Tuesday, July 23, 2024
- ማስታወቂያ -
- ማስታወቂያ -

የኢትዮጵያ ሰነደ ሙዓለ ንዋይ ገበያ ራሱን ለዓለም አቀፍ ባለሀብቶች ለማስተዋወቅ ወደ ለንደን አቀና

ተዛማጅ ፅሁፎች

የኢትዮጵያ ሰነደ ሙዓለ ንዋይ ገበያ (Ethiopian Securities Exchange (ESX) ዓለም አቀፍ ባለሀብቶችን ለመሳብና የኢትዮጵያን የካፒታል ገበያ ለማስተዋወቅ፣ የመጀመሪያ የውጭ ጉዞውን ወደ እንግሊዝ ለንደን ከተማ አደረገ።

በዚሁ መሠረት ሰኞ መስከረም 28 ቀን 2016 ዓ.ም. በለንድን ከተማ ራሱን ማስተዋወቂያ ትዕይንት የሚያካሂድ ሲሆን፣ በዚህ መርሐ ግብር ላይም የገንዘብ ሚኒስቴር ሚኒስትር ደኤታና የኢትዮጵያ ካፒታል ገበያ ባለሥልጣን ዋና ዳይሬክተርን ጨምሮ ሌሎች ከፍተኛ የመንግሥት ባለሥልጣናት እንደሚሳተፉበት ያገኘነው መረጃ ያመለክታል። 

በመርሐ ግብሩ ላይ የESX አስተዳደር ቡድን አጭር መግለጫ የሚያቀርብ ሲሆን፣ የሰነደ ሙዓለ ነዋይ ገበያው፣ ለኢትዮጵያ ኢኮኖሚ የሚፈጥራቸው ዕድሎችን የተመለከተ ገለጻ እንደሚያቀርብም ታውቋል። በተጨማሪም የውጭ የግል ባለሀብቶች እርስ በርስ ትስስር እንዲፈጥሩና በኢትዮጵያ ካፒታል ገበያ ውስጥ ስላሉ ለውጦች ግንዛቤ እንዲያገኙ ዕድል ይፈጥራል ተብሎ ይጠበቃል።

ከ900 ሚሊዮን ብር በላይ የሆነ ካፒታል እንደሚያስፈልገው የተገመተው አክሲዮን ማኅበሩ፣ ከዚህ ውስጥ 25 በመቶውን ለኢትዮጵያ መንግሥት መሸጡ ይታወቃል። 

የኢትዮጵያ ኢንቨስትመንት ሆልዲንግስ በስሩ ከሚገኙ አራት የመንግሥት የልማት ድርጅቶች ጋር በመሆን በአምስት አባላት የሰነዶች ሙዓለ ንዋይ ገበያ አክሲዮን ማኅበርን ለመመሥረት የሚያስፈልገውን 25 በመቶ በማዋጣት አክሲዮን ማኅበሩን መሥርቷል፡፡ በአምስቱ ድርጅቶች ከተዋጣው 25 በመቶ ድርሻ ከፍተኛውን መጠን የያዘው ኢንቨስትመንት ሆልዲንግስ መሆኑ ተገልጿል፡፡

አራቱ የመንግሥት የልማት ድርጅቶች ኢትዮ ቴሌኮም፣ የኢትዮጵያ የባህር ትራንስፖርትና ሎጂስቲክስ አገልግሎት፣ የኢትዮጵያ መድን ድርጅትና የብርሃንና ሰላም ማተሚያ ድርጅት ናቸው፡፡ የአክሲዮን ማኅበሩን መቋቋሚያ መመሥረቻ ስምምነት ማክሰኞ መስከረም 22 ቀን 2016 ዓ.ም. በኢትዮጵያ ኢንቨስትመንት ሆልዲንግስ ግሩፕ ዋና መሥሪያ ቤት ተፈራርመዋል፡፡

የተቀረውን 75 በመቶ ለውጭና ለአገር ውስጥ ኢንቨስተሮች ለመሸጥ አቅዷል። በለንደኑ መርሐ ግብርም ራሱን ከማስተዋወቅ ባለፈ ፍላጎት ላላቸው የውጭ የግል ኢንቨስተሮች የአክሲዮን ሽያጭ ሊያካሂድ እንደሚችል ይጠበቃል።

አክሲዮን ማኅበሩ የሚቀረውን የ75 በመቶ ድርሻ በአገር ውስጥና በውጭ አገር ለሚገኙ የግል ድርጅቶች የመሸጥ ሥራ በቀጣዮቹ ሦስት ወራት አጠናቆ የባለአክሲዮኖች ጠቅላላ ጉባዔ እንደሚያደርግ ይጠበቃል፡፡

የኢትዮጵያ ሰነደ ሙዓለ ንዋይ ገበያ ሰባት አባላትን የያዘ መሥራች የዳይሬክተሮች ቦርድ ባለፈው ሳምንት መሰየሙ ይታወሳል፡፡

በዚህም መሠረት የዘመን ባንክ የቀድሞ ምክትል ፕሬዚዳንትና የሴፈስ ካፒታል አማካሪ ድርጅት ከፍተኛ አመራር የነበሩትና በአሁኑ ወቅት ደግሞ የብሔራዊ ባንክ አማካሪ የሆኑት አቶ ህላዌ ታደሰ የቦርዱ ሰብሳቢ ሆነዋል።

በቦርድ አባልነት እንዲያገለግሉ የተመረጡት ደግሞ፣ የኢትዮጵያ ምርት ገበያ መሥራች የነበሩት ኢሌኒ ገብረ መድኅን (ዶ/ር)፣ የኢኮኖሚና ቢዝነስ አማካሪው አቶ ዘመዴነህ ንጋቱ፣ የኢትዮጵያ ኢንቨስትመንት ሆልዲንግስ ምክትል ሥራ አስፈጻሚ ወ/ሮ ያዝሚን ወሀብረቢ፣ የገንዘብ ሚኒስቴር አማካሪዋ ወ/ሪት ሂንጃት ሻሚል፣ የኢኮኖሚ ባለሙያው ቴዎድሮስ መኮንን (ዶ/ር) እና የሕግ ባለሙያው አቶ ፈቃዱ ጴጥሮስ ናቸው፡፡

የተሾሙት የቦርድ አባላት አዳዲስ የሚገቡት ባለአክሲዮኖች ምዝገባ ተጠናቆ የባለአክስዮኖች ጠቅላላ ጉባዔ ከተደረገ በኋላ በድጋሚ ለዕጩነት እንደሚቀርቡ፣ የአክሲዮን ማኅበሩ ከፍተኛ አመራር ጥላሁን ካሳሁን (ዶ/ር) ለሪፖርተር ገልጸዋል፡፡

‹‹ኢንቨስተሮች ቦርድ ማየት ስለሚፈልጉ አሁን ቦርድ ተሹሟል፡፡ በቀጣዩ በቀጣዩቹ ሦስት ወራት የኢንቨስተሮችን ምዝገባና ቀሪዎቹን ባለአክሲዮኖች ምዝገባ እናጠናቅቃለን፤›› ሲሉ ጥላሁን (ዶ/ር) አስረድተዋል፡፡

አሁን ያሉት የቦርድ አባላት ማኅበሩን ለማቋቋም ታስቦ በመንግሥት የተመረጡ መሆናቸውን፣ ወደፊት የቦርድ አባላት አሿሿም በአክሲዮን ድርሻ መጠን እንደሚሆንም አስረድተዋል፡፡ ቦርዱና ባለአክሲዮኖቹም በጋራ ዋና ሥራ አስፈጻሚ እንደሚሾሙ ተናግረዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች