Saturday, June 15, 2024
- Advertisement -
- Advertisement -

ማኅበራዊየክፍያ መንገዶች ኢንተርፕራይዝ የብረት አጥር ዝርፊያን ለመግታት ኮንክሪት ለማድረግ መገደዱን አስታወቀ

የክፍያ መንገዶች ኢንተርፕራይዝ የብረት አጥር ዝርፊያን ለመግታት ኮንክሪት ለማድረግ መገደዱን አስታወቀ

ቀን:

  • ብረቱን ወደ ኮንክሪት ለመቀየር ከፍተኛ ወጪ ይጠይቃል

የክፍያ መንገዶች ኢንተርፕራይዝ በአዲሱ አዳማ ፈጣን መንገድ ዳርና ዳር የተተከለውን የብረት አጥር ዝርፊያ ለማስቀረት፣ የተተከሉትን የብረት አጥሮች በኮንክሪትና በተቀቀሉ እንጨቶች ለመቀየር መገደዱን አስታወቀ፡፡

በመንገዶቹ ዙሪያ የተተከሉትን ብረቶች ሊሰረቁ በማይችሉ አጥሮች ለመተካት ኢንተርፕራይዙ ጥናት ማድረጉን፣ በዚህም መሠረት የዕቃ ግዥ እየፈጸመ መሆኑን አስታውቋል፡፡

የኢንተርፕራይዙ ዋና ሥራ አስኪያጅ አቶ ሙስጠፋ አባሰመል ለሪፖርተር እንደገለጹት፣ ለስርቆት የተዳረጉትን ብረቶች በእንጨትና በኮንክሪት ለመቀየር በመቶ ሚሊዮኖች የሚቆጠር ገንዘብ ያስፈልጋል፡፡

- Advertisement -

የሕዝብ ተወካዮች ምክር ቤት የመንግሥት ወጪ፣ አስተዳደርና ቁጥጥር ጉዳዮች ቋሚ ኮሚቴ በኢንተርፕራይዙ የ2013/2014 በጀት ዓመት ዋና ኦዲተር መሥሪያ ቤት ባቀረበው የክዋኔ ኦዲት ግኝት ላይ ከባለድርሻ አካላት ጋር ሰኞ ሚያዚያ 16 ቀን 2015 ዓ.ም. ግምገማ አድርጓል፡፡

‹‹የመንገድ ላይ አጥር ቋሚ ብረቶቹን ኃላፊነት የማይሰማቸው ሰዎች ነቅለው በማይረባ ዋጋ ገበያ ውስጥ ሸጠው ለመጠቀም የሚያደርጉትን ተግባር ለመቀልበስ የተጀመረው ሥራ፣ ስርቆቱን በከፍተኛ ደረጃ ይቀንሰዋል፤›› ብለዋል፡፡

የአዲስ-አዳማና የሞጆ-ሐዋሳ ፈጣን መንገዶችን እያስተዳደረ የሚገኘው ኢንተርፕራይዙ፣ በዓመት 4.5 ሚሊዮን ብር በማውጣት የመንገድ ላይ አጥሮችንና ሌሎች ንብረቶችን ጥበቃ ለሚያደርግ 46 የጥበቃ ማኅበራት አደራጅቶ ማኅበራቱም በሥራ ላይ እንደሚገኙ የተገለጸ ሲሆን፣ ሥራ ላይ ከነበሩ ማኅበራት ውስጥ ከዚሁ የመንገድ ላይ አጥር ስርቆት በተገናኘ 14 ያህሉን ከሥራ ማሰናበቱን ዋና ሥራ አስኪያጁ ተናግረዋል፡፡

በተመሳሳይ በፈጣን መንገዶቹ ላይ የፌዴራል ፖሊስና የኦሮሚያ ፖሊስ፣ እንዲሁም ከድሬ-ዳዋ ወደ ደወሌ የሚዘልቀውን መንገድ ጥበቃ የሚያደርጉ የሶማሌ ክልል ፖሊሶች መመደባቸውንም ዋና ሥራ አስኪያጁ አብራርተዋል፡፡

የፌዴራል ዋና ኦዲተር ወ/ሮ መሠረት ዳምጤ በዓመት 4.5 ሚሊዮን ለጥበቃ ገንዘብ ወጪ እየተደረገ በዚያው ልክ ደግሞ በርካታ ንብረት መጥፋቱ ተቃርኖ እንደሚፈጥር አውስተው፣ ጠባቂ ማኅበራት ተቀጥረው ንብረቱ የሚዘረፍ ከሆነ ለጥበቃ በሚወጣው ገንዘብና ኢንተርፕራይዙ አባረርኳቸው በሚላቸው ማኅበራት መካከል ያለውን አሠራር እንደገና ሊፈትሽ ይገባል ብለዋል፡፡ 

ዋና ኦዲተሯ ዓለም አቀፍ ስታንዳርዶችን መሠረት አድርገው የተገነቡት ዘመናዊ መንገዶች የአስተዳደር ሥርዓታቸውም በዚያው ልክ እንዲሆን አሳስበዋል፡፡

በ11.2 ቢሊዮን ብር ግንባታው የተጠናቀቀውና 90 ኪሎ ሜትር ርዝመት ያለው የአዲስ-አዳማ ፍጥነት መንገድ፣ እስካሁን 2.5 ቢሊዮን ብር ገቢ ማስገባቱና 60 ሚሊዮን ተሽከርካሪዎች ማስተናገዱ ተገልጿል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]

እኔ ምልህ? እ... ዛሬ ደግሞ ምን ልትይ ነው? ንቅናቄዎችን አላበዙባችሁም? የምን ንቅናቄ? በመንግሥት...

የመንግሥት የ2017 ዓ.ም በጀትና የሚነሱ ጥያቄዎች

የ2017 ዓመት የመንግሥት ረቂቅ በጀት ባለፈው ሳምንት መገባደጃ ለሚኒስትሮች...

ከፖለቲካ አባልነትና ከባንክ ድርሻ ነፃ የሆኑ ቦርድ ዳይሬክተሮችን ያካተተው ብሔራዊ ባንክ ያዘጋጃቸው ረቂቅ አዋጅና መመርያዎች

የኢትዮጵያ የብሔራዊ ባንክ የፋይናንስ ተቋማትን የተመለከቱት ድንጋጌዎችንና የባንክ ማቋቋሚያ...

የልምድ ልውውጥ!

እነሆ መንገድ ከቦሌ ሜክሲኮ። አንዱ እኮ ነው፣ ‹‹እንደ ሰሞኑ...