Sunday, February 5, 2023
- Advertisment -
- Advertisment -

ክቡር ሚኒስትሩ የግንቦት ሃያ በዓል ላይ ከተገኘ አንድ ዳያስፖራ ጋር እየተነጋገሩ ነው

  • አንተ ከአሜሪካ መቼ መጣህ? እዚህስ እንዴት መጣህ?

 

  • ሳምንት ሆነኝ ክቡር ሚኒስትር፡፡
  • በፊት ሳውቅህ የእኛ ተቃዋሚ ነበርክ፡፡
  • አሁንም እቃወማለሁ ክቡር ሚኒስትር፡፡
  • የምትቃወመን ከሆነ በዓላችን ላይ ምን ትሠራለህ?
  • እኔ እኮ ጽንፈኛ አይደለሁም ክቡር ሚኒስትር፡፡
  • ማን ነው ታዲያ ጽንፈኛ እባክህ?
  • እናንተን አምርረው የሚቃወሙና ዓይናቸውን ጨፍነው የሚደግፏችሁ፡፡
  • የእኛ ደጋፊዎች ጽንፈኛ ናቸው እንዴ?
  • ሁሉንም አላልኩም ክቡር ሚኒስትር፡፡
  • የትኞቹ ናቸው ታዲያ ጽንፈኞች?
  • ድንጋዩን ዳቦ ነው ብለው የሚያፈጡት ናቸዋ፡፡
  • እንደዚህ ይላሉ እንዴ?
  • እነሱ እኮ ምንም ዓይነት ተቃራኒ ነገር ማየትም መስማትም አይፈልጉም፡፡
  • ለምን ይመስልሃል እባክህ?
  • ነገሮችን የሚያዩት ከጥቅማቸው አንፃር ብቻ ስለሆነ ነዋ፡፡
  • እንዴት እንዲህ ልትል ቻልክ?
  • ብዙዎቹን አውቃቸዋለሁ ክቡር ሚኒስትር፡፡
  • በምሳሌ አስረዳኝ፡፡
  • መንግሥት ሲሳሳት ለማረም አይፈልጉም፡፡
  • እሺ?
  • ሰዎች ገንቢ ሐሳብ ሲያቀርቡ ያበሻቅጣሉ፡፡
  • እሺ?
  • ትንሿን ነገር እያጋነኑ የሌለ ምሥል ይፈጥራሉ፡፡
  • እሺ?
  • የአገር የጋራ ጉዳይን ብሔር ውስጥ ይወሽቃሉ፡፡
  • ሌላስ?
  • የሚደግፉት መንግሥት ችግር ውስጥ ሲገባ ይጠፋሉ፡፡
  • ምን?
  • ያኔ አመፁ ሲቀጣጠል እኮ ጠፍተው ነበር ክቡር ሚኒስትር፡፡
  • በኋላስ?
  • የአስቸኳይ ጊዜ አዋጁ ሲታወጅ ቀና አሉ፡፡
  • ከዚያስ?
  • የአስቸኳይ ጊዜ አዋጁን የዴሞክራሲ ውጤት ነው ማለት ጀመሩ፡፡
  • አንተ ትዋሻለህ እንዴ?
  • ክቡር ሚኒስትር ማኅበራዊ ሚዲያ ውስጥ ገብተው ማየት ይችላሉ፡፡
  • የእኛን ደጋፊዎች እንዲህ ስታብጠለጥል ስለተቃዋሚዎቹስ ምን ትላለህ?
  • እነዚያም ከእጅ አይሻል ዶማ ናቸው፡፡
  • እንዴት?
  • ዓይናቸውን በጥሬ ጨው አጥበው ይዋሻሉ፡፡
  • ምን ይላሉ?
  • አገሪቱ እንደ ሶማሊያ ተፈረካክሳለች ሲሉ ነበር፡፡
  • ሌላስ?
  • እርስ በርሳቸው ሲናጩ ይከርሙና በትንሽ ጉዳይ ጊዜያዊ ወዳጅነት ይፈጥራሉ፡፡
  • እሺ?
  • ጥቂት ሳይቆዩ ደግሞ እርስ በርስ ይባላሉ፡፡
  • እሺ እባክህ?
  • በሐሰተኛ ወሬዎች አንድ ወር ይዝናናሉ፡፡
  • ከዚያስ?
  • ሌላ አዲስ ወሬ እስኪፈጠር ያደፍጣሉ፡፡
  • በዚ ላይ ደግሞ…
  • ምን?
  • እዚህ አገር አዲስ ነገር ተሠራ ሲባል ዓይናቸው ደም ይለብሳል፡፡
  • ለምን እንዲህ ይሆናሉ?
  • አንደኛው በባዕድ አገር መኖር በራሱ ትልቅ ጫና አለው፡፡
  • ሁለተኛውስ?
  • ፕሮፓጋንዳ ሲጋቱ ስለሚከርሙ ግራ ይጋባሉ፡፡
  • ልማታችንን ማድነቅ አይፈልጉም አይደል?
  • እናንተን በጣም ስለሚጠሉ ሥራችሁ አይጥማቸውም፡፡
  • የሚሠራ መንግሥት ይጠላሉ ማለት ነው?
  • አይደለም ክቡር ሚኒስትር፡፡
  • ታዲያ ምንድነው?
  • ይኼ የአገሪቱን ችግር ነው የሚያሳየው፡፡
  • የምን ችግር?
  • የጋራ የሚባል መግባቢያ በመጥፋቱ ነዋ፡፡
  • እኛ ምን እናድርግ ታዲያ?
  • ኃላፊነት የሚሰማው መንግሥት ብሔራዊ መግባባት እንዲፈጠር መሥራት አለበት፡፡
  • እነሱ አንፈልግም ካሉስ?
  • በጽንፈኛነት መቀጠል አያዋጣም ክቡር ሚኒስትር፡፡
  • ማለት?
  • ጽንፈኝነት ሲመክን የተለያዩ ሐሳቦች በነፃነት ይደመጣሉ፡፡
  • ስለዚህ?
  • የተሟላ ዴሞክራሲ የሚሰፍነው በዚህ መንገድ ብቻ ነው ክቡር ሚኒስትር፡፡

[ክቡር ሚኒስትሩ ዳያስፖራውን አሰናብተው ከአንድ ደጋፊ ጋር እየተነጋገሩ ነው]

  • ክቡር ሚኒስትር በዓሉ እንዴት ነው?
  • ዘንድሮ በረድ አድርገን እያከበርነው ነው፡፡
  • በነገራችን ላይ ክቡር ሚኒስትር ደህና ነዎት?
  • ለምን ጠየቅኸኝ?
  • ስሜትዎ ቀዝቅዞብኝ ነው ክቡር ሚኒስትር፡፡
  • ይኸውልህ ወዳጄ?
  • አቤት ክቡር ሚኒስትር?
  • የ26 ዓመታት ድላችንን ስናከብር መለስ ብለን ማየት አለብን፡፡
  • ምኑን ክቡር ሚኒስትር?
  • ከ26 ዓመታት በፊት እኮ ለ17 ዓመታት ታግለናል፡፡
  • ልክ ነው ክቡር ሚኒስትር፡፡
  • ያኔ የታገልነው ሕዝብን ከደርግ አገዛዝ ነፃ ለማውጣት ነበር፡፡
  • ልክ ነው ክቡር ሚኒስትር፡፡
  • ደርግ የሚወክለው ምን እንደሆነ ታውቃለህ?
  • አዎን ክቡር ሚኒስትር፡፡
  • ጭቆናን ነበር፡፡
  • ትክክል ክቡር ሚኒስትር፡፡
  • ይኼ ጭቆና በምን ይገለጻል?
  • ሐሳብን በነፃነት መግለጽ ባለመቻል፡፡
  • ልክ ብለሃል፡፡
  • ፍትሕ በማጣት፡፡
  • ትክክል ብለሃል፡፡
  • እስር ቤት በመወርወር፡፡
  • ትክክል ነህ፡፡
  • ጥያቄ ያነሱትን በመግደል፡፡
  • በደንብ ገብቶሃል፡፡
  • በገዛ አገር ባይተዋር መሆንም ክቡር ሚኒስትር፡፡
  • ትክክል ወዳጄ፡፡
  • ክቡር ሚኒስትር?
  • አቤት?
  • ይህንን ጉዳይ ለምን አነሱት?
  • እኛ ላይም ጥያቄ እየተነሳ እንዳለ መዘንጋት የለብህም፡፡
  • ይኼ እኮ የፀረ ሰላም ኃይሎች ወሬ ነው፡፡
  • እንደሱ አትበል፡፡
  • ለምን ክቡር ሚኒስትር?
  • ችግራችን ሲነገረን ብናዳምጥ አንጎዳም፡፡
  • ክቡር ሚኒስትር በጠራ መስመር እየተመራን ነው እኮ?
  • አንተ አይገባህም እንዴ?
  • ምነው ክቡር ሚኒስትር?
  • ያ ሁሉ አመፅ የተነሳው ለምን ይመስልሃል?
  • በፀረ ሰላም ኃይሎች ሴራ ነዋ ክቡር ሚኒስትር፡፡
  • ለመሆኑ ጥልቅ ተሃድሶ አላደረግክም፡፡
  • ያኔ ለሥራ ጉዳይ ውጭ ነበርኩ ክቡር ሚኒስትር፡፡
  • ተሃድሶ አልገባህማ?
  • ለጥቂት ነው ያለፈኝ ክቡር ሚኒስትር፡፡
  • በቃ ሌላ ዘር ተሃድሶ እስኪመጣ…
  • ምን ላድርግ ክቡር ሚኒስትር?
  • የፅሞና ጊዜ ያስፈልግሃል፡፡
  • የት ነው እሱ?
  •  በርህን ዘግተህ…
  • በሬን ዘግቼ ምን ላድርግ ክቡር ሚኒስትር?
  • ጥልቅ ግምገማችንን በጥልቀት ታነበዋለህ ገባህ?

[ክቡር ሚኒስትሩ ቢሮአቸው ገብተው ከጸሐፊያቸው ጋር እየተነጋገሩ ነው]

  • ዛሬ ቀጠሮ አለኝ?
  • የለዎትም ክቡር ሚኒስትር፡፡
  • እንዲያ ከሆነማ ቤት ልሂዳ፡፡
  • አንድ ሰው ግን በስልክ ሊያናግርዎት ይፈልጋል ክቡር ሚኒስትር፡፡
  • ማን ነኝ አለ?
  • ኢንቨስተር ነኝ ነው የሚለው ክቡር ሚኒስትር፡፡
  • ለምን ፈለገኝ?
  • አስቸኳይ ነው ብሎ ስልኩን ትቷል ክቡር ሚኒስትር፡፡
  • እዚሁ ደውይና አገናኚኝ፡፡
  • ይኸው ክቡር ሚኒስትር፡፡
  • ማን ልበል?
  • ክቡር ሚኒስትር ልማታዊ ኢንቨስተር ነኝ፡፡
  • ምን ማለት ነው?
  • ለልማቱ ዘብ የቆምኩ ሀቀኛ ኢንቨስተር ክቡር ሚኒስትር፡፡
  • እሱን ተወውና ምን ፈልገህ ነው?
  • እንደሚያውቁት አባል ለመሆን ጥቂት የቀረኝ የልብ ደጋፊ ነኝ ክቡር ሚኒስትር፡፡
  • ጉዳይህ ምንድነው?
  • ክቡር ሚኒስትር አንድ ችግር ገጥሞኝ ነው፡፡
  • ምንድነው እሱ?
  • መሬት በድርድር ጠይቄ እንቢ ተባልኩ ክቡር ሚኒስትር፡፡
  • በጨረታ ተወዳደር፡፡
  • የውጭ ምንዛሪም በአስቸኳይ እፈልጋለሁ ክቡር ሚኒስትር፡፡
  • ወረፋ ጠብቅ፡፡
  • የባንክ ብድር በፍጥነት ፈልጌ ነበር ክቡር ሚኒስትር፡፡
  • አንተ ከማን በልጠህ ነው እባክህ?
  • የእኔ ኢንቨስትመንት ልዩ ስለሆነ…
  • እንዲህ የሚባል ነገር አላውቅም፡፡
  • ኧረ ክቡር ሚኒስትር አንድ ይበሉኝ?
  • አንተ ሰውዬ ነገርኩህ እኮ?
  • ክቡር ሚኒስትር የሚያስፈልገውን ሁሉ በእኔ ይተውት፡፡
  • አንተ አጭበርባሪ ዝም ትላለህ አትልም?
  • እኔ እኮ የቤተሰብዎ  የቅርብ ወዳጅ ነኝ ክቡር ሚኒስትር፡፡
  • ምን አልክ?
  • የቤተሰብዎ የቅርብ ወዳጅ ነኝ ክቡር ሚኒስትር፡፡
  • ማነው ደግሞ ከቤተሰቤ ጋር ያስተዋወቀህ?
  • ክቡር ሚኒስትር እንዳይቆጡ?
  • ለምን?
  • ያስተዋወቀኝ እኮ…
  • ማን ነው?
  • የቅርብ አማካሪዎ ነው ክቡር ሚኒስትር፡፡
  • ወስላታ ሁሉ!

[ክቡር ሚኒስትሩ አማካሪያቸውን አስጠርተው እየጮሁበት ነው]

  • አንተ ብለህ…ብለህ…
  • ምን አደረግኩ ክቡር ሚኒስትር?
  • ያን ሞላጫ ኢንቨስተር ተብዬ ከማን ጋር ነው ያስተዋወቅከው?
  • እሱን ነው እንዴ ሞላጫ የሚሉት?
  • ምን ልበለው ታዲያ?
  • ኧረ የተከበረ ኢንቨስተር ነው ክቡር ሚኒስትር?
  • እንዴት ነው የተከበረ የሚባለው ይኼ ሌባ?
  • ኧረ ክቡር ሚኒስትር ይረጋጉ፡፡
  • ለመሆኑ ከማን ጋር ነው ያስተዋወቅከው?
  • ከባለቤትዎና ከሴት ልጅዎ ጋር ነው ያስተዋወቅኩት፡፡
  • ለምን ብለህ?
  • ጠቃሚ ሰው ስለሆነ ክቡር ሚኒስትር፡፡
  • ይኼ ወስላታ ምኑ ነው የሚጠቅመው?
  • ትልቅ ውለታ ሊሠራልዎት ነው ክቡር ሚኒስትር፡፡
  • እኔ የሌባ ውለታ አላውቅም ገባህ?
  • ክቡር ሚኒስትር ተረጋግተን እናውራ፡፡
  • ከእንዳንተ ዓይነቱ የሌባ ጉዳይ አስፈጻሚ ጋር እንዴት ነው የማወራው?
  • ክቡር ሚኒስትር ትዝ ይልዎታል?
  • ምኑ እባክህ?
  • ባለቤትዎና ልጅዎ አሜሪካ መዝናናት እንደሚፈልጉ የነገሩኝ?
  • እና?
  • አሁን ችግሩ ተቀረፈ እኮ?
  • እንዴት ሆኖ?
  • ይኼ እርስዎ የሚያወግዙት የዋህ ኢንቨስተር ነዋ?
  • ምን አደረገ?
  • ወጪውን በሙሉ እችላለሁ ብሏል፡፡
  • አንተ አብደሃል እንዴ?
  • ኧረ ክቡር ሚኒስትር አያክርሩ?
  • ምን አልክ አንተ?
  • አንድ ጽንፍ ይዘው መላወሻ አሳጡኝ እኮ?
  • እኔ ነኝ ጽንፈኛ?
  • ይኼው ከቅድም ጀምሮ አንድ ነገር ይዘው አለቅ ብለዋል፡፡
  • ከሌባ ጋር አልሞዳሞድም ማለት እንዲህ ያስብላል?
  • አሁን እኮ ሁሉም ነገር አልቋል ክቡር ሚኒስትር?
  • ምኑ ነው የሚያልቀው?
  • አለ አይደል ክቡር ሚኒስትር?
  • ምን?
  • በቃ አሁን የባለቤትዎና የልጅዎ ቲኬት በኦንላይን ተቆርጦ ተልኳል፡፡
  • የምን ቲኬት?
  • የሚበሩበት ነዋ ክቡር ሚኒስትር፡፡
  • የት ነው የሚበሩት?
  • ላስ ቬጋስ!

 

በብዛት የተነበቡ ፅሁፎች

ከውጭ ይገቡ የነበሩ 38 ዓይነት ምርቶች እንዳይገቡ ዕግድ ተጣለ

የኢትዮጵያ ብሔራዊ ባንክ 38 ከውጪ የሚገቡ ምርቶች ላይ ዕገዳ...

መንበሩ ካለመወረሱ በስተቀር መፈንቅለ ሲኖዶስ መደረጉን ቤተ ክህነት አስታወቀ

ቅዱስ ሲኖዶስ ከነገ ጀምሮ ውይይት እንደሚጀምር ተነገረ ‹‹እኛ ወታደርም ሆነ...

አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

የአየር መንገድ ተጓዦች በሻንጣ የሚያስገቡትን የልብስና የጫማ ብዛት የሚገድብ ረቂቅ መመርያ ተዘጋጀ

ከቀረጥ ነፃ ይገቡ የነበሩ ዕቃዎች 87 በመቶ እንዲቀንሱ ተደርጓል መንገደኞች...
- Advertisment -

ትኩስ ፅሁፎች

በጦርነቱ የወደሙ ትምህርት ቤቶችን መልሶ የመገንባቱ ውጥን

በኢትዮጵያ በሰሜኑ ክፍል በሦስት ዙር ተካሄዶ በነበረው ጦርነት ምክንያት...

በርካታ ሰዎችን እያጠቁ የሚገኙት የሐሩራማ አካባቢ በሽታዎች

ትኩረት የሚሹ የትሮፒካል /ሐሩራማ በሽታዎች በአብዛኛው ተላላፊ ሲሆኑ፣ በዓይን...

ስለአገር ኢኮኖሚ ማሰብ የነበረባቸው ጭንቅላቶች በማያባሩ ግጭቶች ተነጥቀዋል!

አገራችን ኢትዮጵያ ውጪያዊና ውስጣዊ ፈተናዎቿ መብዛት ብዙ ዋጋ እያስከፈላት...

ግመሎቹና ሰውዬው

በአንድ ትንሽ መንደር ውስጥ የሚኖር አንድ ሰው ነበር። ታዲያ...
spot_img

ተዛማጅ ፅሁፎች

[ክቡር ሚኒስትሩ በወቅታዊ ፀጥታና ደህንነት ጉዳዮች ላይ የቀረበላቸውን ምክረ ሐሳብ እያደመጡ ነው]

ችግሩ ምን እንደሆነ በትክልል ለይተነዋል ግን ግን ምን? በይፋ መናገር አልነበረብንም። ለምን? ችግሩን ምን እንደሆነ በይፋ በመናገራችን ተዋናዮቹ ራሳቸውን ለመከላከል በየቦታው ግጭት እየቀሰቀሱብን ነው። ታዲያ ምንድነው ማድረግ የሚሻለን ትላለህ? ከእርሶ...

[ክቡር ሚኒስትሩ ወደ ቢሯቸው እንደገቡ የፖለቲካ አማካሪያቸው ስለ ሰሜኑ ግጭት የሰላም ስምምነት አተገባበር ማብራሪያ ለመጠየቅ ገባ]

ክቡር ሚኒስትር ጥሰውታል? እንዴ? እስኪ ተረጋጋ ምንድነው? መጀመርያ ሰላምታ አይቀድምም? ይቅርታ ክቡር ሚኒስትር፡፡ ምን ገጥሞህ ነው? ስምምነቱን ጥሰውታል ክቡር ሚኒስትር? ኧረ ተውው ተረጋጋ፡፡ እሺ ክቡር ሚኒስትር ይቅርታ... ደንቆኝ እኮ ነው። ስምምነቱን...

[ክቡር ሚኒስትሩ ለከተማ አስተዳደሩ እንድ ሹም በቢሮ ስልካቸው ላይ ደጋግመው ቢደውሉም ሊያገኟቸው ስላልቻሉ ወደ እጅ ስልካቸው ሞከሩ] 

ጤና ይስልጥልኝ ክቡር ሚኒስትር? ትላንት የቢሮ ስልክዎ ላይ ብደውል ለሥራ ወጥተዋል ተባልኩ፣ ዛሬም ስደውል ለሥራ ወጥተዋል ተባልኩ። ልክ ነው ክቡር ሚኒስትር ቢሮ አልገባሁም ነበር። እኔ ሳላውቅ የጀመሩት...