Thursday, July 25, 2024
- ማስታወቂያ -
- ማስታወቂያ -

የመንግሥትና የግሉ ዘርፍ የምክክር መድረክ ዕውቅና አገኘ

ተዛማጅ ፅሁፎች

በዓለም አቀፍ ደረጃ የመንግሥትና የግሉ ዘርፍ የምክክር መድረኮችን የሚደግፈውና በየዓመቱም ክንውኖቻቸውን የሚገመግመው ዓለም አቀፉ የግልና የመንግሥት ምክክር መድረክ ኮሚቴ የኢትዮጵያ የመንግሥትና የግሉ ዘርፍ የምክክር መድረክን ሸለመ፡፡

በዓለም ባንክ ድጋፍ በየዓመቱ የሚካሄደው ዓለም አቀፉ የግልና የመንግሥት የምክክር መድረክ የኢትዮጵያን የምክክር መድረክ ተሸላሚ ያደረገው ለረዥም ጊዜ ዘላቂ የሆነ የምክክር መድረክ በማካሄድ (Long Standing Achievement) በሚል የሽልማት ዘርፍ ነው፡፡

ባለፈው ሳምንት በዴንማርክ ኮፕንሃገን በተካሄደው በስምንተኛው ዓለም አቀፍ የምክክር መድረክ ኮንፈረንስ ላይ የመንግሥትና የግሉ ዘርፍ የጋራ የምክክር መድረክ ካላቸው አገሮች መካከል እንደ ምሳሌ የሚታይ ተግባራት በመፈጸም ከኢትዮጵያ ሌላ ሁለት አገሮች ተሸላሚ ሆነዋል፡፡

ከ54 አገሮች በላይ ተሳታፊ በሆኑበት የኮፕንሃገኑ ኮንፈረንስ ከኢትዮጵያ ሌላ በተለያዩ መስፈርቶች ተሸላሚ የሆኑት የቱኒዚያና የፍልስጤም የግሉና የመንግሥት መድረኮች እንደሆኑ የኢትዮጵያ ንግድና ዘርፍ ማኅበራት ምክር ቤት ፕሬዚዳንት አቶ ሰለሞን አፈወርቅ ለሪፖርተር ገልጸዋል፡፡

የኢትዮጵያ የመንግሥትና የግል ዘርፉ የምክክር መድረክ ጽሕፈት ቤት ከተቋቋመ ሦስተኛ ዓመት የያዘ ቢሆንም፣ ጽሕፈት ቤቱ ከመቋቋሙ ቀደም ብሎም የተለያዩ አጀንዳዎችን በመቅረፅ ከመንግሥት ጋር ሲመክር የነበረና ሳያቋርጥ የምክክር መድረኩ እንዲቀጥል በማስቻሉ ዕውቅና ሊሰጠው እንደቻለ ተገልጿል፡፡

በዓመት አንድ ጊዜ ከጠቅላይ ሚኒስትሩ ጋር ከዚያም ለውይይት ከተቀረፁ አጀንዳዎች ጋር ግንኙነት ካላቸው የመንግሥት ተቋማት ኃላፊዎች ጋር እየተካሄደ ያለው የምክክር መድረክ እንደምሳሌ ተወስዶ ሊሸለም የቻለባቸው የተለያዩ መስፈርቶች እንደነበሩም ታውቋል፡፡

በምክክር መድረኩ ጽሕፈት ቤት ለምክክር የሚቀርቡ አጀንዳዎች የሚዘጋጁት ወቅታዊ የንግድ ኅብረተሰቡ ችግሮች ናቸው የተባሉትን ጉዳዮች በመያዝና ተከሰተ ለተባለው ችግር መፍትሔ ጭምር በማቅረብ የተደረጉት ውይይቶች ውጤት የታየበት መሆኑ ለሽልማት መብቃቱ እንደትልቅ ውጤት ይታያልም ተብሏል፡፡

ኢትዮጵያ ለሽልማት የበቃችበት ዘርፍ ለረዥም ጊዜ ውጤታማና ዘላቂ የምክክር ባህልን በማዳበር ከሌሎች አገሮች የተሻለ ውጤት በማስመዝገቧ እንደሆነ የሚጠቅሱት አቶ ሰለሞን፣ ዕውቅናው ለመንግሥትም ሆነ ለግሉ ዘርፍ የጋራ ድል ነው ብለውታል፡፡

የሽልማት ኮሚቴው ኢትዮጵያ ተሸላሚ የሆነችበትን ዘርፍ በጥልቅ የገመገመ ሲሆን፣ ውጤት አስገኝተዋል ከተባሉ ነጥቦች ውስጥ የውይይት መድረኩ በርካታ ጉዳዮችን መዳሰሱ አንዱ ስለመሆኑ የኢትዮጵያ የመንግሥትና የግሉ ዘርፍ የምክክር መድረክ ጽሕፈት ቤት ሥራ አስኪያጅ አቶ ኢዮብ ተካልኝ ተናግረዋል፡፡

በተለይም በኢትዮጵያ በመንግሥትና በግሉ ዘርፍ ሊመከርባቸው ይገባሉ የተባሉ አጀንዳዎችን የያዘው የቢዝነስ አጀንዳ ተቀርጾ ሥራ ላይ እንዲውል መደረጉም፣ ኢትዮጵያ አሸናፊ በሆነችበት ዘርፍ ከሌሎች የተሻለ ውጤት እንድታገኝ ካስቻሉ ምክንያቶች አንዱ ስለመሆኑም አቶ ኢዮብ ገልጸዋል፡፡

የረዥም ጊዜ አገልግሎት፣ በአስቸጋሪ ወቅት ሥራዎችን በመሥራትና አዲስ አሠራርን በመተግበር በሚሉ ሦስት የሽልማት ዘርፎች ተከፋፍሎ የተደረገው ግምገማ ሦስቱን አገሮች አሸናፊ አድርጓል፡፡ ቱኒዚያ አዳዲስ የምክክር መድረኮችን በማካሄድና አዳዲስ አሠራሮችን በማፍለቅ ተሸላሚ ስትሆን፣ ፍልስጤም ደግሞ አስቸጋሪ ሁኔታዎችን በመቋቋም መድረኩን በማስቀጠልዋ ለሽልማት በቅታለች፡፡ እንደ ንግድ ምክር ቤቱ መረጃ በሦስቱም ዘርፎች ከየዘርፉ ለሽልማት የታጩትን አገሮች በመገምገም ተሸላሚዎቹን የመረጠው ደግሞ የዓለም ባንክ፣ የዴንማርክ ኢንዱስትሪ ፌዴሬሽን፣ የዴንማርክ የውጭ ጉዳይ ሚኒስቴር፣ የዓለም አቀፍ የግል ዘርፍ ኢንተርፕራይዝ ተቋማትና ገለልተኛ የመንግሥትና የግሉ ዘርፍ ኤክስፐርቶች የያዘው ቡድን ነው፡፡

የኢትዮጵያ የመንግሥትና የግሉ ዘርፍ የምክክር መድረክ በተለይ ካለፉት ሦስት ዓመታት ወዲህ 15 በሚሆኑ አጀንዳዎች ላይ ውይይት አድርጓል፡፡ በሁሉም ጉዳዮች ላይ መፍትሔ ተገኝቷል ባይባልም፣ በአብዛኛው ውጤት የተገኘበት ስለመሆኑም የምክክር መድረኩ ጽሕፈት ቤት ይገልጻል፡፡ በየውይይት መድረኩ የቀረቡ ጉዳዮች ላይ እንደ መፍትሔ የቀረቡትን ሐሳቦች በትክክል ሥራ ላይ ስለማዋላቸው ኮሚቴ በማዋቀር በመሠራቱ፣ ብዙዎቹ አዎንታዊ ውጤት ማምጣታቸውንም ይገልጻሉ፡፡ ሆኖም አንዳንዶቹ አጀንዳዎች ግን እስካሁንም መፍትሔ ያለመገኘታቸው ይታወቃል፡፡

በጥቅል ሲታይ ግን የምክክር መድረኩ የሚፈለገውን ዓላማ እያሳካና ሳይቋረጥ በተከታታይ እየተካሄደ እንደሆነ ለውይይት ከቀረቡ አብዛኛዎቹ ችግሮች መፍትሔ እንዲያገኙ ያስቻለ ነው ይላሉ፡፡ አቶ ኢዮብም በዚህ ሐሳብ የሚስማሙ ሲሆን፣ ይህ ማለት ግን የመጨረሻው ምዕራፍ ላይ ተደርሷል ማለት አይደለም ይላሉ፡፡

በዓለም አቀፉ ደረጃ የተገኘው ዕውቅና ለእኛ ብዙ ትርጉም አለው ያሉት አቶ ሰለሞን፣ በተለይ የምንሠራው ሥራ በዓለም አቀፍ ደረጃ ዕውቅና ማግኘታቸው ቀጣይ ሥራዎችን ያጠናክራል ይላሉ፡፡

‹‹በንግድ ኅብረተሰቡ ውስጥ ያለውን ችግር በጋራ የመፍትታት አቅም፤ እንዲሁም ችግሮችን አቅርቦ በችግሮቹ ላይ ለመወያየትና ለመፍታት የሚችል የመንግሥት አካል መኖሩንና በሁለቱ ወገኖች መካከል መተማመን ያለ መሆኑን ያሳየንበትም ነው፤›› በማለት የገለጹት አቶ ሰለሞን፣ የእስካሁኑ አካሄድ እንደተጠበቀ ሆኖ ወደፊት የምክክር መድረኩ ይዘት የተለያዩ አቅጣጫዎችን እንዲያይ ያደርጋል የሚል እምነት አላቸው፡፡ ይህንን አባባላቸውን በምሳሌ ሲያስረዱም፣ በእስካሁኑ አካሄድ ለምክክር መድረኩ የሚቀርቡትን አጀንዳዎች ቀርጾ በጉዳዩ ላይ ጥናት በማድረግ ያሉ ችግሮችንና የመፍትሔ ሐሳቦቹ የሚቀርቡት ከንግድ ኅብረተሰቡ ነው፡፡

ከዚህ ጎን ለጎን ግን መንግሥትም በንግድ ኅብረተሰቡ ላይ አሉ የሚላቸውን ችግሮች በመያዝ ንግድ ኅብረተሰቡ መፍትሔ እንዲያበጅ ማድረግ የሚችልበት መንገድ ሊኖር የሚችል መሆኑን ነው፡፡

የምክክር መድረኩ ጽሕፈት ቤት ሥራ ከጀመረ ወዲህ አሥራ አምስት በሚሆኑ ጉዳዮች ላይ ውይይት ተደርጓል፡፡ ውይይት ከተደረጉላቸው አጀንዳዎች መካከል በንግድ ምዝገባና ፈቃድ አሰጣጥ፣ የአምራች ዘርፍ ችግሮች፣ የአዕምሯዊ ንብረት፣ ቱሪዝም፣ የገቢ ግብር አፈጻጸም ችግሮች ይገኙበታል፡፡

ምክክር ከተደረገባቸው አጀንዳዎች ውስጥ በተጨባጭ መፍትሔ ተገኝቶባቸዋል ተብለው ከሚጠቀሱት ውስጥ ደግሞ በንግድ ምዝገባ ላይ የነበሩ ችግሮች መፈታታቸው ይጠቀሳል፡፡ ከዚህም ሌላ በንብረት አስተዳደርና ግዢ ላይ እንደችግር ቀርብው የነበሩ ጉዳዮችም መፍትሔ አግኝተዋል ያሉት አቶ ሰለሞን፣ በመንግሥት ግዢዎች ላይ አገር በቀል ኩባንያዎች የተሻለ እንዲያገኙ ማድረግ ስለመቻሉም ጠቅሰዋል፡፡

በአምራች ዘርፎች ዙሪያም የነበሩ ችግሮች በተወሰነ ደረጃ መፈታት እንደተቻለ የተናገሩት አቶ ሰለሞን፣ ያልፈቱ ችግሮችም ካሉ በዓመት አንድ ጊዜ ከጠቅላይ ሚኒስትሩ ጋር በሚደረገው ውይይት ላይ ይህንኑ በማቅረብ ዕድል አለ በማለት ብዙ ችግሮች ተፈተዋል የሚል ነው፡፡

አቶ ሰለሞን የምክክር መድረኩ ውጤት እያስገኘ ነው የሚል እምነት ያላቸው ቢሆንም፣ አንዳንድ መፍትሔ ይሻሉ የተባሉ ጉዳዮች ግን በእንጥልጥል ላይ እንዳሉ እየተገለጸ ነው፡፡

በዚህ ዙሪያ አቶ ሰለሞን የፖሊሲ ጉዳዮች የሚጠይቁ ካልሆኑ በስተቀር ብዙዎቹ ተፈተዋል የሚል እምነት አላቸው፡፡ ይህ በእንዲህ እንዳለ የጋራ የምክክር መድረኩ በቋሚነት እንዲካሄድ በመንግሥትና በንግድ ምክር ቤቱ መካከል ስምምነት ሲደረግ በፌዴራል ደረጃ ከሚካሄደው ምክክር ባሻገር የክልልና የከተማ ንግድና ዘርፍ ማኅበራትም በየደረጃቸው ተመሳሳይ መድረክ ይኖራቸዋል የሚል ነው፡፡

ይሁን እንጂ የምክክር መድረኩ በይበልጥ እየተሠራበት ያለው በፌዴራል ደረጃ በመሆኑ፣ በክልልና በከተማ ደረጃ ይተገበራል የተባለው ምክክር እየተካሄደ ያለመሆኑ ለምን? የሚል ጥያቄ ያስነሳል፡፡

በዚህ ጉዳይ ላይ አስተያየታቸውን የሰጡት አቶ ሰለሞን፣ በክልልና በከተማ ደረጃ ውይይቱ ሊካሄድ ያልቻለበት ዋና ምክንያት የአቅም ጉዳይ ነው ይላሉ፡፡ ይህም ሆኖ ግን አንዳንድ የክልል ንግድ ምክር ቤቶች ከክልሉ መንግሥት ጋር የምክክር መድረኩ ለማዘጋጀት መሞከራቸውን ጠቅሰዋል፡፡ ነገር ግን በሚፈለገው ደረጃ እየተካሄደ አለመሆኑን ግን ይስማሙበታል፡፡ አቅም ከተገኘ መካሄዱ አይቀርም ብለው፣ እንዲህ ዓይነቱ የምክክር መድረክ ለመንግሥትም ጭምር ጠቃሚ በመሆኑ መንግሥት ራሱ ሊደግፈውና ፋይናንስ ሊያደርገው የሚችልበት መንገድ ቢኖር የሚል ሐሳብ አላቸው፡፡

መድረኩ አገራዊ የችግር መፍቻ ቁልፍ በመሆኑ በትብብር በመሥራት መድረኩን ወደታች ድረስ ሊያወርድ ይገባል ይላሉ፡፡ በብሔራዊ ደረጃ የሚደረገውን የምክክር መድረክ በገንዘብ እየደገፈ ያለው በዓለም ባንክ ሥር የሚገኘው ዓለም አቀፉ የፋይናንስ ተቋም (IFC) እንደሆነ ይታወቃል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች