Monday, December 5, 2022
ሌሎች ዓምዶች
    - Advertisement -
    - Advertisement -
    ዜናምርጫ ቦርድ ለመኢአድና ለአንድነት ተጨማሪ የሁለት ሳምንት ጊዜ ሰጠ

    ምርጫ ቦርድ ለመኢአድና ለአንድነት ተጨማሪ የሁለት ሳምንት ጊዜ ሰጠ

    ቀን:

    የኢትዮጵያ ብሔራዊ ምርጫ ቦርድ ጥር 5 ቀን 2007 ዓ.ም. ባካሄደው አስቸኳይ ስብሰባ፣ የመላው ኢትዮጵያ አንድነት ድርጅት (መኢአድ) እና አንድነት ለዴሞክራሲና ለፍትሕ ፓርቲ (አንድነት) የውስጥ ችግሮቻቸውን እንዲፈቱ ተጨማሪ የሁለት ሳምንት ጊዜ መስጠቱን በሚኒስትር ማዕረግ የቦርዱ ሰብሳቢ ፕሮፌሰር መርጋ በቃና ገለጹ፡፡ ከዚህ በተጨማሪም ሰብሳቢው ሰማያዊ ፓርቲ ምርጫ ቦርድን ይቅርታ ይጠይቅ የሚል ማስጠንቀቂያ መስጠቱንና ፓርቲውም ለቦርዱ በጻፈው ደብዳቤ ይቅርታ እንደማይጠይቅ ማስታወቁን ገልጸው፣ ከተጠቀሱት ተግባራት የማይቆጠብ ከሆነ የሥነ ምግባር ጥሰቶችን ሊመጥን የሚችል ሕጋዊ ዕርምጃዎችን ሊወስድ እንደሚችል ገልጸዋል፡፡ ቦርዱ ታኅሳስ 28 ቀን 2007 ዓ.ም. አንድነትና መኢአድ ያሉባቸውን ችግሮች እንዲፈቱ እስከ ጥር 4 ቀን 2007 ዓ.ም. ድረስ የጊዜ ገደብ ማስቀመጡን መዘገባችን የሚታወስ ሲሆን፣ በዚሁ ቀን ሰማያዊ ፓርቲም እያደረገ ባለው ያልተገባ አካሄድ ምክንያት በጽሑፍ ቦርዱን ይቅርታ ይጠይቅ መባሉም እንዲሁ ተዘግቦ ነበር፡፡ በዚህም መሠረት ቦርዱ ጥር 5 ቀን 2007 ዓ.ም. ባካሄደው አስቸኳይ ስብሰባ፣ ‹‹አንድነትና መኢአድን በተመለከተ ባካሄደው አስቸኳይ ስብሰባ ችግሩ የፓርቲው አመራሮች የፈጠሩት መሆኑን በመረዳት የፓርቲው ህልውና ግን በተቻለ መጠን መቀጠል ስላለበት፣ ከፓርቲው በስተጀርባ ያለውን ሕዝብ በመመልከት አሁንም ጉዳዩን በሆደ ሰፊነት ለመመልከት ለመጨረሻ ጊዜ የሁለት ሳምንት ቀነ ገደብ ሰጥቷል፤›› በማለት ሰብሳቢው ገልጸዋል፡፡ ከዚህ በተጨማሪም፣ ‹‹በዚህ ሁለት ሳምንት ጊዜ ውስጥ አመራሮቹ ፓርቲው የገባበትን ችግር በማጤን የውስጥ ጉዳዮቻቸውን አንድ ላይ በመሆን በጠቅላላ ጉባዔያቸው በማስወሰን፣ የጠቅላላ ጉባዔውን ሪፖርት ለቦርዱ በማቅረብ ወደ ምርጫው እንቅስቃሴ እንዲገቡ ቦርዱ አዟል፤›› በማለት በሁለት ሳምንት ጊዜ ውስጥ ሪፖርት እንዲቀርብለት ትዕዛዝ መስጠቱን አስታውቀዋል፡፡ ሰማያዊ ፓርቲን በተመለከተ፣ ‹‹በፓርቲው በኩል ሲፈጸሙ ለቆዩት የሥነ ምግባር ጥሰቶች ይቅርታ እንዲጠይቅ ቢወሰንም ፓርቲው ይቅርታ ለመጠየቅ ፈቃደኛ አለመሆኑን ገልጿል፤›› በማለት ፕሮፌሰር መርጋ አስረድተዋል፡፡ ሰማያዊ ፓርቲ በበኩሉ፣ ‹‹ቦርዱ በላከው ደብዳቤ ያቀረባቸውን ውንጀላዎች መሠረት በማድረግ ፓርቲያችን ይቅርታ እንዲጠይቅ ያቀረበው ውሳኔ ተቀባይነት የለውም፡፡ ከዚህ በተጨማሪም ይህ ዓይነቱ የይቅርታ ጥያቄና የይቅርታ አድራጊ ግንኙነት በምርጫ ቦርድ በሕግ ከተሰጡት ሥልጣንና ተግባራት ውጪ በመሆኑ፣ የቦርዱና የፖለቲካ ፓርቲዎች ሕጋዊ ግንኙነትን ያልተከተለና ተቀባይነት የሌለው መሆኑን እንገልጻለን፤›› የሚል ምላሽ ሰጥቷል፡፡ ቦርዱም ጉዳዩን በጥልቀትና በስፋት መመርመሩን ገልጾ፣ ሰማያዊ ፓርቲ በቀጣይ ከሚያካሂዳቸው ተግባራት የማይቆጠብ ከሆነ የሥነ ምግባር ጥሰቶቹን ሊመጥን የሚችል ሕጋዊ ዕርምጃዎችን ሊወስድ እንደሚችል የቦርዱ ሰብሳቢ አስታውቀዋል፡፡

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ዳግም ነፍስ የዘራው የተማሪዎች ማርች ባንድ

    የሙያው ፍቅር ያደረባቸው ገና በልጅነታቸው ነው፡፡ በ1970ዎቹ መጀመርያ፣ ለቀለም...

    በስንደዶና ሰበዝ የተቃኘው ጥበብ

    በአንዋር አባቢ ተወልዳ ያደገችው መሀል አዲስ አበባ አራት ኪሎ ነው፡፡...

    አዲስ ጥረት የሚጠይቀው  ኤችአይቪ  ኤድስን  የመግታት  ንቅናቄ

    ‹‹ኤችአይቪ በመላው ዓለም  በሚሊዮን የሚቆጠሩ ሰዎችን የሚያጠቃ ዋነኛ የሕዝብ...

    የኅትመት ብርሃን ያየው ‹‹የቃቄ ወርድዎት›› ቴአትር

    ከአራት ዓመታት በፊት በኢትዮጵያ ብሔራዊ ቴአትር መድረክ ላይ ይታይ...