Monday, July 22, 2024
- Advertisement -
- Advertisement -
ማኅበራዊየሐኪሞች ደመወዝ እንዲስተካከል ተጠየቀ

የሐኪሞች ደመወዝ እንዲስተካከል ተጠየቀ

ቀን:

የሐኪሞች ደመወዝ የጊዜውን የኑሮ ሁኔታ ባገናዘበ መልኩ እንዲስተካከል የኢትዮጵያ ሕክምና ማኅበር ጠየቀ፡፡

ለሦስት ቀናት ያህል የተካሄደው የማኅበሩ 53ኛ ዓመታዊ የሕክምና ጉባኤና ዓለም አቀፍ የጤና ዐውደ ርዕይ፣ ሚያዝያ 19 ቀን 2009 ዓ.ም. በተከፈተበት ሥነ ሥርዓት ላይ የማኅበሩ ፕሬዚዳንት ዶ/ር ገመቺስ ማሞ እንደገለጹት፣ ማስተካከያው ያስፈለገው የእያንዳንዱ ሐኪም ኪስ ከኑሮው ጋር መጣጣምና መቀራረብ እያቃተው በመምጣቱ ነው፡፡

የሕክምና ባለሙያው በመኖሪያ ቤት እጥረት እንደሚቸገር በመግለጽም፣ ይኼን ችግር ለመፍታት መንግሥት ሐኪሞች በጋራ ተደራጅተው የጋራ መኖሪያ ቤት እንዲሠሩ ከሊዝ ነፃ መሬት መስጠትና በረዥም ጊዜ የሚከፈል ብድር ማመቻቸት ይከብደዋል ብለው እንደማያስቡ አክለዋል፡፡

የትራንስፖርት ችግር የመላው ሕዝብ ችግር መሆኑ ቢታወቅም፣ ሐኪሞች ከውጭ አገር ከቀረጥ ነፃ መኪና እንዲያስገቡ ወይም በቀረጥ ከውጭ የሚገቡትንም ሆነ በአገር ውስጥ የሚገጣጠሙትን ገዝተው በረዥም ጊዜ ብድር እንዲከፍሉ ቢፈቀድ መልካም እንደሆነ አመልክተዋል፡፡

በግሉ የጤና ዘርፍ ላይ የሚያገለግሉ ሐኪሞች የድኅረ ምረቃ ትምህርት እንዲማሩ መፍቀድ አስፈላጊ መሆኑን በመጠቆምም፣ የጤና ጥበቃ ሚኒስቴር ለመንግሥት የጤና ድርጅቶች የሚሰጠውን ትኩረት ያህል ለግሉ ዘርፍ እንዳልሰጠ አክለዋል፡፡

ከቅርብ ዓመታት ወዲህ የሕክምና አገልግሎት ጥራት ማነስ ከኅብረተሰቡ እየተነሳ እንደሆነ፣ ለተፈጠረው የአገልግሎት ጥራት ማነስም ሐኪሙ ተጠያቂ ሲሆን እንደሚታይ፣ ይህ ደግሞ ሁልጊዜ ትክክል ነው ብሎ ለመቀበል እንደሚያስቸግርና የታካሚዎችን ሕይወት ለመታደግ ሐኪሞች የማይከፍሉት መስዋዕትነት እንደሌለ ዶ/ር ገመቺስ አመልክተዋል፡፡

የሐኪሞች አገልግሎት በግብዓት፣ በአቅርቦት ማነስና በአመራር ዕጦት የሚፈተንበት ጊዜ እየበዛ መምጣቱን፣ ሐኪሞችም የነገሮችን መበላሸትና የችግሮችን መብዛት ከመልመዳቸው የተነሳ ለምን ብሎ መጠየቅን መፍራታቸውን፣  የሕክምና መሣሪያዎችና የመድኃኒቶች መጥፋት የታካሚዎችን ሕይወት አደጋ ላይ ሲጥሉ እየታየ ዝም ማለት መመረጡንም ተናግረዋል፡፡ የብቁ አስተዳደር አለመኖርም ሥራውን እያስተጓጎለና ጥራት ያለው አገልግሎት እንዳይሰጥ ከማጉረምረም ያለፈ የመፍትሔ ዕርምጃ ሲወሰድ አለመታየቱን ገልጸዋል፡፡

የሕክምና አገልግሎት ጥራት የሚጀምረው ከሚሰጠው የሕክምና ትምህርት ጥራት እንደሆነ በማስታወስም፣ ጥራት የጎደለው ትምህርት የተማረ ሐኪም የሚሰጠው አገልግሎት ጥራት የጎደለውና አንዳንዴም ከጥቅሙ ጉዳቱ የሚያመዝን እንደሚሆን ፕሬዚዳንቱ ገልጸዋል፡፡

መንግሥት በያዘው ሐኪሞችን በብዛት የማስመረቅ ስትራቴጂ በአገሪቱ በርካታ የመንግሥት እና የግል ሕክምና ትምህርት ቤቶች እንደተከፈቱ ቢታወቅም፣ ብዛት ላይ የተሰጠው ትኩረት ጥራት ላይም እኩል መተግበር እንዳለበትም አሳስበዋል፡፡  

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...