[ክቡር ሚኒስትሩ የነዳጅ ግብይት በዲጂታል ክፍያ መንገድ ብቻ እንዲፈጸም የተላለፈውን ውሳኔ አተገባበር ላይ ስለተነሱ ቅሬታዎች ከባልደረባቸው ጋር እየተወያዩ ነው]

• ክቡር ሚኒስትር አተገባበሩ ጥሩ ቢሆንም፣ ከፍተኛ ወቀሳ እየደረሰብን ነው።
• ዲጂታል የግብይት ሥርዓቱን ለማስፋፋት በመጣራችን መመስገን ሲገባን እንዴት እንወቀሳለን?
• የሚገርመው በዲጂታል ክፍያ ላይ የተሰማሩ ኩባንያዎች ናቸው በዋነኛነት እየወቀሱን ያሉት።
• ለምን?
• እኛም የዲጂታል ክፍያ አገልግሎት ብንሰጥም፣ አንድ ተቋም ብቻ በአድሎ ገበያውን እንዲቆጣጠርና ከጫወታ ውጪ እንድንሆን ተገፍተናል እያሉ እየወቀሱን ነው።
• ይህ ተቋም የተመረጠው የተሻለ ልምድና ተደራሽነት ስላለው ነው ብላችሁ በበቂ ሁኔታ አላስረዳችሁም ማለት ነው?
• ኧረ አስረድተናል ክቡር ሚኒስትር።
• ታዲያ ለምን ወቀሳ መጣብን?
• ማኅብረሰቡ ልምድ የላችሁም፣ ተደራሽ አይደላችሁም ብሎ የፈለገውን ይምረጥ እንጂ መንግሥት እንዴት ይወስናል ነው የሚሉት።
• መንግሥት ለማኅበረሰቡ ምቹ ሁኔታ የመፍጠር ግዴታ እንዳለበትማ መዘንጋት የለበትም።
• እኛም ይህንኑ አስረድተናል ነገር ግን የመንግሥትና የግል ባንኮች እንዲሁም አዲስ የገባው የውጭ ቴሌኮም ሳይቀር ውሳኔውን ተቃውመውታል። እንዲያውም አንዳንዶቹ …
• እ … አንዳንዶቹ ምን?
• ብዙ ተከታይ ያላቸው የማኅበራዊ ሚዲያ ተዋናዮችን በማሰማራት እየተሳለቁብን ነው።
• ምን እያሉ ነው የሚሳለቁት?
• የቀጣዩ ምርጫ ድምፅ አሰጣጥም በዚሁ ነው እያሉ።
• የማይሆን ነገር ነው የሚያወሩት!
• ሌላም ብዙ ተሳልቀዋል።
• ምን አሉ?
• ነገሩ በዚሁ ከቀጠለ ቤንዚን የሚስቡ የጎዳና ልጆችንም ተጠቀሙ መባለቸው አይቀርም ሲሉም ተሳልቀዋል።
• ምን?
• ቴሌ ብር!
• በሉ ይሄንን ነገር በፍጥነት ተቆጣጠሩ።
• እንዴት አድርገን?
• ሁሉም ንግድ ባንኮች በግብይቱ እንዲሳተፉ ይደረግ።

[የክቡር ሚኒስትሩ አማካሪ ሰሞኑን የተላለፈው መልዕክት ማንን እንደሚመለከት ሚኒስትሩን እየጠየቀ ነው]

• የትኛውን መልዕክት ነው የምትለው?
• ደቡብ ምዕራብ ላይ የተገነባው ሪዞርት ሲመረቅ የተላለፈውን ማለቴ ነው። እርስዎም እኮ ቦታው ላይ ነበሩ?
• አዎ። ተገኝቼ ነበር፣ ግን የተላለፈውን መልዕክት ዘነጋሁት፣ ምን ነበር?
• ‹‹በኢትዮጵያ የውስጥ ጉዳይ ገብታችሁ የምትፈተፍቱ የውጭ ኃይሎች፣ የእኛን ጉዳይ ለእኛ ተውሉን›› የተባለውን ማለቴ ነው።
• እ … አስታወስኩት። ልክ ነው ማቆም አለባቸው!
• ግን የውጭ ኃይሎች የተባሉት እነማን ናቸው?
• በአጠቃላይ የውጭ ኃይሎችን የሚመለከት ነው።
• ጎረቤት አገርን ይሆን እንዴ?
• ለምን ጎረቤት ጠረጠርክ?
• መልዕክቱ ላይ ጎረቤት አገር ልትሆን እንደምትችል የሚጠቁም ነገር የሰማሁ ይመስለኛል።
• ምን የሚል?
• ብዙ ያልሠራችሁት ነገር ስላለ የእኛን ጉዳይ ለእኛ ተውሉንና በምድራችሁ ያልሠራችሁትን ሥሩ የሚል መልዕክት አብሮ ተላልፏል።
• ታዲያ ይኼ ጎረቤት አገር መሆኑን ይጠቁማል እንዴ?
• መቼም ኃያሏን አገር ሊሆን አይችልም ብዬ ነው። በዚያ ላይ …
• በዚያ ላይ ምን?
• በዚያ ላይ የታሰበው ሳይለቀቅ አይናገሯትም ብዬ አስቤ ነው።
• ለማንኛውም መልዕክቱ ጎረቤት አገርንም ሆነ ኃያሏን አገር በስም አልጠቀሰም።
• ምን አልባት እርሶ የሚያውቁ ከሆነ ብዬ እንጂ በስምማ አልተጠቀሰም።
• መልዕክቱ ሁሉንም የውጭ ኃይሎች የሚመለከት ነው።
• እንዴት ሁሉንም ሊሆን ይችላል ክቡር ሚኒስትር? ቢያንስ በውስጥ ጉዳይ የሚፈተፍቱ መሆን አለባቸው።
• እኮ እንደዚያ የሚያደርጉትን ሁሉንም ማለቴ ነው።
• ግን ጎረቤት አገር እንደምትሆን ይሰማኛል።
• እንዴት? በምን ምክንያት?
• ምክንያቱም ቅድም ከጠቀስኩት ውጤት ሌላ ጠቋሚ ነገር ያለ ይመስለኛል።
• ምን?
• የውጭ ኃይሎችና በተለይ ኢትዮጵያዊ ያልሆኑ ኃይሎች የሚል ጠቋሚ ነገርም በመልዕክቱ ተላልፏል።
• ታዲያ ኢትዮጵያዊ ያልሆኑ የሚለው ምን ይጠቁማል?
• መረጃ እየተቀበሉ የሚጽፉትን ትውልደ ኢትዮጵያዊ ለማለት ፈልገው ይመስለኛል።
• መረጃ የሚቀበሉት ከማን ነው?
• ከጎረቤት አገር መረጃና ደኅንነት ይመስለኛል።
• እኔ ግን እሳቸውን ለማለት የፈለጉ አይመስለኝም።
• ታዲያ ረሺድ አብዲ ነው ሊሉኝ ነው።
• እሱማ እዚህ መጥቷል?
• የት? አዲስ አበባ?
• አዎ!
• በኢንተር ፖል ነው?
• ለምን?
• ታዲያ እንዴት መጣ?
• ተጋብዞ ነዋ!
• ተጋብዞ?
• ለምን አይጋበዝም?
• ከተጋበዘ አይቀርማ በደንብ መጋበዝ አለበት።
• ምን?
• ፍትፍት!