Friday, July 12, 2024
- ማስታወቂያ -
- ማስታወቂያ -

ብሔራዊ ባንክ ኅብረተሰቡና ባንኮች በሐሰተኛ የገንዘብ ኖቶች እንዳይጭበረበሩ አሳሰበ

ተዛማጅ ፅሁፎች

ሐሰተኛ የገንዘብ ኖቶችን በማሳተምና በማሠራጨት ግብይት ላይ ለማዋል ጥረት የሚያደርጉ በመኖራቸው፣ ንግድ ባንኮችና ኅብረተሰቡ እንዳይጭበረበሩ ጥንቃቄ እንዲያደርጉ የኢትዮጵያ ብሔራዊ ባንክ አሳሰበ፡፡

ብሔራዊ ባንክ ብዙም ባልተለመደ ሁኔታ ማክሰኞ መስከረም 15 ቀን 2016 ዓ.ም. ከሐሰተኛ ገንዘብ ኅትመትና ሥርጭት ጋር በተያያዘ ባወጣው መግለጫ፣ በቀጣዮቹ ቀናት በኢትዮጵያ በተከታታይ የሚከበሩ በዓላትን ተንተርሰው የወንጀል ድርጊት ፈጻሚዎች፣ ሐሰተኛ ገንዘብ ግብይት ለማዋል ጥረት እንደሚያደርጉ መረጃዎች እንደሚጠቁሙም ጠቅሷል፡፡

በመሆኑም ኅብረተሰቡ በግብይት ወቅት በሐሰተኛ ገንዘቦች ሊያጋጥም ከሚችል ያልታሰበ ጉዳት ራሱን መጠበቅ እንደሚኖርበት፣ በመግለጫው ላይ አሳስቧል፡፡

ዛሬ የሚከበሩትን የመውሊድና የመስቀል ደመራ በዓላትን ጨምሮ የመስቀልና የኢሬቻና ሌሎች በዓላት በተከታታይ የሚከበሩ በመሆናቸውና ከፍተኛ ግብይት የሚደረግበት ወቅት ስለሆነ፣ ይህንኑ አጋጣሚ በመጠቀም ወንጀለኞች በቻሉት መንገድ ሐሰተኛ ገንዘቦችን ሊያሠራጩ እንደሚችሉ በመገንዘብ ጥንቃቄ ማድረግ እንደሚገባም ብሔራዊ ባንክ ጠቁሟል፡፡

በንግድ ባንኮችም አካባቢ ሁኔታው ሊያጋጥም ስለሚችል ጥንቃቄ ማድረግ እንደሚኖርባቸውም አስገንዝቧል፡፡ ጉዳዩን በማስመልከት ለሁሉም ባንኮች ባስተላለፈው መልዕክት፣ ‹‹ሁሉም ገንዘቦች ላይ የሚገኙ የደኅንነት መጠበቂያ ምልክቶችን በትኩረት በመመልከትና ለግብይት በሚቀርቡላችሁ ገንዘቦች ላይ ከሚታዩ ምልክቶች ጋር በማነፃፀር፣ በሕገወጥ ከሚዘዋውሩ ሐሰተኛ ገንዘቦች ራሳችሁን እንድትጠብቁ በአፅንኦት እናሳስባለን፤›› ብሏል፡፡

በመግለጫው ማጠቃለያ ላይም፣ ‹‹ሐሰተኛ ገንዘቦችን የሚያትሙ፣ የሚያዘዋውሩና በግብይት የሚያቀርቡ ወንጀለኞችን በአካባቢው ለሚገኙ የፀጥታ አካላት ወዲያውኑ በመጠቆምና ወንጀሉን ለመከላከል የበኩላችሁን አስተዋጽኦ እንድታደርጉ ብሔራዊ ባንክ ጥሪ ያቀርባል፤›› ሲል አሳስቧል፡፡

ይህ የኢትዮጵያ ብሔራዊ ባንክ መግለጫ ብዙም ያልተለመደ እንደሆነ ሪፖርተር ያነጋገራቸው የባንክ የሥራ ኃላፊዎች አመልክተው፣ እንዲህ ባለው ደረጃ ብሔራዊ ባንክ ማሳሰቡ እንደ አንድ ተቆጣጣሪ አካል በቂ መረጃ ይዞ ሊሆን ስለሚችል ጥንቃቄ ማድረግ አስፈላጊ እንደሆነ ገልጸዋል፡፡

ባንኮች በራሳቸው መንገድ ሐሰተኛ የገንዘብ ኖቶች እንዳያልፉ ጥንቃቄ የሚያደርጉ ቢሆንም፣ ይህ ችግር አልፎ አልፎ ሲያጋጥማቸው መቆየቱን በመግለጽ ችግሩ ሲያጋጥማቸው ጉዳዩን ለሕግ አካላት በማመልከት እየሠሩበት እንደሆነም አስረድተዋል፡፡

ችግሩ በባንኮች ጥንቃቄ ብቻ ሳይሆን ኅብረተሰቡም የራሱን ጥንቃቄ እንዲያደርግ፣ ባንኮችም በራሳቸው መንገድ እንደሚያስገነዝቡ አክለዋል፡፡

የብሔራዊ ባንክ ማሳሰቢያ ግን ባንኮች በተለየ ሁኔታ ትኩረት አድርገው እንዲሠሩ የሚያደርግ እንደሆነ፣ ሆኖም ሐሰተኛ የብር ኖቶች በበዓላት ወቅት ብቻ ሳይሆን በሌሎች ወቅቶችም የሚያጋጥሙ መሆናቸውን ሳይጠቅሱ አላለፉም፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች