Sunday, June 23, 2024
- Advertisement -
- Advertisement -

የተመረጡ ፅሑፎች

መንግሥት ተራ አስከባሪዎች የሚዘውሩትን የትራንስፖርት ታሪፍ መቆጣጠርና ማስቆም አለበት!

በኅብስት አበበ

ረዥም አሰልቺ ሠልፍ የተሠለፉ የመዲናዋን ነዋሪዎች መመልከት የተለመደ ነው፡፡ ከማለዳው 12 ሰዓት ጀምሮ በየታክሲ ፌርማታው ረዥም ሠልፍ ማየት ይታክታል፡፡

ከቀኑ ዘጠኝ ሰዓት ጀምሮ ደግሞ ይኸው ማኅበረሰብ ወደ ቤቱ ለመግባት ብዙ ፈተናዎች ማለፍ ይጠበቅበታል፡፡

በብዙ የኑሮ ውጣ ውረድ ፍዳውን የሚበላው ነዋሪ የትራንስፖርት እጥረት፣ የታሪፍ ጭማሪና ባለታክሲዎች ባለመገኘታቸው የሚሰቃዩ በርካቶች ናቸው፡፡ በተለይ ከመሸ የሚጠራው ታሪፍ ከመደበኛው በእጥፍ የሚበልጥ መሆኑ ነዋሪዎችን በእጅጉ አማሯል፡፡

በኑሮ ውድነት አቅሉን የሳተውን የመዲናዋ ነዋሪ ስቃዩ በዚህ ብቻ አላበቃም፣ ከመደበኛ ታሪፍ ይልቁንም መብቱ ተጥሶ ሳይወድ በግዱ ሁለትና ሦስት እጥፍ ጨምሮ አገልግሎቱን ይጠቀማል፡፡

የዚህ ዓይነቱ የተጨማሪ ታሪፍ ክፍያ በከተማዋ በሁሉም አቅጣጫ የሚደረግ ነው፡፡

ከቦሌ ድልድይ ጎሮ መደበኛው ታሪፍ 15 ብር ቢሆንም፣ ከመሸ እስከ 30 ብርና ከዚያ በላይ መንገደኛው ይጠየቃል፡፡ የዚህ ዓይነቱ የተጨማሪ ታሪፍ ክፍያ በከተማዋ በሁሉም አቅጣጫ የሚደረግ ነው፡፡

የዚህ የታሪፍ ጭማሪ የተራ አስከባሪዎች ጭምር ሆን ብለው የሚተባበሩ ሲሆን፣ በጊዜ ለመግባትና እየመሸ ከመጣ ሌላ ችግር ስለሚከተላቸው ዜጎች ሳይወዱ በግዳቸው እንዲከፍሉ ይገደዳሉ፡፡

የታሪፍ ጭማሪ ከመሸ ብቻ ሳይሆን በጠራራ ፀሐይ ተግባራዊ የሚደረጉ ባለታክሲዎች የትየለሌ ሲሆኑ፣ ተሳፋሪዎች ሲጠይቋቸው የተራ ክፍያው ስለሚጨምር መሆኑን በምክንያትነት ያነሳሉ፡፡

ጎሮ፣ ሰሚት፣ ሃያት የሚኖሩ ግለሰቦች ከቦሌ ድልድይ ወደ ቤታቸው ለመድረስ መንግሥት ካወጣው ተመን በተጨማሪ ሥርዓቱ የተበላሸና ሃይ ባይ ያጣ በመሆኑ ብቻ ከ15 ብር እስከ 30 ብር ተጨማሪ ወጪ ለማውጣት ይገደዳሉ፡፡

በዚህ የትራንስፖርት ታሪፍ ሰንሰለት ከመንግሥት ትራንስፖርት ተቆጣጣሪ፣ ተራ አስከባሪ የሚተባበሩበት ሲሆን፣ በዚህ ችግር ነዋሪዎች ኪሳቸው እየተበዘበዘ መሆኑን መንግሥት መረዳት አለበት፡፡

የሁሉም ነገሮች ዋጋ ጣሪያ በነካበት ኢኮኖሚ፣ በትራነስፖርት ሥርዓቱ የሰፈነው ሥርዓት አልበኝነት ነዋሪዎችን አንገሽግሿቸዋል፡፡ በትራንስፖርት ታሪፍ ጭማሪ እልባት ያልተገኘለትና በዚህ ኪሳቸውን የሚያደልቡ መበራከታቸው ደግሞ ችግሩን አባብሶታል፡፡

ነዋሪዎች ወይም ትራንስፖርት ተጠቃሚዎች ከታሪፍ ጭማሪ በተጨማሪ የትራንስፖርት አቅርቦት ጉዳይም ፈተና ሆኖባቸዋል፡፡ በተለይም የተማሪዎች መውጫና መግቢያ ሰዓት ላይ ሆን ተብሎ በሚመስል ሁኔታ ተሳፋሪዎች አንድ ታክሲ ለመጠበቅ ከሁለት ሰዓት በላይ ሲጠብቁ ማየት የተለመደ ነው፡፡

በእርግጥ የመንገድ መዘጋጋት ለታክሲዎች መዘግየት ትልቅ ችግር ቢሆንም፣ ነገር ግን ሆን ብለው እስኪመሽ የሚደበቁና ታሪፍ ጨምረው አገልግሎት የሚሰጡ ከጊዜ ወደ ጊዜ እየጨመረ መሆኑ የሚታወቅ ነው፡፡

ይህም በትራንስፖርት አስተባባሪዎች ጭምር የሚታወቅ እውነታ ቢሆንም፣ ጆሮ ዳባ ብለው አላፊ አግዳሚውን ሲቆጣጠሩ ይስተዋላል፡፡

በተለይም በረዥም ርቀት ላይ የተመደቡ ባለታክሲዎች ከተራ አስከባሪዎችና ከትራንስፖርት ተቆጣጣሪ ባለሙያዎች ጋር በመመሳጠር ማኅበረሰቡን የሚያጉላሉ እንጂ የመፍትሔ አካል አልሆኑም፡፡ በዚህ ያላበቃው እጥፍ ታሪፍ ከማስከፈሉም በላይ ሁለት ሰዎችን በሚይዘው ወንበር ሦስት ሰዎችን አጭቆ መሄድ እየተለመደ መጥቷል፡፡

ለትራንስፖርት እጥረት ከጊዜ ወደ ጊዜ ወደ አዲስ አበባ የሚጎርፈው የሰዎች ብዛት (ፍልሰት) የራሱ የሆነ አስተዋጽኦ ቢኖረውም፣ ትራንስፖት ሆን ተብሎ ተሳፋሪን በማጉላላት የሚደረገው የታሪፍ ጭማሪ ግን ዓይን ያወጣ ወንጀል ሆኗል፡፡ ማኅበረሰቡ ችግሩን ለሚመለከተው አካል ቢናገርም ከረዥም ሰዓታት የትራንስፖርት ጥበቃ ድካምና እንግልት የሚታደገው አላገኘም፡፡

ተሳፋሪው ረዥም ሰዓታትን ታክሲ እስከሚመጣ በመጠበቅ ስለሚሰላች አይደለም ቅሬታ ማቅረብ ቀርቶ በታሪፍ ሳይስማሙ የሚነጫነጩ ተሳፋሪ ካሉ አፍ አፉን ብለው የሚያስቆሙት በርካቶች ናቸው፡፡

በዚህ የተማረረው ተሳፋሪ ጠዋት ሥራ በጊዜ ለመግባት የላዳ አማራጭ ለመጠቀም ቢፈልግ እንኳን ዋጋቸው አይቀመሴ ሆኖበታል፡፡ እንዳንዴም የባለ ላዳ ታክሲዎች ተጠቃሚ ለማድረግ በሚመስል ሁኔታ በአንድ ሰው ከ70 እስከ 100 ብር ድረስ እንደ ርቀቱ ያስከፍላሉ፡፡ በዚህ ጉዳይ ማሳያ ለማቅረብ ከቦሌ ድልድይ እስከ ሰሚት (ፍየል ቤት) ድረስ 150 ብር ለአንድ ሰው አገልግሎት ይሰጣሉ፡፡

በዚህ ረገድ የትራንስፖርት አቅርቦትና ፍላጎት ያለመጣጣም ችግር የራሱ የሆነ አስተዋጽኦ ቢኖረውም፣ በተገቢው መንገድና በሰዓታቸው አለመገኘታቸው ሌላኛው ችግር ሆኗል፡፡

ያሉት ታክሲዎች በአግባቡና በሰዓት አገልግሎት መስጠት አለመቻላቸው መንግሥት የሰጠው ትኩረት አናሳ መሆኑ ግልጽ ነው፡፡ በተለይም ዘርፉን ይቆጣጠሩልኛል፣ ሥርዓት ያስከብሩልኛል ብሎ የቀጠራቸውን ተቆጣጣሪዎች መፈተሸና መገምግ ይኖርበታል፡፡

ተቆጣጣሪዎችና በስመ ተራ አስከባሪዎች ትራንስፖርት አገልግሎት ያሳልጣሉ የተባሉት በተገላቢጦሽ ሕዝብን ከማገዝና ችግሩን ከመቅረፍ ይልቅ ክፍተቱን ለኪስ ማደለቢያነት እየተጠቀሙበት ነው፡፡

ችግሩ ጎልቶ መውጣቱን ሁሉም የሚያውቀው እውነት ቢሆንም፣ ተቆጣጣሪዎች ‹‹የአየር ሰዓት›› በማለት ባለ ታክሲዎችን ለመጥቀም ከአካባቢው የሚሰወሩበትን ሁኔታዎች ሁሉ አመቻችተዋል፡፡

ሌላው ቢቀር ማታና በጠራራ ፀሐይ ከታሪፍ በላይ የሚያስከፍሉትን መቆጣጠር ቢያቅታቸው እንኳን፣ ‹‹የአየር ሰዓት›› በሚል ከአካባቢው የሚሰወሩ መኖራቸው ሌላኛው ትልቅ ችግር መሆኑ ተሳፋሪዎች በምሬት ሲናገሩ ይስተዋላል፡፡

መንግሥት በትራንስፖርት ታሪፍ ጭማሪና መሰል ችግሮችን እፈታለሁ በሚል ያስገባቸውን ተቆጣጣሪዎች የችግሩ ምንጭ እንጂ መፍትሔ ሊሆኑ አልቻሉም፡፡

ተቆጣጣሪዎች ሥርዓቱን የሚያስከብሩት በትክክል የዜጎችን ችግር ለመፍታት በቴክኖሎጂና በተለያዩ ዘዴዎች በመጠቀም ችግሩን መቀነስ ይቻላል፡፡ ራሳቸው ከዚህ ውጪ መንግሥት ትራንስፖርት ተራ ያስከብራሉ፣ ሥርዓቱን ይቆጣጠራሉ ብሎ በሥርዓቱ ላይ ያስገባቸውን አባላቶችን በመፈተሽና በመገምገም መፍትሔ ያብጅላቸው፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት