Thursday, October 6, 2022
ሌሎች ዓምዶች
    - ማስታወቂያ -
    - ማስታወቂያ -

    ብላክ ሬይኖ በኢትዮ ጂቡቲ ነዳጅ ማመላለሻ መስመር ግንባታ ፕሮጀክት ማሻሻያ ጥናት ማድረግ ጀመረ

    - ማስታወቂያ -

    ተዛማጅ ፅሁፎች

    • የኃይል ሽያጭ ታሪፍ ድርድር እያደረገ ነው

    ከጂቡቲ እስከ ኢትዮጵያ (አዋሽ) ድረስ በመሬት ውስጥ በሚቀበር ማስተላለፊያ መስመር ነዳጅ ለማጓጓዝ በተነደፈው ፕሮጀክት ላይ መንግሥት ማሻሻያ በማድረጉ፣ ሥራው ተሰጥቶት የነበረው የአሜሪካው ግዙፉ ብላክ ስቶን እህት ኩባንያ ብላክ ሬይኖ በድጋሚ ጥናት ማካሄድ ጀመረ፡፡

    ከዚህ በተጨማሪ ብላክ ሬይኖ በኢትዮጵያ የኤሌክትሪክ ኃይል ማመንጫ ዘርፍ ለማሰማራት ከኢትዮጵያ ኤሌክትሪክ ኃይል ጋር በጋምቤላ ክልል በባሮ ወንዝ ላይ የታምስ ኃይድሮ ኤሌክትሪክ ግንባታ ለማካሄድ የመግባቢያ ስምምነት በማድረግ፣ ዝርዝር ጥናትና የኤሌክትሪክ ሽያጭ ታሪፍ ላይ ድርድር እያካሄደ መሆኑ ታውቋል፡፡

    መንግሥት ከጂቡቲ ወደ ኢትዮጵያ የሚጓጓዘውን ነዳጅ በከባድ ተሽከርካሪዎች ከማጓጓዝ ይልቅ፣ በነዳጅ መስመር ማጓጓዝ ይበጃል በማለት ለብላክ ሬይኖ ሥራውን ሰጥቶ ነበር፡፡

    ብላክ ሬይኖ ከጂቡቲ እስከ አዋሽ ድረስ መቶ በመቶ ነዳጅ የሚያጓጉዝበትን ዝርዝር ጥናት አካሂዶ፣ ለዚህም 1.5 ቢሊዮን ዶላር እንደሚያስፈልግ ይፋ አድርጎ ነበር፡፡

    መንግሥት ከአዲስ አበባ (ሰበታ) እስከ ጂቡቲ ድረስ የዘረጋው የባቡር መስመር የግድ ነዳጅ ማመላለስ አለበት የሚል ውሳኔ ላይ በመድረስ፣ በመጀመርያው ፕሮጀክት ላይ ማሻሻያ ሊደረግ መቻሉን መረጃዎች አመልክተዋል፡፡

    በዚህ መሠረት በነዳጅ ማመላለሻ ከባድ ተሽከርካሪዎችና በነዳጅ ማመላለሻ ባቡር በጂቡቲ በኩል ወደ ኢትዮጵያ የሚገባው የነዳጅ መጠን ከ45 እስከ 50 በመቶ ድርሻ እንዲኖራቸው ተወስኗል፡፡

    በኢትዮጵያ የብላክ ሬይኖ ተወካይ አቶ ፀሐይ ነጋሽ፣ ‹‹ከዚህ በፊት መቶ በመቶ ነዳጅ ለማጓጓዝ ጥናት ተካሂዶ ነበር፡፡ ነገር ግን መንግሥት በግማሽ እንዲቀንስ በመወሰኑ ጥናቱን በድጋሚ እያካሄድን ነው፤›› ሲሉ ለሪፖርተር ገልጸዋል፡፡

    ከጂቡቲ እስከ አዋሽ ድረስ 550 ኪሎ ሜትር የሚዘልቀው የነዳጅ ማመላለሻ መስመር ግንባታን ለማካሄድ የብላክ ስቶን እህት ኩባንያ የሆነው ብላክ ሬይኖ ከመንግሥት ጋር የመግባቢያ ስምምነት ማድረጉ ተገልጿል፡፡ ይህንን ፕሮጀክት ያስፈጽማል የተባለው 1.5 ቢሊዮን ዶላር ቢሆንም፣ ግንባታው ነዳጅ የማስተላለፍ አቅሙ ዝቅ እንዲል በመደረጉ የፕሮጀክቱ ፋይናንስ ላይ ለውጥ ሊኖር እንደሚችል ተጠቁሟል፡፡

    የኢትዮጵያ ነዳጅ አቅራቢ ድርጅት ዋና ሥራ አስፈጻሚ አቶ ታደሰ ኃይለ ማርያም ለሪፖርተር እንደገለጹት፣ 3.4 ቢሊዮን ዶላር የወጣበት የኢትዮ ጂቡቲ ባቡር መስመር ቀደም ሲልም ነዳጅ እንደሚያመላልስ ይታወቃል፡፡

    ‹‹መንገደኞች ዕቃዎችና ነዳጅ እንዳያመላልስ ታቅዶ ተገንብቷል፡፡ ለነዳጅ ማመላለሻም 110 ዋገኖች ገብተዋል፤›› ሲሉ የተናገሩት አቶ ታደሰ፣ ‹‹ ባቡሩ የሚያጓጉዘው ነዳጅ በአዋሽ ዲፖ እየተጠራቀመ ወደ መሀል አገር ይገባል፤›› ብለዋል፡፡

    አቶ ታደሰ እንደገለጹት፣ ባቡሩ ሥራ ሲጀምር 60 በመቶ የማመላለስ አቅም ይኖረዋል፡፡ ከባድ ተሽከርካሪዎች ደግሞ 40 በመቶ ድርሻ ይኖራቸዋል፡፡ የነዳጅ ማስተላለፊያ መስመሩ ተገንብቶ አገልግሎት ላይ ሲውል፣ የከባድ ተሽከርካሪዎች ድርሻ ከነዳጅ ማጠራቀሚያ ዲፖዎች ወደ ተቀረው የአገሪቱ ክፍሎች ማጓጓዝ ይሆናል፡፡

    የብላክ ሬይኖ ሌላኛው የትኩረት መስክ የኤሌክትሪክ ኃይል ማመንጫ ነው፡፡ ኢትዮጵያ ለመገንባት ካቀደቻቸው ፕሮጀክቶች መካከል ከጋምቤላ ክልል ወደ ነጭ ዓባይ የሚፈሰው የባሮ ወንዝ አንዱ ነው፡፡ በዚህ ወንዝ ላይ የሚገነባው የታምስ ኃይድሮ ኤሌክትሪክ ኃይል ግድብ ሲሆን፣ ብላክ ሬይኖ በግልና በመንግሥት አጋርነት አማካይነት ለማካሄድ የመግባቢያ ስምምነት ተፈራርሟል፡፡

    አቶ ፀሐይ እንደገለጹት፣ በዚህ ፕሮጀክት ላይ ዝርዝር ጥናት እየተካሄደ ነው፡፡ ከዚሁ ጎን ለጎን የኤሌክትሪክ ኃይል ሽያጭ ታሪፍ ላይ ድርድር እየተካሄደ መሆኑንም ጠቁመዋል፡፡   

     

     

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -