- ክቡር ሚኒስትር፣ ይህ ጉባዔ ለሚያነሳቸው ጥያቄዎች ምላሽና ማብራሪያ ለመስጠት በመካከላችን ስለተገኙ አመሰግናለሁ።
- ክቡር ሚኒስትር፣ ኢትዮጵያ ባለፈው ዓመት የብሪክስ አባል እንድትሆን የሰጡት በሳል አመራር የሚደነቅ ነው።
- አገራችን የብሪክስ አባል ሆና የተመረጠችበት መንገድም ታሪክ የማይረሳው ነው።
- ክቡር ሚኒስትር ኢትዮጵያ የብሪክስ አባል እንድትሆን ለሰጡት በሳል አመራር ክብር ይገባዎታል።
- በመሆኑም ይህ ጉባዔ ክቡር ሚኒስትሩ ለሰጡት በሳል አመራር ያለውን ክብር እንዲገልጽኝ እጠይቃለሁ።
[ጉባዔው አጨበጨበ]
- ክቡር ሚኒስትር ለዚህም ክብር ይገባዎታል።
- ጉባዔው ክቡር ሚኒስትሩ ለሰጡት በሳል አመራር ያለውን ክብር በደማቅ ሁኔታ ስለገለጸ አመሰግናለሁ።
- በመቀጠልም ጥያቄዬን በቀጥታ ለክቡር ሚኒስትራችን አቀርባለሁ።
- ክቡር ጠቅላይ ሚኒስትር ኢትዮጵያ የብሪክስ አባል ሆና መመረጧ የሚያስገኛቸው ፋይዳዎች ምንድናቸው? ማብራሪያ ቢሰጡበት።
- ጥያቄ አቅራቢው እንደገለጹት አገራችን ብሪክስን መቀላቀሏ ትልቅ ድል ነው። ብሪክስን መቀላቀላችን የሚያስገኘውን ፋይዳ ደግሞ በጋራ የምናየው ይሆናል።
[ጉባዔውን የሚመሩት ሰብሳቢ ለሌላ ጥያቄ አቅራቢ ዕድል ሰጡ]
- አመሠግናለሁ ክቡር ሰብሳቢ…
- ክቡር ሚኒስትር ለዘመናት የበቀለው የነጠላ ትርክት የአገሪቱን የፖለቲካ ምኅዳር አጣሞታል። በዚህም ዜጎች ለመኖር ብቻ ሳይሆን ወጥቶ ለመግባት ጭምር እየተቸገሩ ነው።
- ይህንን የተጣመመ የፖለቲካ ምኅዳር ለማስተካከል መንግሥት የብሔራዊነትና የአርበኝነት ትርክትን መገንባት ፍቱን መድኃኒት ነው ብሎ እንደሚያምን ተገልጿል።
- ክቡር ሚኒስትር ለመሆኑ መንግሥት ብሔራዊነት ሲል ምን ማለቱ ነው?
- ከብሔርተኝነት የተለየ ነው ወይስ ተመሳሳይ ትርጉም አለው?
- ለቀረበው ጥያቄው አመሰግናለሁ።
- ሁላችሁም እንደምታውቁት በሕገ መንግሥቱ አንቀጽ 69 ላይ ፕሬዚዳንቷ ወይም ፕሬዚዳንቱ የአገሪቱ ርዕሰ ብሔር ነው ይላል። አይደለም?
- ትክክል ነው።
- ወይም ደግሞ እናንተ ራሳችሁ በዚሁ ጉባዔ ላይ ሌሎች የአገሪቱ ባንኮችን የሚቆጣጠር ብሔራዊ ባንክ በአዋጅ እንዲቋቋም ወስናችኋል። አይደለም?
- ትክክል ነው።
- ወይም ደግሞ ብሔራዊ ሎተሪ የሚባል ተቋም አቋቁማችኋል። አይደለም?
- አዎ።
- ብሔራዊነት ማለት እንደዚያ ነው። ብሔራዊ ሎተሪ ማለት ነው።
- ብሔራዊ ሎተሪ የአንድ ብሔር ነው እንዴ?
- አይደለም።
- ስለዚህ እኛም ብሔራዊነት ስንል የአንድ ብሔር ማለታችን አይደለም።
- ወይም እንደሚጠረጠረው ዘውዳዊ ማለታችን አይደለም።
- ስለዚህ በዚሁ መንገድ ብትረዱት ጠቃሚ ይመስለኛል።
[የጉባዔው ሰብሳቢ ለሌላ ጥያቄ አቅራቢ ዕድል ሰጡ]
- አመሠግናለሁ ክቡር ሰብሳቢ፡፡
- ክቡር ሚኒስትርም ለጥያቄዎቻችን ምላሽ ለመስጠት በመካከላችን ስለተገኙ እያመሠገንኩ ወደ ጥያቄዬ አልፋለሁ።
- ክቡር ሚኒስትር ሰው ሠራሽ አስተውሎት ካለው ፋይዳ በተጨማሪ ዓለም አቀፋዊ ችግር እየሆነ መምጣቱን በቅርቡ የአመራሮች ሥልጠና ላይ ከሰጡት ማብራሪያ ለመረዳት ችለናል።
- ክቡር ሚኒስትር ሰው ሠራሽ አስተውሎት በአገራችን ላይ ሊፈጥር የሚችለውን ችግር በመረዳት ለሰጡት በሳል አመራር ክብር ይገባዎታል።
- ሰው ሠራሽ አስተውሎት የሚፈጥረውን ችግር የሚከላከል አገራዊ አቅም በእርስዎ መሪነት እየተገነባ መሆኑ ይታወቃል።
- ክቡር ሚኒስትር ሰው ሠራሽ አስተውሎት የሚፈጥረውን ችግር ለመከላከል እየተደረገ ካለው ጥረት ጎን ለጎን መንግሥት ሰው ሠራሽ የኑሮ ውድነትን ለመፍታት ያሰበው ነገር ካለ ቢገለጽ?
- ሰው ሠራሽ አስተውሎ በእንግሊዘኛ ስያሜው artificial intelligence ወይም በምኅፃረ ቃሉ AI ይባላል።
- ሰው ሠራሽ የኑሮ ውድነት ማለትም Artificial Inflation በምኅፃረ ቃሉ AI መሆኑ ያመሳስላቸዋል።
- ነገር ግን ሁለቱም AI ስለሆኑ አንድና ያው ናቸው ማለት አይደለም።
- ሰው ሠራሽ አስተውሎት በጥንቃቄ ከተጠቀምንበት አገር የመቀየር ዕድል አለው።
- ሰው ሠራሽ የኑሮ ውድንትም መጎሳቆልን የሚያስከትል ብቻ ሳይሆን ቁጭት የሚፈጥር በመሆኑ ይህንን ቁጭት ከተጠቀምንበት አገር የመለወጥ ዕድል አለው።
- ለምሳሌ የስንዴ ምርት ዕጥረት የፈጠረው ቁጭት ዛሬ ላይ አገራችን በስንዴ ምርታማነት በአፍሪካ ደረጃ እንድትጠቀስ አድርጓታል።
- ስለዚህ ሰው ሠራሽ የኑሮ ውድነት ቁጭት ሊፈጥርብን ይገባል።
- የግብይት ሥርዓቱን ተደራሽ ማድረግ ሰው ሠራሽ የኑሮ ውድነት ችግር ለመቅረፍ ፍቱን መፍትሔው ነው ብሎ መንግሥት ያምናል።
- በመሆኑም በየአካባቢዎቹ የእሑድ ገበያ እያቋቋመ ይገኛል።
