Sunday, February 25, 2024
- ማስታወቂያ -
- ማስታወቂያ -

የግብፁ ኩባንያ አስኮም ኩርሙክ ጎልድ ላይ የነበረውን ቀሪ ድርሻ ሙሉ በሙሉ አስተላለፈ

ተዛማጅ ፅሁፎች

የግብፁ ኩባንያ ቃላ ሆልዲንግስ (Qalaa Holdings) አካል የሆነው አስኮም (ASCOM)፣ ኩርሙክ ጎልድ ኃላፊነቱ የተወሰነ የግል ማኅበር ላይ የነበረውን 35 በመቶ የአክሲዮን ድርሻ ለካናዳው አላይድ ጎልድ ኮርፖሬሽን አስተላለፈ። 

የግብፁ ኩባንያ በቤንሻንጉል ጉሙዝ ኩምሩክ ወረዳ አለ ተብሎ በሚታመነው የወርቅ ክምችት ላይ የፍለጋ ፈቃድ አውጥቶ ሲንቀሳቀስ የቆየ ሲሆን፣ የወርቅ ክምችቱ መኖሩን ካረጋገጠ በኋላ የፕሮጀክቱን 65 በመቶ ድርሻ ለዚሁ አላይድ ጎልድ ኮርፖሬሽን እ.ኤ.አ. በ2017 ማስተላለፉን መረጃዎች ያመለክታሉ። በወቅቱ 65 በመቶ ድርሻውን የሸጠው በ14 ሚሊዮን ዶላር ነበር፡፡ 

ይህንን ሽያጭ ተከትሎ በኩርሙክ የወርቅ ክምችት ቦታ ላይ ከፍተኛውን ድርሻ የተቆጣጠረው አላይድ ጎልድ ኮርፖሬሽን፣ የወርቅ ክምችቱ በሚገኝበት ወረዳ ስያሜ ኩርሙክ ጎልድ ማይኒንግ የተባለ ኩባንያ በኢትዮጵያ በማቋቋም ከፍተኛ ደረጃ የወርቅ ማምረት ፈቃድ እንዲሰጠው የኢትዮጵያ መንግሥትን ጠይቋል።

የኢትዮጵያ የሚኒስትሮች ምክር ቤትም እ.ኤ.አ. በ2021 ኩርሙክ ጎልድን ጨምሮ ለሌሎች አራት ኩባንያዎች ከፍተኛ ደረጃ የወርቅ ማምረት ፈቃድ እንዲሰጥ የወሰነ ሲሆን፣ ይህንን ተከትሎም ኩባንያው ወደ ምርት ሒደት ለመግባት የሚያስችሉ እንቅስቃሴዎችን እያደረገ ይገኛል። 

የግብፁ ኩባንያ አስኮም በኩምሩክ ጎልድ ላይ የነበረውን ቀሪ ድርሻ ለአላይድ ጎልዶ ኮርፖሬሽን ለመሸጥ ባለፈው መስከረም ወር ስምምነት ያደረገ ሲሆን፣ ሽያጩም በዚህ ሳምንት ጸድቆ ተፈጻሚ መሆኑ ታውቋል።

በዚሁ መሠረት የግብፁ ኩባንያ ኩርሙክ ጎልድ ላይ ያለውን 35 በመቶ ለአላይድ ጎሎድ ኮርፖሬሽን በ99.6 ሚሊዮን ዶላር መሸጡ ታውቋል። በመሆኑም፣ አላይድ ጎልድ በኢትዮጵያ የተቋቋመው ኩምሩክ ጎልድ ኩባንያ ላይ 93 በመቶ ድርሻ የያዘ ሲሆን ቀሪው ሰባት በመቶ በማዕድን አዋጁ መሠረት የኢትዮጵያ መንግሥት ነፃ ድርሻ መሆኑ ታውቋል። 

የግብፁ ኩባንያ በኢትዮጵያ ኩርሙክ ጎልድ ላይ የነበረውን ቀሪ ድርሻ ሙሉ በሙሉ ያስተላለፈ ቢሆንም፣ በሽያጭ ውሉ መሠረት ግን የግብፁ ኩባንያ በኩርሙክ ጎልድ ላይ ቀጥተኛ ያልሆነ የባለቤትነት ድርሻ ይኖረዋል።

ይህ የሆነበት ምክንያትም፣ የግብፁ ኩባንያ 35 በመቶ ድርሻውን በ99.6 ሚሊዮን ዶላር ሲሸጥ 34.6 ሚሊዮን ዶላሩ የተከፈለው በካሽ ሳይሆን 11.5 ሚሊዮን አክሲዮኖችን የኩርሙክ ጎልድ እናት ድርጅት ከሆነው አላይድ ጎልድ ኮርፖሬሽን ላይ እንዲተላለፍለት በማድረግ ነው። በሽያጭ ውሉ መሠረት ቀሪው 65 ሚሊዮን ዶላር ደግሞ እ.ኤ.አ. እስከ ሴፕቴምበር 2027 ድረስ በሦስት ዙሮች የሚከፈለው ይሆናል። አስኮም ኩባንያ 65 በመቶ ድርሻውን እ.ኤ.አ. በ2017 ለአላይድ ጎልድ ባስተላለፈበት ወቅትም ከሽያጩ ሊከፈለው የሚገባውን 14 ሚሊዮን ዶላር በቀጥታ እንዳልወሰደ፣ ከዚያ ይልቅ ከሽያጩ የተገኘው 14 ሚሊዮን ዶላር የኩርሙክ ወርቅ ፍለጋ የቁፋሮ ሥራዎችን ለማከናዋን እንዲውል ማድረጉን በወቅቱ የተፈጸመው የሽያጭ ውል የተመዘገበበት ሰነድ ያስረዳል።

በአላይድ ጎልድ ኮርፖሬሽን ባለቤትነት (93 በመቶ ድርሻ) የተቋቋመው ኩርሙክ ጎልድ ከሱዳን ድንበር አምስት ኪሎ ሜትር አንስቶ በኢትዮጵያ ኩርሙክ ወረዳ ውስጥ 100 ካሬ ኪሎ ሜትር በሚሸፍን ቦታ ላይ ወርቅ የማምረት ከፍተኛ ደረጃ ፈቃድ በኢትዮጵያ መንግሥት ያገኘ ሲሆን፣ የኢትዮጵያ የማዕድን ፈቃዱን ለአላይድ ጎልድ ያስተላለፈው የግብፁ አስኮም በበኩሉ ኩምሩክ ጎልድ ፈቃድ ካገኘበት የቤንሻንጉል ጉሙዝ ክልል ኩርሙክ ወረዳ ጋር ድንበር በሚጋራው የሱዳን ብሉ ናይል ግዛት ተመሳሳይ የወርቅ ፍለጋ ፈቃድ ከሱዳን መንግሥት እንደተሰጠው ነገር ግን በፀጥታ ችግር ምክንያት እ.ኤ.አ. ከ2011 ጀምሮ ፍለጋውን ማቋረጡን መረጃዎች ያመለክታሉ።

የሩብ ዓመት የሥራ አፈጻጸማቸውን ለሕዝብ ተወካዮች ምክር ቤት የማዕድንና የኢንዱስትሪ ጉዳዮች ቋሚ ኮሚቴ ያቀረቡት የማዕድን ሚኒስትሩ ሀብታሙ ተገኝ (ኢንጂነር)፣ መንግሥት በወርቅ ማዕድን ምርት ትልቅ ተስፋ የጣለው በኩርሙክ ጎልድ ላይ መሆኑን ተናግረዋል። ኩባንያው የምርት ሒደቱን የጀመረ ሲሆን፣ በቅርቡም ለዚህ የሚያስፈለግውን 500 ሚሊዮን ዶላር መተማመኛ ካፒታል ማስገባቱን ተናግረዋል።

በኢትዮጵያ በዓመት የሚመረተው አጠቃላይ የወርቅ መጠን በአማካይ ዘጠኝ ቶን እንደሆነ የተናገሩት ሚኒሰትሩ ኩርሙክ ጎልድ ወደ ሥራ ሲገባ ብቻውን ዘጠኝ ቶን ወርቅ በዓመት ማምረት እንደሚችል ተናግረዋል። ኩባንያው የዝግጅት ሒደቶችን አጠናቆ እ.ኤ.አ. በ2025 ወርቅ ማምረት እንደሚጀምርም ተናግረዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች