Sunday, April 21, 2024
- ማስታወቂያ -
- ማስታወቂያ -

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

ተዛማጅ ፅሁፎች

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር ቢሊዮን ብር በመጨመር ወደ 20 ቢሊዮን ብር ለማሳደግ ውሳኔ ላይ መድረሱ ተመለከተ፡፡

ከባንኩ ያገኘነው መረጃ እንደሚያመለክተው አዲሱ ቦርድ ባንኩ ገብቶበታል ከተባለው ችግር ለማላቀቅ የተለያዩ ውሳኔዎችን እያሳለፈ ሲሆን ከእነዚህ ውሳኔዎች መካከል አንዱ የባንኩን ካፒታል በማሳደግ አቅሙን ለማጠናከር ያለመ ነው፡፡

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ | Ethiopian Reporter | ሪፖርተር

በዚሁ ውሳኔ መሠረት ካፒታሉን ማሳደግ የሚቻለው የጠቅላላ ጉባዔውን ይሁንታ ሲያገኝ በመሆኑ ይህንኑ የውሳኔ ሐሳብ ለማቅረብ አዲሱ ቦርድ የባንኩን ባለአክሲዮኖች ለአስቸኳይ ጠቅላላ ጉባዔ ጠርቷል፡፡

በተጠራው ጠቅላላ ጉባዔ ላይ የባንኩን ካፒታል በአሥር ቢሊዮን ብር በማሳደግ አጠቃላይ ካፒታሉን 20 ቢሊዮን ብር ለማድረስ የውሳኔ ሐሳብ በማቅረብ በጠቅላላ ጉባዔው ለማፀደቅ ጥረት እንደሚያደርግ ታውቋል፡፡

ይህን የውሳኔ ሐሳብ ማፀደቅና ተጨማሪውን ካፒታል ማሰባሰብ የሚችለው ባንኩ ከዚህ ቀደም ባካሄደው ጠቅላላ ጉባዔ የባንኩን ካፒታል እስከ ሰኔ 2018 ዓ.ም. ድረስ ከአምስት ወደ አሥር ቢሊዮን ብር ለማሳደግ ያስቀመጠው ቀነ ገደብ በመሳጠር ነው፡፡

ለመጋቢት 14 ቀን 2016 ዓ.ም. በተጠራው አስቸኳይ ጠቅላላ ጉባዔ ላይም እስከ ሰኔ 2018 ድረስ ለማጠናቀቅ ታቅዶ የነበረውን የአምስት ቢሊዮን ብር ተጨማሪ ካፒታል እስከ ሰኔ 2016 ተከፍሎ እንዲጠናቀቅ ቦርዱ ለጠቅላላው ጉባዔ ውሳኔ ሐሳብ የሚያቀርብ ይሆናል፡፡

ይህ የሚፀድቅለት ከሆነ በአራት ዓመት ውስጥ ተከፍሎ የሚጠናቀቅ የአሥር ቢሊዮን ብር ተጨማሪ ካፒታል እንዲፀድቅለት የሚጠይቅ ይሆናል፡፡

ባንኩ ከዚህ ቀደም ባካሄደው ጠቅላላ ጉባዔ ካፒታሉን ከአምስት ቢሊዮን ወደ አሥር ቢሊዮን ብር ለማሳደግ በወሰነው መሠረት ከፊሉን ማሰባሰብ የቻለ ሲሆን በአሁኑ ወቅትም የተከፈለ ካፒታሉ 7.7 ቢሉዮን ብር ደርሷል፡፡ አሁን ባለው ዕቅድ 2.3 ቢሊዮን ብር ዋጋ ያላቸው ቀሪ አክስዮኖችን የባንኩ ባለአክሲዮኖች እስከ ሰኔ 2016 አጠናቀው እንዲከፍሉ ይደረጋል፡፡

በድንገተኛ ጠቅላላ ጉባዔው ላይ የባለአክሲዮኖችን ውሳኔ የሚሻ መሆኑ ታምኖ የተያዘው ሌላው አጀንዳ ደግሞ ባንኩ በ2015 የሒሳብ ዓመት አግኝቶት ከነበረው ትርፍ ላይ ለባለአክሲዮኖች ይከፋፈላል የተባለውን የትርፍ ድርሻ ላይ ተወያይቶ ውሳኔ መስጠት ነው፡፡

ንብ ኢንተርናሽናል ባንክ በ2015 የሒሳብ ዓመት ከታክስ በኋላ 1.5 ቢሊዮን ብር ያተረፈ ሲሆን ከዚህ ትርፍ ውስጥ ለመጠባበቂያና ሌሎች ተቀናሾች ታሳቢ ተደርጎ ቀሪው ለባለክኢሰዮኖች እንዲከፋፈል ታኅሳስ 18 ቀን 2016 ዓ.ም. በተደረገው ጠቅላላ ጉባዔ ላይ ተወስኖ እንደነበር አይዘነጋም፡፡

ሆኖም ባንኩ አጋጥሞታል ከተባለው ችግር ጋር ተያይዞ የኢትዮጵያ ብሔራዊ ባንክ የ2015 የሒሳብ ዓመት ትርፍ ሳይከፋፈል እንዲቆይና ለካፒታል ማሳደጊያ እንዲውል በማለት በማሳሰቡ እስካሁን የትርፍ ድርሻ ክፍፍሉ ሳይካሄድ ቆይቷል፡፡ በአስቸኳይ ጠቅላላ ጉባዔው ላይ ቦርዱ የሒሳብ ዓመቱ የትርፍ ክፍፍል ለካፒታል ማሳደጊያ እንዲውል የውሳኔ ሐሳብ ያሳልፋል ተብሎ ይጠበቃል፡፡  

ንብ ኢንተርናሽናል ባንክ ታኅሳስ 18 ቀን 2016 ዓ.ም. ባካሄደው አዲስ የዳይሬክተሮች ቦርድ ምርጫ የተመረጡት የቦርድ አካላት ኃላፊነታቸውን ከተረከቡ በኋላ በተከታታይ ከባለ ድርሻ አካላትጋር እንዲሁም በተለያዩ ደረጃ ላይ ከሚገኙ የባንኩ ሠራተኞች ጋር መክርዋል፡፡ አሁንም ተከታታይ ውይይቶች ያካሂዳሉም ተብሏል፡፡ የ90 ቀናት መሪ ዕቅድ በማውጣት ይህንኑ ዕቅድ ለማስፈጸም እየንቀሳቀሱ ሲሆን ባንኩን ወደ ቀደመው አቋሙ ለመመለስ ያስችላል የተባሉ የተለያዩ ውሳኔዎች ያሳልፋሉ ተብሎም እየተጠበቀ ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች