Sunday, April 21, 2024
- ማስታወቂያ -
- ማስታወቂያ -

የዓለም አቀፍ ንግድ የክፍያ ጫናዎች ያቃልላል የተባለው ስምምነት

ተዛማጅ ፅሁፎች

ዓለም አቀፉ የፋይናንስ ኮርፖሬሽን የኢትዮጵያን የወጪ ንግድ ለማሳለጥና በዓለም አቀፍ ግብይት ውስጥ የሚንቀሳቀሱ የኢትዮጵያ ላኪዎችን ለመደገፍ የ30 ሚሊዮን ዶላር የንግድ ፋይናንስ ዋስትና ለማቅረብ ከዘመን ባንክ ጋር ስምምነት ተፈራረመ፡፡

የኢትዮጵያ የወጪ ንግድ ፋይናንስን ለማጠናከር ይረዳል የተባለው ስምምነት፣ በ‹‹አይኤፍሲ›› እና በዘመን ባንክ መካከል በተፈራረመበት ወቅት እንደተገለጸው፣ የንግድ ፋይናንስ አቅርቦት ዋስትናው የኢትዮጵያን የወጪና የገቢ ንግድ ለመደገፍ፣ እንዲሁም አኅጉራዊ ንግድን ለማበረታታት ከፍተኛ ጥቅም ይሰጣል ተብሏል፡፡

ኮርፖሬሽኑ ለዘመን ባንክ የሰጠው የ30 ሚሊዮን ዶላር ንግድ፣ ፋይናንስ አቅርቦት ዋስትና አፍሪካ ከውጭ የሚገቡ ምርቶች ላይ ያላትን ጥገኝነት ለመቀነስ፣ የአፍሪካ ንግድ የፋይናንስ አቅርቦት በሚል የመደበው የአንድ ቢሊዮን ዶላር ፕሮጀክት አካል ነው፡፡ ይህንን ስምምነት በተመለከተ የዘመን ባንክ ዋና ሥራ አስፈጻሚ አቶ ደረጀ ዘበነ በሰጡት ማብራሪያ፣ በዓለም አቀፍ ንግድ ውስጥ በገዥና በሻጮች መካከል የሚገኘውን መተማመን የሚያሳልጥ በመሆኑ፣ በዚህ ረገድ ባንኮች ዋስትና በመስጠት ትልቁን ሚና የሚጫወቱ በመሆናቸው፣ ይህንን ተግባራቸውን በአግባቡ ለመጠቀም ከፍተኛ ጠቀሜታ እንደሚሰጥ ገልጸዋል፡፡ የክፍያ ሥርዓቱንም በማሳለጥ ረገድ የባንኮች ሚና ቀዳሚ መሆኑን የጠቀሱት አቶ ደረጀ፣  ከዚህ ጎን ለጎን የዓለም የግብይት ሥርዓት በሚዛባበት ጊዜና በገዥዎችና በሻጮች መካከል አለመተማመን በሚፈጠርበት ወቅት በባንኮች ላይ የሚደርሰው ጫና እግጅ ከፍተኛ ከመሆኑ አንፃር፣ እንዲህ ያለው የፋይናንስ አቅርቦት ድጋፍ ባንኮችም ሆነ በወጪና በገቢ ንግድ ለተሰማሩ ነጋዴዎች አስተማማኝ ዋስትና የሚሰጥ መሆኑን ጠቅሰዋል፡፡  

‹‹ባንኮች እምነት እንዲጣልባቸው በጥሬ ገንዘብ በመስጠት ጭምር የንግድ ልውውጦችን ለማሳለጥ ድጋፍ እንድንሰጥ እንገደዳለን፤›› ያሉት አቶ ደረጀ፣ ካለፉት ጥቂት ዓመታት ወዲህ በኢትዮጵያ የፀጥታ ችግር ምክንያት በሚስተዋለው ባንኮች ፈተና ውስጥ መሆናቸውን ገልጸዋል፡፡

አሁን ከ‹‹አይኤፍሲ›› ጋር በተደገው ስምምነት መሠረት ‹‹አይኤፍሲ›› በያዘው ፕሮግራም ለአፍሪካ አገሮች ከሚሰጠው አንድ ቢሊዮን ዶላር ውስጥ ለዘመን ባንክ 30 ሚሊዮን ዶላር ሽፋን ለመስጠት ስምምነት ላይ መድረሱ እንደ ትልቅ ዕድል የሚወሰድ መሆኑን ተናግረዋል፡፡  

ዘመን ባንክ ለደንበኞቹና ለሌሎችም አካላት በዚህ ፕሮግራም በመጠቀም፣ በዓለም አቀፍ ደረጃ የሚደረጉ ግብይቶች የተሳለጡ እንዲሆኑና የገቢና የወጪ ንግድ አስተማማኝ እንዲሆን ያደርጋል የተባለው ይህ ስምምነት፣ ከዚህ በኋላም ዘመን ባንክ በሌሎች ዓለም አቀፍ ተቋማት ላይ እምነት ያሳደረ መሆኑን የሚያሳይ፣ ሌሎች ተቋማትም ከዘመን ባንክ ጋር ለመሥራት ፍላጎት እንዲኖራቸው የሚያደርግ ነው፡፡

በዚህ ስምምነት ዙሪያ አቶ ደረጀ ለሪፖርተር እንደገለጹት፣ በዓለም አቀፍ ደረጃ ለሚደረጉ ግብይቶች በውጭ ባንኮች ዘንድ መተማመንን ለማጉላት ለባንኩ ከፍተኛ ጠቀሜታ ይሰጣል፡፡ ለምሳሌ ከዚህ ቀደም በአገር ውስጥ ከነበረው ግጭት አንፃር አንዳንድ ነጋዴዎች ዕቃቸውን ጭነው ክፍያ ለመፈጸም ዕቃውን ከሸጡላቸው ኩባንያዎች ማረጋገጫ ይጠይቃሉ፡፡

በሌላ ሦስተኛ ወገን ገንዘቡ ስለመከፈሉ ሁሉ ማረጋገጫ የሚጠይቁበት ሁኔታ መኖሩን፣ አሁን ግን ከአይኤፍሲ ጋር የተደረገው ስምምነት ግን ለማንኛውም የወጪና የገቢ ንግድ በውጭ አገር ባንኮች በኩል የሚፈጸሙ ክፍያዎች ወዲያው እንዲፈጸሙ ዋስትና የሚሰጥ ነው፡፡

በስምምነቱ መሠረት ዘመን ባንክ መክፈል ለሚገባው ክፍያ አይኤፍሲ ዋስትና ይሰጣል፡፡ ዘመን ባንክ ባይከፍል አይኤፍሲ እኔ እከፍላለሁ ብሎ ስምምነት ያደረገበት እንደሆነም አቶ ደረጀ ገልጸዋል፡፡ ስለዚህ ማንኛውም ነጋዴ የክፍያ ማረጋገጫ ሰነድ የሚጠይቅ ቢሆን፣ ባንኩ በቀላሉ መስጠት እንደሚቻል ተናግረዋል፡፡

ከዚህ ቀደም ቀደም እንዲህ ያለው ነገር ሲጠየቅ በጥሬ ገንዘብ ሲሰጥ እንደነበር ያስታወሱት አቶ ደረጀ፣ ይህ ዓይነቱ አሠራር የሥራ ማስኬጃ ካፒታልን ማስያዝ ጭምር ይጠይቅ ነበር፡፡ አሁን ግን ይህንን የሥራ ማስኬጃ ካፒታል እንደፈለገ ለማሽከርከር የሚችልበትን ዕድል እንደሚሰጥ አመልክተዋል፡፡ ‹‹ክፍያ በደረሰ ጊዜ ብቻ ክፍያ መክፈል የሚጠበቅንብ እንጂ መተማመኛ ሰነዱ በተከፈተበት ጊዜ ገንዘብ አቅርበህ ነው ፕሮሰስ የሚደረግልን የሚለውንም የሚያስቀር በመሆኑ፣ ከዚህ ሥራ ጋር በተገናኙ ጉዳዮች ለባንኩ ትልቅ ዕፎይታ የሚሰጥ ስምምነትም ነው፤›› ብለዋል፡፡

‹‹ማንኛውም ነጋዴ ዕቃ ሲያስመጣ ማረጋገጫ አምጣ ቢባል አሁን ባንክ ገንዘብ አለኝ፣ የለኝም ብሎ አይጨነቅም፤›› ያሉት አቶ ደረጃ፣ አሁን ግን ይህንን ዋስትና በመያዝ ለመሥራት ያስችላል፡፡ ይህንን ክፍያ ዘመን ባንክ ባይከፍል እንኳን አይኤፍሲ በዘመን ባንክ ስም ይከፍልና በኋላ ላይ ዘመን ባንክ ያንን ገንዘብ ለአይኤፍሲ እንደሚመልስ ተናግረዋል፡፡ አሁን የተደረገው ስምምነት በ30 ሚሊዮን ዶላር እንዲጀመር ተደረገ እንጂ፣ የዚህ ውጤት ታይቶ መጠኑን ከፍ ለማድረግ የሚያስችል መሆኑንም ለማወቅ ተችሏል፡፡      

ከ‹‹አይኤፍሲ›› ጋር እንዲህ ባለው ደረጃ ስምምነት ማድረግ በጋራ ለመሥራት የተገኘው ዕድል ግን እንዲህ በቀላሉ ያልተገኘና ብዙ ውጣ ውረድ የነበረው ስለመሆኑም ተገልጿል፡፡

ከድርድሩ ባሻገር ወደ ኮንትራት ስምምነት ለመግባት የሚያስፈልገው ሒደት ተሟልቶ ከተረጋገጠ በኋላ፣ እንዲሁም በአይኤፍሲ በኩልም ዘመን ባንክ አጠቃላይ አቋሙንና ያለውን የሥራ አፈጻጸም በመገምገም ባንኩ ለዚህ ፕሮግራም ብቁ ነው የሚለው ድምዳሜ ላይ በመድረሱ ነው፡፡

እንደ ዘመን ባንክ መረጃ፣ በዚህ ስምምነት መሠረት በየትኛውም ዓለም ለሚደረጉ ግብይቶች በዘመን ባንክ በሚያልፉ የንግድ ፋይናንስ ሥራዎች በሙሉ ‹‹አይኤፍሲ›› ዋስትና ይሰጣል፡፡ በዚህ ዋስትና መሠረት የሚደረጉ ክፍያዎችን በቀደምትነት የመክፈል ኃላፊነት የዘመን ባንክ ቢሆንም፣ አይኤፍሲ ደግሞ ከበስተኋላ ሆኖ ዋስትና በመስጠት ክፍያው ካልተከፈለ የመክፈል ግዴታ አለበት፡፡  

የዓለም አቀፍ የፋይናንስ ኮርፖሬሽን በዓለም አቀፍ ደረጃ የንግድና የፋይናንስ ዘርፉን ለመደገፍ የተለያዩ ፕሮግራሞች ያሉት፡፡ የንግድ ፋይናንስ ዘርፉን የብድር አገልግሎትና የቅድመ አደጋ አስተዳደር፣ እንዲሁም መካከለኛና አነስተኛ የሆኑ የንግድ ዘርፎች ተጠቃሚ የሚያደርጉ የብድር ዓይነቶች ተግባራዊ እንዲሆኑ የማማከር ሥራንም የሚሠራ መሆኑ ታውቋል፡፡  

ከዚህ በተጨማሪም የንግድ ፋይናንስ አቅርቦት ለአፍሪካ የንግድ ዘርፍ መጎልበት የሚያበረክተው አስተዋጽኦ ከፍተኛ ስለመሆኑ የተጠቀሰ ሲሆን፣ ዘመን ባንክ ከዓለም አቀፉ የፋይናንስ ኮርፖሬሽን ጋር የገባው ስምምነትም በኢትዮጵያ ወሳኝ ለሆኑት የሸቀጦች ንግድ የብድር አቅርቦት ለማጠናከርና ለአገሪቱ አዲስ የንግድ አጋርነት በር ከፋች መሆኑን፣ በኢትዮጵያ የዓለም አቀፉ የፋይናንስ ኮርፖሬሽን ሥራ አስኪያጅ ሚስ ማዲሎ ማኖፋ ገልጸዋል፡፡

ይህ ፕሮግራም የወጪ ንግድ ፋይናንስ እንዳይስፋፋ የሚገድቡ እክሎችን ወይም ለዘርፉ ፈታኝ የሆኑ ሥጋቶችን ለመቀነስ የሚረዳ ስለመሆኑ የገለጹት ሚስ ማዲሎ፣ ለወጪና ለገቢ ንግድ ዘርፉ ፋይናንስ የማቅረብ አቅምንም ያሰፋል ብለዋል፡፡

በዚህ ፕሮግራም በኩል ዓለም አቀፍ ፋይናንስ ኮርፖሬሽን በአግሪ ቢዝነስ፣ በአምራች ዘርፍ፣ የግል ንግድ ዘርፍና ዲጂታል ዘርፍ ትኩረት ሰጥተው ለሚሠሩ የፋይናንስ ተቋማት ከ100 ቢሊዮን ዶላር በላይ ዋስትና መስጠቱም ተጠቅሷል፡፡ ከዚህ ጋር በተያያዘም በ2023 ብቻ 9.1 ቢሊዮን ዶላር ዋስትና የሰጠ ሲሆን፣ ከዚህ ውስጥ 3.5 ቢሊዮን ዶላር የሚሆነው ለአፍሪካ  የተሰጠ መሆኑን የኮርፖሬሽኑን ተግባራት የተመለከቱት መረጃዎች ያሳያሉ፡፡

ዘመን ባንክ በአሁኑ ወቅት አጠቃላይ የሀብት መጠኑ ወደ 50 ቢሊዮን ብር የደረሰ ሲሆን፣ የተከፈለ ካፒታሉ ከሰባት ቢሊዮን ብር በላይ ሆኗል፡፡ የተፈረመ ካፒታሉ ደግሞ 104.2 ቢሊዮን ብር መድረሱን ከባንኩ ያገኘነው መረጃ ያመለክታል፡፡    

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች