Tuesday, July 23, 2024
- Advertisement -
- Advertisement -
ማኅበራዊ‹‹መንግሥት በሆቴልና ሪዞርት ዘርፍ ለተሰማሩ ኢንቨስተሮች መሬትንና የፀጥታ ሁኔታን ማስከበር ይኖርበታል›› ሻለቃ...

‹‹መንግሥት በሆቴልና ሪዞርት ዘርፍ ለተሰማሩ ኢንቨስተሮች መሬትንና የፀጥታ ሁኔታን ማስከበር ይኖርበታል›› ሻለቃ ኃይሌ ገብረሥላሴ፣ የኃይሌና ዓለም ኢንተርናሽናል ዋና ሥራ አስኪያጅ

ቀን:

ኢትዮጵያ ያላትን የቱሪዝም መዳረሻ ቦታዎች በአግባቡ ለመጠቀም እንዲሁም ኢኮኖሚያዊ ዕድገቷን አንድ ዕርምጃ ከፍ ለማድረግ ከሚያስፈልጉ መሠረታዊ ነገሮች መካከል ደረጃቸው የተጠበቀ ሆቴሎችና ሪዞርቶች መሆናቸው ይታመናል፡፡ በተለይም የቱሪዝም መዳረሻ የሆኑ ቦታዎች ላይ ዘመናዊና ጥራታቸውን የተጠበቀ ሆቴሎች መገንባት የግድ መሆኑን የዘርፉ ባለሙያዎች በተለያዩ መድረኮች ላይ ሲናገሩ ይደመጣል፡፡

ይህንን ዕውን ለማድረግ ኃይሌና ዓለም ኢንተርናሽናል ኃላፊነቱ የተወሰነ የግል ማኅበር በሆቴል ኢንቨስትመንት ዘርፍና በሌሎች ሥራዎች ላይ 12 ዓመታትን ያስቆጠረ ሲሆን፣ ከዚህ ቀደም ሰባት ሆቴሎና ሪዞርቶችን በመገንባት ለቱሪዝም ዘርፍ የተሻለ አገልግሎት በመስጠት ጉልህ ሚና ከተጫወቱ ተቋሞች መካከል ተጠቃሽ ያደርገዋል፡፡

ተቋሙም በአሁኑ ወቅት ከ2.5 ቢሊዮን ብር በላይ በሆነ ወጪ ኃይሌ ግራንድ አዲስ የተሰኘ ባለ አምስት ኮከብ ሆቴል በአዲስ አበባ ላምበረት አካባቢ በመገንባት ሐሙስ ጥር 18 ቀን 2015 ዓ.ም. ለአገልግሎት ክፍት እንዲሆን ማድረጉን በሰጠው ጋዜጣዊ መግለጫ አስታውቋል፡፡

የኃይሌና ዓለም ኢንተርናሽናል ኃላፊነቱ የተወሰነ የግል ማኅበር ዋና ሥራ አስኪያጅ ሻለቃ ኃይሌ ገብረ ሥላሴ በጋዜጣዊ መግለጫው ላይ እንደገለጹት፣ ሆቴሉ ከጥንስሱ ጀምሮ ለአገልግሎት ክፍት እስኪሆን ድረስ ሙሉ ለሙሉ ግንባታው የተጠናቀቀው በኢትዮጵያ ባለሙያዎች ነው፡፡

ባለፉት ዓመታት ኢትዮጵያ በተከሰተው ጦርነት፣ በኮቪድ-19 እና ሌሎች ችግሮች የተነሳ በተለያዩ ቦታዎች ላይ እየተገነቡ ያሉ ሆቴሎች ግንባታቸው እንዲንቀራፈፍ ምክንያት ሆኗል የሚሉት ዋና ሥራ አስኪያጁ፣ በመሆኑም በአሁን ወቅት ተገንብቶ ለአገልግሎት ክፍት የሆነው ሆቴል ግንባታው አምስት ዓመታት መፍጀቱን አስረድተዋል፡፡

በተለይም የውጭ ምንዛሪ እጥረትና የግብዓት መወደድ ተቋሙ በተለያዩ ቦታዎች እየሠራቸው ለሚገኙ ሆቴሎች ላይ እንቅፋት መፍጠሩን፣ ለአብነት ያህል ሶዶና ደብረ ብርሃን እየተገነቡ ሆቴሎች ተጠቃሽ መሆናቸውን ተናግረዋል፡፡

በእነዚህ ችግሮች ምክንያት የሶዶ ሆቴል ግንባታ ሙሉ ለሙሉ ተጠናቆ አገልግሎት መስጠት በነበረበት ጊዜ ሊፈጸም አለመቻሉንና በነሐሴ ወር መጨረሻም ለአገልግሎት ክፍት ለማድረግ እየተሠራ መሆኑን አብራርተዋል፡፡

በኢትዮጵያ በእንደዚህ ዓይነት ኢንቨስትመንት የተሰማሩ ግለሰቦችም ሆኑ ተቋሞች ወደ ውጭ አገር ሄደው ኢንቨስት አድርገው በቂ የውጭ ምንዛሪ እንዲያመጡ መንግሥት የበኩሉን ሊወጣ እንደሚገባና ለዚህ ማሳያም ያደጉ አገሮች ተጠቃሽ መሆናቸውንም አክለው ገልጸዋል፡፡

ዘርፉን ለማሳደግ ተቋማቸው በተለያዩ ቦታዎች ላይ የማስፋፊያ ሥራ እየሠራ መሆኑን የገለጹት ሻለቃ ኃይሌ፣ ‹‹መንግሥት በሆቴልና ሪዞርት ዘርፍ ለተሰማሩ ኢንቨስተሮች መሬትንና የፀጥታ ሁኔታን ማስከበር ይኖርበታል፤›› ብለዋል፡፡

አብዛኛውን ጊዜ ለበርካታ ኢንቨስተሮች ትልቅ ተግዳሮት የሆነው የፀጥታ ችግር መሆኑን ጠቅሰው በአሁኑ ወቅትም ለአገልግሎት ብቁ የሆነው ሆቴል ከ2.5 ቢሊዮን ብር በላይ ወጪ ፈሰስ እንደተደረገለት ተናግረዋል፡፡

በሆቴልና ሪዞርት ዘርፉንም አንድ ዕርምጃ ከፍ ለማድረግ ከሌሎች የውጭ አገር ኢንቨስተሮች ጋር መወዳደር የግድ እንደሚልና ይህንንም ተፈጻሚ እንዲሆን ተቋሙ ትኩረት ሰጥቶ እንደሚሠራ ገልጸዋል፡፡

የሆቴልና የሪዞርት ኢንቨስትመንቱን በወልቂጤ፣ በጅማ፣ በኮንሶ፣ በደብረ ብርሃን፣ በሻሸመኔ፣ በአርባ ምንጭ፣ በአዳማና በሌሎች ቦታዎች ላይ የተጀመረ ሲሆን፣ በእነዚህም አካባቢዎች የሚገነቡት ሆቴሎች አንድም የአካባቢውን ገጽታ ከመቀየር ባለፈ ለቱሪዝም ዘርፍ ትልቅ አስተዋጽኦ ይኖረዋል ብለዋል፡፡

በአዲስ አበባ ላምበረት አካባቢ የተገነባው ኃይሌ ግራንድ አዲስ ሆቴል ካለፈው መስከረም መገባደጃ ጀምሮ በሙከራ ደረጃ አገልግሎት ሲሰጥ እንደነበርና በአሁኑ ወቅትም ሙሉ ለሙሉ በሚባል ደረጃ ተጠናቆ ለሥራ ክፍት ሊሆን እንደቻለ የኃይሌ ሆቴሎችና ሪዞርቶች ግሩፕ ማኔጂንግ ዳይሬክተር አቶ መልካሙ መኮንን ተናግረዋል፡፡

በቀጣይም በዘርፉ ላይ ትኩረት በመስጠት በተለያዩ የውጭ አገሮች ላይ ሥራዎችን ለመሥራት ተቋሙ ዕቅድ ይዞ እየተንቀሳቀሰ መሆኑን የተናገሩት አቶ  መልካሙ፣ በአብዛኛው የሚገነቡ ሆቴሎች የኢትዮጵያ ባህልና እሴቶች የጠበቁ ናቸው ብለዋል፡፡

ኃይሌ ግራንድ አዲስ ሆቴል ለ450 ሠራተኞች ቋሚና ጊዜያዊ የሥራ ዕድል መፍጠሩን ከእነዚህም ውስጥ ለ120 አዲስ ተመራቂ ሠራተኞች ሥልጠና በመስጠት ወደ ሥራ እንዲገቡ መደረጉን አክለው ገልጸዋል፡፡

ሆቴሉም በኃይሌ ሆቴሎችና ሪዞርቶች ከዚህ ቀደም ተገንብተው አገልግሎት እየሰጡ ከሚገኙ ሰባት መዳረሻዎች በተለየ መንገድ የተገነባ ሲሆን፣ 157 ምቹና ሰፊ የመኝታ ክፍሎችና 175 አልጋዎች የያዘ ነው፡፡

በሌላ በኩል የባህል ምግብ አዳራሽ፣ ስምንት የስብሰባ አዳራሾች ከዘመናዊ የድምፅና የመብራት ግብዓትና ሁለት ትላልቅ ቦል ሩምስ አካቶ ይዟል፡፡

የጤናና የውበት መጠበቂያ ማዕከል እና 200 ተሽከርካሪዎች የሚይዝ የመኪና ማቆሚያ ሥፍራ፣ ስምንት የስብሰባ አዳራሾች ያሉት ሲሆን፣ ሆቴሉ ከተገነባ ጀምሮ እስኪጠናቀቅ ድረስ በርካታ ሠራተኞች የሥራ ዕድል አግኝተዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...