Friday, May 17, 2024
- Advertisement -
- Advertisement -

ማኅበራዊበትግራይ ክልል ለሁለት ዓመታት ጡረታ ያልተከፈላቸው አረጋውያን በምግብ እጥረት እየሞቱ መሆኑ ተሰማ

በትግራይ ክልል ለሁለት ዓመታት ጡረታ ያልተከፈላቸው አረጋውያን በምግብ እጥረት እየሞቱ መሆኑ ተሰማ

ቀን:

በትግራይ ክልል ከሁለት ዓመታት በላይ የጡረታ ደመወዝ ያልተከፈላቸው አረጋውያን በምግብ እጥረት ለሕልፈተ ሕይወት እየተዳረጉ መሆኑን የክልሉ አረጋውያን ማኅበር ገለጸ፡፡

የክልሉ አረጋውያን ማኅበር ለሪፖርተር እንደገለጸው፣ ከዓመታት በፊት ጡረታ የወጡ አረጋውያን ብዛት 75 ሺሕ ነበር፡፡ አሁን ላይ ቁጥራው በውል ባይታወቅም አዳዲስ ጡረታ የወጡ ሰዎች አሉ፡፡ አዳዲሶቹን ጨምሮ በአጠቃላይ የሚገኙ ጡረተኞች ወደ 100 ሺሕ ቢሆንም፣ የጡረታ ደመወዝ ስላልተሰጣቸው በምግብ እጥረት እየሞቱ እንደሆነ አስታውቋል፡፡

ከሁለት ዓመታት በላይ የጡረታ ደመወዝ ያልተከፈላቸው አረጋውያን በምግብ እጥረት እየሞቱ መሆኑን የማኅበሩ ሊቀመንብር አቶ አርዓያ ገሠሠ አስረድተዋል፡፡

- Advertisement -

የሰባት ወር የሚሆን ተብሎ የጡረታ ደመወዝ እንደተለቀቀላቸው፣ ይሁን እንጂ የተወሰኑ ሰዎች ቢያገኙም አብዛኛዎቹ ገና በመጠባበቅ ላይ እንዳሉ አክለዋል፡፡

ምን ያህል አረጋውያን ደመወዝ እንደተሰጣቸው፣ ያልተሰጣቸው ምን ያህል እንደሆኑ፣ በአጠቃላይ ለጡረታ ያልተከፈለው ገንዘብ ምን ያህል እንደሆነ ከሪፖርተር ለቀረበላቸው ጥያቄ በሰጡት ምላሽ፣ ‹‹ዝርዝሩን መያዝ አልተቻለም፡፡ በመቀሌ አካባቢ ብቻ ያሉት ናቸው ያገኙት፡፡ የአበሉ ደረጃ የተለያየ ነው፤›› ብለዋል፡፡

እንደሚታወቀው ዕድሜ ከገፋ ተደራራቢ የደም ግፊት፣ የስኳር ሕመሞች እንደሚከሰቱ፣ ከጡረተኞች መካከልም በእንዲህ ዓይነት ሕመሞች የተጠቁ እንዳሉ ያስረዱት አቶ አርዓያ፣ ‹‹እኔ ራሴ ሁለት ዓመት ተኝቼ የተነሳሁትና መንቀሳቀስ የጀመርኩት አሁን ነው፤›› ሲሉ አስረድተዋል፡፡

ጡረተኞች ከደመወዛቸው ብር እየጠቆረጠ እንዲቀመጥላቸው የሚደረገው አቅመ ደካሞች በሚሆኑበት ወቅት እንዲረዳቸው መሆኑን አስረድተው፣ የፌዴራሉ መንግሥት ችግሩን እንዲቀርፍ ጠይቀዋል፡፡

ለሁለት ዓመታት የጡረታ ደመወዝ አልተከፈላቸውም ከተባሉት አረጋውያን መካከል በምግብ እጥረት የሞቱት ምን ያህል እንደሆኑ ከሪፖርተር ለቀረበላቸው ጥያቄ በሰጡት ማብራሪያም፣ ‹‹ዞረን እንዳንቆጥር አቅም የለም፡፡ ትራንስፖርት የለም፤›› ብለዋል የማኅበሩ ሊቀመንበር፡፡

ጉዳዩን በተመለከተ ምን ምላሽ እንዳላቸው ከፌዴራል የመንግሥት ማኅበራዊ ዋስትና ኤጀንሲ የተደረገው ሙከራ ስልክ ባለማንሳታቸው ሳይሳካ ቀርቷል፡፡

ከጥር ወር 2015 ዓ.ም. ወዲህ በክልሉ ከ1,300 በላይ ሰዎች በረሃብ መሞታቸውን፣ የክልሉ አደጋ ሥጋት አመራር ኮሚሽን፣ ለፌዴራልና ለዓለም አቀፍ ሰብዓዊ ድርጅቶች ዓርብ ሐምሌ 14 ቀን 2015 ዓ.ም. ባቀረበው ሪፖርት አስታውቆ ነበር፡፡

በስርቆት ምክንያት የዕርዳታ ድጋፍ ካቆመ ጊዜ ወዲህ ሕይወታቸው በጥር ወር አልፏል የተባሉት 1,300 በላይ ሰዎች ቁጥር ከ1,400 በላይ ከፍ ማለቱን፣ የክልሉ አደጋ ሥጋት ኮሚሽን ከዞኖች የደረሰው ሪፖርት እንደሚያስረዳ ለተለያዩ የሚዲያ አውታሮች ይፋ ማድረጉ ይታወሳል፡፡

ኮሚሽኑ የሟቾቹን ቁጥር ይፋ ያደረገው፣ በማዕከላዊ ዞን 22 ወረዳዎች፣ በደቡብ ትግራይ ዞን በስድስት ወረዳዎች፣ እንዲሁም በምዕራብ ትግራይ መሆኑ ተነግሯል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ