Wednesday, July 24, 2024
- Advertisement -
- Advertisement -
- Advertisement -

ፌርማታ ፅሁፎች

ሀገሬ

ትኩስ ፅሁፎች

(በገብረክርስቶስ ደስታ)

አገሬ ውበት ነው ፥

ለምለምና ነፋስ የሚጫወትበት ፥

ፀሐይ የሞላበት ፥ ቀለም የሞላበት ።

አገሬ ቆላ ነው ፥ ደጋ ወይና ደጋ ፥

እዚያ ብርሃን አለ ሌሊቱ አስኪነጋ።

አገሬ ተራራ ሸለቆ ረባዳ ፥

አገሬ ጅረት ነው ገደልና ሜዳ ፥

ውበት ነው በበጋ ፀሃይ አትፋጅም ፥

ክረምቱም አይበርድም ፥

          አይበርድም ፥ አይበርድም።

አገሬ ጫካ ነው ፥

እንስሳት አራዊት የሚፈነጩበት ፥

በወጥመድ ሳይገቡ ሳይነካቸው ጠላት።

እዚያ አለ ነፃነት ፤

በሃገር መመካት ፥

          በተወዳጅነት ፥

          በባለቤትነት ፥

እዚያ አለ ነፃነት።

አገሬ ሃብት ነው ፤

          ጎመኑ ስብ ጮማ ፥ ቆሎው ክትፎ ስጋ ፥

ድርቆሹ ፍትፍት ነው ፤ ቃሪያው ሙክት ስጋ።

ጠጁ ነው ወለላ ፥

ከኮኛክ ያስንቃል የመንደሩ ጠላ ።

እህሉ ጣዕም አለው ፥ እንጀራው ያጠግባል ፥

ከቢራ ከሻምፓኝ ውሃው ይጣፍጣል ፥

በአሉ ይደምቃል ፥

          ሙዚቃው ያረካል ፥

ጭፈራው ዘፈኑ ችግርን ያስረሳል።

እዚያ ዘመድ አለ ፤

          ሁሉም የእናት ልጅ ነው ፥

ሁሉም ያባት ልጅ ነው ፤

ጠላትም አንዳንዴ ይመጣል መቃብር ፥

ባለጋራም ቸር ነው <<ያገር ልጅ>> ሲቸገር ፤

ገነት ነው አገሬ።

ምነው ምን ሲደረግ?

           ምነው ለምን እንዴት?

ዘራፊ ቀማኛ ምቀኛ ወንበዴ ፥

          ጥርኝ አፈር በጁ ስንዝር ወሰን አልፎ ፥

                  የተቀደሰውን ያፍሪካ ላይ ደሴት፥

ባያገኝ ለማርከስ ጠላት ይመኝ እንዴት።

እምቢኝ አሻፈረኝ

           አሻፈረኝ እንቢ፥

                መቅደስ ነው አገሬ፥

                    አድባር ነው አገሬ፥

                        እናትና አባቴ ድኽው  ያደጉበት ፥

ካያት ከቅድም አያት የተረካከቡት ፥

አፈር የፈጩበት ፥

              ጥርስ የነቀሉበት።

አገሬ አርማ ነው የነፃነት ዋንጫ ፥

በቀይ የተጌጠ ባረንጓዴ ቢጫ።

እሾክ ነው አገሬ ፥

             በጀግናው ልጅ አጥንት የተከሰከሰ፥

ጠላት ያሳፈረ አጥቂን የመለሰ።

አገሬ ታቦት ነው ፥ መቅደስ የሃይማኖት፥

ዘመን የፈተነው በጠበል በፀሎት።

ለምለም ነው አገሬ፥

ውበት ነው አገሬ፥

ብሞት እሄዳለው ከመሬት ብገባ፥

እዚያ ነው አፈሩ የማማ ያባባ።

ስሳብ እሄዳለው ቢሰበርም እግሬ፥

አለብኝ ቀጠሮ ፥ ከትውልድ አገሬ።

አለብኝ ቀጠሮ፥

ከትውልድ አገሬ፥

             ካሳደገኝ ጓሮ።

- Advertisement -
- Advertisement -

ተጨማሪ ለማንበብ

በብዛት የተነበቡ ፅሁፎች