Thursday, June 20, 2024
- ማስታወቂያ -
- ማስታወቂያ -

ሒጅራ ባንክ ወደ አትራፊነት ተሸጋገረ

spot_img

ተዛማጅ ፅሁፎች

በኢትዮጵያ የፋይናንስ ኢንዱስትሪ ውስጥ ሙሉ ለሙሉ ከወለድ ነፃ የባንክ አገልግሎት ከሚሰጡ ባንኮች መካከል አንዱ ሒጅራ ባንክ ነው፡፡ ከወለድ ነፃ የባንክ የባንክ አገልግሎት ለመስጠት ሁለተኛው ባንክ ሆኖ ወደ ሥራ ከገባም አንድ ዓመት ከአሥር ወራትን አስቆጥሯል፡፡ ወደ ሥራ በገባበት በመጀመርው ዓመት በአሥር ወራት ውስጥ ያስመዘገበው ውጤት አመርቂ ስላልነበረ ኪሳራ ያጻፈበት ዓመት ሆኖ ነበር፡፡ በወቅቱ የነበረው አፈጻጸም የተጠበቀውን ያህል ባለመሆኑ ባንኩ ይዞ የተነሳውን ስትራቴጂ እስከመቀየር ደርሶ በ2015 የሒሳብ ዓመት እጅግ ከፍተኛ የተባለ ውጤት ማስመዝገብ እንዳስቻለው ገልጿል፡፡ ባለፈው ዓመት ገጥሞት ከነበረው ኪሳራ ወጥቶም ከፍተኛ እድገት የታየበት ትርፍ ወደ ማምጣት መሸጋገሩን የባንኩ የሥራ ኃላፊዎች አስታውቀዋል፡፡

ሒጅራ ባንክ የሥራ አስፈጻጸሙን በተመለከተ ሰኔ 30 ቀን 2015 ዓ.ም. በሰጠው ጋዜጣዊ መግለጫ በቀደመው ዓመት የታየው ዝቅተኛ አፈጻጸም ባንኩን በቁጭት እንዲሠራ በማድረግ፣ በዘንድሮው የሒሳብ ዓመት በኢንዱስትሪው ውስጥ ከፍተኛ የሚባለውን የትርፍ ዕድገት ያስመዘገበ ባንክ እንዲሆን አስችሎታል ብሏል፡፡

የባንኩ የሥራ ኃላፊዎች በዝርዝር ያቀረቡት አኃዛዊ መረጃዎች እንደሚያመለክቱትም፣ ሒጅራ ባንክ በ2015 የሒሳብ ዓመት በተለያዩ ዘርፎች ያስመዘገበው ውጤት በብዙ እጥፍ ዕድገት የታየበት ነው፡፡   

የባንኩ ተጠባባቂ ፕሬዚዳንት አቶ ዳዊት ቀኖ እንዳመለከቱትም፣ በተጠናቀቀው የሒሳብ ዓመት ባንኩ ያገኘው የትርፍ መጠን 162 በመቶ የትርፍ ዕድገት አስመዝግቧል፡፡ የትርፍ ምጣኔ ዕድገቱ ብቻ ሳይሆን በሌሎች የባንኩ የሥራ አፈጻጸሞች ስኬት ማስመዝገበ መቻላቸውንም ጠቁመዋል፡፡ ባንኩ ባለፈው ዓመት 162 ሚሊዮን ብር ኪሳራ ማጻፉ የሚታወስ ሲሆን፣ ዘንድሮ ግን ከዚህ ወጥቶ ከታክስና ከሌሎች ተቀናሾች በፊት 70 ሚሊዮን ብር በላይ ማትረፍ ችሏል፡፡ ይህም ሙሉ በሙሉ ከወለድ ነፃ ባንክ አገልግሎት ከተጀመረ ወዲህ ወደ ትርፍ መሸጋገሩን ይፋ ያደረገ ባንክ እንዲሆን አስችሎታል፡፡  

ባንኩ በሒሳብ ዓመቱ ከፍተኛ የሆነ ውጤት አስመዝግቤበታለሁ ብሎ የጠቀሰው ሌላው አፈጻጸሙ በተቀማጭ ገንዘብ አሰባሰብ ረገድ ያገኘው ውጤት ነው፡፡ በዚህ ረገድ ባንኩ በሒሳብ ዓመቱ ከአምስት ቢሊዮን ብር በላይ ገንዘብ በማሰባሰብ አጠቃላይ የተቀማጭ ገንዘብ መጠኑን ከ6.3 ቢሊዮን ብር በላይ ማድረስ ችሏል፡፡ ይህም ካለፈው የበጀት ዓመት አፈጻጸም ጋር ሲነፃፀር በ273 በመቶ ዕድገት ያስመዘገበ መሆኑን አቶ ዳዊት ገልጸዋል፡፡ የባንኩ የቀደመ ዓመት ተቀማጭ የገንዘብ መጠን 1.3 ቢሊዮን ብር እንደነበር ይታወሳል፡፡ የባንኩ አስቀማጭ ደንበኞችን ከማሳደግ አንፃርም በሒሳብ ዓመቱ መጨረሻ ላይ የደንበኞቹን ቁጥር በ122 በመቶ በማሳደግ ከ300 ሺሕ በላይ ማድረሱን ባንኩ አስታውቋል፡፡ የቅርንጫፎቹን ብዛትም በ80 መቶ ማሳደግ የቻለው ሒጅራ ባንክ በሒሳብ ዓመቱ መጨረሻ ላይ ቅርንጫፎቹን 72 ማድረስ ችሏል፡፡ የባንኩ ባለሙያዎች ከቅርንጫፍ ማስፋፋት ጋር በተያያዘ በሰጡት ማብራሪያ፣ ባንኩ ካሉት ቅርንጫፎች ውስጥ 52 የሚሆኑትን ከአዲስ አበባ ውጪ የከፈታቸው ናቸው፡፡ በአዲስ አበባ ከተማ ያሉት 19 ቅርንጫፎች ናቸው፡፡ ይህ የሆነበት ዋነኛ ምክንያት ባንኩ ተጠቃሚዎች ሊኖሩ በሚችሉባቸው የክልል ከተሞች ትኩረት አድርጎ በመሥራቱ መሆኑን አመልክተዋል፡፡

 ሒጅራ ባንክ የሒሳብ ዓመቱ ሌላው ስኬት ነው ብሎ ያመለከተው አፈጻጸሙ የሀብት መጠን ዕድገቱን ነው፡፡ በሒሳብ ዓመቱ መጨረሻ ባንኩ በ207 በመቶ ሀብቱን በማሳደግ 7.1 ቢሊዮን ብር ማድረስ ችሏል፡፡

በተለይ ዓመታዊ ገቢው ከሁሉም የላቀ አፈጻጸም የታየበት እንደሆነ የሚያመለክተው የባንኩ መረጃ፣ በሒሳብ ዓመቱ መጨረሻ ላይ ዓመታዊ ገቢውን በ1,442 በመቶ በማሳደግ ከ440 ሚሊዮን ብር በላይ ማድረስ ችሏል፡፡ በቀዳሚው ዓመት አግኝቶት የነበረው ገቢ 27 ሚሊዮን ብቻ እንደነበር ተጠቅሷል፡፡ በሒሳብ ዓመቱ ከፍተኛ ለውጥ የታየበት ሌላው የሥራ አፈጻጸም በተለያዩ የቢዝነስ ዘርፎች የሰጠው ብድር ነው፡፡  ባንኩ ካሰባሰበው ተቀማጭ ገንዘብ መጠን ፋይናንስ ያደረገው (ያበደረው) የገንዘብ መጠን ከቀዳሚው ዓመት በ937 በመቶ ዕድገት አሳይቷል፡፡ ከብድር አሰጣጡ ጋር በተያያዘ ከተሰጠው ማብራሪያ መገንዘብ እንደተቻለውም ለብድር ማዋል ከሚቻለው ገንዘብ ውስጥ 72 በመቶ ወይም ከ 3.9  ቢሊዮን ብር በላይ ብድር ሰጥቷል፡፡ በቀደመው ዓመት ግን ለብድር የዋለው የገንዘብ መጠን 370 ሚሊዮን ብር ነበር፡፡  

እንደ አቶ ዳዊት ገለጻ፣ ሒጅራ ባንክ እነዚህን ዘርፈ ብዙ ስኬቶችን ማስመዝገብ የቻለው በአጠቃላይ ኢንዱስትሪው በከፍተኛ ውድድር ላይ ባለበት፣ እንዲሁም እንደ አገር በኢኮኖሚው ዘርፍ ከፍተኛ ጫና በሚስተዋልበት ወቅት መሆኑ ስኬቱን እጥፍ ድርብ ያደርግልዋል ብለዋል፡፡

ሒጅራ ባንክ በወለድ አልባ የባንክ አገልግሎት ዘርፍ በቴክኖሎጂ የተደገፈ አገልግሎቱን ከማስፋት አንፃር በኢትዮጵያ አዲስ የሆነ ሙሉ ለሙሉ የወለድ ነፃ ባንኮችን ብቻ ታሳቢ ተደርጎ የተበለፀገ ቴክኖሎጂ እየተገበረ መሆኑን ደግሞ የባንኩ ዳይሬክተሮች ቦርድ ሰብሳቢ አቶ አብዱ ሰላም ከማል ገልጸዋል፡፡ ይህ ቴክኖሎጂ  ከዓለም አቀፍ ከሸሪዓ መርህ ጋር ሙሉ ለሙሉ የተጣጣመ፣ ለዚህም ከዓለም አቀፉ ምዘና ተቋም በየዓመቱ ማረጋገጫ የሚሰጠው፣ በዓለም አቀፍ ከ165 በላይ የሆኑ ከወለድ ነፃ አገልግሎት የሚሰጡ ባንኮች የሚገለገሉበት ‹‹አይማል ኮር ባንኪንግ›› የተሰኘ ሲስተም መሆኑን ገልጸዋል፡፡

ባንኩ ሸሪዓን መሠረት ያደረገ የወለድ ነፃ ባንክ አገልግሎቱን እያሳደገ ሲሆን፣ እስካሁን ሲሰጣቸው ከነበሩ አገልግሎቶች በተጨማሪ፣ አዳዲስ አገልግሎቶችን እንደሚጀምርም በዚሁ መግለጫ ላይ ተገልጿል፡፡ የባንኩን የ2015 የሒሳብ ዓመት አፈጻጸም በአጠቃላይም ከወለድ ነፃ ባንክ አገልግሎት አሰጣጥ ላይ ገለጻ ያደረጉት የሒጅራ ባንክ የሸሪዓ አማካሪ ኮሚቴ ሰብሳቢ ኡስታዝ አቡበከር የተመዘገበውን ውጤት ለማግኘት በርካታ ሥራዎች ተሠርተዋል ብለዋል፡፡ ‹‹ተያይዘን መሥራት ከቻልን ነገም የተሻለ ውጤት ማስመዝገብ እንደሚቻል ዘንድሮ የተገኘው ውጤት ትልቅ ማሳያ ነው፤›› ብለዋል፡፡ አሁንም ዕድሎችን በአግባቡ መጠቀምና በጋራ ተያይዞ መጓዝ ለአገርም ጭምር የሚጠቅም መሆኑን ኡስታዝ አቡበከር ገልጸዋል፡፡

ባንኩ በሒሳብ ዓመቱ ያገኘውን ስኬት የበለጠ ለማጠናከርና ባንኩን በተደላደለ መሠረት ላይ ለማስቀመጥ ከዚህ ቀደም አክሲዮን የመግዛት ዕድል ላላገኙ አክሲዮን መሸጥ እንደሚጀምርም አስታውቋል፡፡

ሂጅራ ባንክ ከብሔራዊ ባንክ ፈቃድ በማግኘት ሙሉ ለሙሉ ሸሪዓን መሠረት ያደረገ የወለድ አልባ አገልግሎት ለመስጠት ሥራ የጀመረው ነሐሴ 29 ቀን 2013 ዓ.ም. ሥራ ነው፡፡ በአሁኑ ወቅት ከ12 ሺሕ በላይ ባለአክሲዮኖች አሉት፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች