Sunday, June 16, 2024
- ማስታወቂያ -
- ማስታወቂያ -

በመጨረሻ ምዕራፍ ላይ ያለው ሐበሻ ቢራ

spot_img

ተዛማጅ ፅሁፎች

ከአዲስ አበባ በ125 ኪሎ ሜትር ርቀት ላይ የምትገኘው ደብረ ብርሃን ከተማ ከሌሎች የክልል ከተሞች በተለየ የሁለት የቢራ ፋብሪካዎች እየተገነቡባት ትገኛለች፡፡ ከተማዋን ከመረጡ ሁለት የቢራ ፋብሪካዎች መካከል አንዱ የአገሪቱን የቢራ ገበያ ለመቀላቀል እየተዘጋጀ ያለው ሐበሻ ቢራ ፋብሪካ ነው፡፡ ሌላው በኢንዱስትሪው ከአሥር ዓመታት በላይ የቆየው የዳሸን ቢራ ሲሆን፣ እሱም በተመሳሳይ የፋብሪካ ግንባታውን በማጠናቀቅ ላይ ይገኛል፡፡ 8,000 ባለአክሲዮኖችን የያዘው ሐበሻ ቢራ አክሲዮን ማኅበር የአገሪቱን የቢራ ገበያ ለመቀላቀል እንቅስቃሴ ከጀመረ ከአራት ዓመታት በላይ ተቆጥሯል፡፡ አክሲዮን በመሸጥና ለኢንቨስትመንቱ የሚያስፈልገውን ተጨማሪ ካፒታል በማሰባሰብ ወደ ፋብሪካ ግንባታ ሥራ ከገባ ደግሞ ሁለት ዓመታት ተቆጥረዋል፡፡ የፕሮጀክቱ ግንባታ ቢዘገይም በአሁኑ ወቅት ፋብሪካው ወደ ሥራ ለመግባት የሚያስችለውን አብዛኛውን ሥራ ለማጠናቀቁ የፕሮጀክቱ የምሕንድስና ዘርፍ ኃላፊ አቶ ዓብይ በቀለ ይገልጻሉ፡፡ በአሁኑ ወቅት የፋብሪካው አብዛኛው የኮንስትራክሽንና የማሽነሪ ተከላ ሥራ በመጠናቀቅ ላይ በመሆኑ ከሦስት ወራት በኋላ ወደ ሥራ ይገባል ተብሏል፡፡ በአክሲዮን ማኅበሩ ከፍተኛ ባለርድርሻ በሆነው በሆላንዱ ባቫሪያ ኩባንያ ተወካይና የፕሮጀክቱ ኃላፊ ቶማስ ስዊንክልስ ገለጻ መሠረት፣ የፋብሪካው የግንባታ ሥራ 88 ከመቶ፣ የማሽነሪ ተከላዎቹ ደግሞ 90 ከመቶ ያህል ተጠናቋል፡፡ አቶ ዓብይ እንደገለጹት፣ ለፋብሪካው ግንባታ የሚያስፈልጉት ማሽነሪዎች በተገቢው የጥራት ደረጃ የተተከሉ ናቸው፡፡ ማሽነሪዎቹ የጥራት ደረጃቸው በአዲንዱስትሪው ቀዳሚ ተብለው ከሚታወቁት ውስጥ የሚመደቡ መሆናቸውንም ጠቅሰዋል፡፡ ፋብሪካው የደረሰበት የግንባታ ደረጃ ወደ ማጠናቀቂያው በመድረሱ፣ ሚያዝያ 2007 ዓ.ም. ቢራ የማምረት ሥራውን ይጀምራል የሚል እምነት እንዳላቸውም የፕሮጀክቱ ኃላፊዎች ገልጸዋል፡፡ ፋብሪካው ወደ ሥራ ሲገባ በመጀመርያው የምርት ዘመን 300 ሺሕ ሔክቶ ሊትር የማምረት አቅም ይኖረዋል፡፡ ሆኖም ምርቱን ወደ 500 ሺሕ ሔክቶ ሊትር ለማሳደግ አቅም እንደሚኖረው ያስረዱት ሚስተር ቶማስ፣ በቀጣዩ ዓመት የማስፋፊያ ሥራ ማከናወን ይጀመራል ብለዋል፡፡ በአሁኑ ወቅት ካሉት የቢራ ፋብሪካዎችና ወደ ማምረት ሥራ ለመግባት ዝግጅት እያረጉ ካሉ ፋብሪካዎች በተለየ ሐበሻ ቢራ በፋብሪካ ጠርሙስ የታሸገ ቢራ ብቻ የሚያመርት ይሆናል፡፡ በሌላ አገላለጽ ተጨማሪ ኢንቨስትመንት እስከሚያካሂድ ድራፍት ቢራ አያመርትም ማለት ነው፡፡ ኩባንያው ወደ ድራፍት ቢራ ምርት የሚያመራው የተያዘው የጠርሙስ ቢራ ምርቱን ለገበያ ካቀረበ በኋላ የሚያካሄደውን ተጨማሪ የማስፋፊያ ፕሮጀክት ግንባታ ካጠናቀቀ በኋላ ነው፡፡ የፋብሪካው ግንባታም በቀጣይ ማስፋፊያ ሥራ ለማከናወን በሚያመች መንገድ ዲዛይኑ ተሠርቷል፡፡ እንደ ኩባንያው ኃላፊዎች ገለጻ፣ ለደብረ ብርሃኑ ፋብሪካ ግንባታ እስካሁን ከ1.2 ቢሊዮን ብር በላይ ወጪ ተደርጓል፡፡ አጠቃይ የግንባታ ወጪው ግን 1.4 ቢሊዮን ብር እንደሚፈጅ ተገልጿል፡፡ በአጠቃላይ ከባለአክሲዮኖች ከተሰበሰበው ካፒታል ሌላ የኢትዮጵያ ንግድ ባንክ 377 ሚሊዮን ብር ብድር ፈቅዶለታል፡፡ የኩባንያውን ካፒታል ወደ 550 ሚሊዮን ብር በማሳደግም ተጨማሪ አክሲዮኖችን ሊሸጥ ችሏል፡፡ አክሲዮን በመሸጥ በሰበሰቡት ካፒታል የቢራ ፋብሪካ ለመገንባት ሲንቀሳቀሱ የቆዩት ሦስት ቢራ ፋብሪካዎች ብልጫ ያለውን የአክሲዮን ድርሻ ለውጭ ኩባንያዎች መሸጣቸው ይታወሳል፡፡ የሐበሻ አክሲዮን ማኅበርንም የ49 ከመቶ የሚሆነውን የአክሲዮን ድርሻ የወሰደው ባቫሪያ ቢቨሬጅ የተባለው የሆላንድ ኩባንያ ነው፡፡ በዓለም አቀፍ ደረጃ በቢራና በሌሎች የመጠጥ ኢንዱስትሪዎች ውስጥ ከ300 ዓመታት በላይ ዕድሜ ያለው ባቫሪያ እስካሁን ከሐበሻ ቢራ የ17 ሚሊዮን ዶላር ዋጋ ያላቸው አክሲዮኖችን የገዛ ሲሆን፣ ይህ የአክሲዮን ድርሻውም ወደ 70 ከመቶ ሊያድግ ይችላል ተብሎ ይጠበቃል፡፡ በቢራ ጠመቃ ሥራ ውስጥ በተለይ በአውሮፓና በሌሎች አኅጉሮች ውስጥ ምርቱን በስፋት እያሰራጨ ነው የተባለው ባቫሪያ፣ አፍሪካ ውስጥ እንዲህ ባለ ደረጃ ኢንቨስት ሲያደርግ የመጀመርያው ስለመሆኑም ሚስተር ቶማስ ለሪፖርተር ገልጸዋል፡፡ በኢትዮጵያ ውስጥ ያለውን ገበያ በመመልከት ሐበሻ ቢራ ውስጥ ኢንቨስት ያደረጉ መሆኑን የገለጹት ሚስተር ቶማስ፣ በሐበሻ ቢራ አማካይነት ሊያመርቱ ያቀዱት የጠርሙስ ቢራ ጣዕም ገበያው ውስጥ በቀላሉ ለመግባት የሚያስችል የጥራት ደረጃ ያለው ስለመሆኑም ይናገራሉ፡፡ የሐበሻ ቢራ የፋብሪካ ግንባታ በዋናው ባለአክሲዮን ባቫሪያ ቢቨሬጅ መሪነት የሚካሄድ ሲሆን፣ የሲቪል ሥራውን፣ የታንከሮች ተከላና ተያያዥ ሥራዎችን የቻይናው ሊው ኩባንያ በማከናወን ላይ ይገኛል፡፡ የማማከር ሥራውን ደግሞ ቴክኖ ኤስፖርት ለተባለ የቼክ ሪፐብሊክ ኩባንያ ተሰጥቷል፡፡ ፋብሪካው ከተከላቸው የፋብሪካው ማሽነሪዎች ውስጥ 40 ከመቶው ከጀርመን የተገዛ ነው፡፡ ጥንስስ መጠንሰሻውንና የቢራ ማሸጊያ ማሽኖችን ጨምሮና ሌሎችም መሣሪያዎች ከጀርመን የተገዙ ናቸው፡፡ አጠቃላይ የማሽነሪ መረጣና ተከላዎችን በዚሁ አገልግሎት ዙሪያ የማማከር ሥራውን የወሰደውም የጀርመን ኩባንያ እንደሆነ ተገልጿል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች