Tuesday, July 23, 2024
- ማስታወቂያ -
- ማስታወቂያ -

የንግድ ምክር ቤቱ ምርጫ ሐሙስ ይካሄዳል

ተዛማጅ ፅሁፎች

–  የምልዓተ ጉባዔው ጉዳይ ውዝግብ ይፈጥራል ተብሎ ተሰግቷል

በፍርድ ቤት ትዕዛዝ ዘጠነኛ መደበኛ ጉባዔውና በጉባዔው ላይ የተወሰኑ ውሳኔዎች የተሻሩበት የአዲስ አበባ ንግድና ዘርፍ ማኅበራት ምክር ቤት፣ መጋቢት 3 ቀን 2007 ዓ.ም. አዳዲስ አመራሮቹን ይመርጣል፡፡ 

ኅብረት ኢንሹራንስ ኩባንያ በመሠረተበት ክስ የተፈረደበት የአዲስ አበባ ንግድና ዘርፍ ማኅበራት ምክር ቤት፣ በዘጠነኛ መደበኛ ጉባዔ የተመረጡት አመራሮቹ በሐሙሱ ምርጫ በድጋሚ ዕጩ ተወዳዳሪዎች ሆነው ይቀርባሉ ተብሎ እየተጠበቀ ነው፡፡

እንደ ምንጮች ገለጻ ምርጫን እንዲያካሂድና የንግድ ምክር ቤቱን እንዲመራ የተቋቋመው ባላደራ ቦርድ የሰየመው የምርጫ አስተባባሪ፣ ለሐሙሱ ምርጫ ለመወዳደር በዕጩነት ከተጠቆሙት ውስጥ በተሻረው ዘጠነኛው መደበኛ ጉባዔ ላይ ተመርጠው የነበሩት አመራሮች ተካተዋል፡፡

በአቶ ኤልያስ ገነቴ ከሚመራው ቦርድ ውስጥ አብዛኛዎቹ በድጋሚ ለመመረጥ ከመጠቆማቸውም በላይ፣ አቶ ኤልያስ በድጋሚ ለፕሬዚዳንትነት ይወዳደራሉ ተብሏል፡፡ እንደ ምንጮች ገለጻ ከሆነ፣ በፍርድ ቤት የተሻረውን የቀድሞ አመራሮች በድጋሚ ለማስመረጥም ውስጥ ውስጡን ድጋፍ የማሰባሰብ ሥራ እየተሠራ ነው ተብሏል፡፡

በተለይ የዘርፍ ማኅበራት አባላት በጉባዔው ላይ በርከት ብለው በመምጣት ድምፅ እንዲሰጡ ዝግጅት ተደርጓል የሚሉት ምንጮች፣ ምርጫው አምና ከተስተዋለው የተለየ አይሆንም ይላሉ፡፡ በአምናው ምርጫ አብዛኛውን ድምፅ የሰጡት የዘርፍ ማኅበራት አባላት እንደነበሩ አይዘነጋም፡፡

ይህ በእንዲህ እንዳለ የንግድ ሚኒስትር ዴኤታ አቶ ዓሊ ሲራጅ የሚመራው የባላደራ ቦርድ የጠራው ጠቅላላ ጉባዔና የምርጫ ሒደቱ፣ አሁንም ሕገወጥ ሊሆን ይችላል የሚል ሥጋት አሳድሯል፡፡

በተለይ የነገው ምርጫ ሒደት አሁንም ሕግና ደንብን ያልተከተለ ሊሆን ይችላል የሚል ሥጋት ያላቸው ወገኖች፣ እንደ መከራከሪያ የሚያቀርቡት ደግሞ የጠቅላላ ጉባዔውን ምልዓተ ጉባዔ ምጣኔ ነው፡፡

የነገው ስብሰባ ንግድ ምክር ቤቱ ካሉት ከ14 ሺሕ በላይ አባላት ውስጥ 500+1 ከተገኙ ምልዓተ ጉባዔ እንደተሟላ ተደርጐ ይቆጠራል የሚባል ከሆነ ይህ ሕጋዊ ያልሆነ አሠራር በመሆኑ ተቀባይነት እንደማይኖረው አቶ ኢየሱስ ወርቅ ዛፉ ይናገራሉ፡፡

እርሳቸውና ኅብረት ኢንሹራንስ ኩባንያ ባቀረቡት ክስ ይህ የምልዓተ ጉባዔ ጉዳይ የሕግ ጥሰት ያለበት መሆኑን ተከራክረው ነበር፡፡ ጠቅላላ ጉባዔው በአዲሱ የንግድ ምክር ቤቶች ማቋቋሚያ አዋጅ መሠረት ሲሠራበት የቆየው በውክልና ሲሆን፣ ምልዓተ ጉባዔውን በ500 ሰዎች ብቻ መወሰን አግባብ እንዳልሆነም ያመለክታሉ፡፡ ይህ አሠራር ሕገወጥ ነው የሚሉት አቶ ኢየሱስ ወርቅ፣ የአሁኑ ስብሰባ በዚሁ መንገድ የሚካሄድ ከሆነ ሕገወጥ ነው ብለዋል፡፡

ውክልና በሌለበት 500+1 አባላት ከተገኙ ምልዓተ ጉባዔ ይሆናል የተባለው አካሄድ የሕዝብ ተወካዮች ምክር ቤት ያፀደቀውን አዋጅ የሚፃረር እንደሆነም በአፅንኦት ገልጸዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች