Saturday, November 26, 2022
ሌሎች ዓምዶች
    - ማስታወቂያ -
    - ማስታወቂያ -

    አነስተኛና መለስተኛ ሙያተኞች ጊዜያዊ ፈቃድ ሳይሰጣቸው ሥራ እንዳያገኙ ሰርኩላር ተላለፈ

    - ማስታወቂያ -

    ተዛማጅ ፅሁፎች

    አነስተኛና መለስተኛ ሙያ ባለቤት የሆኑ ግለሰቦች የሙያ ምዘና ምዝገባ ሳያካሂዱ ሥራ እንዳይሰጣቸው ሰርኩላር ተላለፈ፡፡

    የከተማ ልማት፣ ቤቶችና ኮንስትራክሽን ሚኒስትሩ አቶ መኩሪያ ኃይሌ ሰሞኑን ለኮንትራክተሮችና አርክቴክቶች ባስተላለፉት ሰርኩላር የአነስተኛና መለስተኛ ሙያ ባለቤት የሆኑ አናፂዎች፣ ግንበኞች፣ ቀለም ቀቢዎች፣ የአርማታ ብረት ሠራተኞች፣ የኤሌክትሪክና ባንቧ ሠራተኞች፣ የፕሮጀክት ተቆጣጣሪዎች (ፎርማን) ተመዝግበው ጊዜያዊ የሥራ ፈቃድ ካልተሰጣቸው በስተቀር ሥራ እንዳይሰጣቸው አዘዋል፡፡ አቶ መኩሪያ ያስተላለፉት ሰርኩላር እንደሚያመልከተው፣ የኮንስትራክሽን ኢንዱስትሪው በፈጣን ሁኔታ በማደግ ላይ ይገኛል፡፡ ይሁን እንጂ የኢንዱስትሪው ዕድገት ከጊዜ ወደ ጊዜ እየጨመረ የመጣ ቢሆንም፣ በኢንዱስትሪው ውስጥ የሚታዩ መሠረታዊ ችግሮች መፍታት አልተቻለም ብለዋል፡፡

    በዘርፉ ውስጥ  ከሚታዩ ችግሮች አንዱ በሙያው በቂ ዕውቀትና ክህሎት ያለው አነስተኛና መለስተኛ ባለሙያ አለመኖሩ እንደሆነ ተጠቁሟል፡፡ የኢንዱስትሪው ውጤቶች የሆኑ ግንባታዎች የጥራት ደረጃቸው ዝቅተኛ ደረጃ ላይ እንደሚገኝ የሚኒስትሩ ሰርኩላር  አብራርቷል፡፡ ይህንን ችግር ለመፍታት ሚኒስቴሩ የአነስተኛና መለስተኛ ባለሙያዎችን ክህሎትና ብቃት በሙያ ምዘና ለማረጋገጥ መመርያ አውጥቶ፣ ለሁለቱ ከተሞች (ድሬዳዋና አዲስ አበባ) እንዲሁም ለዘጠኙ ክልሎች አስተላልፏል፡፡ ‹‹ሆኖም እስካሁን በታየው የቅድመ ምዘና ምዝገባ አፈጻጸም፣ የተያዘውን የአምስት ዓመት ዕቅድ ማሳካት የሚያስችል አይደለም፤›› ይላል የሚኒስትሩ ሰርኩላር፡፡

    ይህ ችግር መስተካከል ስላለበት ከመጋቢት 1 ቀን 2007 ዓ.ም. ጀምሮ የቅድመ ምዘና ምዝገባ ያላደረገና ጊዜያዊ የሥራ ፈቃድ ያልያዘ አነስተኛና መለስተኛ ባለሙያ በማንኛውም የግንባታ ሥራ ላይ መሳተፍ እንደማይቻል የአቶ መኩሪያ ሰርኩላር ትዕዛዝ አስተላልፏል፡፡ አቶ መኩሪያ ሰርኩላር ያስተላለፉት እነዚህን አነስተኛና መለስተኛ ሙያተኞች ቀጥረው ለሚያሠሩት ስድስት ተቋማት ነው፡፡ እነሱም የኢትዮጵያ ኮንስትራክሽን ሥራ ተቋራጭ፣ ደረጃ አንድ ሥራ ተቋራጮች፣ የኢትዮጵያ ሲቪል መሐንዲሶች፣ የኢትዮጵያ አማካሪ አርክቴክቶችና መሐንዲሶች፣ የኢትዮጵያ ሲቪል መሐንዲሶችና ኮንስትራክሽን ቴክኖሎጂ ማኔጅመንት ባለሙያዎች፣ የኢትዮጵያ አርክቴክቶች ያቋቋማቸው ማኅበራት ናቸው፡፡

    የከተማ ልማት፣ ቤቶችና ኮንስትራክሽን ሚኒስቴር የኮንስትራክሽን ኢንዱስትሪ ቢሮ ኃላፊ አቶ ሴፉ ገብረ ሚካኤል ለሪፖርተር እንደገለጹት፣ እስካሁን አምስት ሺሕ አነስተኛና መለስተኛ ባለሙያዎች ምዝገባ አካሂደው ጊዜያዊ ፈቃድ ወስደዋል፡፡ ይህንን ቁጥር ወደ አምስት ሺሕ ለማሳደግ ሚኒስቴሩ ዕቅድ መያዙን ገልጸዋል፡፡ ነገር ግን እነዚህ አነስተኛና መለስተኛ ባለሙያዎች ምዝገባ አካሂደው ጊዜያዊ ፈቃድ ቢሰጣቸው እንኳ፣ የመንግሥት ተቋማት የሙያ ምዘና አካሂደው ቋሚ ፈቃድ ለመስጠት የራሳቸው ችግር እንዳለባቸው ታውቋል፡፡ ከተወሰኑ አነስተኛና መለስተኛ ሙያ ዘርፎች ውጪ በኢትዮጵያ የሚገኙ አብዛኛዎቹ ሙያተኞች በልምድ የሚሠሩ መሆናቸው ይታወቃል፡፡

     

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች