Wednesday, February 1, 2023
- ማስታወቂያ -
- ማስታወቂያ -

ራያ ቢራ የምርት አቅሙን በ25 በመቶ ሊያሳድግ ነው

- ማስታወቂያ -

ተዛማጅ ፅሁፎች

ራያ ቢራ አክሲዮን ማኅበር አሁን ያለውን 600,000 ሔክቶ ሊትር የማምረት አቅም በ25 በመቶ ለማሳደግ የሚያስችለውን የመጀመሪያ ደረጃ የማስፋፊያ ፕሮጀክት ጀመረ፡፡ ለዚህ የማስፋፊያ ፕሮጀክት ድርጅቱ 75 ሚሊዮን ብር መድቧል፡፡

ይህ በእንዲህ እንዳለ ድርጅቱ ለመጀመርያው ረድፍ ማስፋፊያ የሚሆኑትን የዕቃ ግዢዎች፣ ለቢራ ምርት የሚሆኑ ዕቃዎችን በማቅረብ ከሚታወቀው ከቻይናው ድርጅት ከሌሁይ ግሩፕ ታዟል፡፡ ሌሁይ ተገጣጣሚ የቢራ ማጠራቀሚያ ጋኖችን ያቀርባል፡፡

ከዚህም በተጨማሪ ሌሁይ ዕቃዎቹን የመግጠምና ወደ ሥራ የማስገባትን ኃላፊነትን ይወጣል፡፡

አሁን ባለው አቅም የራያ የቢራ ማጠራቀሚያ ጋኖች 18,000 ሔክቶ ሊትር የመሸከም አቅም አላቸው፡፡ አዲሱ የማስፋፊያ ፕሮጀክት ተጨማሪ 6,000 ሔክቶ ሊትር አቅም ይፈጥራል፡፡

ራያ ቢራ ወደ ምርት ከገባ ሁለት ዓመታት የሞሉት ሲሆን፣ አሁን ባለው አቅም በትግራይ ክልልና በሰሜን አማራ አንዳንድ አካባቢዎች እንዲሁም በአፋር ክልል ተቀባይነትን ከጊዜ ወደ ጊዜ እያገኘ እንደመጣ የራያ ቢራ ዋና ሥራ አስኪያጅ አቶ ተወልደ አስፋው ይናገራሉ፡፡

አሁን ባለው የምርት አቅም ራያ ቢራ ምርቱን ወደ ሌላ አካባቢዎች ተደራሽ ለማድረግ እንደወሰነ ዋና ሥራ አስኪያጁ አክለዋል፡፡ ነገር ግን አዲሱ የማስፋፊያ ፕሮጀክት ድርጅቱ የምርቱን አቅርቦት በመላ አገሪቷ እንዲያዳርስ እንደሚያስችለው ጠቁመዋል፡፡

አሁን ባለው አቅም ራያ ቢራ ምርቶቹን ወደ እስራኤል እየላከ ነው፡፡ ከሰባት ዓመታት በፊት በ58 መሥራች ባለአክሲዮኖች የተቋቋመው ራያ ቢራ በአሁኑ ጊዜ 2,441 የሚሆኑ ባለአክሲዮኖች አሉት፡፡ ራያ ቢራ በቀድሞው የኢትዮጵያ መከላከያ ሠራዊት ጠቅላይ ኤታ ማዦር ሹም ሌተና ጄኔራል ፃድቃን ገብረ ትንሳዔ የቦርድ ሰብሳቢነት ይመራል፡፡

የራያ ቢራ ፋብሪካ ከአዲስ አበባ በ662 ኪሎ ሜትር ርቃ በምትገኘው በታሪካዊዋ በማይጨው ከተማ አቅራቢያ ይገኛል፡፡

ባለፈው ዓመት 104 ሚሊዮን ብር ኪሳራ ያስመዘገበው ራያ ቢራ፣ በተመሳሳይ ጊዜ በሦስት እጥፍ ያደገ ወደ ግማሽ ቢሊዮን ብር ገደማ ሽያጭ መፈጸሙ ይታወሳል፡፡

በተመሳሳይ በባለፈው ዓመት ለባለአክሲዮኖች ባቀረበው የፋይናንስ ሪፖርት ምርቶቹን እንደ አዲስ አበባ ላሉ ትልልቅ ገበያዎች ለማቅረብ እጥረት እንዳለበት ገልጾ ነበር፡፡

የማስፋፊያ ፕሮጀክቱ በሁለት ዙር የሚደረግ ሲሆን፣ ከሁለተኛው ዙር ጋር ራያ ቢራ የማምረት አቅሙን በዓመት ወደ 1.3 ሚሊዮን ሔክቶ ሊትር ያሳድጋል፡፡ የመጀመርያው ዙር የማስፋፊያ ፕሮጀክት ከአራት እስከ ስድስት ወራት ባሉ ጊዜያት ጊዜ ውስጥ እንደሚጠናቀቅ ይጠበቃል፡፡

የመጀመርያው ዙር ማስፋፊያ በድርጅቱ የራስ አቅም እንደሚደረግና ለቀጣዩ ዙር ደግሞ የፋይናንስ አቅርቦት ከአበዳሪዎች ይጠየቃል ተብሏል፡፡ ባለፈው ዓመት የፋይናንስ ሪፖርት መሠረት የድርጅቱ የረዥም ጊዜ የብድር ጣሪያ 815.14 ሚሊዮን ብር እንደደረሰ ይታወሳል፡፡

ከዚህም ጋር በተያያዘ የራያ ቢራ አጠቃላይ የሀብት መጠን 1.607 ቢሊዮን ብር እንደደረሰ ሪፖርቱ ያሳያል፡፡ ከዚህም ውስጥ ወደ 1.295 ቢሊዮን ብር የሚሆነው በንብረት፣ ለምርት አስፈላጊ የሆኑ ዕቃዎችና በሊዝ መሬት ላይ ፈሰስ ተደርጓል፡፡

በአሁኑ ጊዜ የኢትዮጵያ የቢራ ኢንዱስትሪ በፍጥነት በማደግ ላይ ይገኛል፡፡ ባለፉት አምስት ዓመታት አዳዲስ ፋብሪካዎች ኢንዱስትሪውን መቀላቀላቸው እንደ ማሳያ መጥቀስ ይቻላል፡፡

በዚህ ዓመት እንኳን ዘቢዳር ቢራ ወደ ገበያ መግባቱ ይታወሳል፡፡ ይኼ ፋብሪካ ለኢትዮጵያ ሰባተኛው የቢራ አምራች ሲሆን፣ 350,000 ሔክቶ ሊትር በዓመት የማምረት አቅም አለው፡፡

ከዚህም በተጨማሪ እንደ ዳሸን ቢራ፣ ሜታ ቢራ እንዲሁም ሐይኒከን ቢራን የመሳሰሉ ድርጅቶች የማስፋፊያ ሥራ አከናውነዋል፡፡

በአሁኑ ወቅት የአገሪቷ አጠቃላይ የማምረት አቅም በዓመት 12 ሚሊዮን ሔክቶ ሊትር ደርሷል፡፡ ራያ ቢራ ከጀመረው የማስፋፊያ ፕሮጀክት ጋር 12.7 ሚሊዮን ሔክቶ ሊትር ይደርሳል፡፡

ከዚህ ጋር ተያይዞ የነፍስ ወከፍ የቢራ ፍጆታ አድጓል፡፡ ከአራት ዓመታት በፊት አማካይ የግለሰብ ዓመታዊ የፍጆታ መጠን አምስት ሊትር የነበረ ሲሆን፣ አሁን ግን ስምንት ሊትር ደርሷል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች