Tuesday, October 4, 2022
ሌሎች ዓምዶች
    - Advertisement -
    - Advertisement -
    ማኅበራዊሁለት ዩኒቨርሲቲዎች የዝዋይ ሐይቅን ለመንከባከብ ተስማሙ

    ሁለት ዩኒቨርሲቲዎች የዝዋይ ሐይቅን ለመንከባከብ ተስማሙ

    ቀን:

    የወልቂጤ እና የአሰላ ዩኒቨርሲቲዎች የዝዋይ ሐይቅን በጥምረት በመንከባከብ ማኅበራዊ ኃላፊነታቸውን ለመወጣት መስማማታቸውን የወልቂጤ ዩኒቨርሲቲ ፕሬዚዳንት አስታወቁ፡፡

    ‹‹ኮርፖሬት ሶሻል ሪስፖንስብሊቲ ኤንድ ሰስቴነብል ዴቨሎፕመንት›› በሚል ርዕስ አዲስ አበባ ውስጥ ለሁለት ቀናት የተካሄደውን ዓለም አቀፍ ጉባኤ አስመልክተው ፕሬዚዳንቱ ፕሮፌሰር ደጀኔ አየለ ለሪፖርተር እንደገለጹት፣ የመንከባከቡ ሥራ የሚያተኩረው ሐይቁን ከብክለት በማዳን ነው፡፡

    ከዚህም ሌላ የውኃውን መመናመን ማስቀረት፣ በሐይቁ ዙሪያ ባሉት ሁለት ተፋሰሶች ላይ የተፈጥሮ ሀብት ሥራ፣ የችግኝ ተከላ ማከናወንና የአሣውን ምርት ከፍ ማድረግ ከተካተቱት ተግባራት መካከል ተጠቃሽ ናቸው፡፡

    ይህንንም ሥራ የሚያከናውነው ከሁለቱ ዩኒቨርሲቲዎች የተውጣጣ አንድ የጥናት ቡድን ነው፡፡ የመለየቱም ሥራ በመጪው ነሐሴ አጋማሽ ላይ የሚጠናቀቅ ሲሆን፣ የእያንዳንዱ ባለድርሻ አካላት የሥራ ድርሻ በውል ተለይቶ ከታወቀ በኋላ የመግባቢያ ሰነድ ፊርማ ተከናውኖ ሁሉም የተጣለበትን ኃላፊነት ለመወጣት የየፊናውን እንቅስቃሴ ማካሄድ ይጀምራል፡፡

    በሐይቁ ዙሪያ ከሚገኙት የአበባ እርሻዎች የሚመጣውም የፈርትላይዘር ፎስፈረስ የመሳሰሉ ኒውትረንቶች ባህር ውስጥ የሚበቅሉ ተክሎችን በማበልፀጉ የተነሳ ሐይቁ በተክሎች ተሸፍኗል፡፡ የተክሎቹ ማደግ ደግሞ ሐይቁን ከመበከል አልፎ የኦክስጂን መጠኑን የሚቀንስ ሲሆን ይህም አሣዎች እንዳይኖሩ ያደርጋል፡፡

    ‹እምባጮ› የሚባለው አረም በዝዋይ ሐይቅ ዙሪያ እንደተስፋፋ፣ ይህ ዓይነቱ አረም ካልተወገደና መልሶ እንዳይበቅል ጥንቃቄ ካልተደረገ የከፋ ችግር ሊያስከትል እንደሚችልም ገልጸዋል፡፡

    የዝዋይ ሐይቅ ውኃ በተለያዩ ምክንያቶች እየተመናመነ መምጣቱ ከቀጠለ ዳግማዊ ሀሮማያ ሐይቅ ይሆናል የሚል ሥጋት እንዳሳደረ፣ አንድ ሐይቅ እንዳለ ሲጠፋ ደግሞ በማኅበረሰቡም ሆነ በአገር ላይ ከፍተኛ ቀውስ ሊያስከትል እንደሚችል ፕሮፌሰር ደጀኔ ተናግረዋል፡፡

    ወልቂጤ ዩኒቨርሲቲ ሕንድ ከሚገኘው ሶሳይቲ ፎር ኢዱኬሽን  ኤንድ ሪሰርች ዴቨሎፕመንት ጋር በመተባበር ከሚያዝያ 24 እስከ ሚያዝያ 25 ቀን 2009 ዓ.ም.  ባከናወነው በዚሁ አምስተኛው ዓለም አቀፍ ጉባኤ ላይ፣ በልማት ሥራ የተሠማሩ  የመንግሥትና የግል ድርጅቶች ከማኅበረሰቡ ጋር ተቀናጅተው በመሥራት ግዴታቸውን መወጣት እንዳለባቸው ተገልጿል፡፡

     

    - Advertisement -

    ይመዝገቡ

    spot_img
    spot_img