[የተቃዋሚ ፓርቲ አመራሩ ክቡር ሚኒስትር ሌሊቱን በእንቅልፍ ልባቸው በህልም እየተወራጩ ሳለ የሞባይል ስልካቸው ጥሪ አነቃቸው። አለቃቸው ስለነበሩ ስልኩን በፍጥነት አነሱት]

• በሌሊት ስለደወልኩኝ ይቅርታ፡፡
• ችግር የለውም ክቡር ሚኒስትር፣ ምን ልታዘዝ?
• አንድ የአውሮፓ ባለሥልጣን ነገ በጠዋት ወደ አዲስ አበባ ይገባል።
• እሺ።
• ሌሎች የመንግሥት አመራሮች ስላልቻሉ እርስዎ መንግሥትን ወክለው ቦሌ ኤርፖርት እንዲቀበሉት መወሰኑን ላሳውቅዎት ነው።
• ጥሩ፣ እንዳሉት አደርጋለሁ ክቡር ሚኒስትር።
• መልካም በሌሊት ስለረበሽኩዎት ይቅርታ፣ ጉብኝቱ እንደሚኖር ያሳወቁን በመጨረሻው ሰዓት ስለሆነ ነው።
• አያስቡ ክቡር ሚኒስትር፣ ይልቅ እያየሁት የነበረው ህልምና የእርስዎ መደወል መገጣጠሙ አስገርሞኛል።
• እንዴት? ከህልም ነው የቀሰቀስክዎት?
• በእርግጥ ስልኩ ነው የቀሰቀሰኝ፣ የተገረምኩት ሳየው የነበረው ህልምና አሁን ያወሩኝ ነገር መገጣጠሙ ነው።
• እንዴት? በህልምዎ እንግዳ ሲቀበሉ ነበር?
• አይደለም።
• ታዲያ ምንድነው?
• አሁን ካለሁበት ፓርቲ ለቅቄ ገዥው ፓርቲን ስቀላቀልና ለሌላ ከፍተኛ የመንግሥት ኃላፊነት ስሾም እያየሁ ነበር።
• ታዲያ ምን አገናኘው?
• ምኑን ክቡር ሚኒስትር?
• እርስዎ ዘንድ የደወልኩት እኮ እንግዳ እንዲቀበሉ መወሰኑን ለመንገር ነው፡፡
• እሱንማ ሰምቻለሁ… እ… ግን እርስዎም ስለነበሩበት ልንገርዎት ብዬ ነው ክቡር ሚኒስትር።
• ምኑ ላይ ነው እኔ የነበርኩት?
• ህልሙ ላይ፡፡
• አስቸጋሪ ናችሁ።
• እነማን ክቡር ሚኒስትር?
• እናንተ ተቃዋሚዎች።
• እንዴት?
• ትንሽ ጊዜ በካቢኔ አባልነት ስትቆዩ ህልም ትወዳላችሁ።
• ምን ማለትዎ ነው ክቡር ሚኒስትር?
• ትረሱታላችሁ ለማለት ፈልጌ ነው።
• ምኑን?
• መቃወሙን።
• ተኝቼ ያየሁት ህልምና የእርስዎ የስልክ ጥሪ መገጣጠሙ አስገርሞኝ እንጂ እኔ ከፓርቲዬ ዓላማ ውጪ የመንቀሳቀስ ፍላጎቱ የለኝም፣ በተጨማሪም…
• በተጨማሪ ምን?
• የተቃዋሚ ፓርቲ አባልና አመራር ብሆንም በምክንያታዊ ተቃዋሚነት እንጂ በሌላ አላምንም።
• ምን ለማለት ፈልገህ ነው?
• ምን?
• በሌላ አላምን ያልከው?
• የ‹‹ዕብደት በኅብረት›› ፖለቲካ አራማጅ አይደለሁም ማለቴ ነው።
• ለማንኛውም በጥያቄ መልክ ይዤዋለሁ።
• ምኑን?
• ህልሙን!

[ክቡር ሚኒስትሩ ከግብፅ ድርድር መልስ ከምሁራንና ከተደራዳሪ ቡድኑ አባላት ጋር እየተወያዩ ነው]

• እንደሰማችሁት ተቋርጦ የነበረው ድርድር በአዲስ መልክ ሰሞኑን ተጀምሯል፣ እኛም በመጀመሪያው ዙር ድርድር ላይ ተሳትፈን ነው የተመለስነው።
• ክቡር ሚኒስትር ድርድሩ በአዲስ መልክ ከመጀመሩ በፊት እንደተለመደው በጉዳዩ ላይ ከሚመራመሩ ምሁራንና ባለሙያዎች ጋር ምክክር ተደርጎ የጋራ አቋም አለመያዙ ትክክል አልመሰለኝም፣ አብዛኞቻችንንም ሥጋት ውስጥ ከቶናል።
• እኛም ይህንን ስህተት ለማረም ነው የዛሬውን ምክክር የጠራነው፣ ውሳኔው አስቸኳይና ከመንግሥት የመጣ ስለነበር ምክክር ለማድረግ ጊዜ ባለማግኘታችን ነው፣ ይህንን እንድትረዱ እንፈልጋለን።
• ክቡር ሚኒስትር ሰሞኑን በጀመራችሁት አዲስ ድርድር ላይ በጋራ ያልመከርንበትና ከዚህ በፊት ያልነበረ አዲስ አቋም ይዛችሁ መቅረባችሁን የሚጠቁም ተባራሪ መረጃ መስማታችን እውነት ለመናገር በእጅጉ አስደንግጦናል፣ እውነት የሚባለው መረጃ ትክክል ነው?
• ምንድነው የሰማችሁት?
• ለአጭር ዓመታት የሚቆይ አሳሪ ስምምነት ለመፈረም በእኛ በኩል ፈቃደኝነት መንፀባረቁን ነው የሰማነው ክቡር ሚኒስትር፣ ይህ ደግሞ ከዚህ በፊት ያልመከርንበትና ብሔራዊ ጥቅማችንን አሳልፎ የሚሰጥ ነው።
• እርግጥ ነው የተባለውን ፈቃደኝነት አሳይተናል፣ ነገር ግን ይህንን ያደረግነው ከሌላኛው ወገን ልናገኝ የምንችለውን ምላሽ በማስላት ነው፣ ያገኘነውም ምላሽ እንዳሰብነው ነው።
• ክቡር ሚኒስትር ምን እንዳሰላችሁ ሊያስረዱን ይችላሉ?
• ለአጭር ዓመት የሚቆይ አሳሪ ስምምነት ላይ ለመድረስ ፈቃደኛ መሆናችንን በመግለጽ በተቃራኒው ወገን ላይ ዲፕሎማሲያዊ ግብ ማስቆጠር ነው፣ ይህንን ያደረግነው ደግሞ እንደማይቀበሉት ስለምናውቅ ነው።
• ቢቀበሉትስ?
• አንደኛ አይቀበሉትም።
• እሺ ሌላውስ?
• ሌላው ለአጭር ዓመት የሚቆይ አሳሪ ውል ለመፈራረም ፈቃደኛነት ብናሳይም፣ በሌላ በኩል ይህንን መቀበል እንዳይችሉ አድርገን አስረነዋል።
• እንዴት?
• አሳሪ ውሉ የሚፀናበት ጊዜ በማብቃቱ አስቀድሞ በተፋሰሱ አገሮች መካከል የተቀረፀው የውኃ ትብብር ማዕቀፍ ስምምነት ማዕቀፍ ተጠናቆ ወደ ትግበራ መግባት እንዳለበት የሚገልጽ አሳሪ አንቀጽ እንዲገባ ጠይቀናል።
• ይህንን ባይቀበሉስ?
• ይህንን ካልተቀበሉ እኛም ወደ አሳሪ ውል አንገባም።
• ክቡር ሚኒስትር ሌላ አንቀጽ በመጨመር አሳሪ ውል ላለመግባት ያደረጋችሁት ጥረት የተፈጠረብንን ሥጋት ለጊዜው የሚቀርፍ ነው፣ ነገር ግን… የከፈትነው ቀዳዳ ጥሩ አይደለም።
• እንዴት?
• ለጊዜው የከፈትነውን ቀዳዳ ለመሸፈን የሞከርነው የተፋሰሱ አገሮች አቋም ከእኛ ጋር የሚስማማ እንደሆነ በመተማመን ነው፣ አይደለም?
• ልክ ነው።
• ነገር ግን እነዚህ አገሮች ከተፋሰሱ የሚያገኙት ጥቅም አነስተኛ በመሆኑ ከእኛ ጋር የሚስማማ አቋም ይዘው እስከ መጨረሻው ለመፅናታቸው መተማመኛ የለንም።
• እንዴት በአቋማቸው ሊፀኑ አይችሉም?
• ምክንያቱም ከተፋሰሱ ከሚያገኙት ጥቅም የገዘፈ የኢኮኖሚ ድጋፍ ከምዕራባውያኑ ቃል ከተገባላቸው በቀላሉ አቋማቸውን ሊቀይሩ ይችላሉ፣ ይህ ሁኔታ ከተፈጠረ ደግሞ አይመችም።
• ምንድነው የማይመቸው?
• መውቀስም መቀልበስም!