Saturday, June 15, 2024
- ማስታወቂያ -
- ማስታወቂያ -

የአዲስ አበባ ቀላል ባቡር የቅድመ ሙከራ ትራንስፖርት ጀመረ

spot_img

ተዛማጅ ፅሁፎች

– ዋናው የሙከራ ፕሮግራም በመጪው እሑድ ይጀመራል

የአዲስ አበባ ቀላል ባቡር የሙከራ ትራንስፖርት ከቃሊቲ – ዴፖ – መስቀል አደባባይ ድረስ ባለው መስመር ላይ ቅድመ ሙከራ አገልግሎት ጀመረ፡፡ በአሁኑ ወቅት 19 ባቡሮች አገር ውስጥ የገቡ ሲሆን፣ የሙከራ ፕሮግራሙም ባቡሮቹንና የትራንስፖርት መስመሩን ማለትም ሐዲዶቹንና የኤሌክትሪክ መስመሮቹን ለመፈተሽ መሆኑን፣ ከኢትዮጵያ ምድር ባቡር ኮርፖሬሽን የተገኘው መረጃ ያመለክታል፡፡ እ.ኤ.አ. በጃንዋሪ መጨረሻ ሁሉም የግንባታ ሥራዎች የሚጠናቀቁ በመሆናቸው፣ የሙከራ ሥራው በሁሉም መስመሮች እንደሚከናወን ኮርፖሬሽኑ አስታውቋል፡፡ በአሁኑ ወቅት የቅድመ ሙከራ ሥራው በአንድ ባቡር ብቻ እያከናወነ የሚገኘው የትራንስፖርት አገልግሎቱን ለአምስት ዓመታት ለመስጠት የተዋዋለው ሲአርኢሲ ኤንድ ሸንዘን ሜትር ግሩፕ የተባሉት የሁለት ኩባንያዎች ጥምረት መሆኑን ለማወቅ ተችሏል፡፡ ዋናው የሙከራ ፕሮግራም የመንግሥት ባለሥልጣናት፣ ከተለያዩ የኅብረተሰብ ክፍሎች የተውጣጡ ግለሰቦችና ታዋቂ ሰዎች በሚገኙበት በመጪው እሑድ በይፋ ይጀመራል፡፡ የባቡር ትራንስፖርት መስመሩ ውስጥ ሰዎችም ሆኑ እንስሳት እንዳይገኙ ከቃሊቲ እስከ መስቀል አደባባይ ያለው መስመር የታጠረ ቢሆንም፣ ሰዎች ግን አጥሩን ዘለው ሲተላለፉ ተስተውለዋል፡፡ በሙከራ መስመሩ ላይ የኤሌክትሪክ ኃይል የተለቀቀ በመሆኑ ማቋረጥ እንደማይቻል ማስጠንቀቂያ የተላለፈ ቢሆንም፣ አሁንም ሰዎች እየተላለፉ በመሆናቸው በሙከራ ወቅት መስመሩ ውስጥ እንዳይገቡና በተገቢው መሸጋገሪያ እንዲተላለፉ ኮርፖሬሽኑ አሳስቧል፡፡ የእነዚህ ኩባንያዎች ጥምረት በ118 ሚሊዮን ዶላር ለአምስት ዓመታት የባቡር ትራንስፖርትና የጥገና አገልግሎቱን ለመስጠት መስማማቱን መዘገባችን ይታወሳል፡፡ በመጀመሪያዎቹ ሦስት ዓመታት ቻይናውያን የባቡር አሽከርካሪዎች፣ የጥገናና የሲግናሊንግ ሠራተኞች ሙሉ በሙሉ በኢትዮጵያን የሚተኩ ሲሆን፣ በቀሪዎቹ ሁለት ዓመታት የኩባንያው ሚና የማማከርና ቴክኖሎጂዎችን ማቅረብ ይሆናል ተብሏል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች