Saturday, July 13, 2024
- Advertisement -
- Advertisement -
ማኅበራዊየበኩር ጋዜጠኛ ያዕቆብ ወልደ ማርያም ሥርዓተ ቀብር ዛሬ ይፈጸማል

የበኩር ጋዜጠኛ ያዕቆብ ወልደ ማርያም ሥርዓተ ቀብር ዛሬ ይፈጸማል

ቀን:

በኢትዮጵያ ዘመናዊ ጋዜጠኝነት ታሪክ፣ በተለይ በእንግሊዝኛ ቋንቋ ዝግጅት፣ ከፈር ቀዳጆቹ አንዱ የሆኑትና የመጀመርያው ኢትዮጵያዊ፣ የኢትዮጵያን ሔራልድ ዋና አዘጋጅ የነበሩት አቶ ያዕቆብ ወልደ ማርያም ሥርዓተ ቀብር ዛሬ ነሐሴ 17 ቀን 2015 ዓ.ም. በመንበረ ጸባዖት ቅድስት ሥላሴ ካቴድራል በዘጠኝ ሰዓት ይፈጸማል፡፡

አቶ ያዕቆብ በ94 ዓመት ዕድሜያቸው ያረፉት ነሐሴ 16 አጥቢያ ላይ መሆኑን ከቤተሰቦቻቸው የተገኘው መረጃ ያሳያል፡፡

ከአምስት አሠርታት በላይ ባስቆጠረው የጋዜጠኝነት ጉዟቸው በቀዳማዊ ኃይለ ሥላሴ ዘመን (ቅድመ 1967) ከሔራልድ ጋዜጣ በመቀጠል በአዲስ ሪፖርተርና መነን መጽሔቶች፣ በቮይስ ኦፍ ኢትዮጵያ ጋዜጣ በዋና አዘጋጅነት ሠርተዋል፡፡

በዘመነ ደርግ (1967 – 1983) በየካቲት መጽሔት ዋና አዘጋጅ የነበሩ ሲሆን፣ ጡረታ ሊወጡ መንፈቅ ሲቀራቸው ወደ ውጭ ጉዳይ ሚኒስቴር ተዛውረው ሠርተዋል፡፡

የመንግሥትን ለውጥ ተከትሎ በመጣው የግል ሚዲያው ዘርፍ በተለይ በሚዲያ ኤንድ ኮሙዩኒኬሽን ሴንተር እየታተመ በሚወጣው ዘሪፖርተር ጋዜጣ በከፍተኛ አዘጋጅነትና አርታዒነት ከ15 ዓመታት በላይ የሠሩት አቶ ያዕቆብ፣ በተለይ ‹‹ዘ ስፔክታተር›› በተሰኘው ዓምዳቸው የሚያቀርቧቸው ሒሳዊ መጣጥፎች አድናቆትን ያተረፉ ናቸው፡፡

በቀዳሚው የጋዜጠኝነት ሕይወታቸው በአዲስ ሪፖርተር መጽሔትም ከዋና አዘጋጅነታቸው ባሻገር ‹‹ዘ ቪው ፍሮም ፊንፊኔ›› ትኩረት ይስብ እንደነበር ይወሳል፡፡

አቶ ያዕቆብ ግለ ታሪካቸውንና የተመረጡ መጣጥፎቻቸውን የያዘ መጽሐፍ በ1995 ዓ.ም. በእንግሊዝኛ አሳትመዋል፡፡

ከአባታቸው አቶ ወልደ ማርያም ሹባ ሌቃ እና ከእናታቸው ከወ/ሮ ወለተ ሚካኤል ሰንበቶ ሰኔ 12 ቀን 1921 ዓ.ም.፣ በወለጋ ጠቅላይ ግዛት ነቀምት ከተማ የተወለዱት አቶ ያዕቆብ፣ በነቀምት የተፈሪ መኰንን የአንደኛ ደረጃ፣ በአዲስ አበባ ኮተቤ ቀዳማዊ ኃይለ ሥላሴ ትምህርት ቤት የሁለተኛ ደረጃ ትምህርታቸውን በማዕረግ አጠናቀዋል፡፡ ባገኙት ስኮላርሺፕ ወደ ለንደን በማቅናት ከፍተኛ ትምህርታቸውን ተከታትለዋል፡፡

ለሃምሳ ስድስት ዓመታት በጋዜጠኝነት ያገለገሉት አቶ ያዕቆብ ቀዳሚው የሥራ ሕይወታቸው የጀመረው በአዲስ አበባ የአምሃ ደስታ ትምህርት ቤት የእንግሊዝኛ ቋንቋ አስተማሪ በመሆን ነው፡፡

ነፍስ ኄር አቶ ያዕቆብ ወልደ ማርያም ባለትዳርና የሰባት ልጆች አባት የነበሩ ሲሆን፣ የልጅ ልጆችንም አይተዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የሰብዓዊ መብት ጉዳይና የመንግሥት አቋም

ሰኔ ወር አጋማሽ የተባበሩት መንግሥታት ድርጅት (ተመድ) ከፍተኛ የሰብዓዊ...

ከሰሜኑ ጦርነት አገግሞ በሁለት እግሩ ለመቆምና ወደ ባንክነት ለመሸጋገር የተለመው ደደቢት ማክሮ ፋይናንስ

በኢትዮጵያ የፋይናንስ ኢንዱስትሪ ውስጥ በቀዳሚነት ስማቸው ከሚጠቀሱት ውስጥ ደደቢት...