Saturday, April 20, 2024
- Advertisment -
- Advertisment -

[የተጠናቀቀውን ሪዞርት ለመመረቅ የተሳፈሩትን ሚኒስትሮችና የክልል ፕሬዚዳንቶች የያዘው አውሮፕላን ወደ ማረፊያው መቃረቡን የተመለከቱት የጊዜያዊ አስተዳደሩ ፕሬዚዳንት፣ የት አካባቢ እንዳሉ ግራ ገብቷቸው አጠገባቸው የተቀመጡትን ሚኒስትር እየጠየቁ ነው]

  • ክቡር ሚኒስትር ምንድነው ነገሩ?
  • ምኑ?
  • ምዕራብን እንጎበኛለን አይደል እንዴ የተባለው?
  • አዎ ደርሰናል፣ ለማረፍ እየተቃረብን ነው።
  • ይኼ ባለፈው የመጣንበት አካባቢ አይደል እንዴ?
  • አዎ፣ ልክ ነዎት።
  • እኔ እኮ ወደ ምዕራብ መስሎኝ ነው ተጣድፌ የመጣሁት።
  • የትኛው ምዕራብ?
  • የእኛ ምዕራብ።
  • አይቀልዱ እንጂ ክቡር ፕሬዚዳንት?
  • እንዴት?
  • አገሪቱ እኮ ወደ ላይ አይደለም የቆመችው?
  • ምን ማለትዎ ነው ክቡር ሚኒስትር?
  • የእናንተ አካባቢ ብቻ ሳይሆን፣ አገሪቱም አላት ማለቴ ነው።
  • ምን?
  • ምዕራብ!
  • ቢሆንም ሪዞርት ልንመርቅ ነው ተብዬ ብጠራ ይሻል ነበር።
  • ለማንኛውም ደርሰናል፣ እየወረዱ።
  • ይቅደሙ ክቡር ሚኒስትር፣ የእርስዎ ፕሮጀክት አይደል ይቅደሙ።
  • እሺ… እንዴት አገኙት ታዲያ?
  • እኔማ ያኔ የሰላሙን ሁኔታ ለመገምገም ስመጣ ያለቀ ነበር የመሰለኝ።
  • ከዚያ በኋላ ብዙ ነገሮች ተሠርተዋል፣ ለምሳሌ እዚያ ጋ ያለውን ይመልከቱ… ያኔ አልነበረም።
  • አዎ፣ በጣም አረንጓዴ ሆኗል።
  • አረንጓዴ መሆኑን ብቻ ነው ያስተዋሉት?
  • እሱማ ማለቅ የነበረባቸው ነገሮችም አልቀዋል… በተጨማሪም
  • እ…
  • በተጨማሪ ምን?
  • መከርከም የነበረባቸውም ተከርክመዋል፡፡
  • አሁን አንድ ነገር ብቻ ነው የሚቀረን።
  • ምንድነው እሱ?
  • ማን ያስተዳድረው የሚለውን ገና አልወሰንም።
  • ምን እያሉ ነው ክቡር ሚኒስትር?
  • አስተዳደሩን ለማን እንስጥ የሚለውን ገና እየተወያየንበት ነው።
  • ማን ያስተዳድረው የሚለውማ ተወስኗል፣ በግልጽ ተቀምጧል እኮ ክቡር ሚኒስትር?
  • ማነው የወሰነው? ምኑ ላይ?
  • ስምምነቱ ላይ፡፡
  • ስለምንድነው እርስዎ የሚያወሩት? አሁንም እዚያው ነዎት እንዴ?
  • የት?
  • ለማንኛውም ወደ እዚህኛው ቢመለሱ ይሻላል፡፡
  • ወደ እዚህኛው ምን?
  • ምዕራብ!

[ክቡር ሚኒስትሩ ወደ ቤታቸው ሲገቡ ባለቤታቸው በሽብርተኝነት ተጠርጥረው ስለተከሰሱ ሰዎች የሚተላለፈውን ዜና በተመስጦ እየተከታተሉ አገኟቸው]

  • ምንድነው እንዲህ ተመስጠሽ የምታደምጪው?
  • ሰበር ዜና ነው።
  • ስለምንድነው?
  • በሽብርተኝነትና የክልሉን መንግሥት በኃይል ለመጣል ተጠረጥረው ስለተያዙና ስለሚፈለጉ ሰዎች ነው።
  • እ… ስለእሱ ነው።
  • አዎ፣ ታውቅ ነበር እንዴ?
  • እንኳን እኔ እነሱ ራሳቸው የሚያውቁ አይመስለኝም።
  • ይደንቃል፡፡
  • በአሸባሪነት መጠርጠር የለባቸውም ብለሽ ልትሟገቺ ነው?
  • እኔ ምኑን አውቄ እሟገታለሁ?
  • ታዲያ ምንድነው ያስደነቀሽ?
  • ገና ሲጀመር አዲስ አበባ አካባቢ ያሉ ሰዎች ነበሩ በሽብርተኝነት የተከሰሱት።
  • እሺ?
  • ከዚያ ወደ ሰሜን ሄደ።
  • ወደ ሰሜን ማለት?
  • የመጀመሪያው ከሳሽ የነበሩት ራሳቸው ሽብርተኛ ተብለው አልነበር?
  • አዎ፣ ለካ እነሱም አልቀረላቸውም።
  • አሁን ደግሞ ሌላኛው ሰሜን ተረኛ ይመስላል።
  • ካልሽማ ወደ ምዕራብም ዘልቆ ነበር።
  • ይህ እኮ ነው ድንቅ የሚለኝ።
  • ምኑ?
  • የሚንሸራሸረው፣ ማለቴ የሚሽከረከረው ነገር?
  • ምኑ?
  • የሽብርተኝነት ክሱ ነዋ?
  • እንዴት?
  • እንደምን ልበልህ፣ አዎ… እንደ እንትን… ስሙ ምን ነበር?
  • እንደምን?
  • የብሔር ብሔረሰቦች ዋንጫ፡፡
  • ኪኪኪ… ወደው አይስቁ አሉ፣ ታሾፊያለሽ አይደል?
  • እያሾፍኩ አይደለም።
  • ታዲያ ምን እያደረግሽ ነው?
  • ከምሬ ነው፣ ከቅርብ ጊዜ ወዲህ እዚህ አገር የሚሽከረከሩ ነገሮች እየበዙ እያየሁ እገረማለሁ።
  • ሌላ ምን ተሽከረከረ ልትይ ነው ደግሞ?
  • አንዱ እንዳልኩህ ዋንጫው ነው።
  • እሺ ሁለተኛ የሽብርተኝነት ክስ ያልሽው መሆኑ ነው?
  • አዎ፣ ሌላው ደግሞ ግጭትና የጦር መሣሪያ ነው።
  • እሺ ሌላውስ?
  • ሌላው ደግሞ ኮማንድ ፖስት ነው።
  • ኪኪኪኪ… እሺ ሌላ የሚደንቅሽ ነገር የለም?
  • የሚደንቅ ነገር አይጠፋም።
  • ለምሳሌ ምን?
  • ሽብርተኛ የተባሉት ሰዎች በመጨረሻ ላይ የሚሆኑት ነገር።
  • ምን ይሆናሉ?
  • የካቢኔ አባል!

በብዛት የተነበቡ ፅሁፎች

- Advertisment -

ትኩስ ፅሁፎች

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...

እጥረትና ውጥረት!

ጉዞ ከስድስት ኪሎ ወደ ቃሊቲ፡፡ ‹‹ይገርማል ቀኑ እንዴት ይሄዳል?››...
spot_img

ተዛማጅ ፅሁፎች

[የኢኮኖሚ ጉዳዮች አማካሪው ቅሬታ የቀረበባቸው አንዳንድ ጉዳዮችን ክቡር ሚኒስትሩ ተመልክተው ምላሽና ውሳኔ እንዲሰጡባቸው ለማድረግ ከክቡር ሚኒስትሩ ጋር እየተወያዩ ነው] 

ክቡር ሚኒስትር ተቋማችን በሚሰጣቸው አንዳንድ አገልግሎቶች ላይ ጥያቄ እየተነሳ በመሆኑ ነው ዛሬ ከእርስዎ ጋር ለመወያየት የፈለግኩት። የምን ጥያቄ? ማነው ጥያቄውን ያቀረበው? ጥያቄውን ያቀረቡት የተቋማችን ተገልጋዮች ናቸው። እሺ፣...

[ክቡር ሚኒስትሩ ከፖለቲካ ፓርቲዎች የጋራ ምክር ቤት አባላት ጋር በአገራዊ ጉዳዮች ላይ እየመከሩ ነው]

ክቡር ሚኒስትር ባለፈው ሊያወያዩን ሲመጡ ለአገራችን የፖለቲካ ችግር መፍትሔው አንድና አንድ እንደሆነ ነግረንዎት ነበር፣ ያስታውሳሉ? አላስታውስም። ባለፈው የተገናኘን ጊዜ ይህችን አገር ከችግር የሚያወጣው መፍትሔ አንድና አንድ...

[ክቡር ሚኒስትሩ በዕረፍት ቀናቸው በመኖሪያ ቤታቸው ሆነው ከባለቤታቸው ጋር ከውጭ እንዳይገቡ ስለተከለከሉ ምርቶች እያወሩ ነው]

እኔ እምልህ ...ኤል ሲ እንዳይከፈት ተከልክሏል ሲባል አልነበረም እንዴ? ኤል ሲ ደግሞ ምንድነው? ሌተር ኦፍ ክሬዲት ነዋ!? አልገባኝም? አስመጪዎች ከውጭ ለሚያስገቡት ዕቃ የሚያስፈልጋቸውን የውጭ ምንዛሪ ከባንኮች አይደል የሚያገኙት? አዎ። ኤል...