Friday, July 12, 2024
- Advertisement -
- Advertisement -
ዝንቅ‹‹አሳዳጅ በደጅ››

‹‹አሳዳጅ በደጅ››

ቀን:

የጎጃሙ ገዢ ደጃዝማች ብሩ ደፋርና ኃይለኛ ተዋጊ ነበሩ፡፡ ተድላ ጉዋሉ የተባለ የስልጣን ተፎካካሪ ነበራቸው፡፡ ከለታት አንድ ቀን፣ ተድላ ለደኅንነቱ ስለ ሠጋ ዓባይን ተሻግሮ በሌሎች ገዥዎች ክንድ ሥር ለመጠለል አሰበ፡፡ ጥቂት ቦታዎች ያልተሳካ ጥረት ካደረገ በሁዋላ መጨረሻ ላይ ነገዎ ገመዳ የተባለ የጃርሶ (ሰላሌ) ጌታ ጥገኝነት ሊሰጠው ተስማማ፡፡

ደጃች ብሩ ይህንን እንደ ሰማ በንዴት ጤሰ! ‹‹ጠላቴን ሸሽገህ ይዘሀልና መጣሁልህ›› ብሎ ለነገዎ ማስጠንቀቂያ ላከበት! ነገዎ ገመዳ ማስፈራርያው እንደደረሰው፥ ሠራዊቱን ከየቦታው ባዋጅ ጠርቶ ሰላሌ ሜዳ ላይ ጉግስ ጨዋታ አካሄደ፡፡ አላማው የፈረሰኞቹን ብዛት እና ንቃት ለጠላቶቹ ለማሳየት ነበር፡፡ በዛሬው አነጋገር ወታደራዊ ሰልፍ ማካሄዱ ነው፡፡ ይህንን የተመለከቱ የብሩ ሰላዮች ጉዳዩን ለጌታቸው አመለከቱ፡፡

ብሩ ግን ከውሳኔው ንቅንቅ አላለም፡፡ ወደ ሰላሌ ሄዶ የነገዎ ገመዳን ፈረሶች ‹‹ቂጥለቂጥ እንደሚያማታ›› ዛተ፡፡

መካሪ መኮንንኖች ግን እንዲህ አሉት

‹‹ግዴለም ይቅርብን! አሳዳጅ በደጅ አንሁን!››

ዋናዋ ነጥብ ‹‹አሳዳጅ በደጅ አንሁን›› የምትለው ምክር ናት! በሰፈራቸው፥ በሜዳቸው ብንገጥማቸው ያሸንፉናል ማለት ነው (ናፖሊዮን ቦናፖርት እንዲህ የተባ መካሪ የነበረው ቢኖረው ሩስያ ገብቶ አይዋረድም ነበር)፡፡

ደጃች ብሩ የመኳንንቱን ምክር ተቀብሎ ዘመቻውን አጠፈው፡፡

ፍቅር እስከመቃብር በተባለው የሐዲስ ዓለማየሁ ዝነኛ ልቦለድ ውስጥ ካሉት ዋና ታሪኮች አንዱ የባላገሮች አድማ ነው፡፡

ፊታውራሪ መሸሻ የተባሉት ጌታ የዓመት በአል መዋያ የሚል አዲስ ግብር በባላገሮች ላይ ጣሉባቸው፡፡ ባላገሮች እምቢ አንከፍልም አሉ፡፡ ፊታውራሪ ጉልበታቸውን ተማምነው የሚንቁትን ያመጸ ባላገር በዘመቻ ለመቅጣት ቆረጡ፡፡

መካሮች ተሰበሰቡ፡፡ የድሮ መካር እንደ ዛሬ ‹‹በለው ! በለው !›› አይልም፡፡ ጌታው ፈረስ ከሆነ መካሩ ልጉዋም ይሆናል፡፡ መካሮች ተናገሩ፡፡

‹‹ባላገር ሕይወቱንም ጥይቱንም ቆጥቦ ነው እሚዋጋ ፥ ጠላቱ እሱን በመፈለግና በራብና በጥም እስኪደክም ፊትለፊት ተሰልፎ አይገጥምም! ባገሩ እህል ውኃው የሱ ስለሆነ ዱር ገደሉ ተራራው ሸንተረሩ፥ ሁሉም የሱ ስለሆነ ፥ እህል ውሀውን ሸሽጎ፥ እሱ በዱር ገደሉ ተሸሽጎ ብዙ ሰው ሳይሞትበት ፥ ብዙ ጥይት እንኩዋ ሳይጠፋበት፥ ድል ያደርጋል! ያደመ ባላገርን አሸንፋለሁ ብሎ ማሰብ ውቅያኖስን ጠልቄ እጨርሳለሁ እንደማለት ነው፡፡››

ፊታውራሪ መሸሻ እንደ ደጃች ብሩ ምክር የሚሰሙ አልነበሩም፡፡ አሻፈረኝ ብለው ጦራቸውን አስከትለው ወደ አደሙት ባላገሮች ዘመቱ! ባላገሮች አበጀ በለው በተባለ ሽፍታ መሪነት የሚደንቅ ነገር አደረጉ፡፡ ፊታውራሪ መሸሻ ወደ ሰፈራቸው ዘው ብለው እንዲገቡ በሩን ከከፈቱላቸው በሁዋላ አዘናግተው፥ ከብበው፥ ከምክትል ሚስታቸው ጋር በተኙበት ማረኳቸው፡፡

የምንኖረው በቅራኔዎች በተሞላ ዓለም ውስጥ ነው፡፡ ከቅራኔዎች እሚገላግለን ምናልባት ሞት ሳይሆን አይቀርም፡፡ ፖለቲካ ማለት ቅራኔዎችን ከናካቴው ማስቀረት ሳይሆን ቅራኔዎችን ለከፋ ጉዳት እንዳይዳርጉ አድርጎ ማርገብ ነው፡፡ የሆነ አካባቢ ማኅበረሰብ ሲያምጽ የአመጽ ምንጭ የሆኑትን ሮሮዎች እህ ብሎ መስማት፡፡ ችግሮችን ማዳመጥ እና ለመፍታት መፍቀድ የመንግሥት ዋና ሥራ መሆን አለበት፡፡ ለገበሬ ማዳበርያ በጊዜው ማቅረብ፡፡ ሕዝቡ አስተዳዳሪዎቹን ራሱ እንዲመርጥና እንዲሽር መፍቀድ፥ በሰላም ተዘዋውሮ እንዲኖር፥ እንዲሠራና የቤት ንብረቱ ባለቤት እንዲሆን ማገዝ፡፡ ወዘተርፈ…፡፡

በተረፈ በገዛ መንደሩ ላይ ወታደር አሰማርቶ ብሶቱን ለማፈን መሞከር ከታሪክም ከሥነ ጽሑፍም አለመማር ነው፡፡ ቅራኔዎችን ማራገብ ትተን ቅራኔዎችን ማርገብ ይልመድብን!

  • በእውቀቱ ሥዩም
spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የሰብዓዊ መብት ጉዳይና የመንግሥት አቋም

ሰኔ ወር አጋማሽ የተባበሩት መንግሥታት ድርጅት (ተመድ) ከፍተኛ የሰብዓዊ...

ከሰሜኑ ጦርነት አገግሞ በሁለት እግሩ ለመቆምና ወደ ባንክነት ለመሸጋገር የተለመው ደደቢት ማክሮ ፋይናንስ

በኢትዮጵያ የፋይናንስ ኢንዱስትሪ ውስጥ በቀዳሚነት ስማቸው ከሚጠቀሱት ውስጥ ደደቢት...