Saturday, October 1, 2022
ሌሎች ዓምዶች
    - Advertisement -
    - Advertisement -
    - Advertisement -

    ፌርማታ ፅሁፎች

    የፕሬዚዳንት ሮበርት ሙጋቤ የ1 ሚሊዮን ዶላር ልገሳ

    ትኩስ ፅሁፎች

    የአፍሪካ ኅብረት 29ኛው መደበኛ የመሪዎች ጉባኤ በአዲስ አበባ ሰኔ 26 ቀን 2009 ዓ.ም. ሲከፈት የተገኙት የዚምባቡዌ ፕሬዚዳንት ሮበርት ሙጋቤ፣ ለኅብረቱ የ1 ሚሊዮን ዶላር ቼክ አስረክበዋል፡፡ ፕሬዚዳንት ሙጋቤ፣ ለኅብረቱ ያደረጉት ድጋፍ ከዚህ ቀደም ቃል የገቡት ሲሆን፣ ገንዘቡን ለማሰባሰብም ደጋፊዎቻቸውና ፓርቲያቸው በመቶዎች የሚቆጠሩ ከብቶችን ሸጠዋል፡፡ ፕሬዚዳንቱ ቼኩን ሲያስረክቡ ከሁለት ዓመት በፊት 300 ከብቶችን ለኅብረቱ እንደሚሰጡ ቃል መግባታቸውን አስታውሰዋል፡፡

    ***

    ፎቶ በዳንኤል ጌታቸው

    የመገዘዝ አይጥ ምን ትበላ ይሆን?

    ከቶ እንደምን ሆና እንደምን ከርማለች?

    የመገዘዝ አይጥ ምኑን ትበላለች ?

    ድርቅ ገብቷል አሉ መኽሩም አልሆነም

    ዝናቡም አምርሮ ሳይሸፍት አይቀርም፤

    ካልጮኸ ጅራፉ

    ካልተንጫጫ ወፉ፤

    ያ ነዶ ዘርጣጩ 
                 ዝንጀሮው በሞላ
    ከእረኞቹ ጋራ 
                  በዕለት ካልተጣላ፤

    ጉድ እየፈላ ነው፤ እኔን የጨነቀኝ …

    የሌላውስ ይቅር ታፍራ እና ተከብራ

    አገሯ ስትኖር ከሁሉም ተባብራ፤

    ድመት እንኳን ሳይቀር አካፍሏት በሰላም

    ይኖሩ ነበረ ለእምቅድመ ዓለም፤

    ማንን በመጥየቅ አገኛለሁ መልሱን

    የመገዘዝ አይጥ ምን ትበላ ይሆን ?

    • ፀሐይ ደመቀ (ናሽቪል ቴነሲ)

    ***

    ‹‹ብሽቅ!››

         ኤደንብራ ውስጥ የሚገኙ የዊቨርሊ ደረጃዎች ነፋስ ይበዛባቸዋል፡፡ ከዓመት ዓመት ያለማቋረጥ ኃይለኛ ነፋስ እንደነፈሰ ነው፡፡ ታዲያ አንድ ቀን አንዷ ሴት ወይዘሮ ባቡር ልትሳፈር ተቻኩላ ደረጃዎቹን እየሮጠች ወጥታ ስትጨርስ ነፋሱ ገለባት፡፡ ተናዳ ያያት ሰው መኖሩን ለማወቅ ዞር ብላ ስትመለከት አንዱ ከታች ያጮልቃል፡፡

          ‹‹ወደ ሥራህ ብትሄድ አይሻልህም?!››አለችው በተግሳጽ፡፡

          ‹‹እሺ፣ እሄዳለሁ፤ ግን ትላንትም የለበሽው ይህንኑ የውስጥ ሱሪ ነበር አይደል?›› አላት፡፡

    ********

    አንበሳን ማን ይቀድማል?

         ስኮትላንዳዊውና እንግሊዛዊው ዱር ውስጥ እየተንሸራሸሩ ሳሉ አንበሳ ከፊት ለፊታቸው ሲመጣ አዩ፡፡ ይኼኔ ስኮትላንዳዊው ያደረገውን ትልቅ የቦት ጫማ በፍጥነት አውልቆ ቀለል ያለ ሸራ ጫማ ማጥለቅ ጀመረ፡፡

         ‹‹ይኼ ምን ይጠቅምሃል፣ ወዳጄ?›› አለ እንግሊዛዊው በመገረም፤ ‹‹መቼስ አንበሳን ሮጠህ ማምለጥ አትችልም?››

         ‹‹ልክ ነህ፣ እሱንማ አልቀድመውም፡፡ አንተን ግን እቀድምሃለሁ፤››

    • አረፈዓይኔ ሐጐስ ‹‹የስኮትላንዳውያን ቀልዶች›› (2005)

    *********

    «እርኩምን ሊበሉ ጅግራ ነው አሉ»

    ራስን መደለል በእንስሳትም መካከል በጥቂቶች ላይ የተደረገ ሆኖ፤ በምሳሌ ዓይነት እንደ ተረት የሚነገር ቃል እናገኛለን፡፡ ተረቱም እንደሚከተለው ነው፡፡

    ከዕለታት አንድ ቀን አንዲት የተራበች ጦጣ ባንድ የወይን ሥፍራ አጠገብ ስታልፍ ቁመቷ ከማይደርስበትና ዘልላም ልታወርደው ከማይቻላት አስቸጋሪ ከሆነ ካንድ ከፍተኛ ሥፍራ ላይ በስሎ መልኩ ብቻ እንኳን የሚያስጎመጅ አንድ የወይን ዘለላ ተንዠርጐ ተመለከተች፡፡ ለማውረድም ሞክራ ሳይሆንላት ስለ ቀረ ፥ ልቧ እያወቀ ራሷን በማታለል ፥ ‹‹ወይኑ እኮ እንደሆን በእውነቱ ገና አልበሰለም፤ ለጊዜው የደረሰ መሰለ እንጂ ጥሬ ነው፡፡ ስለዚህ ላንድ ጥሬ ለሆነ ላልበሰለ ወይን ይህን ያኸል ምን ያደክመኛል? የሱን ዓይነት ከሌላስ ሥፍራ አጥቼ ነውን?›› በማለት ራሷን ደልላ ይኸንኑ ቃል በመደጋገም ራሷን እየነቀነቀች ነገሩን አኳስሳ ትታው ሄደች ይባላል፡፡

    እንደዚሁም አንዲት ሰጐን አንድ አዳኝ ጠመንጃውን ደግኖ ሊተኩስባት ሲያነፃፅርባት እያየች፤ ሮጣ  ሕይወቷን ለማዳን ከመሞከር ይልቅ፤ እዚያው ሁና ተደፍታ ዓይኖቹዋ እንዳያዩ ወደታች አቀርቅራ፤ ‹‹የት አለና ነው አዳኝ? ቢኖር ለምን አላያውም? ይኸው ምንም ነገር አላይም›› እያለች በሐሳቧ ራሷን ደልላ ከዚያው አንገቷን ደፍታ ተቀመጠች ይባላል፡፡ ነገር ግን እውነቱ ጦጣዋም ሆነች ይህችኛዋ አውሬ፤ ሁለቱም ራሳቸውን እንዲህ አድርገው ቢደልሉትም፤ ወይኑን የበሰለ መሆኑ፤ አዳኙም ከዚያ ተገኝቶ ጠመንጃውን የደገነ መሆኑ የማይቀርና የነርሱ ክህደት ነገሩን ለውጦ ሐሰት ሊያደርገው አለመቻሉ የተረጋገጠ ነው፡፡

    እንግዲህ በዚህ ታሪክ ውስጥ ጦጣይቱና ሰጎኗ ራሳቸውን በመደለል ያደረጉትን ሙከራ እንመለከታለን፡፡ ሰውም ልክ እንደነዚሁ እንስሳት ይኸንኑ ዓይነት ተግባር በራሱ ላይ ሲፈጽም ይገኛል፡፡ ለዚያውም ደግሞ እነዚህ እንስሳት ይህንን ነገር ፈጽመውት ነው ማለት ሳይሆን፤ ከሰዎች ዘንድ የሚደረግ መሆኑን በምሳሌ መንገድ ለመግለጽና ለማስተማር ያኸል የሚነገር ነው፡፡ የቀድሞ አባቶቻችን፤ ሰው ያልኾነውን ነው በማለት ራሱን የሚደልል ከንቱ መኾኑን ተመልክተው «እርኩምን ሊበሉ፤ ጅግራ ነው አሉ» ብለው ይተርኩት የነበረ ቃልም ይገኛል፡፡

    ስለዚህ ሰው ራሱን በራሱ እንደ ሕፃን  ልጅ በመደለል በሐሳቡ የተመኘውን ነገር ሁሉ ሲፈጽም መታየቱ የቆየ እንጂ፤ አዲስ አይደለም፡፡

    • የማነ ገብረማርያም (ዶ/ር) ‹‹የፍልስፍና ትምህርት ፩ኛ›› (1955)

    ***

    የኦሊምፒክ ቀን በሐረርና ድሬዳዋ

    የኢትዮጵያ ኦሊምፒክ ኮሚቴ ‹‹ተንቀሳቀስ፣ እወቅ፣ ፍጠር›› በሚል መሪ ቃል በየዓመቱ እ.ኤ.አ. ጁን 23 በዓለም ደረጃ የሚከበረውን የኦሊምፒክ ቀን፣ ሰኔ 24 እና 25 ቀን 2009 ዓ.ም. በሐረርና ድሬዳዋ ከተሞች አክብሯል፡፡ ብሔራዊ ኦሊምፒክ ኮሚቴ በላከው መግለጫ እንዳስታወቀው፣ በዓሉ በሁለቱም ከተሞች በአትሌቲክስ፣ በእግር ኳስ፣ በቅርጫት ኳስ፣ በእጅ ኳስ፣ በብስክሌት፣ በወርልድ ቴኳንዶና በቦክስ ስፖርቶች ውድድር በማድረግ ተከብሮ ውሏል፡፡

    ፎቶ በብርሃነ በዛብህ አብተው

    - Advertisement -
    - Advertisement -

    ተጨማሪ ለማንበብ

    በብዛት የተነበቡ ፅሁፎች