Wednesday, May 29, 2024
- ማስታወቂያ -
- ማስታወቂያ -

የራይድ ትራንስፖርት ተጠቃሚዎች ክፍያ በቪዛ ካርድ መፈጸም የሚያስችላቸው አሠራር ተጀመረ

spot_img

ተዛማጅ ፅሁፎች

ራይድ ትራንስፖርት ከዓለም አቀፉ የፋይናንስ ድርጅት ከቪዛ ካርድ ጋር በመተባበር፣ የትራንስፖርት ተጠቃሚዎች በኤሌክትሮኒክ ክፍያ መገልገል የሚችሉበት አሠራር ተግባራዊ መደረግ ጀመረ፡፡

በኢትዮጵያ ቀዳሚው የጥሪ ትራንስፖርት አገልግሎት አቅራቢ ድርጅት ራይድ ከቪዛ ካርድ ጋር ዓርብ ሚያዝያ 11 ቀን 2016 ዓ.ም. በሸራተን አዲስ በተደረገ  የትብብር ማብሰሪያ መርሐ ግብር በዓለም አቀፍ የዲጂታል ክፍያ ተቋም ቪዛ አማካይነት ጎብኚዎች፣ ኢትዮጵያ ውስጥ የሚኖሩ የውጭ ዜጎችና የዳያስፖራ ማኅበረሰብ አባላት የራይድ ትራንስፖርት ክፍያቸውን መፈጸም ይችላሉ ተብሏል።

የውጭ ዜጎች የቪዛ ካርዳቸውን ብቻ በመጠቀም የመጓጓዣ ክፍያቸውን መፈጸም እንደሚችሉ፣ የራይድ ትራንስፖርት ዋና ሥራ አስፈጻሚ ወ/ሮ ሳምራዊት ፍቅሩ አስታውቀዋል።

ቪዛ ካርድ ከአቢሲኒያ ባንክ ጋር ሳይበር ሶርስ በተባለ ሲስተም አማካይነት ተጠቃሚዎች ክፍያ ሲፈጽሙ፣ ገንዘቡ በቀጥታ ወደ ራይድ ትራንስፖርት ድርጅት ስለሚተላለፍ ድርጅቱ ለአሽከርካሪው ወዲያውኑ ክፍያው እንደሚደርሰው ወ/ሮ ሳምራዊት ለሪፖርተር ገልጸዋል።

የራይድ ትራንስፖርት አገልግሎት ሲጀመር በዲጂታል የአከፋፈል ሥርዓት የጀመረ ቢሆንም፣ የክፍያና የአገልግሎት አሰጣጡን በየጊዜው ዘመናዊ ማድረግ በማስፈለጉ የውጭ ዜጎች ክፍያ ለመፈጸም በውጭ ምንዛሪ እንዲገበያዩ የሚያስችል የአሠራር ሥርዓት መዘርጋቱን ተናግረዋል።

ከቪዛ ካርድ ጋር በጋራ የከናወነው ሥራ ‹‹ዲጂታል ኢትዮጵያ 2025›› ዕውን ለማድረግ እየተከናወነ ካለው እንቅስቃሴ ጋር የሚገናኝ መሆኑን አክለዋል፡፡

ቪዛ ካርድ በአሁኑ ወቅት የዲጂታል ክፍያ አገልግሎት መስጠት የሚያስችለውን ሳይበር ሶርስ ሲስተም እየተጠቀመ የሚገኘው ከአቢሲኒያ ባንክ ቢሆንም፣ ወደፊት ከኢትዮጵያ ንግድ ባንክና ከሌሎች ባንኮች ጋር በጋራ ለመሥራት ማቀዱን በኢትዮጵያ የቪዛ ካርድ ዳይሬክተር አቶ ያሬድ እንዳለ አስረድተዋል፡፡

የዲጂታል ክፍያን ለሁሉም ለማዳረስ በሚከናወነው ሥራ ከራይድ ጋር የተጀመረው ጥምረት፣ የኢትዮጵያን ቱሪዝም ዘርፍ ለማዘመን ሚናው የጎላ ነው ብለዋል፡፡

ኢትዮጵያ ‹‹የአራተኛው የኢንዱስትሪ አብዮት›› ዋነኛ መገለጫ የሆነውን ዲጂታል ትራንስፎርሜሽን በይፋ ተቀላቅላ ተግባራዊ እንቅስቃሴ በመጀመር፣ ‹‹ዲጂታል ኢትዮጵያ 2025›› የተሰኘ መርሐ ግብር ተቀርፆ እንቅስቃሴ እየተደረገ መሆኑ ይታወቃል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች