Thursday, July 18, 2024
- Advertisement -
- Advertisement -
ማኅበራዊወቅቱን ያልጠበቀው ዝናብ አዎንታዊና አሉታዊ ገጽታዎች

ወቅቱን ያልጠበቀው ዝናብ አዎንታዊና አሉታዊ ገጽታዎች

ቀን:

በኢትዮጵያ ከፍተኛውን ኢኮኖሚ ከሚይዙ ምርቶች መካከል የግብርና ዘርፍ ቀዳሚውን ይይዛል፡፡ ከቅርብ ጊዜ ወዲህ በስፋት የተጀመረው የመስኖ ልማት ደግሞ፣ የግብርናውን ውጤታማነት ከፍ ቢያደርገውም፣ በተለዩያ ችግሮች ምክንያት በአገሪቱ ለእርሻ ሊውሉ የሚችሉ መሬቶች ፆማቸውን ማደራቸው አልቀረም፡፡

በአሁኑ ወቅት እንኳን አብዛኛውን አርሶ አደር ሞፈርና ቀንበሩን ተሸክሞ እርሻውን ለማረስ ሲኳትን ባልተለመደ መልኩ እየዘነበ ያለው ዝናብ ፈተና ሆኖበታል፡፡ በፈተናውም ችግር ውስጥ ከወደቁት መካከል አርሶ አደር አቶ ወንዱ በቀለ ይገኙበታል፡፡

ከመጋቢት ወር ጀምሮ ባልተለመደ መልኩ እየዘነበ ያለው ዝናብ ለአብዛኛው አርሶ አደሮች ችግር ሆኖብናል ይላሉ፡፡ በተለይ እንደ እሳቸው ዓይነት ዝናብ ጠብቆ ምርት ለሚያመርት አርሶ አደር እንዲህ ዓይነት ዝናብ ሥራቸውን እንዳስተጓጎለው ለሪፖርተር ገልጸዋል፡፡ በተለይም አሁን ላይ የእርሻ ወቅት ስለሆነ አሁን የሚዘንበው ዝናብ ችግር እንደሆነባቸው ተናግረዋል፡፡

በሰኔ ወር ላይ ዘር ለመዝራት አሁን የእርሻ መሬት በተደጋጋሚ ማረስ እንደሚያስፈልግ፣ ነገር ግን ዝናቡ ሊያሳርሳቸው እንዳልቻለ አስረድተዋል፡፡

በተለያዩ ወቅቶች ጤፍ፣ ስንዴ፣ ሽንብራ፣ በቆሎና ሌሎች ምርቶችን በመዝራት ቤተሰቦቻቸውን እንደሚያስተዳድሩ የሚናገሩት እኚህ አርሶ አደር፣ የዝናቡ ሁኔታ በዚሁ ከቀጠለ በቀጣይ አጥጋቢ ምርት ለማምረት እንደሚቸገሩ ተናግረዋል፡፡

ከዚህ በፊት በዚህ ወቅት እንዳሁኑ ዓይነት ለረዥም ጊዜ የቆየ ዝናብ ገጥሟቸው እንደማያውቅ፣ የበልግ መርህን ተከትለው ምርት ለሚያመርቱ አርሶ አደሮች ትልቅ አስተዋጽኦ ቢኖረውም፣ አብዛኛው አርሶ አደር ዝናብን ጠብቆ የሚያመርት በመሆኑ፣ ይህ ዝናብ በአሁኑ ወቅት አያስፈልግም ብለዋል፡፡

የኦሮሚያ ክልል ግብርና ቢሮ ምክትል ኃላፊ አቶ በሪሶ ፌይሳ ለሪፖርተር እንደገለጹት፣ አሁን ያለ ወቅቱ እየዘነበ ያለው ዝናብ በግብርና ዘርፉ አሉታዊም ሆነ አዎንታዊ ተፅዕኖ አሳድሯል፡፡

በክልሉ አንዳንድ አካባቢዎች ባለፉት ስድስት ዓመታት በበልግ ወቅት በቂ ዝናብ ባለመዝነቡ የተነሳ፣ በበልግ ጊዜ የሚመረቱ ምርቶችን በተሻለ መንገድ ለማምረት ተቸግረው እንደነበር አቶ በሪሶ ተናግረዋል፡፡

ዘንድሮ በቂ ዝናብ በመኖሩ የሚፈለገውን ያህል ምርት ሊገኝ መቻሉን ገልጸው፣ በክልሉም በበጋ ወቅት የሚመረቱ ምርቶች በቂ ውኃ እንዲያገኙ እየጣለ ያለው ዝናብ ትልቅ አስተዋጽኦ አበርክቷል ብለዋል፡፡

በበጋ መስኖ ወቅት ተመርቶ የደረሰውን የስንዴ ምርት ለመሰብሰብ እንዲሁም እርሻ ለማረስ አሁን እየዘነበ ያለው ዝናብ በአርሶ አደሮች ላይ አሉታዊ ተፅዕኖ ማሳደሩን፣ በክልሉ በተለያዩ ጊዜያት የተከሰተው የጎርፍ አደጋ በሰብል፣ በእንስሳትና በሰዎች ላይ ከፍተኛ ጉዳት ማስከተሉን አስረድተዋል፡፡

በዘንድሮ በጀት ዓመት አንድ ሚሊዮን ሔክታር በበልግ ለመሸፈን ታቅዶ ከ1.2 ሚሊዮን በላይ መሸፈን መቻሉን፣ ከዚህ አንፃርም በአሁኑ ወቅት እየዘነበ ያለው ዝናብ በጎ ጎኑ እንደሚያመዝን አቶ በሪሶ አስታውሰዋል፡፡

በተለይ በድርቅ ምክንያት የተጎዱ ቦታዎች ላይ ዝናብ መዝነቡ ትልቅ አስተዋጽኦ እንዳለው የተናገሩት ኃላፊው፣ አርሶ አደሮችን ወደ ነበሩበት ለመመለስ አሁን እየጣለ ያለው ዝናብ ጠቀሜታው የጎላ ነው ሲሉ ተናግረዋል፡፡

በሌላ በኩል አሁን ወይም ግንቦት ወር እየዘነበ ያለው ዝናብ ለአርሶ አደሮች ችግር እየፈጠረባቸው መሆኑን፣ የመጀመርያ እርሻ ካረሱ በኋላ ሁለተኛ ለመድገም ሲሉ ለእርሻው የሚሆነው መሬት በውኃ መሞላቱን አክለው ገልጸዋል፡፡

በዚህ የተነሳ ከሚዘራው ዘር በቂ ምርት እንዳይገኝ ያደርገዋል ያሉት ኃላፊው፣ አፈር የመገልበጥና ማሳን የማዘጋጀት ችግር አሁን እየታየ ነው ብለዋል፡፡

በአብዛኛው የኦሮሚያ ክልል ሰኔ ወር የተለያዩ ሰብሎች የሚዘራበት ወቅት ስለሆነ፣ በርካታ አርሶ አደሮች ችግር ውስጥ ሊወድቁ የሚችሉበት አጋጣሚ ይፈጠራል፣ እነዚህን ችግሮች ቀድሞ ለመታደግ ቢሮው እየሠራ ይገኛል ብለዋል፡፡

የአማራ ክልል ግብርና ቢሮ ምክትል ኃላፊ አቶ ቃልኪዳን ሽፈራው በበኩላቸው እንደገለጹት፣ በአሁኑ ወቅት በአማራ ክልል በተለያዩ ቦታዎች ዝናብ ያለ ቢሆንም በሰብል ላይ ምንም ዓይነት ጉዳት አላደረሰም፡፡

በተለይም የምሥራቅ አማራ ዞኖች ሰፊ የሆነ የበልግ ሽፋን ስላላቸው፣ አሁን እየዘነበ ያለው ዝናብ ለሰብል ምርቱ ከፍተኛ የሆነ አስተዋጽኦ እያበረከተ መሆኑን አስረድተዋል፡፡

በዚህ መሠረት ከዚህ በፊት ከነበረው የበልግ ምርት ሽፋን የዘንድሮ ዓመት የተሻለ መሆኑን የተናገሩት ኃላፊ፣ በዚህም የተነሳ በአብዛኛው የግብርና ክፍል ላይ እየዘነበ ያለው ዝናብ ከጉዳቱ ይልቅ ጥቅሙ ያጋደለ ነው ሲሉ አክለው ገልጸዋል፡፡

በሌላ በኩል በክልሉ በተለያዩ ቦታዎች ላይ የመስኖ ልማት እየተካሄደ መሆኑን፣ ክረምት እየተቃረበ በመጣ ቁጥር ውኃ ያጥር እንደነበር፣ ነገር ግን አሁን እየዘነበ በመሆኑ ዘርፉ ላይ የተሻለ ሥራ እንዲሠራ መንገድ ከፍቷል ብለዋል፡፡

ከዚሁ ጎን ለጎን በአሁኑ ወቅት ከመኸር አኳያ የእርሻ ድግግሞሽ የሚካሄድበት ወቅት እንደመሆኑ መጠን እየዘነበ ያለው ዝናብ የተሻለ ዕድል መፍጠሩን ተናግረዋል፡፡

በተለይም ጥቁር አፈር የበዛቸው ቦታዎች አፈሩ ላይ የመሰንጠቅ ችግር ስለሚታይ ለእርሻ ድግግሞሽ አስቸጋሪ እንደነበር ለሪፖርተር ገልጸዋል፡፡

አብዛኛው የምዕራብ አማራ አካባቢ የሚገኙ አርሶ አደሮች ከአሁኑ ጀምሮ እስከ ሰኔ ድረስ በቆሎ የሚዘሩ መሆኑን ኃላፊው ጠቁመዋል፡፡

በምዕራብና በምሥራቅ አማራ አካባቢ በሚያዝያና በግንቦት ወር ማሽላና በቆሎ የሚዘራ ሲሆን፣ በደጋማ አካባቢዎች ደግሞ ድንችና ገብስ እንደሚዘራ አቶ ቃልኪዳን አብራርተዋል፡፡

ከጉዳት አኳያ ደግሞ ሲታይ አሁን እየተተገበረ ባለው የእርሻ ሥርዓት አንደኛ ዙር ከታረሰ በኋላ፣ ሁለተኛ ዙር ለማረስ ሲፈልጉ ዝናቡ አስቸጋሪ እንዳደረገባቸው ተናግረዋል፡፡

በተመሳሳይም በመድረስ ላይ ያሉ የመስኖ ስንዴና ሌሎች ምርቶች 82 በመቶ ቢሰበሰብም፣ 28 ሺሕ ሔክታር ደግሞ በዝናብ ምክንያት አለመሰብሰቡን ኃላፊው ለሪፖርተር ተናግረዋል፡፡

ክልሉ በዘንድሮ በጀት ዓመት 226 ሺሕ ሔክታር መሬትን በበልግ ወቅት ለመሸፈን ዕቅድ ይዞ፣ 230 ሺሕ ሔክታር መሬት መሸፈኑን፣ ለዚህም የወቅቱ ዝናብ ማገዙን አስረድተዋል፡፡

በክልሉ በበልግ ወቅት አብዛኛው መሬት በገብስ ምርት የተያዘ ሲሆን፣ ሌላው ደግሞ የማሽላና የስንዴ ሰብል መሆናቸውን ገልጸዋል፡፡

በሌላ በኩል በክልሉ የተሰበሰቡ ሰብሎችን ወቅተው ወደ ጎተራ ለማስገባት ችግር የሆነባቸው አካባቢዎች እንዳሉ አስረድተዋል፡፡  

የግብርና ሚኒስቴር የሰብል ልማት መሪ ሥራ አስፈጻሚ አቶ ኢሳይያስ ለማ እንደለገጹት፣ በአሁኑ ወቅት ያለው ዝናብ የግብርና ዘርፉ ላይ ያን ያህል ችግር አልፈጠረም፡፡

በኦሮሚያ፣ በአማራና በደቡብ ክልሎች በተለያዩ ቦታዎች በበልግ ወቅት ሰብሎችን እንደሚያለሙ፣ ደቡብ ክልል 50 በመቶውን ድርሻ በማልማት ትልቁን ድርሻ እንደሚይዝ ተናግረዋል፡፡

ሰላሳ በመቶ ደግሞ ኦሮሚያ ክልል የሚያመርት ሲሆን፣ ቀሪው በአማራ ክልል የሚለማ መሆኑንና እስካሁንም እየዘነበ ያለው ዝናብ በሰብል ላይ ምንም ዓይነት ችግር አለመፍጠሩን ገልጸዋል፡፡

በአሁኑ ወቅት በአንዳንድ ቦታዎች ላይ በተወሰነ መልኩም ቢሆን አርሶ አደሮች እርሻ ለማረስ መቸገራቸውንና ይህንንም ችግር ለመፍታት እንደ ግብርና ሚኒስቴር እየተሠራ መሆኑን ጠቁመዋል፡፡

በበልግ ወቅት ከሚመረቱ ምርቶች መካከል ማሽላ፣ ቦሎቄ፣ ስንዴ፣ ጤፍና ሌሎች ምርቶች ይገኙበታል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ቀጣናዊ ገጽታ የያዘው የኢትዮ ሶማሊያ ውዝግብ

ከአሥር ቀናት ቀደም ብሎ በተካሄደው የፓርላማ 36ኛ መደበኛ ስብሰባ፣...

የኢንሹራንስ ኩባንያዎች በዓረቦንና የጉዳት ካሳ ክፍያዎች ላይ ተጨማሪ እሴት ታክስ መጣሉን ተቃወሙ

በአዲሱ ተጨማሪ እሴት ታክስ አዋጅ ውስጥ የኢንሹራንስ ከባንያዎች ለሚሰበስቡት...

የዘንድሮ ነገር!

ጉዞ ከስድስት ኪሎ ወደ ካዛንቺስ፡፡ ከእንጦጦ በኩል ቁልቁል እያስገመገመ...