Saturday, December 3, 2022
ሌሎች ዓምዶች
    - Advertisement -
    - Advertisement -
    - Advertisement -

    ፌርማታ ፅሁፎች

    የልዑል ዓለማየሁ ቴዎድሮስ አያት ታሪካዊ ደብዳቤ

    ትኩስ ፅሁፎች

    ልዑል ዓለማየሁን ከአፄ ቴዎድሮስ የወለዱት እቴጌ ጥሩነሽ ናቸው፡፡ የእቴጌዪቱ እናት፣ የዓለማየሁ አያት ወይዘሮ ሳቃየ በስደት የነበረው የልጅ ልጃቸው ልዑል ዓለማየሁ (1853- 1872) ናፍቆት ቢበረታባቸው ከ147 ዓመታት በፊት ጥር 4 ቀን 1862 ዓ.ም. ደብዳቤ ጻፉለት፡፡  በብሪታንያ ግምጃ ቤት የሚገኘው ደብዳቤ ይዘት እንደወረደ እነሆ፡-

    ይህ፡ ቃል፡ ይድረስ፡ ከደጃዝማች፡ ዓለማየሁ፡፡

    የተላከ፡ ከወይዘሮ፡ ሳቃየ፡ ከቴየ፡ ጥሩነሽ፡ እናት፡ እኔም፡ ያለሁ፡ ከእናትህ፡ አገር፡ ከደጃዝማች፡ ውቤ፡ ደብር፡ ነው፡፡  ልጄ፡ ወዳጄ፡ እጅጉን፡ እንዴት፡ አለህ፡ ከተለያየነ፡ ጀምሮ፡ እስከ፡ ዛሬ፡ ድረስ፡  ምነው፡ ወረቀት፡ አትሰድልኝ፡ በኃዘን፡ በልቅሶ፡ ስሞት፡ አላንተ፡ በቀር፡ ሌላ፡ ልጅ፡ ሌላ፡ ተስፋ፡ የለኝም፡፡ አሁንም፡ ተሎ፡ ወረቀት፡ ስደድልኝ፡ መልክህን በሥዕል፡ አድርገህ፡ ዘወትር፡ እንዳየው፡፡ ክርስቶስ፡ ለመገናኘት፡ ያብቃን፡ አሜን፡፡

    ከንግሊዚቱ፡ ንግሥት፡ ከመስኮብ፡ ንጉሥ፡ ከፈረንሳዊ፡ ንጉሥ፡ ነገሥታቱ፡ ሁሉ፡ ወዳጅ፡ ሁን፡ ወረቀት፡ ላክ፡ ሀበሻ፡ ሰው፡ ሁሉ፡ አንተን፡ ይጠብቃል፡ ይመኛል፡ ብልህ፡ ሁን፡ የሀበሻ፡ ሰው፡ ዓይን፡ አውጣበት፡ ዕውር፡ ሁኗል፡ ጥበብ፡ አውጣለት፡ እንዲህ፡ ዕውር፡ እንደሆነ፡ አይቀር፡፡

    በዘመነ ዮሐንስ በጥር በ፬ ቀን ተጻፈ፡

    (ሔኖክ መደብር)

    ባይተዋሩ ልዑል!

    ስለ ልዑል ዓለማየሁ ቴዎድሮስ ነገረ ሞት ኢትዮጵያውያን የመቆጨታችንን ያህል ተረፈ አካሉን ለአገሩ አፈር ለማብቃት ለምን እንደ ማይታሰብበት ይገርመኛልና በእናንተ በኩል መንገድ ቢፈለግለት ብዬ የሚከተለውን ግጥም በሪፖርተር የግጥም ዓምድ ሥር ብታቀርቡት ብዬ ለጋዜጣችን ሠንቄዋለሁ።

             ባይተዋሩ ልዑል!

    ባይተዋሩ ልዑል ÷ ሰው አልባው ሰው የለው

    እርሙን ያወጣው ÷ ካገሩ ያለ ሰው

    መቼም ባይሸሽገው ÷ መቼም ባይደብቀው

    ውለታው ከባብዶ ÷ በዓለም ያልመለሰው።

    ሐዘን ወመከራ እንደ ተጫጫነው

    በሩቅ ወጥቶ የቀረው ÷ የሚያሳዝነው ሰው

    ይህን ዓለም አየው! እያሠቀያየው

    የውስጥ ስሜቱን ÷ ማንም ሳይጠይቀው።

    እናት እንደ ሌለው ÷ አባት እንደ ሌለው

    ሰማይ በላዩ ላይ ÷ ወዲያ ቢደፋበት

    ወዲህ እኮ ነበረው ÷ ፍቱን መድኃኒት

    ባይተዋሩ ልዑል! ሕመሙን ቢያውቁለት።

    ትዝታ ከብረት ÷ እንደ በረታበት

    ናፍቆት ከእግር ብረት ሲጠነክርበት

    ተስፋ ባይነፍጉት

    ወዲህ መዳረሻ ÷ ቀኑም አያጥርበት

    ያኔ በልጅነት።

    ግና ያባት ዕዳ ÷ ኾነና ለልጅ

    ባልዋለበት ውሎ ÷ ወደቀ ሰው ደጅ።

    እናት እንደ ሌለው ÷ አባት እንደ ሌለው

    ወደቀ ሰው ደጅ

    ባይተዋሩ ልዑል የመሳፍንት ልጅ

    ሕልሙ ሳይቋጭ።

    አገር እንደ ሌለው ÷ ወገን እንደ ሌለው

    ወደቀ ሰው ደጅ

    ባይተዋሩ ልዑል በባይተዋር እጅ

    እርሙን ላይበጅ።

    ወርቅ አበድሮ ጠጠር!

    በኖረበት አገር ÷ ተረስቶ ነገር

    ባይተዋሩ ልዑል እንደ ጥሩ ዘር

    ምነው በቀለለው ÷ የአገሩ አፈር።

    በእናቱ በኩል ጥሩ የሚባል

    ክብሩ ማይዋልል

    አባቱም በውል የማይታበል

    የኢትዮጵያ ባል!

    ከዳዊት መንግሥት ÷ ከሰሎሞን ቤት

    የ‘የሩሳሌም ቀናዒ አድርጎት

    ቢገዳደሩት

    ለፅዮን ለስሟ ÷ ይሞት ይሟሟት

    ዳሩ ምን ገዶት!

         (ኃይለ ልዑል ካሣ፣ አዲስ አበባ)

    ታኅሣሥ 5 ቀን 2009 ዓ.ም. ተጻፈ

       ከአገሩ ወጥቶ ለቀረው  ለልዑል ዓለምአየሁ ቴዎድሮስ

                                    ***

                                  

    - Advertisement -
    - Advertisement -

    ተጨማሪ ለማንበብ

    በብዛት የተነበቡ ፅሁፎች