Monday, June 24, 2024
- Advertisement -
- Advertisement -
ስፖርትየታላቁ ሩጫ በኢትዮጵያ ደወል በአክራ

የታላቁ ሩጫ በኢትዮጵያ ደወል በአክራ

ቀን:

   ከአሥራ አራት ዓመታት በፊት በ10,000 ተሳታፊዎች በአዲስ አበባ፣ አዲስ ክስተት ሆኖ የተጀመረው ታላቁ ሩጫ በኢትዮጵያ፣ ዓለም አቀፋዊ ዝናን ለመቀዳጀት የወሰደበት ጊዜ እምብዛም አልነበረም፡፡ መስቀል አደባባይን የመፀው ወራትን በሚገልጸው የአደይ አበባ ቀለም ዓይነት መሮጫ ካናቴራ ለብሶ አደባባዩን ያጥለቀለቀው ሕዝብ ከዚያ በፊት በአደባባዩ ይከሰቱ ከነበረው ሁነት ለየት ያለውን ታላቁ ሩጫ አስተናግዷል፡፡ ከስፖርታዊ ትዕይንትነቱም በላይ የማኅበራዊ፣ ኢኮኖሚያዊና ፖለቲካዊ ስሜቶችን ሲቀሰቅስ ኖሯል፡፡ በከተማይቱ ነዋሪም ተወዳጅነትን አትርፏል፡፡

በኦሊምፒክና በዓለም ሻምፒዮና መድረኮች የአገሪቱን ሰንደቅ ዓላማ ከፍ አድርገው በማውለብለብ ታሪካዊ ጀግንነትን ከሠሩት የምንጊዜም ውድ ልጆች አንዱና አንጋፋው፣ አትሌት ኃይሌ ገብረ ሥላሴ በዓለም ላይ የናኘበትን የረዥምና የማራቶን ሩጫ በአገሩ መዲና ላይ የጎዳና ሩጫ ብሎ ሲጀምር፣ ጉዳዩ የኢትዮጵያውያንን ብቻ ሳይሆን የመላው አፍሪካ ታላቁ የጎዳና ላይ ሩጫ እንደሚሆን ተገምቶ ነበር፡፡ እውንም ሆኖ በዓለም ላይ ሊሮጥባቸው ከሚገቡ 10 ምርጥ የጎዳና ሩጫዎች ተብሎም ተሰይሟል፡፡ ይህ ከአገር አልፎ አፍሪካን ያኮራና የአገሪቱንም መልክ በበጎ ሁኔታ የቀየረው የሩጫ ፌስቲቫል ሌሎችንም የአፍሪካ አገሮች እንደሚስብና የታላቁን ኢትዮጵያዊ አትሌትን እገዛ እንደሚሻ የሚጠበቅ ነበር፡፡

 በቅርቡም በእግር ኳሱ የአፍሪካ ቁንጮ ከሚባሉት ጥቂቶቹ አገሮች አንዷ የሆነችው ጋና በመዲናዋ አክራ የአዲስ አበባውን ዓይነት ታላቁ የጎዳና ሩጫ ለማስጀመር ከታላቁ አትሌትና አዘጋጆቹ ጋር ለጳጉሜን 1 ቀን 2007 ዓ.ም. ቀጠሮ ይዛለች፡፡ አትሌቱም ከምዕራብ አፍሪካዊቷ የወደብ ከተማ አክራ የቀረበለትን ጥሪ ተቀብሎ በከተማዋ ሊደረግ የታሰበውን የ21 እና አምስት ኪሎ ሜትር የጎዳና ሩጫ መሰናዶ መጀመሩን ይናገራል፡፡

የታላቁ ሩጫ በኢትዮጵያ መሥራችና አዘጋጆቹ ባለፈው ሳምንት ወደ ጋና አክራ አምርተው የውድድሩን መጀመር አስመልክቶ በተካሄደው ሥነ ሥርዓት ላይ መገኘታቸውን ኃይሌ ለሪፖርተር ገልጿል፡፡ ‹‹በአገራችን ያካበትነውን የሩጫ ውድድር የማዘጋጀት ልምድ ለተቀረው ዓለም ማካፈል በመቻላችን ኩራት ተሰምቶኛል፤›› ያለው ኃይሌ፣ በማከልም የታላቁ ሩጫ በኢትዮጵያ ዋና ሥራ አስኪያጅ አቶ ኤርሚያስ አየለ ቀደም ብለው ወደ ጋና አክራ በማምራት ለውድድሩ ዝግጅት ስኬት አስፈላጊ ከሆኑ አካላት ጋር ተነጋግረው ውሳኔ ላይ የደረሱ መሆኑንም አመልክቷል፡፡

‹‹ጋናውያኑ በአዲስ አበባ የሚደረገው ዓይነት የጎዳና ላይ ሩጫ በጋና አክራ ለማካሄድ ፍላጎት እንዳላቸው ሐሳቡን ያቀረቡልን ከሁለት ዓመት በፊት ነው፡፡ እንዲህ ያፋጥኑታል የሚል እምነትም አልነበረንም፤›› በማለት ሒደቱን የሚገልጸው ኃይሌ፣ ሩጫውን ስፖንሰር የሚያደርጉ ኩባንያ ድርጅቶች ሳይቀር ከሚጠበቀው በላይ የተሟላ መሆኑን እንደተነገረው ጭምር ያስረዳል፡፡

ጳጉሜን 1 ቀን በአክራ ከተማ የሚካሄደው ይኼው የ21 እና አምስት ኪሎ ሜትር የጎዳና ሩጫ ‹‹ልኬቱ›› በታላቁ ሩጫ በኢትዮጵያ አዘጋጆች አማካይነት መጠናቀቁንና ይህም ሲሆን የአገሪቱ ምክትል ፕሬዚዳንትና የአክራ ከተማ ከንቲባ ከኃይሌና ዝግጅቱን የማስተባበር ሙሉ ኃላፊነት ከወሰደው የታላቁ ሩጫ በኢትዮጵያ ባልደረቦች በጋራ ተነጋግረው መከናወኑን ተናግሯል፡፡

ኃይሌና ታላቁ ሩጫ በኢትዮጵያ ‹‹ሚሌኒየም ማራቶን›› በሚል ስያሜ የሚታወቀውን ውድድር በማዘጋጀታቸው የሚያገኙት ጥቅም ይኖራል ወይ? ለሚለው የሪፖርተር ጥያቄ ኃይሌ፣ እንዲህ መልሷል፡፡ ‹‹ጥቅም ሁለተኛ ነገር ነው፡፡ በመሆኑም ጥልቁ ጥቅም መላው ኢትዮጵያውያን ምን ያህል አቅም እንዳለን ማሳየታችን ነው፡፡ እውነቱን ለመናገር ታላቁ ሩጫ በኢትዮጵያ ‹በእጅ የያዙት ወርቅ› ዓይነት እየሆነ ነው እንጂ ለእኔ ትልቅ ክብርና ዝና ካስገኘልኝ ሩጫ ባልተናነሰ ክብር አስገኝቶልኛል፡፡››

በታላላቅ የአውሮፓ አገሮች በበጀትም ሆነ በተሳታፊ ቁጥር ብዛት በእጅጉ የሚልቁ የጎዳና ሩጫዎች ቢኖሩም፣ በኢትዮጵያ እንደሚደረገው ከ30,000 እና 40,000 በላይ ተሳታፊዎችን አንድ ዓይነት የመሮጫ ቲሸርት አልብሶ የሚሮጥበት ብቸኛው የጎዳና ሩጫ፣ ታላቁ ሩጫ በኢትዮጵያ ብቻ ነው የሚለው ኃይሌ፣ ‹‹ይኼ ለእኔም ሆነ ለተቀረው ዓለም በገንዘብ ከሚተመነው በላይ ነው፤›› በማለት ታላቁ ሩጫ በዓለም ላይ እያሳደረ ያለውን ተፅዕኖ ያስረዳል፡፡ ጥቅም የሚለውን በተመለከተ ውድድሩ የመጀመርያ እንደመሆኑ እንዲህ ይሆናል ተብሎ ለመግለጽ ቢያስቸግርም፣ በቀጣዮቹ ዓመታት ግን ታላቁ ሩጫ ወጪውን ችሎ የተሻለ ጥቅም ሊያገኝ እንደሚችል ነው ቅድመ ግምቱን ያስቀመጠው፡፡

በመጨረሻም ኃይሌ ይህ ዓይነቱ መድረክ በአገሪቱ በሁሉም የልማት ሴክተሮች መለመድ እንደሚገባው፣ ኢትዮጵያውያን መፎካከር ካለብን እርስ በርሳችን ሳይሆን ከተቀረው ዓለም ጋር ቢሆን የተሻለች ኢትዮጵያን በአጭር ጊዜ ውስጥ መፍጠር እንደሚቻልም ገልጿል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...