Sunday, February 25, 2024
- ማስታወቂያ -
- ማስታወቂያ -

የፈረንሣዩ ኦሬንጅ ከኢትዮ ቴሌኮም የ45 በመቶ ድርሻ ግዥ የጨረታ ሒደት ራሱን አገለለ

ተዛማጅ ፅሁፎች

ግዙፉ የፈረንሣይ የቴሌኮም ድርጅት ኦሬንጅ ሊሳተፍበት ከነበረው የኢትዮ ቴሌኮም 45 በመቶ ድርሻ ግዥ የጨረታ ሒደት ራሱን ማግለሉን አስታወቀ፡፡

ኦሬንጅ በኢትዮጵያ ያለው የገበያ ሁኔታ ከድርጅቱ የቢዝነስ ሥልት ጋር ባለመጣጣሙ ምክንያት፣ የኢትዮ ቴሌኮም ድርሻን የመግዛት ሒደት ማቋረጡን ማስታወቁ ተሰምቷል፡፡

ኩባንያው ‹‹ለሞባይል ወርልድ ላይቭ›› ሚዲያ በሰጠው መግለጫ፣ ከኢትዮ ቴሌኮም 45 በመቶ ድርሻ ለማግኘት የያዘውን ዕቅድ መቀጠል እንደማይችል ገልጿል፡፡

‹‹የኦሬንጅ ኩባንያ ግሩፕ ባደረገው ግምገማ መሠረት በኢትዮጵያ ያለው ነባራዊ ሁኔታ፣ ያቀደውን ስትራቴጂ በፍጥነት ለማከናወን እንቅፋት እንደሚሆንበትና ፕሮጀክቱ በወቅቱ እንዲጠናቀቅ የማያደርግ ነው፤›› ማለቱ ተዘግቧል፡፡

ኦሬንጅ ለመጀመሪያ ጊዜ የኢትዮ ቴሌኮምን አነስተኛ ድርሻ ለመግዛት የፍላጎት መግለጫ ያቀረበው ከሁለት ዓመት በፊት፣ የኢትዮ ቴሌኮም የጨረታ ሒደት በተጀመረበት ወቅት መሆኑን በመግለጫው አስታውቋል።

ኢትዮ ቴሌኮም በ2011 ዓ.ም የመንግሥት ልማት ድርጅቶችን በከፊል ወደ ግል ይዞታ ለማዞር በተያዘው ዕቅድ ውስጥ ከተካተቱ ድርጅቶች አንዱ ነው።

የገንዘብ ሚኒስቴር፣ የመንግሥት የልማት ድርጅቶች ይዞታና አስተዳደር ኤጀንሲና የኢትዮ ቴሌኮም የቦርድ አመራሮች፣ ኢትዮ ቴሌኮምን በከፊል ወደ ግል ለማዞር ከታቀደ በኋላ መግዛት የሚፈልጉ የቴሌኮሙዩኒኬሽን ኩባንያዎች የፍላጎት መግለጫ (Expression of Interest – EOI) እንዲያስገቡ ተጠይቆ እንደነበር ይታወሳል፡፡

በዚህም መሠረት የቀድሞው ፍራንስ ቴሌኮም የአሁኑ ኦሬንጅ ቴሌኮም ኩባንያ የኢትዮ ቴሌኮምን 45 በመቶ ድርሻ ለመግዛት በይፋ ጥያቄ አቅርቦ ነበር።

ኦሬንጅ ኩባንያ በአሁኑ ጊዜ ፈረንሣይን ጨምሮ በአውሮፓ፣ በመካከለኛው ምሥራቅና በአፍሪካ የቴሌኮሙዩኒኬሽን አገልግሎት በመስጠት ላይ ሲሆን፣ አጠቃላይ ሀብቱም ከ100 ቢሊዮን ዩሮ በላይ እንደሆነ መረጃው ያሳያል።

የኩባንያው 23 በመቶ ድርሻ የፈረንሣይ መንግሥት ሲሆን፣ ቀሪው 77 በመቶ ደግሞ የተለያዩ የግል ኩባንያዎችና የሌሎች ሕዝባዊ ተቋማት ድርሻ መሆኑን መረጃው ያመላክታል።

ኦሬንጅ ኩባንያ 2020 ድረስ በ26 የዓለም አገሮች ከ250 ሚሊዮን በላይ ደንበኞች እንዳሉት፣ ከዚህ ውስጥ ከ200 ሚሊዮን በላይ ያህሉ የሞባይል ደንበኞች ሲሆኑ ቀሪዎቹ የብሮድባንድ ተጠቃሚዎች ናቸው።

የኢትዮጵያ መንግሥት በ2021 ቮዳፎን ግሩፕ፣ ቮዳኮምና ሳፋሪኮምን ላቀፈው ኮንሰርቲየም የአገሪቱን የመጀመሪያ የግል የሞባይል ኔትወርክ ፈቃድ መስጠትን ጨምሮ ገበያውን ለዓለም አቀፍ ድርጅቶች ክፍት ማድረጉ ይታወቃል። በአሁኑ ጊዜም ኢትዮ ቴሌኮምና ሳፋሪኮም ኢትዮጵያ የቴሌኮም አገልግሎት እየሰጡ ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች