Thursday, December 1, 2022
ሌሎች ዓምዶች
    - ማስታወቂያ -
    - ማስታወቂያ -

    ተግዳሮት ውስጥ የሚገኘው የአበባ ንግድ

    - ማስታወቂያ -

    ተዛማጅ ፅሁፎች

    የአውሮፓውያኑ የጋራ መገበያያ ገንዘብ ዩሮና የሩስያው ሩብል በመግዛት አቅማቸው እየተዳከሙ በመምጣታቸው ሳቢያ በዓለም አቀፍ ደረጃ የአበባ የወጪ ንግድ ላይ ተፅዕኖ ቢያሳርፍም እንደ ኢትዮጵያና ኬንያ ያሉ አበባ ላኪዎች ተጠቃሚ ሊሆኑ የሚችሉት ዕድል እንዳለ ተጠቆመ፡፡

    የኢትዮጵያ አበባ አትክልትና ፍራፍሬ አምራችና ላኪዎች ማኅበር በቅርቡ የሚያካሂደውን ስድስተኛውን ‹‹ሆርቲ ኢትዮጵያ 2015›› የንግድ ትርዒት አስመልክቶ በሰጠው ጋዜጣዊ መግለጫ ላይ እንደገለጸው፣ የዩሮና የሩብል መውረድ የአበባ ላኪ አገሮችን እየፈተነ ነው፡፡ የንግድ ትርዒቱን ከማኅበሩ ጋር በመተባበር የሚያዘጋጀው ኤችፒፒ ኢንተርናሽናል ኤግዚቢሽንስ ኩባንያ ፕሬዚዳንት ሚስተር ሰክሰን ዋይማርለን እንደገለጹት፣ በአሁኑ ወቅት የአውሮፓ ገበያ ላይ አበባ ተግዳሮቶች እየገጠሙት ነው፡፡

    በተለይ በዩሮና በሩብል መውረድ ሳቢያ ገበያው ላይ ተፅዕኖ በመፈጠሩ በደቡብ አሜሪካና አውሮፓ የሚገኙ ኩባንያዎች በቢዝነሱ ውስጥ ለመቆየት ከባድ ሆኖባቸዋል ብለዋል፡፡ በገበያው መቀዛቀዝ ሳቢያ ኩባንያዎቹ ከፍተኛ ገቢ አጥተዋል በማለት፣ በአሁኑ ወቅት በዓለም አቀፍ ደረጃ የአበባ ገበያ እየገጠመው ነው ያሉትን ችግር አብራርተዋል፡፡

    ‹‹ሁሌም ቢሆን አንዱ ሲያጣ ሌላው ያገኛል፤›› ያሉት ሚ/ር ሳክሰን፣ ኢትዮጵያና ኬንያ ግን ከዚህ በተለየ ተጠቃሚ ሊሆኑ ይችላሉ የሚል እምነት አላቸው፡፡ በምሳሌነት የጠቀሱትም ሩስያ ገበያ የተለያዩ የአበባ አይነቶችን የምትፈልግ መሆንዋንና ኢትዮጵያ ደግሞ እነዚህን ተፈላጊ ምርቶች ማቅረብ መቻልዋ ነው፡፡ በተለይ ለሩስያ ገበያ ምርቶችን ለማቅረብ ከኳዶር የተሻለ ዕድል አላት ብለዋል፡፡ በትራንስፖርት ረገድም ኢትዮጵያ ለአውሮፓ ገበያ ቅርብ በመሆንኗ አትራፊ መሆን ትችላለች የሚል አመለካከት ያላቸው ሳክሰን፣ በተለይ የኢኳዶር አበባ አምራቾች ከሩስያ ገበያ መውጣት ለኢትዮጵያ መልካም ዕድል መሆኑን ገልጸዋል፡፡

    በሚቀጥለው ወር በአዲስ አበባ የሚከፈተው የንግድ ትርዒት የገበያ ዕድሎችን ለመፍጠር ከፍተኛ ዕድል እንደሚኖረውም ጠቁመዋል፡፡ ይህን ለማድረግ የሩስያ አበባ ገዥዎች በንግድ ትርዒቱ ላይ እንዲገኙ ማድረግ መቻላቸውንና በዚህ መነሻነትም  ከኢትዮጵያ አበባ ላኪዎች ጋር በመዋዋል ገበያውን ለማግኘት የሚቻልበት ሁኔታ እንደተመቻቸ አመልክተዋል፡፡

    በቅርቡ እየተሰማ ያለው መረጃ ግን የአበባ ላኪዎች ዩሮ ከአሜሪካ ዶላር ጋር ሲነጻጸር የመግዛት አቅሙ እየቀነሰ በመምጣቱ፣ የኢትዮጵያ አበባ ላኪዎች ገበያቸው እየቀነሰ ነው መባሉን ነው፡፡ እንደውም ጉዳዩ አሳሳቢ በመሆኑ በአፋጣኝ ሊታይ ይገባል ተብሎ ነበር፡፡

    ይሁን እንጅ እንደ ሚስተር ሳክሰን እምነት ችግሩ ቢኖርም መፍትሔ  አለው ይላሉ፡፡ አማራጭ ገበያዎችን መመልከት አንዱ ሲሆን፣ እንዲህ ያሉ የንግድ ትርዒቶችም የራሳቸውን ሚና የሚጫወቱ መሆኑን ሌላው መፍትሔ ነው፡፡ ለስድስተኛ ጊዜ የሚካሄደው ኢንተርናሽናል የፎሎሪካልቸር እና ሆርቲካልቸር የንግድ ትርዒት ከመጋቢት 16 እስከ መጋቢት 18 ቀን 2007 ዓ.ም. ለሦስት ቀናት በሚሊኒየም አዳራሽ የሚካሄድ ነው፡፡ እንደ ንግድ ትርዒቱ አዘጋጆች ገለጻ፣ የንግድ ትርዒቱ ዋና ዓላማ የኢትዮጵያን የሆርቲካልቸር ምርቶች በዓለም ገበያ የበለጠ ተመራጭ እንዲሆኑ ለማድረግ ሲሆን፣ ከዚህም አገሪቱ ለሆርቲካልቸር ኢንቨስትመንት ተመራጭ ቦታ እንደሆነች ለማስተዋወቅ የሚረዳ በመሆኑ ለዘርፉ ዕድገት ጠቀሜታ ይኖረዋል፡፡

    ማኅበሩ በሁለት ዓመት አንድ ጊዜ የሚያዘጋጀው ዓለም አቀፍ የንግድ ትርዒትን በትብብር የሚያዘጋጀው ኤችፒፒ ኢንተርናሽናል ኤግዚቢሽንስ ግሩፕ ከተባለ ኩባንያ ጋር ነው፡፡ የንግድ ትርዒቱ የኢትዮጵያ አበባ አምራችና ላኪዎች ሰፊ ገበያ እንዲያገኙ የሚያስችል መሆኑን የገለፀው ማኅበሩ ከመላው ዓለም የተውጣጡ ገዥዎችን ቀልብ የሚስብ ይሆናል ብሏል፡፡

    ማኅበሩ በመግለጫው ወቅት የንግድ ትርዒቱ በሆርቲካልቸር ኢንዱስትሪ ዘርፍ ተሳታፊ የሆኑ ኩባንያዎችን የሚያሰባስብ ተመራጭ ፕሮግራም እየሆነ መምጣቱን ጠቁሟል፡፡ ኢትዮጵያ የአገር ውስጥና የውጪ ኢንቨስትመንት በመሳብ በአበባ፣ በአትክልትና ፍራፍሬ አምራችነት የታወቁት ኩባንያዎች ተሳታፊ እንዲሆኑ በማድረግ ላይ እንደሆነች በማለት መግለጫው ጠቁሞ፣ በዘርፉ የአገሪቱ የኤክስፖርት ብቃት ባለፉት ሁለት ዓመታት ዕድገት ማሳየቱን አስታውቋል፡፡

    በአሁኑ ወቅት ኢትዮጵያ ከአፍሪካ አገሮች መካከል ከኬንያ ቀጥላ ሁለተኛዋ የአበባ ላኪ አገር ስትሆን፣ ለዘርፉ አመቺ ፖሊሲ መዘርጋቱ ለተገኘው ዕድገት የራሱን አስተዋጽኦ አበርክቷል ተብሏል፡፡

    ከዚህም በተጨማሪ፣ ኢትዮጵያ የአበባ ምርትን ለዓለም አቀፍ ገበያ በተለይ ለአውሮፓና ለመካከለኛው ምሥራቅ አገሮች ለማቅረብ በአመቺ መልከዓ ምድር ላይ መገኘትዋ በዘርፉ በዓለም ገበያ ላይ ለመወዳደር ተመራጭ እንድትሆን ማስቻሉንም የማኅበሩ መግለጫ አመልክቷል፡፡

    የሆቲካልቸር ዘርፍ ለአገሪቱ ከፍተኛ የውጪ ምንዛሪ ከሚያስገኙ የወጪ ንግዶች በአምስተኛ ደረጃ ላይ ይገኛል፡፡ በቀጣይም ለአገሪቱ ከፍተኛ ገቢ ሊያስገኙ የሚያስችሉ የማስፋፊያ ፕሮጀክቶች እየተካሄዱ መሆኑን የጠቆመው ማኅበሩ፣ መጠነ ሰፊ የውጪ ኢንቨስትመንት የሚያመጣበት ሁኔታ እየተመቻቸ ነው ብሏል፡፡

    በጋዜጣዊ መግለጫው ላይ የተገኙት የማኅበሩ የቦርድ ሊቀመንበር አቶ ዘላለም መሰለ እንደገለጹት፣ የሆቲካልቸር ዘርፉን ለማሳደግ የማስፋፊያ ሥራዎች እየተካሄዱ መሆኑንና በተለይ በዝዋይ ከተማ 300 ሄክታር ላይ የማስፋፊያ ሥራ እየተሠራ እንደሚገኝ ገልጸዋል፡፡ የዘንድሮው የንግድ ትርዒትም ከገዥዎች ባሻገር በዘርፉ የሚሰማሩ ተጨማሪ ኢንቨስተሮች እንዲመጡ ያስችላል ብለዋል፡፡

    በንግድ ትርዒቱ ገዥዎች፣ አምራቾች፣ ግብዓት አቅራቢዎች፣ አማካሪዎች፣ መንግሥታዊ ድርጅቶችና በዘርፉ የሚንቀሳቀሱ ሌሎች ኩባንያዎች በአንድ ቦታ የሚያሰባስብ ነው፡፡ ከዚህ ቀደም በተካሄዱት የንግድ ትርዒቶች ላይ ተሳታፊ ከነበሩ ኩባንያዎች ብልጫ ያላቸው የሚገኙበት ይሆናል ተብሏል፡፡

    በዘንድሮው የንግድ ትርዒት ላይ ከ100 በላይ ኩባንያዎች በንግድ ትርዒቱ ላይ ተሳታፊ እንደሚሆኑ ታውቋል፡፡ ከተካፋዮች መካከል የኬንያ፣ የቻይና፣ የቱርክ፣ የጀርመን፣ የስዊድን፣ የኔዘርላንድስ፣ የስፔን፣ የቤልጂየም፣ የመካከለኛው ምሥራቅና የሩቅ ምሥራቅ አገሮች ኩባንያዎች ይገኙበታል ተብሎ ይጠበቃል፡፡

    ከዚሁ ጋር በተያያዘ ዋና ዋና ገዥዎች ከጀርመን፣ ከሩሲያ፣ ከሲዊድንና የመካከለኛው ምሥራቅ ሲጠበቁ፣ ኩባንያዎች ከሌሎች አገሮች በጎብኝነት የሚሳተፉትም የኢትዮጵያ አምራቾችና ላኪዎች ሰፊ የገበያ ዕድል የሚፈጥሩበት መሆኑ ተጠቁሟል፡፡

    የሆርቲካልቸር ዘርፍ በየዓመቱ ከሩብ ቢሊየን ዶላር በላይ ገቢ የሚያስገኝ ከመሆኑም በላይ ሰፊ የሥራ ዕድል በመፍጠር ይጠቀሳል፡፡ በአሁኑ ወቅት ዘርፉ ከ183 ሺሕ በላይ ለሚሆኑ ዜጎች የሥራ ዕድል የፈጠረ ሲሆን፣ ከዚህ ውስጥ 85 ከመቶ የሚሆኑት ሴቶች ናቸው፡፡

    የኢትዮጵያን የአበባ ምርት ገዥ ከሆኑ አገሮች መካከል ኔዘርላንድስ፣ ጀርመን፣ ሳዑዲ አረቢያ፣ ኖርዌይ፣ ቤልጂየም፣ የተባበሩት ዓረብ ኢሚሬቶች፣ ጃፓን፣ አሜሪካና ፈረንሳይ ይጠቀሳሉ፡፡

    በተመሳሳይ ሶማሊያ፣ ጂቡቲ፣ ሱዳን፣ ኔዘርላንድስ፣ እንግሊዝ የተባበሩት ዓረብ ኢሚሬቶች፣ ጀርመን፣ ቤልጂየም፣ ሩስያና የመን በኢትዮጵያ የተመረቱ የፍራፍሬና የአትክልት ምርቶችን የሚገዙ አገሮች ናቸው፡፡

    ኢትዮጵያ ወደ ውጭ ከምትልከው አበባ ውስጥ 83 በመቶውን የምትገዛው ሆላንድ ነች፡፡ የአትክልትና የፍራፍሬ ምርቶችን በመቀበል ደግሞ ሶማሌላንድ ቀዳሚ ናት ለውጭ ገበያ ከሚቀርበው ምርት ውስጥ 56 በመቶውን ትረከባለች ተብሏል፡፡

    የኢትዮጵያ አበባ አትክልትና ፍራፍሬ አምራችና ላኪዎች ማኅበር እ.ኤ.አ በ2002 ዓ.ም. የተመሠረተ ሲሆን፣ በዘርፉ የተሰማሩ 110 ኩባንያዎችን በአባልነት ያቀፈ ነው፡፡

    በአሁኑ ወቅት በአበባ፣ ፍራፍሬ፣ አትክልትና በተያያዘ ምርቶች ላይ የተሰማሩ 116 ኢንቨስትመንቶች የተወሰኑ ሲሆን በአገር ውስጥ ኩባንያዎች 46 እርሻን በባለቤትነት ሲቆጣጠሩ፣ 61 እርሻዎች ደግሞ በውጪ ኩባንያዎች የእርሻ ቦታዎች ደግሞ በሽርክና የሚካሄዱ ናቸው፡፡ ከዚህ ጋር በተያያዘ በ1 ሺሕ 426 ሄክታር ላይ የሚካሄድ የአበባ ምርት ሲሆን፣ በፍራፍሬና በአትክልት ምርት የተያዘው ደግሞ 11ሺሕ 371 ሄክታር ይደርሳል፡፡               

     

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች