Sunday, January 29, 2023
- ማስታወቂያ -
- ማስታወቂያ -

ብሔራዊ ባንክ ከ50 ግራም ጀምሮ ወርቅ እንዲገዛ ተወሰነ

- ማስታወቂያ -

ተዛማጅ ፅሁፎች

የወርቅ ኮንትሮባንድ ንግድን ለማስቀረትና አምራቾችን ተጠቃሚ ለማድረግ፣ ብሔራዊ ባንክ ከ50 ግራም ወርቅ አንስቶ ግዥ እንዲፈጽም መንግሥት ወሰነ፡፡

ከዚህ በተጨማሪም የሚቀርብለትን ወርቅ በአንድ ወር ውስጥ ከፍተኛ በሆነው የዓለም የወርቅ ዋጋ እንዲገዛ መወሰኑን የማዕድን፣ ነዳጅና የተፈጥሮ ጋዝ ሚኒስትሩ አቶ ሞቱማ መቃሳ ለሪፖርተር ገልጸዋል፡፡

የአገር ውስጥ አነስተኛ ወርቅ አምራቾች ያመረቱትን ወርቅ ለብሔራዊ ባንክ የመሸጥ ግዴታ በሕግ የተጣለባቸው ቢሆንም፣ ብሔራዊ ባንክ ከ150 ግራም በላይ ሲቀርብለት ብቻ ግዥ የሚፈጽም የነበረ መሆኑ የወርቅ ኮንትሮባንድ ንግድ በከፍተኛ ደረጃ እንዲስፋፋ ምክንያት መሆኑን ሚኒስትሩ አስረድተዋል፡፡

ከዚህ በተጨማሪም በባህላዊ መንገድ የሚያመርቱ ወጣቶች 150 ግራም እስኪሞላላቸው ገቢ ሳያገኙ መጠበቅ ስላላስቻለው በእነሱ ልፋት ለሚያተርፉ ለመሸጥ መገደዳቸውን፣ እነዚህ ነጋዴዎች ደግሞ በቁጥ ቁጥ የገዙትን ወርቅ አጠራቅመው በሕገወጥ መንገድ ከአገር እንደሚያስወጡት አቶ ሞቱማ አስረድተዋል፡፡

ይህንን የኮንትሮባንድ ሰንሰለት ለመበጠስና አምራቾቹ በቀጥታ ተጠቃሚ ይሆኑ ዘንድ፣ ብሔራዊ ባንክ ከ50 ግራም አንስቶ የሚቀርብለትን ወርቅ እንዲገዛ መወሰኑንና ከኅዳር ወር ጀምሮ ተግባራዊ እንደሚደረግ ገልጸዋል፡፡

በተጨማሪም ብሔራዊ ባንክ የሚቀርብለትን ወርቅ ከዓለም አቀፍ ዋጋው አምስት በመቶ ጨምሮ መግዛቱ እንደተጠበቀ ሆኖ፣ አቅራቢዎች ወርቃቸውን ለብሔራዊ ባንክ ባቀረቡበት ዕለት ባለው ዓለም አቀፍ የወርቅ ዋጋ ይፈጸም የነበረውን ግዥ በማስቀረት፣ ወርቁ ለብሔራዊ ባንክ በቀረበ በአንድ ወር ጊዜ ውስጥ በሚኖረው ከፍተኛ የወርቅ ዋጋ እንዲገዛ መወሰኑ ትልቅ ዕርምጃ መሆኑንም ገልጸዋል፡፡ ይህንን አሠራር ብሔራዊ ባንክ ቀደም ብሎ ይጠቀምበት የነበረ ቢሆንም፣ ከ2004 ዓ.ም. አንስቶ ግን በዕለታዊ የዓለም የወርቅ ዋጋ ሲገዛ እንደነበር አስታውሰዋል፡፡

በጉዳዩ ላይ ሪፖርተር ያነጋገራቸው የብሔራዊ ባንክ ገዥ አቶ ተክለ ወልድ አጥናፉ፣ በአዲሱ አሠራር መሠረት ግዥ ለመፈጸም ባንኩ ዝግጅቱን እያጠናቀቀ መሆኑን አረጋግጠዋል፡፡

መንግሥት ይህንን ትልቅ ውሳኔ ያሳለፈው ወርቅን በመጠቀም የአገሪቱ የውጭ ምንዛሪ ክምችት እንዲጨምር ብቻ ሳይሆን፣ በአነስተኛ የወርቅ ማምረት መስክ ወጣቶች እንዲሰማሩና ሥራ መፍጠሪያ ካፒታል እንዲያገኙ ለማመቻቸት መሆኑን አስረድተዋል፡፡

የአገሪቱ የውጭ ምንዛሪ ክምችት መጠን ብሔራዊ ባንክ የሚገዛውን የወርቅ ክምችትም እንደሚያካትት የተናገሩት የባንኩ ገዥ፣ መንግሥት ባሳለፈው ውሳኔ የኮንትሮባንድ ሰንሰለትን መበጠስና በወርቅ ማምረት የሚሰማሩ ወጣቶችን ዋነኛ ተጠቃሚ ሲያደርግ የብሔራዊ ባንክን ኪሳራ እንደሚያንረው ግን አልሸሸጉም፡፡

በባህላዊ መንገድ ተመርቶ የሚቀርብለትን ወርቅ ከዓለም አቀፍ ዋጋው አምስት በመቶ ብልጫ ገዝቶና የተገዛውን ወርቅ ወደ ውጭ ልኮ ማስነጠር፣ በዓመት ከ80 እስከ 100 ሚሊዮን ብር ብሔራዊ ባንክ እንደሚያከስር ተናግረዋል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች