Thursday, June 13, 2024
- Advertisement -
- Advertisement -

የሳምንቱ ገጠመኝየ ሳ ም ን ቱ ገ ጠ መ ኝ

የ ሳ ም ን ቱ ገ ጠ መ ኝ

ቀን:

የመሥሪያ ቤታችን ዋና ሥራ አስፈጻሚ በታይታና በማስመሰል የተካነ፣ ከእባብ የበለጠ ተናዳፊ፣ አንደበተ ርቱዕ ሆኖ በአፉ ጥሬ የሚያበስል፣ ከገዛ ጥቅሙ በላይ ለሥራ ባልደረቦቹም ሆነ በአጠቃላይ ለአገር ደንታ የሌለው መሰሪ ነው፡፡ በሆነ አጋጣሚ በኤፍኤም ሬዲዮ ጣቢያ ከሥራ ጋር በተገናኘ ለቀረቡለት ጥያቄዎች በሰጠው ምላሽ ጠያቂዎቹን ብቻ ሳይሆን፣ በቀጥታ ሥርጭት ለአስተያየት በቀረቡ አድማጮች የፈጣሪ ያህል ውዳሴ እየቀረበለት ሲጨበጨብለት አስታውሳለሁ፡፡ የሬዲዮ ማብራሪያውን የሰሙ ሰዎች፣ ‹ምናለበት ይህንን የመሰለ ድንቅ ምሁር አገር ቢመራ…› እያሉ ሲደመሙም እንደነበር አልዘነጋም፡፡

የሆነ ሆኖ ግን ይህ ሰው በመሥሪያ ቤቱ ውስጥ የራሱን ‹ሚሊሻዎች› አደራጅቶ ሰውን መሰለል የሚወድ፣ በነፃነት የመሰላቸውን የሚናገሩና አስተያየት የሚሰጡ ምስኪኖችን በሰበብ አስባብ ዕድገት የሚነፍግ፣ አበሳጭቶ በገዛ ፈቃዳቸው ከሥራ እንዲለቁ የሚያደርግ፣ የእሱ ጎራ ውስጥ ተቀላቅሎ ከበሮ ለመደለቅ ፈቃደኛ ያልሆነን በሚሊሻዎቹ አማካይነት አደጋ የሚያደርስ ሰይጣን ነበር፡፡ በዚህ የተነሳ ሁሉም ሠራተኛ ማለት ይቻላል ተፈጥሯዊ መብቱን ተገፎ እንደ እንስሳ መነጋገር ተስኖታል፡፡ የመረረው ጥሎ ይሄዳል፡፡ መሄጃ የሌለው ዕድሉን እየረገመ ዕድሜውን ይቆጥራል፡፡ ሁለት ዓመታት ሠርቼ ከዚያ መሥሪያ ቤት ስወጣ ጭንቀቴን የተገላገልኩት የምጥ ያህል ነበር፡፡ አሁን ይኼን ማን ያምናል? እኔ ግን እውነት ነው እላችኋለሁ፡፡

መንግሥት የሐሳብ ነፃነትን እንዳይገድብ በሕግ ቢከለከልም አለመቻሉን የምናውቀው ነው፡፡ የብዙዎቹ የአፍሪካ መንግሥታት ባህርይ መሆኑም ግልጽ ነው፡፡ የሕግ የበላይነት ሲጠፋ መጀመርያ የሚጎዳው ሐሳብን በነፃነት የመግለጽ መብት ነው፡፡ መንግሥት ደግሞ በዚህ ጉዳይ በበርካታ ወገኖች የሰሉ ትችቶች ቢቀርቡለትም፣ ‹ውሾቹ ይጮሃሉ ግመሉ ግን ጉዞውን ቀጥሏል› እያለ መልካም አጋጣሚዎች በተደጋጋሚ መክነዋል፡፡ ልክ እንደ መንግሥት ሁሉ ይህ ዓይነቱ በሽታ የተጋባባቸው ብዙ ሰዎች አሉ፡፡ ከእነዚህ መሀል አንዱ የዩኒቨርሲቲ መምህሬ ነበሩ፡፡

- Advertisement -

እሳቸው መንግሥትን ባገኙት አጋጣሚ ሁሉ በመንቀፍና በመቃወም ይታወቃሉ፡፡ በፊት በፊት በጋዜጦች ይጽፉም ነበር፡፡ ለእኔ ግን በጣም ዕንቆቅልሽ ናቸው፡፡ እሳቸው የሚሉትን አለመቀበል ከቁጣና ከግልምጫ ባለፈ ‹ግሬድ› ያስቀጣል፡፡ አንድ ቀን ‹በፌዴራሊዝም ላይ የጻፉት ጥሩ ጎኖች ቢኖሩትም፣ ሚዛናዊነት ይጎድለዋል…›› ስላቸው፣ ‹‹አንተ ደግሞ ከመቼ ወዲህ ነው የብሔርተኞች ደጋፊ የሆንከው?›› ብለው ዓይኔን በንዴት አስፈጠጡኝ፡፡ ከቁጣዬ በረድ ብዬ በጽሑፉ አመክንዮ ላይ እንነጋገር ብላቸው፣ ‹‹መጀመርያ አቋምህን አስተካክል…›› ብለውኝ ተለያየን፡፡ የ‹‹ኤ›› ተማሪ የ‹‹ሲ›› ሰለባ ሆኜ ቀረሁ፡፡ ድንቄም ዩኒቨርሲቲ፣  ድንቄም መምህር፡፡

በአንድ ወቅት እኔም እንዳቅሚቲ አንዱን ተቃዋሚ የፖለቲካ ፓርቲ ተቀላቅዬ እንዘጭ እንዘጭ ማለት ጀምሬ ነበር፡፡ አይ መፈክር? አይ ቅስቀሳ? ዘው ብዬ በገባሁበት ጊዜ አፍላ ወጣቶችና ጎልማሶች ለፓርቲው ተልዕኮ መሳካት ላይ ታች ሲሉ ወኔያቸው አስገራሚ ነበር፡፡ በአገር ፍቅር ስሜትና ለለውጥ ካለ ፍላጎት የተነሳ ቀንና ሌሊት እንደዚያ ሲራወጡ ያስቀኑ ነበር፡፡ እኔ ጊዜው ባይኖረኝም በገንዘብ፣ በሐሳብና አንዳንዴም ጽሑፎችን በመውሰድ በተቻለኝ መጠን እሳተፍ ጀመር፡፡ እየዋለ እያደር ግን አንድ ነገር ግልጽ ሆነልኝ፡፡ በዚያ ሁሉ የተጋጋለ ጥረት ውስጥ ጥላውን የጣለ ነገር አለ፡፡

የፓርቲው ውስጠ ዴሞክራሲ ጤነኛ አይደለም፡፡ የአባላትና የደጋፊዎች ትኩረት ውጫዊ እንዲሆን ተደርጎ፣ የውስጡ ጉዳይ በጥቂቶች ታግቷል፡፡ ከውጭ የሚመጣ ገንዘብ መጠኑና የመምጫው አቅጣጫ ግልጽ አይደለም፡፡ ይህንን ጉዳይ የሚያነሱ ‹ሰርጎ ገብ› ተብለው በፍጥነት ይፈረጁና ይወገዳሉ፡፡ ደፈር ብለው በቅንነት ጥያቄ የሚያነሱ ወይ በመረቡ ይጠመዳሉ፣ አሊያም ‹ሰርጎ ገብ› ተብለው ይንገዋለላሉ፡፡ እንኳንስ ሐሳብን በነፃነት መግለጽ የፊት እንቅስቃሴ ሳይቀር ይገመገማል፡፡ አዲዮስ ዴሞክራሲ! ይህንን እያዩ እዚያ ቦታ መቆየት መርህ ላለው ሰው ስለማይጠቅም ሸሸሁ፡፡ ያለ ዛሬ ይኼንን ጉድ ለመናገር ድፍረት አጥቼ ኖሬያለሁ፡፡ አይ ኢትዮጵያ አገሬ!

እኔ ማኅበራዊ ሚዲያው ውስጥ ስላለው እንቶ ፈንቶ ለመነጋገር አልፈልግም፡፡ በተለይ ፌስቡክና ትዊተር የነባራዊው ዓለም ንፅፅር ቢሆኑም፣ ለምሳሌዬ ፋይዳ አይኖራቸውም፡፡ ነገር ግን በየዕለቱ የፌስቡክና የትዊተር ዓለም ተዋንያን በአካል ከሚያደርጉት ንግግር ስረዳ ተቃራኒ ሐሳብ ከመስማት፣ ሳይወለዱ ቢቀሩ የሚሻላቸው ብዙ ናቸው፡፡ አንዱን በቅርብ የማውቀው በፒኤችዲ ደረጃ ያለ ወዳጄን፣ ‹‹ብዙ ጊዜ አስተያየቶችህን አያቸዋለሁ፡፡ አንተ የምትፈልገው ድጋፍ የሚሰጡህንና የሚያንቆለጳጵሱህን ብቻ ነው፡፡ የአንተን ሐሳብ የማይቀበሉት ግን ስድብ አዘል ምላሽ ትሰጣለህ፡፡ ይህንን ምን ይሉታል?›› ብዬ ወቀሳ ሳቀርብለት፣ ‹‹አንተም ከእነሱ የማትሻል ነህ፡፡ እኔ የማንንም ዝንባዝንኬ የመስማትም ሆነ የማንበብ ትዕግሥት የለኝም…›› እያለ ሲንጣጣብኝ ተስፋ ቆረጥኩ፡፡

መንግሥት መብቴን አፈነብኝ የሚል ሌላውን ለማፈን የሚታገል ከሆነ መድረሻችን የት ነው? ጎበዝ በዚህ ሁኔታ እኮ የአደባባይ ሰዎቻችንን እያጣን የዱር አውሬ መሆናችን ነው፡፡ ሌላውን ትተን ባለፉት አምስት ዓመታት በኢትዮጵያ እየተካሄዱ ባሉ ዘርፈ ብዙ ጉዳዮች ላይ በስክነት መነጋገር እያቃተን ነው፡፡ መንግሥትን ጭልጥ ብለው የሚደግፉ የሌላውን ወገን ጠቃሚ ሐሳብ ለመስማት ዝግጁ አይደሉም፡፡ መንግሥትን አምርረው የሚቃወሙትም በምንም ዓይነት ሁኔታ ወዲያ ማዶ ያለውን ስሜት ለመረዳት አይፈልጉም፡፡ በርካታ ችግሮች ታቅፋ የመፍትሔ ያለህ በምትል አገር ውስጥ እየኖርን፣ ልዩነቶችን ወደ ክብ ጠረጴዛ ከማምጣት ይልቅ መሰዳደብ ወይም ማንቁርት መተናነቅ ነው የሚቀናን፡፡

በቀደም ዕለት ከአንድ ከልጅነት አብሮ አደጌ ጋር በዚህ ጉዳይ ላይ ስንወያይ፣ ‹‹ድሮ ትዝ ይልሃል ታላላቅ ወንድሞቻችን አንዳች የሚያካክሉ መጻሕፍት እያነበቡ ሲወያዩና ሲከራከሩ የነበረው…›› እያለ ከበርካታ ዓመታት በፊት የነበረውን የዚያን ትውልድ ሁኔታ በጨረፍታ አስታወሰኝ፡፡ ያኔ እኛ በጣም ልጆች በነበርንበት ወቅት በአማርኛና በእንግሊዝኛ ቋንቋዎች የታተሙ የታሪክ፣ የፖለቲካ፣ የፍልስፍና፣ የኢኮኖሚክስና ሌሎች መጻሕፍትን እያነበቡ በአንክሮ ሲወያዩና ሲከራከሩ ድንቅ ይለን ነበር፡፡ እኛም ያንን አርዓያነት ተከትለን የማንበብና የመወያየት ባህል ስላዳበርን፣ ለዚህ ንባብ ዕርሙ ለሆነ ትውልድ በጣም አዝናለሁ፡፡ የሐሳብ ነፃነት የሚከበረው እኮ ገዥውም ሆነ ተገዥው ማንበብ ሲችሉና ለውይይትና ለክርክር መድረኮች መኖር አስተዋፅኦ ሲያበረክቱ ነው፡፡ ይህ ባልሆነበት ትርፉ መዳረቅ ነው፡፡

(ሰለሞን ተሻገር፣ ከሲኤምሲ)ል

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]

እኔ ምልህ? እ... ዛሬ ደግሞ ምን ልትይ ነው? ንቅናቄዎችን አላበዙባችሁም? የምን ንቅናቄ? በመንግሥት...

የመንግሥት የ2017 ዓ.ም በጀትና የሚነሱ ጥያቄዎች

የ2017 ዓመት የመንግሥት ረቂቅ በጀት ባለፈው ሳምንት መገባደጃ ለሚኒስትሮች...

ከፖለቲካ አባልነትና ከባንክ ድርሻ ነፃ የሆኑ ቦርድ ዳይሬክተሮችን ያካተተው ብሔራዊ ባንክ ያዘጋጃቸው ረቂቅ አዋጅና መመርያዎች

የኢትዮጵያ የብሔራዊ ባንክ የፋይናንስ ተቋማትን የተመለከቱት ድንጋጌዎችንና የባንክ ማቋቋሚያ...

የልምድ ልውውጥ!

እነሆ መንገድ ከቦሌ ሜክሲኮ። አንዱ እኮ ነው፣ ‹‹እንደ ሰሞኑ...