Saturday, October 1, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር ለበዓል ከአሜሪካ የመጣ የቀድሞ ወዳጃቸውን የበዓል ምሣ ጋብዘውት እያወሩ ነው

    [ክቡር ሚኒስትር ለበዓል ከአሜሪካ የመጣ የቀድሞ ወዳጃቸውን የበዓል ምሣ ጋብዘውት እያወሩ ነው]

    • ብላ እንጂ ምግቡ አልጣመህም እንዴ?
    • ክብር ሚኒስትር ይኼ ካልጣመኝ ምን ሊጥመኝ ነው?
    • ከጥሬውም፣ ከክትፎውም፣ ከዶሮውም፣ ከፍትፍቱም እያወጣህ ብላ እንጂ፡፡
    • ምን ይኼ ብቻ? ጎድን ጥብሱ፣ አልጫውና ቀይ ወጡ፣ ከሽከሽ የሚለው ደረቅ ጥብስ፣ . . . ጉድ እኮ ነው፡፡
    • አየህ በዓላትን የምናደምቀው በእነዚህ ምግቦች ነው፡፡
    • ክቡር ሚኒስትር እኔማ የአንድ ቢሊየነር ድግስ ላይ የተገኘሁ ነው የመሰለኝ፡፡
    • እኛም እኮ ሚሊየነሮችን እያፈራን ነው፡፡
    • እርስዎም ሚሊየነሮች ተርታ ያሉበት ይመስላሉ ክቡር ሚኒስትር፡፡
    • ከዕድገቱ መቋደስ መብታችን ነው እኮ፡፡
    • በነገራችን ላይ ክቡር ሚኒስትር?
    • ምን ነበር?
    • ሕዝቡ ከልማቱ ተጠቃሚ አይደለም የሚባለው እውነት ነው?
    • ዌል እንግዲህ በየደረጃው ተጠቃሚነት ይኖራል፡፡
    • ማለት?
    • ልማቱን ከደገፍክ ለአንተም አይጠፋም ማለቴ ነው፡፡
    • እኔ እያልኩ ያለሁት ፍትሕዊ ተጠቃሚነትን ነው፡፡
    • ፍትሕዊ ተጠቃሚ ለመሆን እኮ ዝግጁ መሆን ያስፈልጋል፡፡
    • ለምኑ ክቡር ሚኒስትር?
    • ልማታዊውን ኃይል ለማገዝ፡፡
    • ዜጎች የልፋታቸውን ካበረከቱ እኮ መቀጠም አለባቸው፡፡
    • ለውጤት መልፋትና ዝም ብለው ሲያዘጠዝጡ በመዋል እኩልነት አይመጣም፡፡
    • አልገባኝም ክቡር ሚኒስትር?
    • ወዳጄ ይኼ የዳያስፖራ ጭንቅላትህን አሠራው፡፡
    • እስኪ በግልጽ ይንገሩኝ ክቡር ሚኒስትር?
    • ይኼ ገበታ እንዲህ ሞልቶ የተንጣለለው ያለ ሥራ መሰለህ?
    • በእርግጥ በዓይኔ ከማየው በላይም የገነቡዋቸው ሦስት ሕንፃዎች፣ የሚያንቀሳቅሱዋቸው የተለያዩ የግል ኩባንያዎች. . . ብዙ ይናገራሉ፡፡
    • አሁን እየገባህ ነው፡፡
    • ይህ ምን ያመለክታል ክቡር ሚኒስትር?
    • ተጠቃሚ መሆን ከፈለግክ ውጤታማ መሆን አለብህ፡፡
    • እንዴት ክቡር ሚኒስትር?
    • በጥሎ ማለፍ ነዋ!
    • አሁንም አልገባኝም ክቡር ሚኒስትር?
    • የጨዋታውን ሕግ ማወቅ ብቻ ሳይሆን. . .
    • እህ?
    • ሕጉን ለራስ በሚመች መንገድ መጻፍ መቻል፡፡
    • ከዚያስ ክቡር ሚኒስትር?
    • ከዚያማ ከሚሊየነርነት ወደ ቢሊየነርነት መሸጋገር፡፡
    • እርስዎ ይህንን ተግባራዊ እያደረጉ ነው?
    • ካርል ማርክስ ምን እንዳለ ታውቃለህ?
    • ምን አለ ክቡር ሚኒስትር?
    • ‹ፈላስፎች ዓለምን በተለያየ መንገድ ተርጉመውታል፣ ዋናው ቁም ነገር ግን ዓለምን መለወጥ ነው› ያለው፡፡
    • ይኼ ምን ማለት ነው?
    • ብዙ ከማውራት. . .
    • እ?
    • በትንሽ ድርጊት ራስን መለወጥ፡፡
    • ምን የሚሉት መርህ ይሆን?
    • ‹የበላ በለጠ የሮጠ አመለጠ› ይባላል፡፡

    [ክቡር ሚኒስትሩ የምሣ ግብዣቸው ላይ ከተገኘ አንድ ባለሀብት ጋር የጦፈ ወሬ ይዘዋል]

    • አንተ እንዲህ ጠፍተህ ለበዓል ትመጣለህ?
    • ምን ይደረግ ብለው ነው ክቡር ሚኒስትር?
    • የሚያጠፋ ምን ተገኘ?
    • የጠፋሁበትን ምክንያት ሳያውቁት ቀርተው ነው ክቡር ሚኒስትር?
    • ምድንነው እሱ?
    • የውጭ ምንዛሪ እጥረቱ ሊያሳብደኝ ነው ክቡር ሚኒስትር፡፡
    • ይኼማ የአገር ችግር ነው፡
    • የአገር ችግር ቢሆንም ሲመራረጡበት እኮ ነው የሚውሉት፡፡
    • እነ ማን?
    • የተሻለ የሰጡና የተቀበሉ ክቡር ሚኒስትር፡፡
    • ታዲያ ለምን አልነገርከኝም?
    • ረሱት እንዴት ክቡር ሚኒስትር?
    • ምኑን?
    • ከአንዴም ሦስቴ ነግሬዎት ነበር፡፡
    • እንዴት ረሳሁት እባክህ?
    • ተሃድሶ ግምገማ ላይ ሆነው ምኑ ትዝ ይበልዎት?
    • ልክ ነህ፡፡
    • ግምገማው ጨከን ያለ ነበር ክቡር ሚኒስትር?
    • ቢሆንም እንችለዋለን፡፡
    • ክቡር ሚኒስትር የውጭ ምንዛሪው ጉዳይ እኮ በጣም እያሳሰበኝ ነው፡፡
    • እንደምንም ይፈለግልሃል፡፡
    • ያለበለዚያ ሞቴ እንደተቃረበ ይወቁት፡፡
    • አይዞህ በእኔ ተወው፡፡
    • ክቡር ሚኒስትር እሱ ከተሳካልኝ ሌላውን በእኔ ይተውት፡፡
    • እሱ ድሮ ቀረ እባክህ፡፡
    • ምን ማለትዎ ነው ክቡር ሚኒስትር?
    • በአራዳ ቋንቋ ልንገርህ እንዴ?
    • በአራዳ ቋንቋ?
    • አዎ!
    • እርስዎ እኮ አይቻሉም ክቡር ሚኒስትር፡፡
    • ቀድመህ ታደርጋለህ፡፡
    • ምኑን?
    • በለመድከው የአራዳ ቋንቋ ልንገርህ ያልኩት እኮ ለዚህ ነው፡፡
    • ኧረ ክቡር ሚኒስትር አወሳሰቡኝ፡፡
    • በል ወዳጄ ቶሎ ወደ አካውንቴ ትራንስፈር አድርገው፡፡
    • ምን?
    • ቀብዱን ‹ውረድ› አልኩህ፡፡
    • ይኼ ደግሞ ከመቼ ወዲህ የመጣ ፈሊጥ ነው?
    • ዘመኑ ተቀየረ እኮ?
    • ወዳጅነት እንዲህ ነው ክቡር ሚኒስትር?
    • እንካ በእንካ ነዋ፡፡
    • ድሮ እኮ እንዲህ አልነበሩም?
    • ‹በድሮ በሬ ያረሰ የለም› ሲባል አልሰማህም?

    [የምሣ ግብዣው ላይ የተገኘ የክቡር ሚኒስትሩ የቅርብ ዘመድ እያነጋገራቸው ነው]

    • አንተ እንዴት ነው እባክህ እንዲህ የተስማማህ?
    • ዕድሜ ለአንተ ጋሼ፡፡
    • እኔ እኮ ለመነሻ የሚሆን ነው የረዳሁህ፡፡
    • አንተ ባሳየኸኝ መንገድ ሄጄ ነው ቀን የወጣልኝ ጋሼ፡፡
    • ሥራ እንዴት ነው?
    • ዕድሜ ለአንተ ስምህ ሲጠራ በሩ ሁሉ ይከፈታል ጋሼ፡፡
    • እንዴት እባክህ?
    • በስምህ የአገሩን በር ነው የበረጋገድኩት ጋሼ፡፡
    • ከዚህ ሁሉ የእኔ ድርሻ የታለ ታዲያ?
    • ጋሼ በእትዬ አካውንት እየገባ እኮ ነው፡፡
    • እስካሁን ስንት ለቀቅክ?
    • ሃያ ሁለት አካባቢ ገብቷል ጋሼ፡፡
    • ሚሊዮን?
    • አዎ ጋሼ፡፡
    • በስንት ጊዜ?
    • በዘጠኝ ወራት ውስጥ ጋሼ፡፡
    • በዚህ ሁኔታማ አንተ ከሃምሳ በላይ ዘግተሃል፡፡
    • ወደዚያ አካባቢ ነው ጋሼ፡፡
    • የእኔ እንዴት ይኼ ብቻ ሆነ?
    • የመጀመሪያ ስለሆነ ትንሽ ልቋቋም ብዬ ነው ጋሼ፡፡
    • አዎ ቤት መሥራት፣ አሪፍ መኪኖች መግዛት፣ ትዳር. . . ያስፈልጉሃል፡፡
    • ጋሼ?
    • አቤት?
    • የአንተ ስም እኮ ነው የጠቀመኝ፡፡
    • ወደፊትም ይጠቅምሃል፡፡
    • እሺ ጋሼ፡፡
    • ግን. . .
    • ግን ምን ጋሼ?
    • ተጠንቀቅ!
    • ከምን ጋሼ?
    • ለእኔ የነገርከኝን ለማንም እንዳትናገር፡፡
    • እኔ እኮ መቃብር ማለት ነኝ ጋሼ፡፡
    • ካልሆንክ ግን ቀብርህን ፈጽምልሃለሁ፡፡
    • ኧረ ጋሼ?
    • አትንዸርዸር በቃ፡፡

    [የበዓሉ የምሣ እንግዶች ተሸኝተው ክቡር ሚኒስትሩና ባለቤታቸው እያወሩ ነው]

    • በጣም ምርጥ የሚባል መስተንግዶ ስለነበር አመሰግንሻለሁ፡፡
    • ይገባኛል ክቡር ሚኒስትራችን፡፡
    • ትንሽ ሲያሳዩሽ እኮ አትቻይም፡፡
    • መመስገንና መወደስ ማን ይጠላል?
    • እኔ ግድየለኝም፡፡
    • አናውቅዎትም ክቡር ሚኒስትር?
    • እንዴት?
    • በሬዲዮ፣ በጋዜጣ፣ በቴሌቪዥን የእርስዎ ጥሩ ጥሩ ዜናዎች ሲቀርቡ እንዴት እንደሚፍለቀለቁ?
    • ስተችም ያው ነኝ፡፡
    • ባለፈው በግምገማ ሊነሳ ነው ተብሎ ሲወራብህ አብደህ አልነበር?
    • ያ ሌላ ይህ ሌላ፡፡
    • ለማንኛውም የምሣ ላይ ወሬህ ፍሬነገር ነበረው?
    • በጣም እንጂ፡፡
    • ምን አገኘህበት?
    • ዳያስፖራውን አወዛገብኩት፡፡
    • እሺ?
    • ወዳጄ ኢንቨስተሩን ለፈጣን ክፍያ አቀባበልኩት፡፡
    • እሺ?
    • ያንን የአክስቴን የልጅ ልጅ ደግሞ አወጣጣሁት?
    • ምኑን?
    • በአካውንትሽ የለቀቀውን፡፡
    • ይህቺም ገንዘብ ቁም ነገር ሆና?
    • እስካሁን ለምን አልነገርሽኝም?
    • አነስተኛና ጥቃቅን ጉዳይ አይመለከትህም ብዬ ነዋ፡፡
    • ነው እንዴ?
    • አዎ ምነው?
    • የሺሕ ኪሎ ሜትር ጉዞ በአንድ ዕርምጃ የሚጀመር መስሎኝ?
    • ይህቺም ገንዘብ ሆና በበዓል አትነጅሰኝ፡፡
    • ሃያ ሁለት ሚሊዮን?
    • አትቀልድ እባክህ፡፡
    • ለማንኛውም?
    • እሺ?
    • ንገሪኝ፡፡
    • ምን ልንገርህ?
    • እያንዳንዷን ነጥብ፡፡
    • ትንሽ ነገር ምን ያደርግልሃል?
    • ትንሽ መስሎኝ ትልቁን የሚያጠፋው?
    • ማለት?
    • የመረጃ ትንሽ የለውም፡፡
    • ምን ያደርግልሃል?
    • አንቺ አይገባሽም እንዴ?
    • ምኑ ነው የሚገባኝ?
    • ስለ ጉንዳን ታውቂያለሽ?
    • ጉንዳን?
    • አዎ ጉንዳን?
    • እና?
    • ጉንዳን በጣም ትንሽ ፍጡር ነው፡፡
    • እሺ?
    • ሾልኮ ከገባ ግን. . .
    • የት?
    • ውስጣችን፡፡
    • እሺ?
    • አደባባይ ላይ ሱሪ ያስፈታናል፡፡
    • ሆሆ. . .
    • ስለዚህ?
    • መርሀችን ነቃ በሉ ነው የሚለው፡፡

    [ክቡር ሚኒስትሩ ሊተኙ ሲሉ ልጃቸው ከውጭ ሲገባ አገኙት]

    • አንተ በበዓል ቀን የት ነው የምትዞረው?
    • ጓደኞቼ ጋ ወጣ ብዬ ነበር ዳዲ፡፡
    • እዚህ ስንት ተደግሶ ምን ያዞርሃል?
    • አለ አይደል ዳዲ፡፡
    • አንተ ጠጥተሃል እንዴ?
    • በመጠኑ ዳዲ፡፡
    • ምንድነው የጠጣኸው?
    • አንድ ሁለት ሻት ነው ዳዲ፡፡
    • ምንድነው እሱ?
    • አለ አይደል ዳዲ፡፡
    • ንገረኝ?
    • ትንሽ ቮድካ ነው ዳዲ፡፡
    • ከመቼ ጀምሮ ነው የምትጠጣው?
    • ዳዲ አትቆጣ፡፡
    • ሰክረህ እያየሁ እንዴት አልቆጣ?
    • አለ አይደል አንዳንዴ ፈታ ማለት አስፈላጊ ነው ዳዲ፡፡
    • ምን አልክ አንተ?
    • ፈታ ነው ያልኩት ዳዲ፡፡
    • ምኑ ነው የሚፈታው አንተ?
    • ዘና ማለቴ ነው ዳዲ?
    • ማን ነው የአስተማረህ?
    • አንተ ነህ ዳዲ፡፡
    • እንዴት አድርጌ?
    • ሚኒስትርነቱንና ቢዝነሱን አንድ ላይ ማስኬድ እኮ የተለየ ስጦታ ነው ዳዲ?
    • እና?
    • እኔም ትምህርቱንና መዝናናቱን አንድ ላይ ማስኬድ ችዬበታለሁ፡፡
    • ውይ. . . ውይ. . . ውይ. . .
    • አገሪቱም እኮ እንዲህ ነው ግብግብ የምትለው ዳዲ፡፡
    • ያንገብግብህ!

    በብዛት የተነበቡ ፅሁፎች

    ለትግራይ የተገዛው ነዳጅ ከጅቡቲ መግባት ጀመረ

    ድርድርን በሚመለከት የአሜሪካ መንግስት አቋም እንደማይዝ ተገለጸ በድርቅ ለተጎዱ አካባቢዎች...

    በቤንዚንና ነጭ ናፍጣ ላይ ጭማሪ ተደረገ

    ከዛሬ መስከረም 18 ቀን 2015 ዓም እኩለ ሌሊት ጀምሮ...

    አነስተኛ ካፒታል ያላቸው ባንኮች በመዋሃድ አቅም እንዲፈጥሩ ጉምቱው የፋይናንስ ባለሙያ መከሩ

    የውጭ ባንኮች በኢትዮጵያ ገበያ ውስጥ እንዳይገቡ የሚከለክለውን ሕግ የማሻሻል...

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...
    - Advertisment -

    ትኩስ ፅሁፎች