[ክቡር ሚኒስትሩ ከፖለቲካ አማካሪያቸው ጋር በወቅታዊ ጉዳዮች ዙሪያ እየተወያዩ ነው]

• ክቡር ሚኒስትር ከማኅበረሰባችን በተለያየ መልኩ ከፍተኛ ተቃውሞ እየደረሰብን መሆኑ ሥጋት ፈጥሮብኛል።
• አትሥጋ… መፍትሔ መፈለግ እንጂ መሥጋት ጥሩ አይደለም፡፡
• ለመፍትሔውም እኮ አቅም ያስፈልጋል።
• እንዴት? አቅም የለንም እያልክ ነው?
• ክቡር ሚኒስትር ነገሩ የተለመደው የተፎካካሪ ፖለቲካ ፓርቲዎች ጫና ሳይሆን ከፍተኛ የኢኮኖሚ አቅም የሚጠይቅ የማኅበረሰብ ተቃውሞ ነው።
• እንደለመድከው የኑሮ ውድነቱ ከቁጥጥር ውጪ እየወጣ ነው ልትል ነው አይደል?
• እሱ አንደኛው ነው ነገር ግን ሌላም ችግር ተከስቷል።
• የምን ችግር?
• የአፈር ማዳበሪያ ችግር።
• የማዳበሪያ ችግር ዓለም አቀፍ እንጂ በእኛ ሀገር ብቻ የተከሰተ አለመሆኑን አታውቅም?
• ቢሆንም ክቡር ሚኒስትር ይህንን ለአርሶ አደሩ ማስረዳት አስቸጋሪ ነው።
• ለምን?
• መሬቱን አባልጋችሁ ዛሬ ማዳበሪያ የለም ማለት አትችሉም ብሎ እያመጸ ነው።
• እያመጸ ነው ማለት?
• በተለያዩ አካባቢዎች ሰለማዊ ሠልፍ እየወጣ ሲሆን በአንዳንድ አካባቢዎች ደግሞ…
• እ… በአንዳንድ አካባቢዎች ምን?
• የማዳበሪያ መጋዘኖችን በመስበር መቆጣጠርና ያለውን ክምችት በራሱ መንገድ መከፋፈል ጀምሯል።
• ከአርሶ አደሩ ያልተለመደ ፀባይ ነው።
• ክቡር ሚኒስትር ይህንን ችግር ቶሎ መፍትሔ መስጠት ካልቻልን አደገኛ ልምምድ ነው። ለመንግሥት ሥልጣንም አስጊ ነው።
• የመንግሥትን ሥልጣን ለምን ያሠጋል?
• ክቡር ሚኒስትር በዚህ ሁኔታ ማለቴ ከከተማ እስከ ገጠሩ አርሶ አደር ተቃውሞ እያነሳብን ቀጣዩን ምርጫ እናሸንፋለን ብለው ያስባሉ?
• አትጠራጠር!
• እንዴት?
• እኛ የዚህን አገር የፖለቲካ ውድድር ጣሪያ ከፍ አድርገነዋልና አትሥጋ፣ የሚደረስብን የለም።
• እንዴት?
• እኛ ያደረግነውን መፈጸም የሚችል ተፎካካሪ የለም።
• ተፎካካሪ ፓርቲዎች ማድረግ የማይችሉት ምን የተለየ ነገር እኛ አደረግን።
• ለባለቤቱ ስላማይታይ እንጂ ብዙ የተለዩ ነገሮችን አድርገናል።
• ለምሳሌ ምን?
• የደካሞችን መኖሪያ ቤት ማደስ።
• እ…
• ችግኝ መትከል
• እ….
• ማዕድ ማጋራት።
• ክቡር ሚኒስትር አርሶ አደሩ እኮ የተቆጣው አሥግቶት ነው።
• ምን አሥግቶት?
• ማዕድ አጋሩኝ ማለት።

[ክቡር ሚኒስትሩ በአገሪቱ የተከሰተው ከፍተኛ የዋጋ ግሽበትን ለመቆጣጠር ያለመ ውይይት ከኢኮኖሚ ጉዳዮች አማካሪያቸው ጋር እያደረጉ ነው]

• የዋጋ ግሽበትን ለመቆጣጠርና ወደ ነጠላ አኃዝ ለማውረድ ለሕዝብ ቃል ብንገባም ግሽበቱ ተባብሶ ቀጥሏል።
• እውነት ነው ክቡር ሚኒስትር። ግሽበቱ ተባብሶ ቀጥሏል!
• ተባብሶ መቀጠሉን እንድታረጋግጥልኝ አይደለም የጠራሁህ?
• ገብቶኛል ክቡር ሚኒስትር። በፍጥነት መፍትሔ ካልሰጠነው ነገሮች ከቁጥጥራችን ውጪ ሊወጡ ይችላሉ፡፡
• እሱን እንድትነግረኝ አይደለም የጠራሁህ!
• ታዲያ ለምንድነው ክቡር ሚኒስትር?
• መሠረታዊ ሸቀጦች ላይ የተጣሉ ቀረጥና ታክስ፣ በተለይም ቫት ቢነሳ ግሽበቱን መቆጣጠር ይቻላል ባልከው የመፍትሔ ሐሳብ መሠረት እንዲነሳ ተደረጓል ነገር ግን ግሽበቱ ተባብሶ ቀጥሏል።
• እውነት ነው ክቡር ሚኒስትር። የመፍትሔ ሐሳቡ ይሠራል ብለን ቀረጥና ታክስ ብናነሳም የሸቀጦች ዋጋ ሊወርድ አልቻለም። እንደውም ተባብሶ ቀጥሏል።
• እሱን እንድታረጋግጥልኝ አይደለም የጠራሁህ!
• እሺ ለምንድነው?
• ያቀረብከው ሐሳብ መፍትሔ ያመጣል ባልከው መሠረት በስድስት ወራት ውስጥ 18 ቢሊዮን ብር የሚሆን ቀረጥና ታክስ እንዳይሰበሰብ ተደርጎ ምርቶች እንዲገቡ ተደርጓል ነገር ግን የዋጋ ግሽበቱ ተባብሶ ቀጠለ እንጂ አልተረጋጋም።
• እውነት ነው ክቡር ሚኒስትር። እንደተባለው 18 ቢሊዮን ብር የሚሆን ቀረጥና ታክስ እንዳይከፈል ቢደረግም የዋጋ ግሽበቱ ቀጥሏል።
• እኮ ይህን ያህል ገቢ ቀሪ ተደርጎ እንዴት ዋጋ ማረጋጋት አልተቻለም?
• እሱ የእኛም ጥያቄ ነው ክቡር ሚኒስትር። ነገር ግን የምጠረጥረው ነገር አለ።
• ምንድነው የጠረጠርከው?
• እኛ ቀረጥና ታክስ እንዳይከፈል ብንወስንም አስመጪዎቹ ግን ይከፍሉ እንደነበር እጠረጥራለሁ። ለነገሩ ጥርጣሬ ብቻ አይደለም።
• እንዴት? ይከፍሉ ነበር እያልክ ነው?
• ክቡር ሚኒስትር እኛ ቀረጥና ታክስ እንዲነሳ ብንወስንም ማዕከላዊ ባንኩ የዶላር ምንዛሪ ተመንን በየቀኑ ከፍ እያደረገ ስለነበር ቀረጥና ታክስ መነሳቱ ትርጉም አልነበረውም።
• እንዴት? ምን አገናኘው?
• አስመጪዎቹ ዶላር መንዝረው የዘይትና ሌሎች ሸቀጦች ግዥ ፈጽመው ሸቀጡ አገር ውስጥ ሲደርስ የዶላር ምንዛሪ ተመን በከፍተኛ ደረጃ ጨምሮ ያገኙታል።
• እኮ ምን አገናኘው? ያስመጡትን ዘይት በዶላር አይሸጡ?
• በዶላር ቢሸጡትማ ጉዳት አይገጥማቸውም ነበር።
• ምን እያልክ ነው?
• በመቶ ዶላር የገዙት ዘይት አዲስ አበባ ሲደርስ የመቶ ዶላር የብር ምንዛሪ አሻቅቦ ይጠብቃቸዋል። አሱ ላይ ትርፍ ጨምረው ዘይቱን ይሸጡታል። ስለዚህ የዘይትን ዋጋ ያስወደዱት አስመጪዎች ብቻ ናቸው ማለት አስቸጋሪ ነው።
• አሃ… መንግሥት የዕለት ፍጆታ ሸቀጦችን በውጭ ምንዛሪ እያስገባ በጎን በኩል ደግሞ የብር የመግዛት አቅምን ማዳከም መቀጠሉ ትክክል አይደለም እያልክ ነው? አሁን እያልክ ያለኸው ገብቶኛል መሰለኝ፣ አይደል?
• ልክ ነዎት ክቡር ሚኒስትር። ችግሩን በትክልል ተረድተውታል። በአጠቃላይ ከውጭ የሚገባ ዘይት ላይ መንግሥት ሳያውቀው ዋጋ እየጨመረ ነበር ማለት ይቻላል።
• እህ… እና ምን ማድረግ ይሻላል ትላለህ?
• የአጭር ጊዜ መፍትሔው የብር ምንዛሪን የማዳከም ሒደት ለጊዜው እንዲቆም ማድረግ ነው። ሌላው …
• ሌላው የረዥም ጊዜ መፍትሔ ነው።
• ምንድነው?
• ቢያንስ የዕለት ፍጆታ ሸቀጦችን በአገር ውስጥ ማምረት ወይም መተካት ካልቻልን ከችግሩ በዛላቂነት መውጣት አንችልም። የዋጋ ግሽበት የአገሪቱ አዙሪት ሆኖ ይቀጥላል።