደር ጋር እየተጨዋወቱ ነው]

  • ጉብኝቱ እንዴት ነበር አምባሳደር?
  • አምባሳደር ብለህ ባትጠራኝ ደስ ይለኛል?
  • ለምን?
  • በስሜ እንድትጠራኝ ነው የምፈልገው።
  • እንደዚያማ ትክክል አይሆንም?
  • ምን ችግር አለው?
  • አገርዎትን በአምባሳደርነት ሲያገለግሉ ቆይተው?
  • ቢሆንም በስሜ እንድትጠራኝ ነው የምፈልገው ካልሆነ ግን…
  • እ… ካልሆነ ምን?
  • ካልሆነ እኔም አንተን ክቡር ሚኒስትር ብዬ አልጠራህም፡፡
  • ታዲያ ምን ብለው ሊጠሩኝ ነው?
  • የወደፊት አምባሳደር!
  • ኪኪኪኪ… ተጫዋች እኮ ነህ። ግን እንዴት ነበር?
  • ምኑ?
  • ለአምባሳደሮች የተዘጋጀው ጉብኝት?
  • እኔ ለምን እንዳስጎበኙንም አልገባኝም።
  • እንዴት?
  • ብዙዎቻችን ሚኒስትር እያለን የምናውቃቸውን ፕሮጀክቶች ነው የጎበኘነው።
  • ቢሆንም ፕሮጀክቶቹ አሁን የደረሱበትን ደረጃ መመልከቱ ችግር ያለው አልመሰለኝም። አለው እንዴ?
  • አብዛኞቻችን ፕሮጀክቶቹን እናውቃቸዋለን። በዚያ ላይ ደግሞ እኔ ብዙም አይገባኝም።
  • ምኑ?
  • የፕሮጀክቶቹ ፋይዳ፡፡
  • እንዴት እንደዚያ ይላሉ አምባሳደር?
  • ወደፊት ፋይዳ ይኖራቸው ይሆናል ነገር ግን አሁን ላይ ካለው የአገሪቱ ሕዝብ ፍላጎት አንጻር የረባ ፋይዳ ይኖራቸዋል ብዬ አላምንም።
  • እንዴት?
  • በአጭሩ ልግለጽልህ?
  • እሺ…
  • የፓርኮቹ ግንባታና በአንድ ወቅት በመላ አገሪቱ የተገነቡ የእግር ኳስ ስታዲየሞች አንድ ናቸው ወይም ለእኔ ይመሳሰሉብኛል።
  • ሁለቱን ደግሞ ምን ያመሳስላቸዋል?
  • ሁለቱም ከሚፈለጉበት ጊዜ ቀድመው መገንባታቸው።
  • አልገባኝም?
  • የእግር ኳስ ስታዲየሞች በሁሉም ክልሎች ቢገነቡም አገልግሎታቸው ግን ሌላ ሆኗል።
  • ምን ሆኗል?
  • የብሔር ብሔረሰቦች ቀን ማክበሪያ!
  • ፓርኮቹ ግን የብሔር ብሔረሰቦች ቀን ማክበሪያ አይሆኑም።
  • ብሔር ብሔረሰቦችማ ቀናቸውን ማክበሪያ ቦታ አግኝተዋል።
  • ፓርኮቹ ግን የቱሪስቶች መዳረሻ ይሆናሉ።
  • መቼ?
  • አገሪቱ ስትረጋጋ።
  • ለዚያ እኮ ነው ለዚህ ትውልድ የሚጠቅሙ ፕሮጀክቶች አይደሉም የምልህ።
  • እና ለዚህ ትውልድ የሚጠቅሙት ፕሮጀክቶች ምንድናቸው?
  • ፓርኮቹን አቆይቶ ፋብሪካዎቹን መጨረስ፡፡
  • የትኞቹን?
  • ብዙ የቆሙ ፋብሪካዎች አሉ አይደለም እንዴ?
  • እስኪ አንዱን ይንገሩኝ?
  • ስኳር ፋብሪካዎቹ!

በብዛት የተነበቡ ፅሁፎች

- Advertisment -

ትኩስ ፅሁፎች

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...

የኢትዮጵያ ንግድ ባንክ ከፍተኛ ትርፍ ቢያገኝም የውጭ ምንዛሪ ገቢው ቅናሽ ማሳየቱ ተጠቆመ

የኢትዮጵያ ንግድ ባንክ በ2016 የሒሳብ ዓመት ያሰባሰበው የውጭ ምንዛሪ...
spot_img

ተዛማጅ ፅሁፎች

[ክቡር ሚኒስትሩ የቅርብ ወዳጃቸው ከሆነች አንድ ባለሀብት የተደወለላቸውን ስልክ አንስተው በኮሪደር ልማቱ ላይ የምታቀርበውን ቅሬታ እየሰሙ ነው]

ክቡር ሚኒስትር እኔ የኮሪደር ልማቱ ላይ ተቃውሞም ሆነ ጥላቻ እንደሌለኝ የሚያውቁ ይመስለኛል? በዚህ እንኳን አትታሚም።  የእውነቴን ነው ክቡር ሚኒስትር። አውቃለሁ ስልሽ? ለኮሪደር ልማቱ አዋጡ ሲባልም ያለማመንታት አምስት ሚሊዮን...

[ክቡር ሚኒስትሩ በችግኝ ተከላ ፕሮግራም ላይ ሳይገኝ ከቀረው አንድ የተቋማቸው ባልደረባ የሆነ የተቃዋሚ ፓርቲ አባልን አስጠርተው እያናገሩ ነው]

ለምንድነው በዚህ አገራዊ ፋይዳ ባለው ፕሮግራም ላይ ያልተገኘኸው? ክቡር ሚኒስትር ህሊናዬ አልፈቀደልኝም። መቃወምና መተቸት ብቻ ውጤት የሚያመጣ መስልዎህ ከሆነ ተሳስተሃል። አልተሳሳትኩም ክቡር ሚኒስትር? ቆይ የመጀመሪያ ዓመት የችግኝ ተከላ...

[ክቡር ሚኒስትሩ ከሚያከብሯቸው አንድ የቀድሞ ጉምቱ ፖለቲከኛ ስልክ ተደውሎላቸው እያወሩ ነው]

አንዳንድ ነገሮች ቢያሳስቡኝ ነው ቀጠሮ ሳልይዝ ላነጋግርህ የፈለኩት ክቡር ሚኒስትር፡፡ እርስዎማ ቀጠሮ መያዝ አያስፈልግዎትም፣ ምን ገጠመዎት? እኔማ ምን ይገጥመኛል አንተኑ ልጠይቅህ እንጂ? ምን? እውነት ለመናገር የማየው ነገር አሳስቦኛል፡፡ ይንገሩኝ...