Sunday, April 14, 2024
- Advertisement -
- Advertisement -

የተመረጡ ፅሑፎች

ሁሉም ነገር ልክ ይኑረው!

ሰላም! ሰላም! ወገኖቼ በሙሉ እንደምን ሰነበታችሁ እያልኩ ከጉልበቴ ሸብረክ ከአንገቴ ጎንበስ እያልኩ ሰላምታ አቀርባለሁ፡፡ የክርስትና እምነት ተከታዮች የኩዳዴ ፆም እየተቃረበ ሲሆን፣ የእስልምና እምነት ተከታዮችም ረመዳን ፆም እንዲሁ በቀናት ልዩነት ይጀመራል። እስላም ክርስቲያኑ በፆሙ ወራት ከፈጣሪው ጋር በጥብቅ ሲገናኝ ለአገር በረከት ነው እላለሁ። ከምድር ምስቅልቅል ነገሮች ለተወሰነ ጊዜ ገለል ብሎ ከፈጣሪ ጋር በፆምና በፀሎት ለመነጋገር መታደል ታላቅ ነገር ሆኖ ይሰማኛል። ፈጣሪ የክርስትናንም ሆነ የእስልምና እምነት ተከታዮችን መንፈሳቸውን አበርትቶ ለአገር ይፀልዩ ዘንድ እንዲረዳቸው መልካም ምኞቴ ነው፡፡ ወገኖቼ ያበርታችሁ እላለሁ። አዛውንቱ ባሻዬ በፆም ወራት አንደበታቸውን ገርተው፣ ከዕርምጃቸው ቀንሰው፣ ውሎአቸውን ከቤተ ክርስቲያን ደጃፍ አድርገውና ፀሎታቸው ላይ ተግተው ስለሚሰነብቱ የእኔ አርዓያ ሰብ ናቸው። እሳቸው በዚህ ዕድሜያቸው ያላቸው ጥንካሬና ንቁነት በእጅጉ ይገርመኛል። ከ80 ዓመት በላይ ያስቆጠሩ ሳይሆኑ ገና በ30 ውስጥ ያሉ አፍላ ጎረምሳ ይመስሉኛል፡፡ ቀን ድካም የለ ሌሊት እንቅልፍ የለ ዳዊታቸውን ዘርግተው ለአገር ሲፀልዩ ያስደምሙኛል፡፡ እሳቸውን በታላቅ ግርማ ሞገስና አይበገሬ መንፈስ ውስጥ ሆነው ሳያቸው ራሴን እታዘባለሁ፡፡ ለምድራዊ ከንቱ ኑሮ ስል በዚህ የድለላ ሕይወት ውስጥ የምቀላምዳቸው ነገሮች ሲታሰቡኝ እናደዳለሁ፡፡ ከራሴ አልፌ ከንቱዎቹን ፖለቲከኞች ሳይ ደግሞ የበለጠ እበግናለሁ፡፡ በክርስትናም ሆነ በእስልምናም እምነቶች ውስጥ እንዲህ ያሉ አዕሩጋንን ኢትዮጵያ ውስጥ ማግኘት መታደል ነው ብዬ እፅናናለሁ፡፡ የሚያፅናና የሰጠ ፈጣሪ የተመሠገነ ይሁን!

ምሁሩ ልጃቸው ደግሞ በከፍተኛ ሥነ ምግባር የታነፀ፣ ጥራት ባለው ትምህርት ከአንድም ሁለት ዲግሪዎችን የጫነ፣ በተለያዩ መንግሥታዊና መንግሥታዊ ባልሆኑ መሥሪያ ቤቶች ከጀማሪ ኤክስፐርትነት እስከ አማካሪነት የሥራ ልምድ ያዳበረ፣ የአገራችንን ብቻ ሳይሆን የዓለምን የፖለቲካ አካሄድ ጠንቅቆ የተረዳ፣ በትምህርትና በሥራ ካካበተው ዕውቀት በተጨማሪ ከዓመታት የንባብ ልምዱ አስደማሚ ክህሎት ያዳበረ፣ በዓለማዊም ሆነ በመንፈሳዊ አስተሳሰብ የላቀ ደረጃ ላይ የሚገኝ፣ በአጠቃላይ ልዕለ ሰብ ለማለት የሚያስችል ሰብዕና የገነባ ወዳጄ ነው፡፡ ያው ደላላ እንደ መሆኔ መጠን ግነት ብወድም በዚህ ወዳጄ ማንነት ላይ ግን አንዲት ሚሊ ሜትር አለመጨመሬን ስነግራችሁ በከፍተኛ ትህትና ነው፡፡ ይህንን የመሰለ ወንድም አከል ወዳጅ በማግኘቴ ምን ያህል እንደተጠቀምኩ ስናገር በታላቅ ኩራት ነው፡፡ ይህ ኩራት የግብዝነት ሳይሆን በአስተውሎት ላይ የተመሠረተ መሆኑን መናገር ይኖርብኛል፡፡ ለዚህም ምሥጋናውን የሚወስደው ምሁሩ የባሻዬ ልጅ ነው፡፡ ክብረት ይስጥልኝ ወዳጄ!

ወደ ተለመደው ወጋችን ስንመለስ ጨዋታ እንደ አጨዋወቱ አይደል? ያው አላድለን ብሎ የእኛ ቻምፒዮንስ ሊግ ወሬ ነው። ወሬም አያልቅብን፣ እኛም አይደክመን ይኼው ይዘነዋል። እና ዛሬ የማጫውታችሁ በሆድ ዙሪያ ይሆናል። ተረቱ ‹ሆድ ካገር ይሰፋል› ይላል። ዛሬ ላይ ቆማችሁ ልትተረጉሙት ካሰባችሁ ማበዳችሁ ነው። ምክንያቱም ቻይነት፣ ታጋሽነት፣ ለመስማት መፍጠን፣ ለመናገር መዘግየት፣ ወዘተ ደብዛቸው ጠፍቷል። ባንመዘገብም እያንዳንዳችን የወሬ ጣቢያ አለን። የወሬ ስላችሁ ይገባችኋል ብዬ ነው። እና እኔ፣ እርስ በርሱ የሚነቋቆረውን ብዛትና የሚጠፋውን ስም ቁጥር ቁጭ ብዬ ሳሰላ መቼ ይሆን የሚሰለቸን ብዬ ከምሁሩ የባሻዬ ልጅ ጋር ወሬ ጀምራለሁ። ምሁሩ የባሻዬ ልጅ በተባ አንደበቱ፣ ‹‹መቼ ይሆን የምንጠግበው አትልም? ‹ሆድ ካገር ይሰፋል› የሚለው ተረት ሲተረት እኮ ምግብን ማዕከል አድርጎ ሳይሆን ወሬንም ነው…›› አለኝ። ደርሶ ግራ ሲያጋባኝ ፊቴ መጠየም ጀመረ፡፡ ‹‹ምንድነው የምትለው?›› ስለው፣ ‹‹በዚህ በኖርከው ዕድሜ ቢያንስ እንዴት ይኼ አልተገለጠልህም?›› ብሎ ፈገግ አለ፡፡ ፈገግታው ውስጥ ያለው ምፀት መሆኑ ቢገባኝም ለጊዜው ከዝምታ በስተቀር ምንም ማለት አልፈለግኩም፡፡ ብፈልግም ምንም የምለው ነገር አልነበረም፡፡ ዝምታ ብቻ!

ቆይቼ ግን ማሰላሰል ጀመርኩ፡፡ አንድ ሐሳብ ብልጭ ሲልልኝ ይኼ ሰው እንዴት ነው ነገሩ፣ ስላፈጠጡና ስላጉረጠረጡ ብቻ እንደመጣለን ብለው ከሚያስቡት ወገኖች ዘንድ መዋል ጀመረ እንዴ እያልኩ፣ ‹‹እስቲ ገለጥ ገለጥ አድርገህ አስረዳኝ…›› ስለው፣ ‹‹የዘመኑን ፈሊጥ ታውቃለህ፣ ዋናው ነገር ድፍረት ይሰኛል። ድፍረት ምንድነው ስትል? ድፍረት በዘመኑ መዝገበ ቃል አፈታት ማንበልበል መቻል ማለት ነው። ስለዚህ መማር ድሮ ቀረ። ዕውቀት አፈር ቃመ። ዋናው ድፍረት ነው። ድፍረት ያበላል ሲሉህ በአጭሩ ወሬ መቻል ማለት ነው። ልብ አድርግ ማንበልበልና አንደበተ ርዕቱነት የተለያዩ ናቸው። ስለዚህ ተረቱ ሲተረት ይኼን ዘመን ዓይቶ ነው በሚለው መስማማት አለብህ። በዚህ ከተስማማህ ብዙ አገር ሻጭ፣ ብዙ ክብር ሻጭ፣ ብዙ እምነት ሻጭ ስታይ የሆድ ነገር በሆድ ብቻ እንደማይፈታ ሳታልመው ሊፈታልህ ይገባል። ስለዚህ…›› ብሎ ምን ብሎ ቢቋጨው ጥሩ ነው? ‹‹…ሰው በእንጀራ ብቻ አይኖርም በወሬም እንጂ…›› ወይ አገርና ሆድ እናንተ!

እናላችሁ የሁለቱ ታላላቅ እምነቶች ፆም ተራ በተራ ለመግባት ሲቃረብ ሥራ ቀዝቅዞ ኪሴ ጭር እንዳይልብኝ እቅበጠበጥ ጀመር። የድሮ ደንበኞቼ ዘንድ እየደዋወልኩ አለሁ እላለሁ። ከደንበኞቼ አንዱ መልሶ ደውሎ፣ ‹‹ያ ባለፈው የነገርከኝ ራቭፎር ተሸጠ እንዴ?›› ሲለኝ ዕፎይ አልኩ በሆዴ። ሻጭና ገዥ ሊገናኙ ቀነ ቀጠሮ ሲቆረጥ የደላላ ሠርግና ምላሹ ስለሆነ በጣም ደስ አለኝ። ታዲያ እኔ ቀልጣፋው ያንን ራቭፎር ላሻሽጥ ጥድፍ ጥድፍ ስል መቼ ዕለት አዛውንቱ ባሻዬ ያጫወቱኝ ተረት ትዝ ብሎኝ፣ መሀል መንገድ ተገትሬ ከራሴ ጋር ማውራት ጀመርኩ። ሰውዬው አህያውን ሊሸጥ ገበያ ይዞ ይወጣላችኋል። ገበያተኛው ሌላ ሌላ ነገር ሲያይ ቆይቶ ይመጣና ባለ አህያው ጋ ሲደርስ እንዳላየ ያልፈዋል። ግራ ገባው። ‹‹ምንድነው ዛሬ ሰው ወደ እኔ የማይመጣው?›› ብሎ ፈጣሪን ማማረር ይጀምራል። ቆያይቶ ደግሞ፣ ‹‹ዛሬማ ይህን አህያ ሳልሸጥ ቤቴ አልገባም…›› ብሎ ዘዴ ይዘይዳል። ዘዴው ሰውዬው አጎንብሶ እንደ አህያ ማናፋት መሆኑ ነው። አንዳንዴ ‹ችግር በቅቤ ያስበላል› የሚለው ተረት ያለ ምክንያት አልተተረተም ያሰኛል፡፡ እውነት ነው!

ሰውየው እንደ አህያ ሲያናፋ የገበያተኛው ቀልብ ወደ እሱ ዞረ። ገበያተኛው ተሰብስቦ እንደ ትንግርት ያየው ጀመር። ኋላ አንዱ ነገሩ ገብቶት፣ ‹‹ለመሆኑ ዋጋህ ስንት ነው?›› ይለዋል። ‹‹ምኑን አውቄው ጌታዬን ጠይቁት…›› ብሎ ይመልሳል። ‹‹ጌታህ ማን ነው?›› ሲለው፣ ‹‹ምኑን አውቄው? ጌታዬን የሚያውቀው ጌታዬ ነው…›› ብሎ ይመልሳል። ‹‹እሺ የጌታህ ጌታ የት ነው ያለው?›› ሲለው፣ ‹‹እርስዎ ኪስ ነዋ…›› ይላል። ሰውዬው ኪሱን ዳበስ አድርጎ ዋጋ ጠራ። ይኼን ዓይቶ ሌላውም ኪሱን እያየ ዋጋ መጥራት። አህያውን በጨረታ ያሸጠ ብቸኛ ሰው መሆኑ አይደል? ምን ልላችሁ ፈልጌ ነው? ዘንድሮ ወይ ባለ አራት እግር ወይም ባለ አራት ዓይን ካልተሆነ በቀር ሙያ፣ ችሎታና ዕውቀት ገደል ገብተው እንስሳት ጎትተው እያወጧቸው ነው ለማለት ነው። ‹ፉገራ› አይምሰላችሁ ሰው አራት እግሩን ይብላ ተብሎ ሲረገም፡፡ ዘመኑ ከፍተኛ ፉክክር ያለበት ስለሆነ እንደ ተለመደው ዓይነት አካሄድ አያዋጣም፡፡ በዚያው መንገድ ለመቀጠል መሞከር ያስበላል እንጂ አያበላም፡፡ እንዲያ ነው! 

እስኪ እንሰነባበት፡፡ እናላችሁ ጠላልፎ ያሰረን ነገር መዓት ነው። ሰንሰለት ይሁን ገመድ እዚያው እናንተ አጣርታችሁ ድረሱበት። እኔ የማውቀው ‹ሥውር› መሆኑን ብቻ ነው። መቼ ዕለት ከምሁሩ የባሻዬ ልጅ ጋር ስለዚሁ ሥውር ትብታብ ስናወራ ምሳሌውን ያነበበበት መጽሐፍ ርዕስ ጠፋውና ለማስታወስ እየሞከረ የሚከተለውን አጫወተኝ። ኑሮ ራሱን እያስረሳው ርዕስ ጠፋህ ተብሎ መውቀስ ግፍ ነውና ተውት። እና ምን አለኝ፣ ‹‹በአንድ መንደር ውስጥ በልብስ አጣቢነት የሚተዳደር ሰው ነበር። የአካባቢውን ነዋሪዎች የቆሸሸ ልብስ ይቀበልና በአህዮቹ ጭኖ ወንዝ ይወርዳል። አጥቦ አድርቆ ሲያበቃ ለየባለቤቶቹ ይመልሳል። ‹ላውንደሪ በስሎው ሞሽን› በለው…›› ሲል ሳቅን። ቀጠለ፣ “እና አንድ ቀን ሰው ተሰባሪ ነውና በጠና ታሞ ከአልጋው መነሳት አቃተው። ልጁን ጠርቶ ‹በል ዛሬ እኔን ተክተህ ያልታጠቡ ልብሶች አሉና አህዮቹን ጭነህ ወንዝ ውረድ› አለው። ልጁም እንደታዘዘው አህዮቹን ጭኖ ቅደሙ ሲላቸው ሊነቃነቁ ነው? እግራቸው በችንካር እንደተቸነከረ ከረገጡበት አልነቅል አሉት። ቢታገል አልሆነም። አባቱ ዘንድ ሄደና የሆነውን ሲያስረዳው ‹ወይ ልጄ ረስቼው ሳልነግርህ፣ እግራቸውን አስሬዋለሁ› አለው። ልጅዬው ግራ ተጋብቶ ‹ምንም ገመድ የሚባል አላየሁም› ሲለው ‹ይኼውልህ ማታ ማታ ወደ ማደሪያቸው አስገብቼ እግሮቻቸውን ተራ በተራ በእጄ ዳሰስ ዳሰስ አደርገዋለሁ፣ እንደታሰሩ ያስባሉ። ጠዋትም እንደዚያው ሳደርግ እንደ ፈታሁዋቸው ያምናሉ። እንዲያ አሠልጥኛቸዋለሁና አሁን ሄደህ እግሮቻቸውን ስትዳስሰው እስራታቸውን እንደተፈታላቸው ያምናሉ› አለው። ልጁም አባቱ እንዳለው አደረገና ወደ አጠባው ሄደ። በላ ይፍቱኝ በል…›› ብሎ ቀላለደ። ወዲያው ግን የመጽሐፉን አርዕስት ለማስታወስ ትግሉን ሲቀጥል ሳየው ትከሻውን ቸብ እያደረግኩ፣ ‹‹በቃ እርሳው ፈትቼሃለሁ…›› ብዬ አሾፍኩበት። ይሻለናል!

የምር ግን ከምሳሌው ብዙ ተማርኩ። ብዙ ነገር አያያዝኩበት። ባልተያዘና ባልተጨበጠ ነገር እውነት መስለው፣ ገሃድ መስለው የተበተቡን ገመዶችን በጣጥሼ መጣል አሰኘኝ። ግዳይ መጣል እንደለመደ ጀግና አዳኝ ሸልል ሸልል አለኝ። ምን ዋጋ አለው ገመዱ አሁንም አልታኘክ እንዳለ ነው። እስኪ ካያችሁት ጥሩኝና ተባብረን እንበጣጥሰው። በነገራችን የአህዮች ጉዳይ ሲነሳ በቅርቡ በአፍሪካ ኅብረት አህዮች ለቆዳቸው ሲባል እንዳይታረዱ መከልከሉ በጣም ነው ደስ ያሰኘኝ፡፡ አፍሪካ ውስጥ የአህያ አገልግሎት አሁንም በእጅጉ ይፈለጋል፡፡ ኢትዮጵያ ውስጥ ታላቁን የዓድዋ ድል ስንጎናፀፍ የአህያ አገልግሎት አይዘነጋም፡፡ አሁንም ከወንዝ ውኃ መቅዳት፣ አሸዋና ሲሚንቶ፣ የምግብና የሌሎች ምርቶች ትራንስፖርት ማሳለጫ አህያ ነው፡፡ አህያ የቤተሰብ ያህል መታሰብ ያለበት ውድና ብርቅ እንስሳ ነው፡፡ እንግዲህ ታላቁ ፆሞቻችን እየተቃረቡ አይደሉም? ስቆም ስቀመጥ ስሄድ ስመለስ ከማየው ነገር ይህንን ለማለት ብወድ መቼም አታሳፍሩኝም። ምን አትሉም? የታይታ ኑሮ፣ የታይታ ወሬ፣ የታይታ ፉክክር ለቀቅ ያለ አልመሰላችሁም? ነገር ከሥሩ ውኃ ከጥሩ መባሉ ቀርቶ ‹ወደ ገደለው ግባ› የሚሉት አባባል ከመጣ ወዲህ ብዙ ነገር አጓጉል ሲያዘም እያየሁ፣ በረዥሙ ከምራመደው በረዥሙ የምተነፍሰው እያደከመኝ ነው። አላንዛዛባችሁና ወደ ገደለው ስገባ፣ ትርጉሙን የሳተ አዋዋልና አኗኗር እየተላመድን ያለን ይመስለኛል። ወግና ባህል እየተፈተሸ እየተራመደ እንዲቀጥል ባናምንም፣ አሁን የማየው ነገር ጭራሹን ‹የውሾን ነገር ያነሳ ውሾ ይሁን› ዓይነት ሆኗል። ያሰኛል!

ለምሳሌ ታድለናል በሚሉት ሠፈር ፆም መያዣ ተብሎ ጮማ ይቆረጣል፣ ፆም መፍቻ ተብሎ ይደለቃል፣ ይቃማል፣ ይጠጣል፣ ይሰከራል፣ ይዘሞታል። የእኔ ቢጤው ዘንድ ደግሞ እንደ አቅሚቲ እንደ ኪስ ፈቃድ ይታደራል። ምሁሩ የባሻዬ ልጅ ሁሌ እንደሚለኝ ይኼ የምላችሁ ነገር መላዋን ኢትዮጵያ ባይገልጽም፣ ዕድሜ ለወሬ አንፋሾች የአገር ገድል ተደርጎ ይተረክላችኋል። ሰባኪ ሆንክ እንዳትሉኝ ብቻ አጠር ሳደርገው የአዛውንቱን ባሻዬን አባባል ለመዋስ እገደዳለሁ። ለአገር የማይጠቅም ወሬኛ አየሩን ሲቆጣጠረው፣ ‹አገር ሲያረጅ ጃርት ያፈራል› ይላሉ፡፡ ለምን ይሆን ይኼን ያህል ራስን መፈተሽ የከበደን ግን ጎበዝ? በመስታወት እያዩ የገዛ ራስን መልክ መርሳት ምን ይባላል? ነው ወይስ አንዳንዴ ወሬ ሲበዛ የዘመኑን ነገር ለዘመኑ ሰው ትቶ ዝም ማለትን የመሰለ ነገር የለም፡፡ ወሬኛ ሲበዛ እኮ ዝም ማለት ያስከብራል ብዬ ነው፡፡ የሆነስ ሆነና እስላም ክርስቲያኑ ለፆም በሚዘጋጁበት በዚህ ጊዜ ከበርካታ አላስፈላጊ ነገሮች መታቀብ ያስፈልጋል፡፡ የፆም አያያዙ በልክ ይሁን፡፡ ሁሉም ነገር ልክ ይኑረው! መልካም ሰንበት!

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት