Sunday, April 14, 2024
- ማስታወቂያ -
- ማስታወቂያ -

ከፍተኛ ችግር የገጠመውን ንብ ኢንተርናሽናል ባንክ ከአሥር ዓመታት በላይ የመሩት ፕሬዚዳንት ከኃላፊነታቸው ተነሱ

ተዛማጅ ፅሁፎች

ከፍተኛ የአስተዳደር ችግር የገጠመውን ንብ ኢንተርናሽናል ባንክን ከአሥር ዓመታት በላይ በፕሬዚዳንትነት ሲመሩ የቆዩት አቶ ገነነ ሩጋ የሥራ መልቀቂያ ደብዳቤ ቢያስገቡም፣ የባንኩ የዳይሬክተሮች ቦርድ አቶ ገነነ ያስገቡት መልቀቂያ ላይ ሳይወስን ግለሰቡን ከፕሬዚዳንትነት በማንሳት አዲስ ተጠባባቂ ፕሬዚዳንት ማጨቱ ተሰማ፡፡

የሪፖርተር ምንጮች እንደገለጹት፣ አቶ ገነነ የሥራ መልቀቂያ ደብዳቤያቸውን ያስገቡት ባለፈው ቅዳሜ የካቲት 2 ቀን 2016 ዓ.ም. ነው፡፡ ይሁን እንጂ አዲሱ የንብ ኢንተርናሽናል ባንክ የዳይሬክተሮች ቦርድ ባካሄደው ስብሰባ የአቶ ገነነን የመልቀቂያ ጥያቄ ወደ ጎን በማድረግ ከኃላፊነታቸው ማንሳቱን አስታውቋል፡፡ 

ከፍተኛ ችግር የገጠመውን ንብ ኢንተርናሽናል ባንክ ከአሥር ዓመታት በላይ የመሩት ፕሬዚዳንት ከኃላፊነታቸው ተነሱ | Ethiopian Reporter | ሪፖርተር
ንብ ኢንተርናሽናል ባንክን ከአሥር ዓመታት በላይ በፕሬዚዳንትነት
ሲመሩ የቆዩት አቶ ገነነ ሩጋ

ቦርዱ ለመጀመሪያ ጊዜ ባወጣው መግለጫ ላይም የአዲሱ የንብ ኢንተርናሽናል ባንክ ቦርድ ከቀረፃቸው የለውጥ ዕቅዶቹ መካከል የመጀመሪያው ምዕራፍ፣ በባንኩ ከፍተኛ ሥራ አመራሮች ላይ ለውጥ ማካሄድ መሆኑን አስታውቋል። ይህም የሚከናወነው የኢትዮጵያ ብሔራዊ ባንክ በባንኩ ላይ በቅርቡ ባካሄደው ምርመራ ግኝትና ባስቀመጠው አቅጣጫ መሠረት እንደሆነ ጠቅሷል፡፡ በዚህም መሠረት የኢትዮጵያ ብሔራዊ ባንክ በንብ ኢንተርናሽናል ባንክ ላይ በቀጣይ የሚያደርገው ተጨማሪ ምርመራ እንደተጠበቀ ሆኖ፣ የባንኩ ዋና ሥራ አስፈጻሚ የነበሩ አቶ ገነነ ሩጋ ከኃላፊነታቸው እንደተነሱ ቦርዱ ባወጣው በመግለጫው ላይ አስታውቋል። በቀጣይም አዲሱ ቦርድ፣ የባንኩን አደረጃጀትና መዋቅር በማስተካከል ቀሪ የባንኩ ከፍተኛ ሥራ አመራር አባላትን ብቃትን መሠረት ባደረገ መሥፈርት በመፈተሽ በአዲስ የመተካት ሥራ እንደሚያከናውንና ባንኩን ወደ ነበረበት ከፍታ በአጭር ጊዜ ለመመለስ እንደሚጥር አስታውቋል፡፡  

ከዚህ የቦርዱ ውሳኔ ጎን ለጎንም በአቶ ገነነ ሩጋ ምትክ የባንኩ ተጠባባቂ ፕሬዚዳንትነት ሆነው እንዲያገለግሉ አቶ መልካሙ ሰለሞንን ያጨ መሆኑ ታውቋል፡፡ በተጠባባቂ ፕሬዚዳንትነት የታጩት አቶ መልካሙ በኃላፊነቱ ላይ እንዲቀጥሉ የኢትዮጵያ ብሔራዊ ባንክ ይሁንታን እንደሚጠይቅ ታውቋል፡፡ 

በተጠባባቂ ፕሬዚዳንትነት የታጩት አቶ መልካሙ በባንክ ኢንዱስትሪ ውስጥ ከ20 ዓመታት በላይ በተለያዩ የሥራ መደቦች ላይ የሠሩ ስለመሆናቸው ተጠቅሷል፡፡ 

በተለይ በንብ ኢንተርናሽናል ባንክ ውስጥ የኦዲት ዳይሬክተር፣ በሪሶርስና ኮምፕሊያንስ ማኔጅመንት ዳይሬክተርነት ሠርተዋል፡፡ የባንኩ የሪሶርስና ፋሲሊቲስ ምክትል ፕሬዚዳንት በመሆንም አገልግለዋል፡፡  

የባንኩ ተጠባባቂ ፕሬዚዳንት ሆነው እስከታጩበት ጊዜ ድረስም የሒውማን ካፒታል ምክትል ፕሬዚዳንት በመሆን ሲያገለግሉ ነበር፡፡ ይህ በእንዲህ እንዳለ የንብ ኢንተርናሽናል ባንክ አዲሱ ቦርድ ኃላፊነቱን ከተረከበ በኋላ ሲያከናውኑ የነበረውን የሥራ እንቅስቃሴ በማስመልከት ዝርዝር መግለጫው ላይ በርከት ያሉ ጉዳዮችን ዳስሷል፡፡ ታኅሳስ 18 ቀን 2016 ዓ.ም. የባንኩን ባለአክሲዮኖች 24ኛ መደበኛ ጠቅላላ ጉባዔ በብሔራዊ ባንክ አመቻችነትና ታዛቢነት ባደረገው ምርጫ የተመረጡ የቦርድ አባላት ዝርዝር ጥር 24 ቀን 2016 ዓ.ም. በኢትዮጵያ ብሔራዊ ባንክ መፅደቁን ያስታውሳል፡፡

አዲሱ ቦርድ ባንኩን የማስተዳደር ተግባሩን ከጥር 27 ቀን 2016 ዓ.ም. ጀምሮ ሙሉ በሙሉ ተረክቦ ባንኩ ያለበትን ከፍተኛ ተግዳሮት በመገንዘብ ፈጥኖ ወደ ሥራ በመግባት የራስ አመራርና የንዑስ ኮሚቴዎችን ድልድል በማካሄድ አቶ ሺሰማ ሸዋነካን በሊቀመንበርነት፣ እንዲሁም ዶ/ር ወንድሙ ተክሌን በምክትል ሊቀመንበርነት መምረጡን በዚሁ መግለጫው ላይ ገልጿል፡፡ 

በቀጣይም ቦርዱ ባንኩ ያለበት አሁናዊ ሁኔታ ጊዜ የማይሰጥና ቀን ከሌሊት መሥራትን እንደሚጠይቅ፣ ከግንዛቤ በማስገባት የባንኩን ስምና ዝና ወደነበረበት መመለስን፣ እንዲሁም የባንኩን ዘለቄታዊ ጥቅም ማስጠበቅን ዋነኛ ግቡ ያደረገውን የባንኩን የመልሶ ማደራጃ የዘጠና ቀናት ዕቅድ በማቀድ ወደ ሥራ መግባቱንም አስታውቋል፡፡ 

ቦርዱ ከባንኩ የማኔጅመት አባላት እስከ ዋና ክፍል ኃላፊ ድረስ ካሉት የሥራ ኃላፊዎችም ጋር ትውውቅና ውይይት ማድረጉንና እንዲሠሩ ባሰባቸው ዝርዝር ጉዳዮች ላይ ማብራሪያ እንደሰጠ ይሄው የቦርዱ መግለጫ ያመለክታል፡፡ በዚህም መሠረት ቦርዱ የታለመውን የመልሶ ማደራጃ ዕቅድ ይፋ በማድረግ፣ የሥራ ኃላፊዎችና ሠራተኞች በተረጋጋ መንፈስና በጥንቃቄ ሥራቸውን እንዲያከናውኑ መመርያ ስለመተላለፉ ይገልጻል፡፡

የቦርዱ ንዑሳን ኮሚቴዎችም ጊዜ ሳይሰጡ ከባንኩ የማኔጅመንት አባላት ጋር በቀረቡ ሪፖርቶችና በቀጣይ አቅጣጫዎች ላይ ውይይት ማካሄዱን ከመግለጫው መገንዘብ ተችሏል፡፡ 

ከዚህም ሌላ አዲሱ ቦርድ የካቲት 6 ቀን 2016 ዓ.ም. ከኢትዮጵያ ብሔራዊ ባንክ ገዥ አቶ ማሞ ምሕረቱ፣ ከኢትዮጵያ ብሔራዊ ባንክ ምክትል ገዥ አቶ ሰለሞን ደስታና ከሌሎች የባንኩ ከፍተኛ የሥራ ኃላፊዎች ጋር ትውውቅ ማድረጉ ታውቋል፡፡ 

በዚህ ትውውቅ ፕሮግራም የኢትዮጵያ ብሔራዊ ባንክ ገዥ አዲሱ ቦርድ ከፊቱ የተደቀኑትን ተግዳሮቶች ግዙፍነት በአጽንኦት እንዳስገነዘባቸውና ኃላፊነታቸውንም በልዩ ቁርጠኝነትና በከፍተኛ የኃላፊነት ስሜትና ፍፁም ታማኝነት እንዲወጡ በአንፅኦት እንዳሳሰባቸው ይሄው መግለጫቸው ያመለክታል፡፡ የኢትዮጵያ ብሔራዊ ባንክ የአዲሱን ቦርድ የሥራ አፈጻጸም በቅርበት እንደሚከታተል እንደሚገመግም የባንኩ ገዥ አስታውቀዋልም ተብሏል፡፡ 

በዋነኛነት የኢትዮጵያ ብሔራዊ ባንክ ገዥ ንብ ኢንተርናሽናል ባንክ፣ ዘርፉ ቀደምትና ጠንከራ ከሆኑት ባንኮች መካከል የሚመደብ መሆኑን አስታውሰው፣ በቀጣይም አዲሱ ቦርድ ንብ ኢንተርናሽናል ባንክ ወደነበረበት ደረጃ በሚያደርገው ጉዞ የኢትዮጵያ ብሔራዊ ባንክ ከጎኑ በመሆን በቅርበት ሁሉን አቀፍ ድጋፍ እንደሚሰጠው የባንኩ ገዥ እንዳረጋገጡላቸውም ጠቅሰዋል፡፡

አዲሱ ቦርዱ የንብ ኢንተርናሽናል ባንክ ከፍተኛ ተግዳሮት በገጠመው በዚህ ወቅት ከጎኑ በመሆን ፈተናዎቹን በስኬት እንዲወጣ፣ የኢትዮጵያ ብሔራዊ ባንክ እያደረገለት ለቆየውና ወደፊትም ለሚቀጥለው ሁሉን አቀፍ ድጋፍ፣ ክትትልና ቁጥጥር ከፍተኛ አክብሮት እንዳለውም በዚሁ መግለጫ ላይ አመልክቷል፡፡ 

የንብ ኢንተርናሽናል ባንክ ባለፉት ጊዜያት በገጠመው ተግዳሮት ምክንያት በደንበኞቹ፣ ገንዘብ አስቀማጮች፣ የንግድ አጋሮቹ፣ እንዲሁም ሌሎች ባለድርሻ አካላት ለደረሰባቸው መጉላላት የባንኩ ቦርድ ይቅርታ ጠይቋል፡፡ በቀጣይም ቦርዱ በሚያደርገው ማስተካከያ ደንበኞቹን፣ አስቀማጮቹን፣ አጋሮቹንና ባለድርሻዎቹን በተሻለ አገልግሎት እንደሚክስ አዲሱ ቦርድ በዚሁ መግለጫው ላይ ቃል ገብቷል፡፡ 

ቦርዱ ከዚህም በኋላ ተከታታይነት ያለው የምክክር መድረኮች በማመቻቸት ከደንበኞቹ፣ ከተበዳሪዎች፣ ከባለአክሲዮኖች፣ ከስመ ጥር ነጋዴዎችና ከሌሎች የንግድ አጋሮቹ ጋር በተከታታይ ውይይት በማድረግ፣ የባንኩን የአገልግሎት ጥራት ለማሻሻል በትጋት እንደሚሠራ አስታውቋል፡፡

በሌላ በኩል ደንበኛ ተኮር የሆኑ አዳዲስ የባንክ አገልግሎቶችን በማቅረብ፣ የደንበኞቹን ፍላጎት ማርካት፣ ብሎም ተገቢውን አገልግሎት በጥራት በስጠት አሁን ያጋጠመውን ችግር በአጭር ጊዜ ውስጥ በመቅረፍ ባንኩን ወደነበረበት ከፍታ ለመመለስ እንደሚሠራ አስታውቋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች