Monday, November 28, 2022
ሌሎች ዓምዶች
    - Advertisement -
    - Advertisement -
    ዜናበቤንሻንጉል ጉሙዝ ክልል በተቀሰቀሰው ግጭት ስምንት ሰዎች እንደ ሞቱ ክልሉ አስታወቀ

    በቤንሻንጉል ጉሙዝ ክልል በተቀሰቀሰው ግጭት ስምንት ሰዎች እንደ ሞቱ ክልሉ አስታወቀ

    ቀን:

    • ሌሎች ምንጮች ቁጥሩን ከፍ አድርገዋል

    ሐሙስ ጥቅምት 16 ቀን 2010 ዓ.ም. በቤንሻንጉል ጉሙዝ ከማሺ ዞን ሃሮ ዴዴሳ ቀበሌ በተነሳው ግጭት ስምንት ሰዎች መሞታቸውን ክልሉ አስታወቀ፡፡

    የቤንሻንጉል ጉሙዝ ክልል ኮሙዩኒኬሽን ቢሮ ኃላፊ አቶ መንግሥቱ ቴሶ የሟቾች ቁጥር ስምንት ብቻ እንደሆነ ተናግረዋል፡፡ ስምንት ሰዎች ደግሞ ጉዳት ደርሶባቸው በሕክምና ላይ እንደሚገኙ ለሪፖርተር ገልጸዋል፡፡

    ቁጥራቸው በውል የማይታወቁ ዜጎች ደግሞ ግጭቱን በመፍራት በየቤተ እምነቶች ተጠልለው እንደሚገኙ አቶ መንግሥቱ አክለዋል፡፡

    እንደ አቶ መንግሥቱ ገለጻ ግጭቱ የተቀሰቀሰው በአማራና በቤንሻንጉል ጉሙዝ ተወላጆች መካከል ነው፡፡ ‹‹አንድ ግለሰብ በሌላ ሰው አማካይነት ሕይወቱ ስለጠፋ ቀብሩ ከተፈጸመ በኋላ፣ ቤተሰቦቹና ዘመዶቹ በደም ፍላት ተነሳስተው በግለሰቡ ቤተሰቦች ላይ ጉዳት ለማድረስ ተንቀሳቅሰዋል፤›› ብለዋል፡፡

    በዚህም የተነሳ ስምንት ሰዎች ሕይወታቸው እንዳለፈ ተናግረዋል፡፡ በግጭቱ በዋናነት ተጎጂ የነበሩት የአማራ ብሔር ተወላጆች እንደነበሩ ለማወቅ ተችሏል፡፡

    ሌሎች ምንጮች ግን የሟቾች ቁጥር አሥር እንደሆነ ይገልጻሉ፡፡ አንድ ታማኝ የሪፖርተር ምንጭ 80 ቤቶች ሙሉ በሙሉ መቃጠላቸውንና ከፍተኛ የድብደባ ጉዳት የደረሰባቸው አሥራ ሁለት ግለሰቦች በነቀምት ሆስፒታል በሕክምና ላይ እንደሚገኙ ገልጸዋል፡፡ በግጭቱ ከ200 በላይ ነዋሪዎች መፈናቀላቸውንም ጠቁመዋል፡፡

    አቶ መንግሥቱ ግጭቱ ብሔር ተኮር አይደለም ቢሉም፣ ግጭቱ ተቀስቅሶ የነበረው በአማራና በጉሙዝ ብሔረሰብ መካከል እንደነበር መረጃዎች ጠቁመዋል፡፡

    በ2006 ዓ.ም. በሺዎች የሚቆጠሩ የአማራ ብሔር ተወላጆች ከጉሙዝ ብሔረሰብ ጋር ተፈጥሮ በነበረ ብሔር ተኮር ግጭት፣ ወደ ክልላቸው ተመልሰው እንደነበር ይታወሳል፡፡

    በግጭቱ ጉዳት የደረሰባቸውን የአማራ ብሔር ተወላጆች ሁኔታ ለማየትና እገዛ ለማድረግ የክልሉ መንግሥት ከፍተኛ አመራሮች ቡድን ወደ ሥፍራው አቅንቶ እንደነበር የሪፖርተር ምንጮች ጠቁመዋል፡፡ አምስት ሰዎችን እንደያዘ የተገለጸው የክልሉ ልዑካን ቡድን ጉዳት የደረሰባቸውና የተፈናቀሉ ዜጎችን ከመጎብኘት በተጨማሪ፣ ከተጎጂዎች ጋር ውይይት ማድረጉ ታውቋል፡፡

    በውይይቱ ወቅትም የአማራ ክልል መንግሥት ጉዳት የደረሰባቸውንና ንብረታቸው የተቃጠለባቸውን ዜጎች እንዲያቋቁም ጥያቄ እንደቀረበለት ተገልጿል፡፡

    በግጭቱ የተጎዱ ዜጎች በአብዛኛው ከምዕራብ ጎጃም አካባቢ የሄዱና በሥፍራው ለረዥም ዓመታት የኖሩ በመሆናቸው ከጉሙዝ ብሔረሰብ ጋር በፍቅር ይኖሩ እንደነበር ተጠቁሟል፡፡

    አቶ መንግሥቱ በአሁኑ ወቅት መረጋጋት መፈጠሩን ቢናገሩም፣ ሌሎች ሥፍራዎች የተጠለሉ ግን ወደ ቀዬአቸው እንዳልተመለሱ ታውቋል፡፡

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...