Sunday, January 29, 2023
- Advertisement -
- Advertisement -
ዜናኢትዮጵያ ከግብፅና ከሱዳን ጋር የህዳሴ ግድብን በተመለከተ የፖለቲካ ስምምነት ልትፈራረም ነው

ኢትዮጵያ ከግብፅና ከሱዳን ጋር የህዳሴ ግድብን በተመለከተ የፖለቲካ ስምምነት ልትፈራረም ነው

ቀን:

ኢትዮጵያ ከግብፅና ከሱዳን ጋር በታላቁ የህዳሴ ግድብና በዓባይ ወንዝ አጠቃቀም ላይ የፖለቲካ ስምምነት ልትፈራረም ነው፡፡

የሱዳኑ የውጭ ጉዳይ ሚኒስትር ዓሊ ካርቲ ሰሞኑን በሰጡት ጋዜጣዊ መግለጫ፣ የሦስቱ አገሮች መሪዎች በተገኙበት በመጪው ሰኞ በካርቱም የዓባይ ወንዝ አጠቃቀምና የታላቁ የኢትዮጵያ ህዳሴ ግድብን በተመለከተ የፖለቲካ ስምምነት እንደሚፈራረሙ አስታውቀዋል፡፡

ስምምነቱን የሚፈራረሙት የሦስቱ አገሮች የውጭ ጉዳይ ሚኒስትሮች ሲሆኑ፣ የሦስቱ አገሮች መሪዎች በስምምነት ሥነ ሥርዓቱ ላይ እንደሚገኙ፣ ሌሎች የዓባይ ተፋሰስ አገሮች መሪዎችም በእማኝነት በስምምነት ሥነ ሥርዓቱ ላይ እንደሚገኙ ሱዳን ትሪቡን ዘግቧል፡፡

የሱዳን የውጭ ጉዳይ ሚኒስትር ስምምነቱ በዓባይ ተፋሰስ ፖለቲካ ውስጥ ታሪካዊ ይሆናል ቢሉም፣ የስምምነቱን ይዘት ግን ከመናገር ተቆጥበዋል፡፡ ይህንን በተመለከተ ማብራሪያ እንዲሰጡ የተጠየቁት የኢትዮጵያ መንግሥት ከፍተኛ ባለሥልጣናትም ዝርዝር ጉዳዩን ከመግለጽ እንዲሁ ተቆጥበዋል፡፡

ይሁን እንጂ ከዚህ ቀደም የግብፅ የውጭ ጉዳይ ሚኒስትር ሳሜህ ሽኩር፣ ኢትዮጵያ በዓባይ ወንዝ ላይ መገንባት የጀመረችው የኃይል ማመንጫ ግድብ በግብፅ የውኃ ድርሻ ላይ ጉልህ ጉዳት እንደማያደርስ በቃል በተደጋጋሚ የምትገልጸውን በሰነድ እንድታረጋግጥ በመጠየቃቸው ምክንያት የሚደረግ ስምምነት መሆኑን ምንጮች ለሪፖርተር ገልጸዋል፡፡ ከዚህ ቀደም የግብፅ የውጭ ጉዳይ ሚኒስትር ሰነዱ በተባበሩት መንግሥታት ድርጅት ጭምር ዕውቅና የሚኖረው እንዲሆን ጠይቀዋል፡፡ ነገር ግን ኢትዮጵያ ጥያቄውን ውድቅ እንዳደረገች፣ ምክንያቱ ደግሞ የተፈጥሮ ሀብቷን የማልማት ሉዓላዊ መብት ስላላት መሆኑን ገልጸዋል፡፡

ይሁን እንጂ የዓባይ ተፋሰስ አገሮች ብቻ በሚሳተፉበት ሁኔታ በኢትዮጵያ፣ በግብፅና በሱዳን መካከል ፖለቲካዊ ማዕቀፍ ለመፍጠር ኢትዮጵያ በወቅቱ ፖለቲካዊ ፍላጐቷን አሳይታለች፡፡ በመሆኑም በኢትዮጵያ የውጭ ጉዳይ ሚኒስቴር አማካይነት ሰነዱ ተዘጋጅቶ ከሳምንት በፊት በሦስቱም አገሮች የውጭ ጉዳይ ሚኒስትሮች ውይይት እንደተካሄደበት ምንጮች ገልጸዋል፡፡

በመሆኑም ሰነዱ በአጠቃላይ ኢትዮጵያ በታችኛው የተፋሰስ አገሮች የውኃ ድርሻ ላይ ጉልህ ጉዳት እንደማታደርስ፣ እንዲሁም የታችኛው ተፋሰስ አገሮች የህዳሴው ግድብ በተመለከተ ያላቸውንም ማንኛውም ጥያቄ ከኢትዮጵያ ጋር በሚደረግ ውይይት እንዲፈቱ ኃላፊነትን የሚጥልባቸው መሆኑን፣ በተጨማሪም ተፋሰሱ የጋራ ሀብት መሆኑን የሚያረጋግጥ ፖለቲካዊ ሰነድ መሆኑን ጠቁመዋል፡፡

በህዳሴው ግድብ ላይ የተሰጡ ሁለት ምክረ ሐሳቦችን ተግባራዊ ለማድረግ የተቋቋመው የሦስቱ አገሮች ቴክኒክ ኮሚቴም ሁለቱን ጉዳዮች ለማካሄድ ፍላጐት ካሳዩ አራት ዓለም አቀፍ ተቋማት መካከል የተሻለውን በስምምነት ለመምረጥ፣ በካርቱም ከሳምንት በፊት ተሰብስበው የነበረ ቢሆንም ኩባንያዎቹ ከዚህ ቀደም የሠሯቸውን ሥራዎች ሱዳን እንድታጣራ በመወሰኑ ኩባንያ የመምረጥ ሒደቱ ላልተወሰነ ጊዜ መራዘሙን ለመረዳት ተችሏል፡፡

 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የገጠር መሬት ማሻሻያና የመሬት ባለቤትነት ጥያቄ በኢትዮጵያ

በኢትዮጵያ ከቅርብ ወራት ወዲህ መሬትን በተመለከተ ጠንከር ያሉ የለውጥ...

በፖለቲከኞች እጅ ያለው ቁልፍ

ኢትዮጵያ በተለይ ካለፉት አምስት ዓመታት ወዲህ ሰላሟ መረጋጋት አቅቶታል፡፡...

የኤክሳይስ ታክስ ረቂቅ አዋጅ ፓርላማው ያፀደቀውን አዋጅ የሚጥሱ ድንጋጌዎችን በማካተቱ እንዳይፀድቅ ተጠየቀ

ሰሞኑን ለሕዝብ ተወካዮች ምክር ቤት የቀረበው የኤክሳይስ ታክስ ማሻሻያ...

በፀጥታ ችግር ሳቢያ ከተለያዩ አካባቢዎች ተፈናቅለው አማራ ክልል የገቡ ዜጎች ቁጥር 800 ሺሕ መድረሱ ተነገረ

በቤኒሻንጉል ጉሙዝ ክልል 112 ሺሕ ተማሪዎች ከትምህርት ገበታ ውጪ...