Monday, June 24, 2024
- Advertisement -
- Advertisement -
ማኅበራዊበውጭ አገሮች የሚኖሩ ኢትዮጵያውያን የእንግሊዝኛ ቋንቋ እንዲያስተምሩ ሊደረግ ነው

በውጭ አገሮች የሚኖሩ ኢትዮጵያውያን የእንግሊዝኛ ቋንቋ እንዲያስተምሩ ሊደረግ ነው

ቀን:

በኢትዮጵያ በቂ የእንግሊዝኛ ቋንቋ መምህራን ባለመኖራቸው፣ በውጭ አገሮች የሚኖሩ ኢትዮጵያውያንና ትውልደ ኢትዮጵያውያን ወደ ኢትዮጵያ መጥተው የእንግሊዝኛ ቋንቋ ሊያስተምሩ መሆኑን የትምህርት ሚኒስቴር አስታወቀ፡፡

ተማሪዎችን ብቻ ሳይሆን መምህራንን ጭምር የሚያሠለጥኑ በውጭ የሚኖሩ ኢትዮጵያውያን፣ በኢትዮጵያ በሚገኙ ትምህርት ቤቶች ተመድበው የእንግሊዝኛ ቋንቋ የሚያስተምሩበት ሁኔታ እየተመቻቸ መሆኑን፣ የትምህርት ሚኒስትሩ ብርሃኑ ነጋ (ፕሮፌሰር) በተለይ ለሪፖርተር ገልጸዋል፡፡

‹‹በአገር ውስጥ በቂ የእንግሊዝኛ ቋንቋ መምህራን የሉም፡፡ ገና ብዙ ሥልጠና እየወሰዱ ናቸው፤›› ያሉት ሚኒስትሩ፣ ‹‹በብዛት መምህራን ያስፈልጉናል፡፡ አዳዲስ የእንግሊዝኛ መምህራን በአዲስ መልክ ለማስተማርም እየሞከርን ነው፤›› ብለዋል፡፡

ከኢትዮ ቴሌኮም ጋር ስምምነት በማድረግ ማንኛውም ኢትዮጵያዊ የእንግሊዝኛ ቋንቋን በነፃ የሚያገኝበት ማስተማሪያ ‹‹ፖርታል›› እንደተዘጋጀም አክለዋል፡፡

ከአገር ውጭ ያሉ ኢትዮጵያውያንና ትውልደ ኢትዮጵያውያን መጥተው እንዲያስተምሩ ከማድረግ፣ ይልቅ በአገር ውስጥ የሚገኙ የእንግሊዝኛ መምህራንን ቋንቋውን እንዲያዳብሩ ማደረግ፣ ያልተቻለው ለምን እንደሆነ ከሪፖርተር ጥያቄ የቀረበላቸው ብርሃኑ (ፕሮፌሰር)፣ ‹‹አገር ውስጥ ላሉት የእንግሊዝኛ ቋንቋ መምህራንም ሥልጠና ለመስጠት እንሠራለን፡፡ ከዚያ በተጨማሪ በውጭ አገር የሚገኙ የአፍ መፍቻ ቋንቋቸው እንግሊዝኛ የሆነ ትውልደ ኢትዮጵያውያን ደግሞ መጥተው እንዲያስተምሩ እናደርጋለን፡፡ በተጨማሪም በዘመናዊ ቴክኖሎጂ በዲጂታል መልክ ማስተማር የሚቻልበት መንገድ ይመቻቻል፤›› ብለዋል፡፡

አንዳንድ ጊዜ ሰዎች የትምህርት ሥርዓቱ ለምን በአገራዊ ቋንቋ አይሆንም የሚል ጥያቄ ያነሳሉ ያሉት ሚኒስትሩ፣ ‹‹በአንድ አገራዊ ቋንቋ አይደለም በአሥሩም ብንስማማ ጥሩ ነው፡፡ በቋንቋ አለመግባባት የትምህርት ጥራትን ለማሻሻል የምናደርገውን ሙከራ ያደናቅፍብናል በሚል እንዴት የእንግሊዝኛ ቋንቋን በስፋት ማዳረስ ይቻላል ስንል፣ የእንግሊዝኛ ቋንቋ የአፍ መፍቻቸው የሆኑ ሦስት ሺሕ የሚሆኑ በውጭ አገር የሚኖሩ ኢትዮጵያውያን በአገር ቤት ያሉ መምህራንንም ሆነ ተማሪዎችን እንዲያስተምሩ በየትምህርት ቤቱ አንድ ለመመደብ አቅደናል፤›› ሲሉ አስረድተዋል፡፡

‹‹የኢትዮጵያ የእንግሊዝኛ ቋንቋ ትምህርት በጣም የተጎዳ ስለሆነ በአጠቃላይ የትምህርት ሥርዓት ላይ ባለው አሉታዊ ተፅዕኖ ምክንያት፣ በጣም ከፍተኛ ጫና ፈጥረን መሥራት ስላለብን እየሄድንበት ያለ መንገድ ነው፤›› ሲሉም አክለው ተናግረዋል፡፡

በኢትዮጵያ ያለውን የትምህርት ዘርፍ በሚመለከት ዋና ዋና ችግሮች ናቸው ተብለው ከተለዩ ክፍተቶች መካከል አንዱ የእንግሊዝኛ ቋንቋ ያለበት ስብራት መሆኑን፣ የእንግሊዝኛ ቋንቋ ከ70 ዓመታት በላይ በኢትዮጵያ ከሁለተኛ ደረጃ ትምህርት ቤት ተጀምሮ እስከ ዩኒቨርሲቲ ማስተማሪያ ቋንቋ ሆኖ እየተሰጠ መሆኑን፣ የማስተማሪያ ቋንቋውን ያላወቁ ተማሪዎች ሌሎች የትምህርት ዓይነቶችንም ለመማር በጣም እየተቸገሩ መሆኑን ብርሃኑ (ፕሮፌሰር) አስረድተዋል፡፡

ያለ ቋንቋ ትምህርት እንደሌለ፣ የእንግሊዝኛ ቋንቋ በደንብ ካልታወቀ በዚሁ ቋንቋ የሚሰጡ የትምህርት ዓይነቶችን መከታተል እንደማይቻል፣ የእንግሊዝኛ ቋንቋ ማወቅ አለመቻል ጉዳቱ የመናገርና ያለ መናገር ብቻ ሳይሆን፣ በሌሎች የትምህርት ዓይነቶችም ጉዳት የሚያስከትል በመሆኑ፣ በውጭ አገር የሚኖሩ ትውልደ ኢትዮጵያውያን በበጎ ፈቃደኝነት ትምህርት እንዲሰጡ ጥሪ ማቅረቡ አስፈላጊ ነው ብለዋል፡፡

በአሜሪካና በሌሎች አገሮች ያሉ ኢትዮጵያውያን ወላጆች የአፍ መፍቻ ቋንቋቸው እንግሊዝኛ የሆነ ልጆቻቸውን ወደ ኢትዮጵያ ለመላክ ፍላጎት ማሳየታቸውም ተረጋግጧል ተብሏል፡፡ በውጭ አገር ያሉ ትውልደ ኢትዮጵያውያን ልጆቻቸውን ወደ አገር ውስጥ ልከው ትምህርት እንዲሰጡ ማድረጋቸው ለመምህራንና ለተማሪዎች የእንግሊዝኛ ቋንቋው መዳበር ታላቅ ሚና ከመጫወት ባሻገር፣ የአገራቸውን ባህልና ታሪክ እንዲያውቁም መልካም አጋጣሚ መሆኑን የገለጹት ሚኒስትሩ፣ የትምህርት ሚኒስቴር ባደረገው ጥሪ መሠረት እንዲመዘገቡ ጠይቀዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...