የአማራና የትግራይ ሕዝቦች ውይይት ነገ ይጀመራል

የአማራ ክልልና የትግራይ ክልል የሕዝብ ለሕዝብ ውይይት መድረክ ቅዳሜ ኅዳር 9 ቀን 2010 ዓ.ም. በጎንደር ከተማ ሊካሄድ እንደሆነ የአማራ ክልል የሕዝብ ግንኙነት ኃላፊ አቶ ንጉሡ ጥላሁን በግል ይፋዊ የፌስቡክ ገጻቸው ላይ ገለጹ፡፡

አቶ ንጉሡ “የአማራ ብሔራዊ ክልላዊ መንግሥት ከአጎራባች ክልሎች ጋር የሕዝብ ለሕዝብ መድረክ በመፍጠር በአብሮነትና በአንድነት ላይ ምክክር ለማካሔድ ባቀደው መሠረት በነሐሴ ወር በመቀሌ ተካሂዶ የነበረው የአማራና የትግራይ ክልሎች ሕዝቦች የጋራ መድረክ ቀጣይ ክፍል በታሪካዊቷና የከተሞች እናት በመባል በምትታወቀው ጎንደር ከተማ ይጀመራል፡፡ የምክክር መድረኩ እስከ ኅዳር 10 ቀን 2010 ዓ.ም. የሚቆይ ሲሆን፣ ከትግራይ ብሔራዊ ክልላዊ መንግሥት 500 ያህል የሃይማኖት አባቶች፣ ታዋቂ ግለሰቦች፣ ምሁራን፣ አመራሮችና ልዩ ልዩ የኅብረተሰብ ክፍሎች በምክክር መድረኩ ላይ ለመታደም ወደ ጎንደር በመጓጓዝ ላይ ናቸው፤” በፌስቡክ ገጻቸው ላይ ገልጸዋል፡፡

ከአማራ ክልል ብቻ 800 ተሳታፊዎች የሚገኙበት ይህ መድረክ ከሁለቱም ክልሎች 1300 ያህል ተሳታፊዎች ወደ ጎንደር ከተማ ዛሬ በመግባት ላይ ይገኛሉ፡፡

በነገው ዕለት በሚጀመረው የምክክር መድረክ ላይ “የመወያያ ጽሁፍ ቀርቦ ውይይት ይደረጋል፤” ሲሉ ኃላፊው በፌስቡክ ገጻቸው ላይ ገልጸዋል፡፡

ከሁለት ሳምንታት በፊት በኦሮሚያ ክልል ርዕሰ መስተዳድር አቶ ለማ መገርሳ የተመራው ልዑክ የሕዝብ ለሕዝብ ውይይት ለማርደግ በባህር ዳር ከተማ ተገኝተው እንደነበር የሚታወስ ነው፡፡