Saturday, September 24, 2022
ሌሎች ዓምዶች
    - ማስታወቂያ -
    - ማስታወቂያ -

    ኢትዮጵያና ቱርክ በመከላከያ ኢንዱስትሪ ዘርፍ ሊተባበሩ ነው

    - ማስታወቂያ -

    ተዛማጅ ፅሁፎች

    – በጋራ የተመረቱ የጦር መሣሪያዎችን ለሦስተኛ አገር መሸጥ ያስችላቸዋል

     ኢትዮጵያና ቱርክ  በመከላከያ ኢንዱስትሪ ዘርፍ መተባበር የሚያስችላቸውን ስምምነት ሊያፀድቁ ነው፡፡ ስምምነቱ የኢትዮጵያ የመከላከያ አቅምን በዓለም አቀፍ ደረጃ ከመገንባት ባሻገር፣ ሁለቱ አገሮች በጋራ ያመረቷቸውን የጦር መሣሪያዎች ለሌላ ሦስተኛ አገርም ለመሸጥ የሚያስችላቸው ነው ተብሏል፡፡

    ሁለቱ አገሮች በመከላከያ ኢንዱስትሪ ዘርፍ ለመተባበር ስምምነት የተፈራረሙበት በሚያዝያ ወር 1998 ዓ.ም. ቢሆንም፣ ስምምነቱ ወደ ተግባር መቀየር ባለመቻሉ ይህንኑ ስምምነት ለማጠናከርና ወደ ሥራ ለመግባት በግንቦት 2005 ዓ.ም. ተጨማሪ ስምምነት አድርገዋል፡፡

    ሁለቱ አገሮች በውስጥ አሠራራቸው መሠረት ስምምነቱን በአዋጅ ማፅደቅ የሚጠበቅባቸው በመሆኑ፣ ባለፈው ሳምንት በኢትዮጵያ በኩል ስምምነቱ ለሕዝብ ተወካዮች ምክር ቤት ቀርቧል፡፡ የስምምነቱ አንቀጽ አራት የትብብር መስኮችን የሚዘረዝር ነው፡፡ በዚህም መሠረት የመከላከያ ሠራዊት የሚፈልጋቸውን የመከላከያ ዕቃዎች የመለዋወጫዎች ዲዛይን ለማውጣት፣ ለማምረት፣ ለመጠገን፣ ለመለወጥና ለማዘመን የሚያስችሉ የምርምር ሥራዎች ላይ መተባበርን ይመለከታል፡፡

    የመከላከያ ኢንዱስትሪ ዘርፍ ቁሳቁሶችንና አገልግሎቶችን ለማምረትና ለመግዛት ወይም ለመሸጥ፣ የጦር መሣሪያዎችን ለማዘመን የጋራ ትብብር ማድረግ፣ የመከላከያ የጦር መሣሪያዎችን ለመፈብረክ የጋራ ፕሮጀክቶችን በመቅረፅ ለሁለቱም አገሮች ወይም ለአንዱ አገር የሚጠቅሙ ሳይንሳዊ ምርምሮችን ማድረግ የትብብሩ አካል ነው፡፡

    በየአገሮቹ ሕግ መሠረት ከበቂ በላይ የሆኑ የመከላከያ ኢንዱስትሪ ዕቃዎችንና አገልግሎቶችን አንዱ አገር ለሌላው አገር የጋራ ሽያጭ እንዲኖር ማድረግ፣ የሚስጥራዊ መረጃዎች ደኅንነት ስምምነት በማድረግ በዚሁ መሠረት ሳይንሳዊና ቴክኒካዊ መረጃዎችን መለዋወጥም የትብብሩ አንድ አካል ሆኖ በስምምነቱ ውስጥ ተጠቅሷል፡፡  

    በጋራ ትብብር ፕሮጀክቶች የተመረቱ የጦር መሣሪያዎችን በሁለቱ አገሮች ስምምነት ለሌላ ሦስተኛ አገር መሸጥ ሌላው የትብብሩ አካል ነው፡፡ የተዋዋይ ወገኖች መብትና ጥቅም በሰጥቶ መቀበል መርህ መሠረት አንዱ ሌላውን በማክበር ላይ የተመሠረተ መሆን እንዳለበት፣ በዚህ የትብብር ማዕቀፍ መሠረት የተሰጠ፣ የተሸጠ ወይም በልውውጥ መልክ የተገኘን ቁሳቁስ፣ ቴክኒካዊ መረጃና ሰነዶች የአንደኛውን ወገን የጽሑፍ ስምምነት ሳያገኙ ለሌላ ሦስተኛ አገር አሳልፎ መስጠት እንደማይቻል ስምምነቱ ይገልጻል፡፡

    ስምምነቱን ወደ ተግባር ለመለወጥ ከሚረዱ ተግባሮች መካከል አንዱ የጋራ ኮሚቴ ማቋቋም መሆኑን የሚያመለክተው የስምምነቱ ሰነድ፣ ከሁለቱም አገሮች የመከላከያ ሚኒስቴሮች በእኩል በተውጣጡ አባላት ኮሚቴው አንደሚዋቀር ይገልጻል፡፡

    ለሚቋቋመው ኮሚቴ የኢትዮጵያ ልዑክ የሚመራው በኢትዮጵያ ብረታ ብረትና ኢንጂነሪንግ ኮርፖሬሽን ዳይሬክተር ጄነራል መሆኑን፣ በቱርክ በኩል ደግሞ በአገሪቱ መከላከያ ሚኒስቴር የቴክኖሎጂና ትብብር ምክትል ሚኒስትር መሆኑን ስምምነቱ ይገልጻል፡፡

    በጠቅላይ ሚኒስትር ጽሕፈት ቤትና በውጭ ጉዳይ ሚኒስቴር ማኅተም ለሕዝብ ተወካዮች ምክር ቤት የቀረበው ሰነድ፣ የስምምነቱ መፅደቅ ብቃት ያለው የመከላከያ አቅምን ለመገንባት ከተያዘው ጥረት ጋር አብሮ የሚሄድ በአገር ውስጥ ከሚደረገው ጥረት ባሻገር፣ ስትራቴጂካዊ አጋር ከሆኑ አገሮች ጋር በሚፈጠር ትብብር የበለጠ የመከላከያን አቅም የማጎልበትና የማዘመን ፋይዳ እንደሚኖረው ይገልጻል፡፡

    ፓርላማው ስምምነቱን በዝርዝር ተመልክቶ የውሳኔ ሐሳብ እንዲያቀርብለት ለመከላከያና የውጭ ደኅንነት ጉዳዮች ቋሚ ኮሚቴ መርቶታል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች