Wednesday, February 1, 2023
- Advertisement -
- Advertisement -
ማኅበራዊ‹‹አንድ አባወራ ለአንድ እንግዳ››

‹‹አንድ አባወራ ለአንድ እንግዳ››

ቀን:

በወርኃ ሐምሌ 1994 ዓ.ም. ነው፡፡ ከካናዳ ከመጣችው አብሮ አደግ ጓደኛዋ ጋር ዘመድ ጥየቃ ወደ ጎንደር ያቀናሉ፡፡ ጎንደር አዘዞ፡፡ በአዘዞ ዛሬ ላይ ስሙን በቅጡ በማታስታውሰው አረንጓዴ ገጠራማ አካባቢ ያቀኑት የጓደኛዋን አያት ለመጠየቅ ነበር፡፡

ከአውሮፕላን ማረፊያ የተቀበላቸው ዘመድ ከአያትየው ቤት እንዳደረሳቸው የአካባቢው ሰው ‹የልጅ ልጃቸው መጥታለች› ተብሎ ወደተነገረላቸው ‹‹እታታ ቤት›› መምጣት ጀመረ፡፡ የአካባቢው ታዳጊዎች ሁሉ መጥተው እንደነበር ታስታውሳለች፡፡

ጎንደር አዘዞን ለመጀመርያ ጊዜ በረገጠችበት ዕለት የተመለከተችው የየጎረቤቱን አቀባበል ዛሬ ድረስ አትረሳውም፡፡

ከየጎረቤቱ መጥተዋል የተባሉትን እንግዶች ለማየት የመጡ ነዋሪዎች በሙሉ ባዶ እጃቸውን አልነበሩም፡፡ ለስላሳ፣ ዳቦ፣ እንጀራና ሌሎችን ይዘው ነበር፡፡ እቅፍ እያደረጉ እንደ ልጆቻቸው አገላብጠው እየሳሙ ለአያትየው ‹እንኳን ደስ አለሽ እታታ› እያሉ ደስታቸውን ይገልጹም ነበር፡፡ ‹‹ፊታቸው ላይ የነበረው የደስታ ስሜት ዛሬም ከ20 ዓመታት በኋላ አይረሳኝም ትላለች››፡፡

ከካናዳ ለመጣችውም ሆነ አብራት ከአዲስ አበባ ለሄደችው ጓደኛዋ እንግዳን መቀበል አዲስ ባይሆንም እዚያ የተመለከቱት ግን አስደምሟቸዋል፡፡ የየአካባቢው ሰው ሁሉ እየተጠራራ በእጅ የሚቀመስ ነገር ይዞ ቤቱን ሞልቶታል፡፡ ‹‹በወጣትነት አዕምሮ የተቀረጸ ደስ የሚል የእንግዳ አቀባበል ነበር›› ስትል ሁኔታውን ታስታውሰዋለች፡፡

ይህ በጎንደር ያየችውን የእንግዳ አቀባበል በሥራ አጋጣሚ በኦሮሚያ፣ በደቡብ፣ በትግራይና በሌሎች አካባቢዎችም ስትዘዋወር መታዘቧን ነግራናለች፡፡ ‹‹ከአዲስ አበባ በወጣሁባቸው አጋጣሚዎች ሁሉ በተለይ በየገጠሩ ያለው አቀባበል ይገርመኛል፡፡ ያላቸውን እንድትቀምሽላቸው፣ ስብስብ ብለው በመቀመጥ እንድታወጊያቸው የሚፈልጉ ናቸው፤›› ትላለች፡፡

መንገድ ለጠፋው ‹‹እንግዳ ይሆናል ንገሩት/ንገሯት››፣ ማዕድ ሲቀርብ ‹‹መጀመርያ እንግዳ ይስተናገድ›› የሚሉት አባባሎችም ለብዙዎች እንግዳ አይደሉም፡፡

ጎንደርም የ2015 ዓ.ም. የከተራ፣ የጥምቀትና የቃና ዘገሊላ በዓላትን አስመልክቶ ወደ ከተማዋ የገቡ እንግዶችን አስተናግዳለች፡፡ ጥምቀት በድምቀት ከሚከበርባቸውና የቱሪስት መዳረሻ ከሆኑ ሥፍራዎች ከቀዳሚዎቹ በምትጠቀሰው ጎንደር ነዋሪው ‹‹አንድ አባወራ ለአንድ እንግዳ›› በሚል የቀረበውን ጥሪ ተቀብሎ እንግዶችን አስተናግዷል፡፡

የከተማ አስተዳደሩ የመኝታ ቦታ ላልያዙና የመኝታ ጥበት የሚያጋጥማቸው ቢኖር ‹‹አንድ አባወራ አንድ እንግዳ›› እንዲያስተናግድ በጠየቀው መሠረት በርካታ የከተማዋ ነዋሪዎች አድራሻቸውን ለከተማ አስተዳደሩ በመስጠት የተቻላቸውን ያህል እንግዶች አስተናግደዋል፡፡

መሪጌታ ደሴ መኳንንት እንግዶችን ተቀብለው ካስተናገዱ በጎ ፈቃደኞች አንዱ ናቸው፡፡ እሳቸው እንደሚሉት፣ ትርፍ አልጋ ያላችሁ፣ በቤታችሁ ማስተናገድ የምትችሉ እንግዳ ተቀበሉ ሲባል የባህል ሕክምና በሚሠሩበት ቤት እንግዳ ማስተናገድ እንደሚችሉ አምነው በበጎ ፈቃደኝነት ስልካቸውን በመስጠት እንደ ቤተሰብ እንግዶችን አስተናግደዋል፡፡

ከዚህ ቀደም ለጥምቀት እንግዳ በበጎ ፈቃድ አስተናግደው እንደማያውቁ፣ ዘንድሮ ግን አምስት ሰዎችን ማስተናገዳቸውን ነግረውናል፡፡

በጎንደር ቀዝቅዞ የቆየው ሥርዓት ዘንድሮ በተለየ በድምቀት መከበሩ፣ የሰዉም አቀባበልና የእንግዳው ሥነ ሥርዓት፣ እሳቸውም እንደ ቤተሰብ እንግዶችን አስተናግደው በመሸኘታቸው መደሰታቸውን አክለዋል፡፡

አቶ መስጠት አረጋ ሌላው እንግዳ ተቀብለው ካስተናገዱ የከተማዋ ነዋሪዎች ውስጥ ይገኙበታል፡፡ ‹‹እኛ በተቻለ መጠን አስተናግደናል›› የሚሉት አቶ መስጠት፣ ለስምንት እንግዶች አልጋ ይዘው፣ ሦስት ደግሞ በቤታቸው ከቤተሰብ ጋር ማስተናገዳቸውን ገልጸዋል፡፡

የሞባይል ሴንተርና ካፌ ባለቤት የሆኑት አቶ መስጠት፣ ለከተማ አስተዳደሩ ስልክ ሰጥተው መገኛቸው አድራሻቸው በአስተዳደሩ ማኅበራዊ ገጽ ከተለቀቀ በኋላ የደወሉላቸውን ሰዎች ከመኝታ ባለፈ ምግብም ችለው እንደሸኟቸው ነግረውናል፡፡

‹‹እንግዳ በመተዋወቄ እነሱ ሳይሆኑ እኔ ተጠቅሜያለሁ፣ በዓልን ለማክበር ቢመጡም እንኳ ስጦታ ሰጥቼ ሸኝቻለሁ፡፡ ከማስተናገድ ባለፈ ጓደኝነት፣ ቤተሰብነት ተሰምቶኛል፣ አድራሻ ተለዋውጠናል፤›› ብለዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ በወቅታዊ ፀጥታና ደህንነት ጉዳዮች ላይ የቀረበላቸውን ምክረ ሐሳብ እያደመጡ ነው]

ችግሩ ምን እንደሆነ በትክልል ለይተነዋል ግን ግን ምን? በይፋ መናገር አልነበረብንም። ለምን? ችግሩን...

የ12ኛ ክፍል የብሔራዊ ፈተና ውጤትና እንደምታው

የተባበሩት መንግሥታት ድርጅት የትምህርት፣ የሳይንስና የባህል ድርጅት (UNESCO) የትምህርትን...

ንግድ ባንክ ከቪዛና ማስተር ካርድ ጋር ተደራድሮ ያስጀመረው የገንዘብ ማስተላለፊያ ቴክኖሎጂና ፋይዳው

ከውጭ ወደ አገር በሕጋዊ መንገድ የሚላክ ገንዘብ (ሬሚታንስ) መጠን...

ይኼ አመላችን የት ያደርሰን ይሆን?

እነሆ ከፒያሳ ወደ ካዛንቺስ። ‹‹አዳም ሆይ በግንባር ወዝ ትበላለህ››...