Wednesday, July 24, 2024
- ማስታወቂያ -
- ማስታወቂያ -

የኢንዱስትሪ ፓርኮች ወደ ልዩ የኢኮኖሚ ዞን ሊሸጋገሩ ነው

ተዛማጅ ፅሁፎች

በሕዝብ ተወካዮች ምክር ቤት በቅርቡ በፀደቀው ልዩ የኢኮኖሚ ዞን አዋጅ የተቀመጡ መሥፈርቶችን የሚያሟሉ የኢንዱስትሪ ፓርኮች፣ ወደ ልዩ የኢኮኖሚ ዞን እንደሚሸጋገሩ ተገለጸ፡፡ ይህ የተገለጸው የኢንቨስትመንት ኮሚሽን ሰኔ 6 ቀን 2016 ዓ.ም. ከገዳ ልዩ የኢኮኖሚ ዞን ጋር የአልሚነት ስምምነት ሲፈራረም ነው፡፡

የኮሚሽኑ ምክትል ኮሚሽነር ዘለቀ ተመስገን (ዶ/ር) እንደገለጹት፣ በአገሪቱ ያሉት 29 የኢንዱስትሪ ፓርኮችና በክልል ደረጃ ያሉ አራት የግብርና ማቀነባበሪያ ፓርኮች ወደ ልዩ የኢኮኖሚ ዞን ማሸጋገር፣ አዋጁን ተከትሎ ከመጡ ለውጦች መካከል አንደኛው ነው፡፡

የኢንዱስትሪ ፓርኮቹ ወደ ልዩ የኢከኖሚ ዞን እንዲሸጋገሩ ሲደረግ፣ የሚያስከትሉት የአካባቢ ተፅዕኖ ግምገማ እንደሚፈተሽ ምክትል ኮሚሽነሩ ገልጸዋል፡፡

ከዚህ ቀደም ፓርኮች ሲቋቋሙ በአንድ የምርት ዓይነት እንደነበር አስታውሰው፣ ወደ ልዩ የኢኮኖሚ ዞን ሲሸጋገሩ ግን የተለያዩ ምርቶች ማምረት እንደሚችሉ አስረድተዋል፡፡

ምንም እንኳን የኢንቨስትመንት ቦርድ በቅርቡ ባስተላለፈው ውሳኔ የኢንዱስትሪ ፓርኮች ከሚያመርቱት 50 በመቶ ለአገር ውስጥ ገበያ ማቅረብ እንደሚችሉ ቢነገርም፣ ወደ ልዩ የኢኮኖሚ ዞን እንዲሸጋገሩ ሲደረግ ግን የውጭ ምንዛሪ አቅምን በይበልጥ እንደሚያሳድጉ ታሳቢ ተደርጎ መሆኑን ገልጸዋል፡፡

አሁን ያሉት ነባር ፓርኮች ወዲያውኑ ወደ ልዩ የኢኮኖሚ ዞንነት እንዲሸጋገሩ በአዋጁ ቢደነገግም፣ መሥፈርቶቹን ግን ሊያሟሉ ይገባል ብለዋል፡፡ ‹‹አንድ ባለሀብት የኢንዱስትሪ ፓርክ ወይም የልዩ ዞን ለማልማት ወደ አገር ውስጥ ሲመጣ ከመነሻው ፓርክ ነው አይደለም የሚለውን ውሳኔ መስጠት የሚችለው የኢንቨስትመንት ቦርድ ነው፤›› ያሉት ዘለቀ (ዶ/ር)፣ ወደ ልማት እንቅስቃሴ ለመግባት የአልሚነት ስምምነት እንደሚካሄድ ጠቁመዋል፡፡

ስያሜው በቦርዱ ከተሰጠ በኋላ በአንድ ማዕከል አገልግሎቱን የማደራጀት ሚና የኢንቨስትመንት ኮሚሽኑ መሆኑን፣ ለገዳ ልዩ የኢኮኖሚ ዞንም የአንድ ማዕከል አገልግሎት ለመስጠት ከዚህ ቀደም ሥራዎች መጀመራቸውን አስታውቀዋል፡፡

የአልሚነት ስምምነትን ከኢንቨስትመንት ኮሚሽን ጋር የተፈራረመው ገዳ ልዩ የኢኮኖሚ ዞን በራሱ እንደሚያለማ የተገለጸ ሲሆን፣ ስምምነቱ ከተፈረመበት ቀን ጀምሮ የሚመጡ አልሚዎችን በማስገባት እንዲያለሙ ማድረግ እንደሚችል ተመላክቷል፡፡ ኮሚሽኑም የአንድ ማዕከል አገልግሎትን ጨምሮ በአዋጁ የተቀመጡ ድጋፎችን ያደርገል ተብሏል፡፡

በኦሮሚያ ክልል በሞጆና በአዳማ ከተሞች መካከል የተቋቋመው ገዳ ልዩ የኢኮኖሚ ዞን በ24 ሺሕ ሔክታር መሬት ላይ በአራት ምዕራፎች እንደሚለማ፣ በመጀመሪያው ምዕራፍ 3,114 ሔክታር የሚሆን መሬት ላይ ልማት ለመጀመር አስፈላጊውን ቅድመ ዝግጅት እያጠናቀቀ መሆኑን የዞኑ ዋና ዳይሬክተር አቶ ሞቱማ ተመስገን ገልጸዋል፡፡

ገዳ ዞን የሎጂስቲክ፣ የሪል ስቴት፣ የነፃ ንግድ ቀጣና፣ የኢንዱስትሪ ፓርክ፣ የግብርና ምርቶች ማቀነባበሪያን ጨምሮ የአይሲቲ ፓርክ አገልግሎት የሚሰጥ መሆኑን ገልጸዋል፡፡

አክለውም ለልማት ከተዘጋጀው ውስጥ አምስት ሺሕ ሔክታር የሚሆነው መሬት ለኢንዱስትሪ፣ አምስት ሺሕ ሔክታር ደግሞ ለሪል ስቴት ልማት እንደሚውል ጠቁመዋል፡፡ 

በአዋጁ ነባር የኢንዱስትሪ ፓርኮች ወደ ልዩ ዞን ከማሸጋገር በተጨማሪም፣ በሚቋቋሙት ልዩ የኢኮኖሚ ዞኖች ውስጥ የውጭ አገር የፋይናንስ ተቋማት አገልግሎት ማቅረብ እንደሚችሉ የተደነገገ ሲሆን ተቋማቱ የሚመረጡበት መሥፈርት፣ ደረጃና የአሠራርና የፈቃድ አሰጣጥ ሁኔታ የኢትዮጵያ ብሔራዊ ባንክ በሚያወጣው መመርያ እንደሚወሰን ተመላክቷል፡፡

ብሔራዊ ባንክ የኢኮኖሚ ዞኑን ሳቢነት፣ ተወዳዳሪነትና ውጤታማነት ለማረጋገጥ የሚያስችል ራሱን የቻለ የፋይናንስና የውጭ ምንዛሪ አስተዳደር ሪፎርም እንደሚያካሂድና የአሠራር ሥርዓት እንደሚዘረጋ ተቀምጧል፡፡      

በተጨማሪም የልዩ ኢኮኖሚ ዞን አልሚዎች የሚያገኟቸው ማበረታቻዎች በአዋጁ የተካተቱ ሲሆን፣ ወደ ልዩ ኢኮኖሚ ዞን የሚገቡና ከዞኑ የሚወጡ ዕቃዎች ከቀረጥና ከግብር ክፍያ ነፃ እንዲሆኑ የሚለው ይገኝበታል፡፡

በተመሳሳይ ወደ ዞኑ የሚገቡ የግንባታ ዕቃዎች የጉምሩክ ቀረጥና ታክስ እንዳይከፈልባቸው፣ እንዲሁም የካፒታል ዕቃዎች ከማንኛውም ቀረጥና ታክስ ነፃ የመሆን መብት በአዋጁ ሠፍሯል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች