Wednesday, February 1, 2023
- ማስታወቂያ -
- ማስታወቂያ -

በታብሌት ኮምፒዩተሮች ግዥ ላይ በስድስት ኩባንያዎች ቀርቦ የነበረው ቅሬታ ውድቅ ተደረገ

- ማስታወቂያ -

ተዛማጅ ፅሁፎች

የመንግሥት ግዢዎችና ንብረት ማስወገድ አገልግሎት የታብሌት ኮምፒዩተሮች ግዢ ጨረታን በተመለከተ፣ በስድስት ኩባንያዎች ቀርቦለት የነበረውን ቅሬታ ውድቅ አደረገ፡፡

ኩባንያዎቹ በአገልግሎቱ በኩል በቀጣዩ ዓመት ለሚደረገው አገር አቀፍ የሕዝብ ቆጠራ አገልግሎት የሚውሉ 180 ሺሕ ታብሌት ኮምፒዩተሮችን ለመግዛት ባወጣው ጨረታ ተሳትፈው ወደ ቀጣዩ ዙር አለማለፋቸው ተነግሯቸው ነበር፡፡ በተቃራኒው በዚህ ጨረታ የአሜሪካው ባክ ዩኤስና የቻይናው ሁዋዌ ኩባንያዎች ወደ ቀጣዩ ዙር እንዲያልፉ መደረጉ ይታወሳል፡፡

ከዚህም ጋር ተያይዞ በጨረታው ላይ ተሳትፈው የነበሩና ወደ ቀጣዩ ዙር አለማለፋቸው የተገለጸላቸው ስድስት ድርጅቶች ውጤቱን በመቃውም ቅሬታቸውን ለአገልግሎቱ አቅርበው ነበር፡፡ ከእነዚህም ውስጥ ዜድቲኢ፣ አይ ላይፍ፣ ቴክኖ፣ ሲምቦ ሪሶርስ፣ ሌኖቮና መስቴክ አፍሪካ የተባሉት ድርጅቶች ለአገልግሎቱ ውጤቱን እንደማይቀበሉትና ጉዳያቸው እንደገና እንዲታይ አመልክተው ነበር፡፡

አገልግሎቱ ባደረገው ውስን ጨረታ 18 ድርጅቶች ተጋብዘው የነበረ ሲሆን፣ ከእነዚህም መካከል ዘጠኙ ብቻ ተሳታፊ ነበሩ፡፡

ይኼ ውጤት የመጀመሪያው የቴክኒክ ግምገማ ከተሰረዘ በኋላ የመጣ ነው፡፡ የተሰረዘውም የታብሌቶቹ ዝርዝር ዓይነት መሻሻል በማስፈለጉ እንደነበር ተገልጿል፡፡

በመጀመሪያ በነበረው ጨረታ የታብሌቶቹ ባትሪ ዓይነት ተቀያሪ እንዲሆኑ ቢፈለግም፣ ነገር ግን ይኼ ተጫራች የሚጋብዝ ሆኖ አልተገኘም፡፡ በዚህም ምክንያት ጨረታው ሊደገም ችሏል፡፡

ከአሁን ቀደም ከዚህ ጋር በተያያዘ ሪፖርተር ያነጋገራቸው ምንጮች ጨረታው ለመሰረዙ ሌሎች ምክንያቶችን ያነሳሉ፡፡ የመጀመሪያው ጨረታ ከተደረገ በኋላ የተጫራቾች የቴክኒክ ሰነድ ውጤት በተጫራቾች መገኘቱን እንደ ምክንያት ይገልጻሉ፡፡

አሁን በተገለጸው ውጤት ስድስቱም ድርጅቶች በአገልግሎቱ ውሳኔ ደስተኛ ካልሆኑ፣ ቅሬታቸውን ወደ መንግሥት ግዥዎችና ንብረት አስተዳደር ኤጀንሲ መውሰድ ይችላሉ፡፡

ኤጀንሲውም ቅሬታቸው አሳማኝ ሆኖ ካገኘው ቅሬታቸውን የማየት ሥልጣን አለው፡፡ አጨቃጫቂ ሆኖ የቀጠለው የጨረታው የቴክኒክ ግምገማ ከመገናኛና ኢንፎርሜሽን ቴክኖሎጂ ሚኒስቴር፣ እንዲሁም ከመረጃና ደኅንነት ኤጀንሲ በተወጣጡ ባለሙያዎች መደረጉ ይታወሳል፡፡

የታብሌት ኮምፒዩተሮቹ ግዢ በግንቦት 2009 ዓ.ም. ተጠናቆ ይቀርባሉ ተብሎ ቢጠበቅም፣ በተፈጠረው የጨረታ መዘግየት ከማስረከቢያ ጊዜው ለአንድ ወር ተራዝሟል፡፡

የሕዝብ ቆጠራውን የሚያካሂደው የማዕከላዊ ስታትስቲክስ ኤጀንሲ፣ ለሕዝብ ቆጠራው በአጠቃላይ ወደ ሦስት ቢሊዮን ብር መድቧል፡፡ ታብሌቶቹ ደግሞ እስከ አንድ ቢሊዮን ብር ያስወጣሉ ተብሏል፡፡

ግዥው ከተፈጸመ በኋላ ታብሌቶቹ በአውሮፕላን ተጓጉዘው የሚገቡ ሲሆን፣ የሕዝብ ቆጠራው ከተደረገ በኋላ ደግሞ ለሌሎች ተመሳሳይ ቆጠራዎች ይውላሉ፡፡ ለደኅንነትም ሲባል ባትሪያቸው እስከ 30 በመቶ ብቻ እንዲሞላ ይደረጋል፡፡

ኤጀንሲው ለዋናው የሕዝብ ቆጠራ ዝግጅት እንዲረዳው ባለፈው ዓመት የሙከራ ቆጠራ አድርጓል፡፡ በዚህም 220 የሚሆኑ የተመረጡ ቦታዎች በታብሌት ኮምፒዩተሮች የታገዘ ቆጠራ ተደርጎላቸዋል፡፡

በኅዳር 2010 ዓ.ም. ይደረጋል ተብሎ ለሚጠበቀው ብሔራዊ ቆጠራ ኮሚሽን መቋቋሙ ይታወሳል፡፡ አገሪቱ ከዚህ በፊት የመጨረሻውንና ሦስተኛውን ቆጠራ በ1999 ዓ.ም. አድርጋለች፡፡ በዚህም ቆጠራ የኢትዮጵያ ሕዝብ ቁጥር 73.8 ሚሊዮን መድረሱ ይታወሳል፡፡ አሁን ባለው መረጃ መሠረት ደግሞ 100 ሚሊዮን ይጠጋል እየተባለ ነው፡፡

 

 

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች